Hlaziya Izalamane Zakho Ngamanzi Enyaniso
USOLOMON wathi: “Ngamanzi abandayo emphefumlweni otyhafileyo iindaba ezilungileyo, ezivela ezweni elikude.” (IMizekeliso 25:25) Anjani ukuhlaziya amava kumphefumlo otyhafileyo ukuphulaphula kwingxelo yakho elungileyo engobomi obungunaphakade kwiParadisi ezayo! Ngale ndlela, umlomo wakho uba “lithende lobomi.”—IMizekeliso 10:11; Isaya 52:7.
Amanzi ayawunyakamisa umhlaba aze abangele ukuntshula, ngoxa isikhukula sisenokubangela intlekele. Kwakhona, amanzi akwimo yesiselo esibandayo ayahlaziya, kodwa ngubani obengathanda ukufunyanwa luqhwithela olunekhephu okanye sisichotho? Ekubeni oko kumpompoza emilonyeni yethu kuye kwafaniswa namanzi, sifanele sinikele ingqalelo kwindlela esifundisa ngayo. (1 Timoti 4:16) Ngokukhethekileyo sifanele siziphaphele iindlela ezahlukahlukeneyo la “manzi” anokuba nomphumo ngayo xa sishumayela kwizalamane.
“Ukuseza” Izalamane
Kumaxesha amandulo, uRahabhi wayivula indlela yokusindiswa kwentsapho yakhe, ibe uKorneli wanikela ubungqina kwizalamane zakhe. (Yoshuwa 2:13; 6:23; IZenzo 10:24, 30-33) Umntakwabo Petros uAndreya wamnceda ukuba abe ngumfundi kaYesu. (Yohane 1:40-42) The namhlanje amaNgqina kaYehova amaninzi avumela inyaniso yeBhayibhile impompozele kwizalamane zawo. IMizekeliso 11:25 ithembisa isithi: “Oseza ahluthise abanye, uyasezwa ahluthe naye.”
Ibhinqa laseYurophu lanqwenela ukwabelana ngokholo lwalo olutsha nabazali balo, abantakwalo, noodade balo ababehlala kwiiPhilippines. Libika lisithi: “Ndakwenza oku kwincwadi nganye endandibabhalela yona. Ngaphambi kokuba ndibhaptizwe, kwakhona ndabathumelela iincwadi ndaza ndababuza enoba bebengathanda na ukutyelelwa ngamaNgqina kaYehova.” Okwalivuyisa kakhulu kukuba, bavuma ukuba mabatyelelwe, ibe ngoku abasibhozo kubo banqula uYehova. Wambi amaNgqina aye abona imiphumo elungileyo ngokuthumelela izalamane zawo isipho somrhumo weMboniselo noVukani!
Kodwa kuthekani ukuba amalungu entsapho akabonisi mdla? UYesu wayejamelene nale meko, kuba ngaxa lithile “nabazalwana bakhe babengakholwa kuye.” Noko ke, kamva, “ngamxhelo mnye” bazingisa emthandazweni, bekunye nabapostile. (Yohane 7:5; IZenzo 1:14) Yintoni eyabangela ukuba iintliziyo zabo ziguquke? Ngokucacileyo uYesu wazinceda izalamane zakhe ngaphambi kokuba anyukele ezulwini. Wakwenza njani oko? Wabanceda ukuba babe nokholo ngokuthi abonakale kuYakobi owayengumntakwabo ngonina. (1 Korinte 15:7) Ngaloo ndlela, musa ukukuyeka ukuzama ukuzinceda izalamane zakho. AmaNgqina amaninzi aye akwazi ukuncokola nezalamane zawo ezingakholwayo ngenyaniso yeBhayibhile emva kokuba aye athi ngomonde alindela ixesha elifanelekileyo.
Noko ke, “ukuseza” izalamane akuthethi ukuzihlaba ngamazwi. Isibini saseYugoslavia siphawula oku: “Kusoloko kukho ingozi yokubashumayeza kakhulu.” Umveleli ohambahambayo uthi: “Ngokufuthi abazalwana bayazibaxa izinto, bebonakalisa inzondelelo engafanelekanga.” ULudwig ukhumbula ixesha laxa waqalisa ukufundisisa iBhayibhile: “Ndandula ke ndamshumayeza umama kangangeeyure eziliqela ndimchazela phantse ngako konke endikufunde eBhayibhileni, ibe ngokufuthi oku kwakukhokelela ekuxambulisaneni, ingakumbi kunye notata.”
Yiba “Ngumthombo Wobulumko”
Sifunda ukuba “ulwimi lwezilumko lulungisa ukwazi; umlomo wezinyabi umpompoza ukumatha,” nokuba “intliziyo yelungisa iyakucamanga ukuphendula.” (IMizekeliso 15:2, 28) Ngaloo ndlela, kufuneka ukuba sibe ngabakhulileyo ngokwengqondo, ngokobulumko nangengqiqo ukuze amazwi ethu siwenze abe nesongo esihlaziyayo nesakhayo. Ukuba sithetha nini, sithetha ntoni, ibe siyithetha ngayiphi indlela kubalulekile.
Ngokomzekelo, ngemini eshushu, hayi indlela ehlaziya ngayo indebe yamanzi abandayo kumntu onxaniweyo! (Mateyu 10:42) Kodwa akukho nomnye obenokuze ayiphuphe into yokuba agalele iemele yamanzi izele phezu kwentloko yakhe! Umveleli wesiphaluka ekucatshulwe amazwi akhe ngasentla ugqabaza esithi: “Iziqhamo ezincamisileyo zifunyanwa ngabo bathi bavuse umdla kwizalamane zabo ngokunikela ubungqina obungokwamabakala.” Xa isalamane esichasileyo sifunyanwa lunxano, ngokungathi kunjalo, size siqalise ukubuza imibuzo, kudla ngokulandela ingxubusho yeBhayibhile eneziqhamo.
UHuriye, iNgqina laseTurkey, wakufikelela oku ekhayeni lakhe ngokuthi ashiye iimpapasho zeBhayibhile zivuliwe kumbandela owawunokuvusa umdla kwindoda yakhe engakholwayo. Abantwana wayebafundela amabali eBhayibhile, aze—ukuba yayiphulaphule—anikele inkcazelo eyayiyingenelo kuyo. Maxa wambi wayeyibuza nje athi: “Ndiye ndafunda oku nokuya kufundisiso lwam namhlanje. Ucinga ntoni ngako oku?” Kwakhona uphawula imigaqo yokuziphatha awayesoloko eyigcinile engqondweni eyile: “Yiba ngozolileyo yaye musa ukucaphuka okanye ukhubeke. Musa ukuba ngowazi konke. Kuphela nje yiba ngolulamileyo uze uhlale uthobekile.” Indoda yakhe ekugqibeleni yayamkela inyaniso yoBukumkani ibe ngoku ikhonza njengomlungiseleli wexesha elizeleyo.
UMarijan wanceda izalamane zakhe ezahlukahlukeneyo ukuze ziyamkele inkolo yakhe. Ucebisa esithi: “Musa ukuzinyanzela izinto kodwa lindela isihlandlo esifanelekileyo. Sifanele sikuhlonele oko xa besicela ukuba singathethi nabo ngenyaniso. Sifanele sibe nomonde size sibonakalise uthando.” Ingakumbi xa izalamane zichasa, iNtshumayeli 3:7 iyefanelekileyo. Ithi: “Ukuthi cwaka kunexesha lako, ukuthetha kunexesha lako.” Oko kubonisa ukuba singabakuvumayo ukuphulaphula ngomonde, ukungaphazamisi, yaye siyazihlonela izimvo zabanye. UPetar, owayekhe wachaswa gqitha kodwa wasiguqula isimo sakhe sengqondo uthi: “Akukho ngqiqo ekubeni ucaphuke xa uncokola nezalamane.”
Vumela Ihambo Elungileyo Ishumayele
Kangangeminyaka emininzi indoda engakholwayo yayitsalisa nzima umfazi wayo ongumKristu, maxa wambi imtshixela ngaphandle kwendlu. Yakhe yanomsindo kangangokuba yayikrazula incwadi awayelibele ukuyifihla. Yintoni eyaguqula isimo sayo sengqondo? Uyachaza: “Ndaqhubeka ndizibuza isizathu sokuba umfazi wam abe nenzondelelo engaka yaye aqhubeke ethembela ngoYehova. Andizange ndibe nakufumana gxeke kuye, ekubeni wayeyigcina indlu icocekile, yaye wayengumfazi olungileyo nomama wabantwana bethu.” Ngenye imini indoda yayifuna umbandela ofanelekileyo eyayiza kuthetha ngawo nabafundi abathile kangangemizuzu emihlanu, ngoko umfazi wayo wayinika iinkupho ezimbini zikaVukani! Yazifunda imanqumnqezi, kodwa yamangaliswa kukufumana umbandela osebenzisekayo owawuthetha ngokwenziwa kweepensile. Ngale ndlela umdla wayo kula maphephancwadi wavuseleleka. Namhlanje, le ntsapho imanyene ekunquleni uYehova.
Isiluleko sompostile uPetros sokuba umfazi unokuyizuza indoda engakholwayo ‘lingekho ilizwi ibonela ihambo yakhe enyulu, enoloyiko’ sisebenza kwanakwamanye amalungu entsapho. (1 Petros 3:1, 2) Xa isibini esitshatileyo sathi sashiya isithethe saso esidala nesingekho ngokweBhayibhile nonqulo lwabazali baso baseRomania, iintsapho zakwamakwabo zabachasa ngokukrakra. Umfazi wayede ahlaselwe nguninazala, owayezama ukumbulala. UNikolic unikela le ngxelo: “Asizange sikuvumele oku ukuba kusidimaze okanye kusicaphukise. Onke amaxhala ethu sawaphosa kuYehova.” Kwiminyaka elishumi elinanye kamva abazali bakhe, oodade wabo ababini nabayeni boodade wabo baba ngamaNgqina abhaptiziweyo. Yintoni eyabangela le nguqulelo? “Ngumzekelo omhle nendlela yokuziphatha yobuKristu. Ngamanye amazwi, asizange sichithe ixesha elininzi sithetha nabo ngenyaniso. Kunoko, sazama ukuyibonakalisa ngezenzo.”
Musa Ukuphelelwa Lithemba!
Ngoxa kubangela uvuyo olukhulu ukubona izalamane ziqalisa ukunqula uThixo oyinyaniso, kuthekani ukuba bambi bayaqhubeka bechasa? Ufanele usabele njani? UYesu wakubona kwangaphambili ukuba unqulo oluyinyaniso maxa wambi lwaluya kuzisa iiyantlukwano ezigqithiseleyo phakathi kwezalamane. (Mateyu 10:34-37) UMarica walahlwa ngawo onke amalungu entsapho xa wathi waba ngomnye wamaNgqina kaYehova. Ngoxa engazange alalanise elunqulweni lwakhe, sekunjalo wayeqonda ukuba “kwanezalamane zinelungelo kwiimbono nakwiingcamango zazo.” Isimo sakhe sengqondo sabashukumisela ekubeni bamhlonele njengokuba babesenza ngaphambili.
ULudwig wakuqonda ukuba wayebophelelekile ukuba abathande abazali bakhe nkqu nangona babenokukhetha indlela eyahlukileyo yobomi. Ngokuphindaphindiweyo wakhumbula izicatshulwa zeBhayibhile ezinxulumene noku, ezinjengezi: “Beka uyihlo nonyoko”; “ukuthetha kwenu makuhlale kumnandi, kuvakalisiwe ngetyuwa”; “nihlale ke nikulungele ukuziphendulela . . . ninobulali noloyiko”; kwanokuba “umkhonzi weNkosi akamele kulwa.” (Efese 6:2; Kolose 4:6; 1 Petros 3:15; 2 Timoti 2:24) Unikela le ngxelo: “Ngalo lonke ixesha ndandibatsalela umnxeba abazali bam okanye ndibatyelela, ndandithandaza kuYehova ndicela ubulumko, ibe ngokuthe ngcembe ulwalamano lwethu lwaya luba lolukhululekileyo, olunobuhlobo ngakumbi.”
Musa ukuphelelwa lithemba lokuba imbewu yenyaniso ekugqibeleni iya kudubula ezintliziyweni zezalamane zakho. Ibhaptizwe njengomnye wamaNgqina kaYehova kwiminyaka engama-31 emva komfazi wayo, enye indoda igqabaza isithi: “Xa ndicinga emva, ndimele ndivume ukuba umfazi wam wandinyamezela gqitha. Ndandisazi kakuhle ukuba ngokufuthi wayendithandazela kuYehova.”
Ngamana amazwi aphuma emlonyeni wakho ngalo lonke ixesha angaba ngachukumisayo naphelisa unxano njengamanzi ahlaziyayo! Ewe, ‘yabelana ngeendaba ezilungileyo zozuko lukaThixo osikelelekileyo’ nabo bonke abantu, kuquka izalamane zakho. (1 Timoti 1:11; ISityhilelo 22:17) Aya kwandula ke amazwi kaYesu asebenze: “Lowo ukholwayo kum, njengoko satshoyo isibhalo, kuya kumpompoza imilambo yamanzi aphilileyo, iphuma embilinini wakhe.”—Yohane 7:38.