“Liphapheleni Igwele LabaFarisi”
UYesu wabalumkisa ngelithi abafundi bakhe: “Liphapheleni igwele labaFarisi, eliluhanahaniso.” (Luka 12:1) Ingxelo engumzekelo yamazwi kaYesu yenza kucace ukuba wayegxeka “imfundiso” yabaFarisi.—Mat. 16:12.
IBhayibhile maxa wambi isebenzisa igama elithi “igwele” njengelifuzisela ukonakala. Ngokungathandabuzekiyo zombini, iimfundiso nesimo sengqondo sabaFarisi zazinempembelelo embi kubaphulaphuli babo. Kwakutheni ukuze iimfundiso zabaFarisi zibe yingozi?
1 AbaFarisi babeqhayisa ngokuba ngamalungisa, yaye babebajongela phantsi abantu abaqhelekileyo.
UYesu wakha wenza umzekelo ngoku kuzenza amalungisa. Wathi: “UmFarisi wema waza waqalisa ukuthandaza ezi zinto kuye ngokwakhe esithi, ‘Owu Thixo, ndiyabulela kuwe kuba ndingekho njengabanye abantu, abaphangi, abangemalungisa, abakrexezi, okanye kwanalo mqokeleli werhafu. Ndizila ukutya kabini ngeveki, ndinikela isishumi kuzo zonke izinto endizizuzayo.’ Ke yena umqokeleli werhafu wayemi mgama engathandi kwanokuphakamisela amehlo akhe ngasezulwini, ezibetha isifuba, esithi, ‘Owu Thixo, yiba nobabalo kum mna moni.’”—Luka 18:11-13.
UYesu wamdumisa umqokeleli werhafu, esithi: “Ndithi kuni, Lo mntu wehla ukuya ekhayeni lakhe engqineke elilungisa ngakumbi kunalowa umntu; kuba wonk’ ubani oziphakamisayo uya kuthotywa, kodwa lowo uzithobayo uya kuphakanyiswa.” (Luka 18:14) Nangona abaqokeleli berhafu bedume ngokunganyaniseki, uYesu wayefuna ukunceda abo baphakathi kwabo ababemphulaphule. Babini ubuncinane abaqokeleli berhafu—uMateyu noZakeyu—ababa ngabalandeli bakhe.
Kuthekani ukuba besicinga ukuba sibhetele kunabanye abantu ngenxa yesiphiwo esisinikwe nguThixo, ilungelo esinalo, okanye ngenxa yokusilela nobuthathaka babanye abantu? Sifanele sikhawuleze sizishenxise ezo ngcinga, kuba iZibhalo zithi: “Uthando luzeka kade umsindo yaye lunobubele. Uthando alunakhwele, alugwagwisi, alukhukhumali, aluziphathi ngokungandilisekanga, alufuni ezalo izilangazelelo, alucaphuki. Alunanzondo. Alubi nemihlali ngentswela-bulungisa, kodwa luvuyisana nenyaniso.”—1 Kor. 13:4-6.
Sifanele sibe nesimo sengqondo esifanayo nesikampostile uPawulos. Emva kokukhankanya ukuba “uKristu Yesu weza ehlabathini ukuze asindise aboni,” uPawulos wongezelela wathi: “Ndingobalaseleyo kubo.”—1 Tim. 1:15.
Imibuzo onokucamngca ngayo:
Ngaba ndiyayiqonda into yokuba ndingumoni yaye usindiso lwam luxhomekeke kububele bukaYehova obungandifanelanga? Okanye ngaba iminyaka emininzi ndikhonza uYehova ngokuthembeka, amalungelo endinawo kwintlangano kaThixo, okanye isiphiwo endinaso ndizijonga njengezinto ezinokundenza ndibajongele phantsi abanye?
2 AbaFarisi babefuna ukubonisa abanye abantu ukuba bangamalungisa. Babefuna udumo nokubizwa ngamagama akhethekileyo.
Kodwa uYesu walumkisa ngelithi: “Yonke imisebenzi abayenzayo bayenza ukuze babonwe ngabantu; kuba bawenza banzi amaqhaga aqulethe izibhalo abawanxiba njengezikhuselo, bayandise imiphetho yezambatho zabo. Bathanda eyona ndawo iphambili kwizidlo zangokuhlwa nezihlalo eziphambili kwizindlu zesikhungu, nemibuliso kwiindawo zemarike nokubizwa ngabantu kuthiwe Rabhi.” (Mat. 23:5-7) Kukho umahluko phakathi kwesimo sabo sengqondo nesikaYesu. Nangona wayenguNyana ofezekileyo kaThixo, wayethobekile. Xa enye indoda yathi kuye “olungileyo,” uYesu wathi: “Kutheni undibiza ngokuthi olungileyo? Akukho bani ulungileyo, ngaphandle komnye, uThixo.” (Marko 10:18) Ngesinye isihlandlo, uYesu wahlamba iinyawo zabafundi bakhe, ngaloo ndlela emisela umzekelo wokuthobeka kubalandeli bakhe.—Yoh. 13:1-15.
UmKristu wokwenyaniso ufanele awakhonze amanye amaKristu. (Gal. 5:13) Abona bantu bafanele benze oko ngabo bafuna ukufanelekela ukuba ngabaveleli ebandleni. Kufanelekile ‘ukuzabalazela isigxina sobuveleli,’ kodwa olu sukelo lufanele lubangelwe kukunqwenela ukunceda abanye. Esi “sigxina” asisosikhundla okanye igunya. Abo bangabaveleli kufuneka ‘bathobeke entliziyweni,’ njengokuba uYesu wayenjalo.—1 Tim. 3:1, 6; Mat. 11:29.
Imibuzo onokucamngca ngayo:
Ngaba ndithanda abantu abaphathiswe iimbopheleleko ebandleni, mhlawumbi ngethemba lokufumana isigxina okanye amalungelo angakumbi? Ngaba ndinikela ingqalelo kakhulu kwiinkalo zenkonzo kaThixo eziza kundenza ndibonwe okanye ndidunyiswe ngabanye abantu? Ngaba ndizabalazela ukubalasela kunabanye abantu?
3 Imiyalelo nezithethe zabaFarisi zenza uMthetho waba luxanduva kubantu abaqhelekileyo.
UMthetho kaMoses wawuchaza indlela amaSirayeli ayefanele amnqule ngayo uYehova. Kodwa ke, awuzange ubuchaze obunye ubuceducedu beenkcukacha ezingenamsebenzi. Ngokomzekelo, uMthetho wawukwalela ukusebenza ngeSabatha, kodwa wawungachazi ngokucacileyo isizathu sokuba kusetyenzwe okanye kungasetyenzwa. (Eks. 20:10) AbaFarisi babefuna ukuvala ezo zikhewu ngemithetho, iinkcukacha namasiko. Ngoxa uYesu wayengayisi so imithetho eyayikhiw’ entloko ngabaFarisi, wawugcina uMthetho kaMoses. (Mat. 5:17, 18; 23:23) Wajonga ngaphaya kwalo Mthetho. UYesu wayesiqonda isizathu sokubekwa koMthetho nemfuneko yokuba nenceba nothando. Wayenengqiqo nakuba abalandeli bakhe babesilela. Ngokomzekelo, nangona wabongoza abapostile bakhe abathathu ukuba bahlale bephaphile yaye belindile ngobusuku bokubanjwa kwakhe, balala ngokuphindaphindiweyo. Sekunjalo, ngovelwano wathi: “Umoya, kambe ke, unentumekelelo, kodwa inyama ibuthathaka.”—Marko 14:34-42.
Imibuzo onokucamngca ngayo:
Ngaba ndibeka imithetho ecinezelayo, engqongqo okanye iimbono zam ndizenza imithetho? Ngaba kusengqiqweni oko ndikulindeleyo kwabanye?
Khawubone umahluko phakathi kweemfundiso zikaYesu nezabaFarisi. Ngaba uyabona apho unokuphucula khona? Ukuba kunjalo, kutheni ungazimiseli ukwenjenjalo?
[Umfanekiso okwiphepha 28]
AbaFarisi babenxiba amaqhaga aqulethe izibhalo.—Mat. 23:2, 5
[Imifanekiso ekwiphepha 29]
Ngokungafaniyo nabaFarisi abanekratshi, abadala abangamaKristu bayabakhonza abanye
[Umfanekiso okwiphepha 30]
Ngaba kusengqiqweni oko ukulindeleyo kwabanye njengoYesu?