Uxolo Lwehlabathi—Luya Kuthetha Ntoni Ngokwenene?

UXOLO lwehlabathi uThixo acinga ngalo luya kuquka okungaphezulu lee kunezivumelwano zehlabathi zokupheliswa kwemfazwe okanye zokupheliswa kwezixhobo zenyukliya. Oku kuboniswa yindlela iBhayibhile elisebenzisa ngayo igama elithi “uxolo.”

Ngokomzekelo, kwiZibhalo zesiHebhere (“ITestamente Endala”) igama elithetha uxolo lelithi sha·lohmʹ. Umzekelo weli gama usetyenziswe kwiGenesis 37:14, apho usolusapho uYakobi axelela unyana wakhe uYosefu oku: “Khawuye kukhangela ukuphila kwabakhuluwa bakho, nokuphila kwempahla emfutshane; ubuye uze kundixelela.”a Kwakhona igama elithi sha·lohmʹ lisetyenzisiwe kwiGenesis 41:16, apho liguqulelwe ngokuthi “impilo-ntle.”—NW.

Ngoko ke, ngokwengqiqo yeBhayibhile, uxolo lokwenene aluquki nje ukupheliswa kwezinto ezibangela ubutshaba kodwa luquka ukuba sempilweni, ukukhuseleka, nempilo-ntle. Inkupho yethu eyandulelayo ibonise ukuba abantu abanako ukucombulula iingxaki ezingendlela yokuziswa koxolo. NguYesu Kristu kuphela, ‘uMthetheli Woxolo,’ oya kuba nako ukucombulula le ngxaki aze azise uxolo lokwenene emhlabeni. (Isaya 9:6, 7) Ngokomzekelo, qwalasela oko kuprofetwa yiBhayibhile kwiNdumiso 72:7, 8 ngolawulo lwakhe: “Malityatyambe ngemihla yakhe ilungisa, nobuninzi boxolo, ide ingabi sabakho inyanga. Makaphathe ubukhosi ethabathela elwandle ase elwandle, ethabathela kuwo uMlambo ase eziphelweni zehlabathi.” Khawufan’ ucinge—ukuba sempilweni, ukukhuseleka, nempilo-ntle ngomlinganiselo wehlabathi liphela! Akukho sivumelwano sezobupolitika esinokuze sikuphumeze oko. BuBukumkani bukaThixo kuphela, ibe buya kufeza nokungakumbi kunoko. IBhayibhile isithela thsupha ngeziprofeto eziliqela ezichwayitisayo eziya kuzaliseka kwihlabathi elinoxolo elizayo. Makhe siqwalasele ezinye zazo.

Ukupheliswa Kwezixhobo Kulo Lonke Ihlabathi—Indlela KaThixo!

INdumiso 46:8, 9 ithi: “Yizani nikhangele imisebenzi kaYehova: Owenze iziphanziso ehlabathini; ulophelisa iimfazwe kude kuse eziphelweni zehlabathi; waphula isaphetha, angqumze umkhonto, atshise iinqwelo zokulwa ngomlilo.” Igama elithi “isaphetha,” “umkhonto” nelithi ‘inqwelo,’ ayimifuziselo yalo naluphi na uhlobo lwesixhobo semfazwe okanye oomatshini bemfazwe. Ngaloo ndlela uYehova wenza okungaphaya kokunciphisa izixhobo okanye ukubekwa kwazo phantsi okupheleleyo. Ngokucokisekileyo uyaziphelisa izixhobo zenyukliya, iinkanunu, iinqwelo ezinkulu ezinqabisekileyo zemfazwe, imijukujelwa yokudubula iintolo zomlilo, iibhombu eziphoswa ngesandla, iziqhushumbisi zeplastiki, imibhaxa, imipu—nantoni na ebinokusongela uxolo lwehlabathi liphela!

Noko ke, izixhobo zizodwa azibangeli mfazwe. Ngokuqhelekileyo, imfazwe ibangelwa yintiyo, kukubawa, okanye sisimo sabantu abangafezekanga sogonyamelo. (Thelekisa uYakobi 4:1-3.) Ngoko ke, uBukumkani bukaThixo buya kuhlasela lo nobangela wemfazwe usisiseko ngokuthi bushenxise imizila yeempawu ezingendawo zobuntu ebantwini. Buya kukwenza njani oko? Ngokusebenzisa inkqubo yokufundisa ehlabathini lonke. “Ilizwe liya kuzala kukwazi uYehova, njengamanzi egubungele ulwandle.”—Isaya 11:9.

Ngaloo ndlela ekubeni ‘lufundiswe nguYehova,’ uluntu alusayi kuze lubone iiyantlukwano zobuzwe zinjengesizinzi sokungavisisani, intiyo okanye indelelo. (Yohane 6:45) “UThixo akamkhethi wabuso bamntu,” ibe abemi bomhlaba baya kubonakalisa ukungakhethi kwakhe buso. (IZenzo 10:34) Kwakhona uBukumkani buya kushenxisa nayiphi na into enokubangela ukungavisisani kweentlanga ngokushenxisa imida yamazwe. ‘Ukusuka elwandle ukuya elwandle, nokuya eziphelweni zehlabathi,’ bonke baya kuzithoba ngokuvumayo baze babonakalise umbulelo kulawulo lukaKristu.—INdumiso 72:8.

Ukuze uxolo olunjalo luhlale luhleli, kwakhona uBukumkani buya kushenxisa eyona nkalo yahlukanisayo kwimbali yoluntu: unqulo lobuxoki. (Zefaniya 2:11) Uluntu luya kumanyaniswa ekunquleni kwalo okuphela koThixo oyinyaniso. (Isaya 2:2, 3) Kuya kwesamela ubuzalwana ehlabathini lonke!

Uxolo Ekhaya

Noko ke, uxolo lwehlabathi beluya kuba naliphi ixabiso ukuba amakhaya ebeyindawo yedabi apho izithuko, amazwi awenzakalisayo nezisongelo bezivakala kuwo ngalo lonke ixesha. Oku kunjalo ngeentsapho ezininzi namhlanje. Ezinye iintsapho ziyazifihla iimvakalelo zentiyo ezinzulu ngokusuka nje zivale ophezulu.

Ngoko ke uxolo lokwenyaniso lumele luquke ukuzola kwasekhaya. Phantsi kwenkqubo yokufundisa yoBukumkani, amadoda nabafazi baya kufundiswa indlela yokuqhubana ngothando nangentlonelo omnye nomnye. (Kolose 3:18, 19) Abantwana baya kufundiswa ‘ukululamela abazali babo ezintweni zonke.’ (Kolose 3:20) Akusayi kubakho bantwana bakwishumi elivisayo banemvukelo abaya kudanisa baze bakhathaze abazali babo. Ukuthobela kuya kuba yinto yesiqhelo, intsebenziswano ibe ngumthetho. Ukondela abantwana kuya kuba yinto eyolisayo kuze kube luvuyo ukuba kunye nabo.

Namhlanje, iingcinezelo ezingokoqoqosho zizandisa kanobomi iingxaki zentsapho, njengoko bobabini abazali ngokufuthi bebophelelekile ukuba basebenze nzima kumsebenzi wokuziphilisa. Kodwa ngaphantsi kolawulo lukaKristu, iintsapho ziya kukhululwa kwingcinezelo engokwemali—irhafu yezindlu ephakamileyo, amaxabiso ezindlu aphakamileyo, iirhafu eziphakamileyo, ukungaqeshwa. Kuya kubakho umsebenzi omninzi owanelisayo nolucelomngeni. Ibe akukho bani ekuya kufuneka angabi nakhaya. Phawula indlela isiprofeto esikuIsaya 65:21-23 esizibalaselisa ngayo ezi nkalo: “Baya kwakha izindlu, bazihlale . . . Abayi kwakha, kuhlale bambi; abayi kutyala, kudle bambi . . . badle into esetyenzwe zizandla zabo abanyulwa bam. Abayi kuzixhamla ngokulambathayo, bazalele ukhwankqiso; ngokuba bayimbewu ayisikeleleyo uYehova, nabaphuma ezibilinini zabo banabo.”

Khawuzithelekelele uphila kwimekobume engenayo imibono, iingxolo, namavumba amabi okonakala kwasezixekweni! Khawuzithelekelele uhlala kwilizwe eliluhlaza—kumhlaba wakho—oye walinywa, wenziwa wamhle waza walungelelaniswa ngendlela efezekileyo. Khawuzithelekelele uphefumla umoya ococeke nohlambuluke ngendlela evuyisayo; usiva, kungekhona ingxolo erhabaxa yempucuko yale mihla, kodwa izandi ezivakala ngokumyoli, zendalo. Kuyinyaniso ukuba, bambi abantu abami kakuhle sele bewunandipha umlinganiselo wezinye zezi zinto. Kodwa kuBukumkani bukaThixo, ukuphila kwiimeko ezinoxolo kuya kunanditshwa ngabo bonke. Akuyi kubakho mahlwempu, balambayo nabahlelelekileyo.—INdumiso 72:13, 14, 16.

Ngokubhekele phaya iBhayibhile ithembisa isithi “banqunyulwe ezweni abangendawo.” (IMizekeliso 2:22) Oko kuthetha ukupheliswa kolwaphulo-mthetho. Ukuba umntwana wakho ongoyena mncinane uyaphuma ukuya kudlala, akuyi kuba yimfuneko ukuxhalatyiswa ngabo baxhaphaza abantwana ngokwesini okanye abaqweqwedisi abahamba ngamathunzi, iinqwelo-mafutha eziqhutywa ngabaqhubi abanxilileyo ezibaleka ngokungalawulekiyo, okanye amaqela olutsha ayabulayo naphanjaniswe ziziyobisi. Abantwana bakho baya kudlala bekhuseleke yaye benqabiseke ngokupheleleyo.

Uxolo Nempilo-ntle Yakho Yobuqu

Ekugqibeleni, kukho inkalo yempilo-ntle yomntu siqu. Kwaneemeko ezibuparadisi aziyithomalalisi intlungu yomhlaza okanye iingqaqambo zamalungu omzimba. Ngoko ke uxolo lokwenyaniso lumele luquke ukupheliswa kwezifo, ukugula nokufa. Ngaba into efana naleyo inokwenzeka? Ngoxa wayesemhlabeni, uYesu Kristu ngokuphindaphindiweyo wabonisa amandla awayenawo okoyisa izifo ababenazo abantu. (Mateyu 8:14-17) Esezulwini, uYesu uya kukwazi ukwenza imimangaliso kuwo wonke umhlaba! IBhayibhile iyathembisa, “Aya kuvulwa amehlo eemfama, zivulwe iindlebe zezithulu; size sitsibe njengexhama isiqhwala, lumemelele ulwimi lwesidenge.”—Isaya 33:24; 35:5, 6.

Noko ke, iphulo likaYesu lokuphelisa imbandezelo eluntwini aliyi kuphelela apho. Umpostile uPawulos ucacisa esithi ngokuphathelele ulawulo lukaKristu: “Kuba umelwe yena kukuthi alawule, ade azibeke phantsi kweenyawo zakhe zonke iintshaba. Olokugqibela utshaba oluya kubhangiswa kukufa.” (1 Korinte 15:25, 26) Oku kuthetha ukuphelisa wonke umonakalo ukufa okuye kwawuzisa phezu koluntu ukususela kwasekuqalekeni. Kunjengokuba uYesu Kristu ngokwakhe wacacisayo esithi: “Kuza ilixa abaya kuthi ngalo bonke abasemangcwabeni balive ilizwi lakhe [uKristu]; baphume ke.” (Yohane 5:28, 29) Ngaloo ndlela izigidi ezingenakubalwa eziye zaphila zaza zafa zibandezelekile ziya kuba nethuba lokuba nesabelo kuxolo lwehlabathi.

Ngaba uya kuba nesabelo kulo? AmaNgqina kaYehova ayakubongoza ukuba ufunde okungakumbi ngoko iBhayibhile ikufundisayo ngokuphathelele oku.b Ithemba loxolo lwehlabathi lichwayitisa gqitha, lilelokwenene gqitha, ukuba lingatyeshelwa. Qinisekiswa kukuba ukuba uzibhokoxa ekufundeni nasekusebenziseni iLizwi likaThixo, ‘uThixo woxolo uya kuba nawe’—ngonaphakade!—Filipi 4:9.

[Imibhalo esemazantsi]

[Imifanekiso ekwiphepha 5]

UYehova uya kuphelisa iimfazwe “kude kuse eziphelweni zehlabathi”

[Inkcazelo]

USAF Official Photo

[Imifanekiso ekwiphepha 6]

Amadoda nabafazi baya kufundiswa uku- qhubana ngoxolo omnye nomnye