Iphupha Loxolo Lwehlabathi—Umbono Ongacacanga

AMATHEMBA oxolo lwehlabathi ayanda. Kumhlathi wakhe weThe Toronto Star, uCarol Goar wabhala: “Izivumelwano zoxolo ziyanda ukususela eAfghanistan ukusa eAngola. Imilo ekwimimandla ethile ebibonakala ingenakulawuleka kwiinyanga ezimbalwa ezidluleyo ibonisa imiqondiso yokuba iyaphela. Ibe iZizwe Ezimanyeneyo zihlaziyeka ngokupheleleyo.” UGoar uthi, oku kuye kwabangela ukuba “ithemba lande kwihlabathi liphela.” Ngokufanayo inqaku lomhleli elalikwiUSA Today lavakalisa oku: “Uxolo luya lusanda kulo lonke ihlabathi.”

Mva nje okuphawuleka ngokukhethekileyo kuye kwaba koko iUN Chronicle yakuchaza ‘njengokumanyaniswa okunenkqubela phambili kweRashiya neUnited States.’ Ukurhoxiswa kwamajoni, iziganeko ezikhwankqisayo ezenzeka kwiMpuma Yurophu, uthethathethwano lokuncitshiswa kwamajoni nezixhobo—ezi nguqulelo ziye zavuselela amathemba okuba amagunya amakhulu asenokuthi ekugqibeleni asithobe isantya sokukhuphisana kwawo ngezixhobo. Kwihlabathi apho kuthiwa inkcitho yezomkhosi ngonyaka ixathula imali engaphezu kwama-22 ezigidi zezigidi zeerandi kwezoqoqosho, eli themba lilelona lamkelwayo.

Sekunjalo, inokukholeleka njani into yokuba elo phupha labantu elingoxolo lwehlabathi liya kuzaliseka? Kwanabona bakhi-mkhanya banethemba bayavuma ukuba kuyinguqulelo enkulu ukusuka ekuncitshisweni kwezixhobo ukuya ekuphelisweni kwazo ngokupheleleyo. Ukupheliswa kwezixhobo zenyukliya bekuya kufuna umlinganiselo ongenakuthelekiswa nanto wokuthembana. Noko ke, kulusizi ukuthi, amagunya amakhulu anembali ende yokungathembani. Njengoko kwaprofetwayo eBhayibhileni, eli libe lelona xesha apho abantu baye bazingqina ‘bengabangayifuni kwaphela imvisiswano [“abaphuli bezivumelwano zoxolo,” King James Version].’—2 Timoti 3:3, NW.

Ngapha koko, asibantu bonke abeyisekileyo kwelokuba ukupheliswa kwezixhobo zenyukliya kuya kuzisa uxolo. Kwanakuba izizwe zinokukhuthazelwa ukuba ziziphelise izixhobo zazo zenyukliya, izixhobo eziqhelekileyo zisenokubulala ngokuphumelelayo. Imfazwe Yehlabathi I neyesi II zinikela ubungqina obothusayo kwesi sibakala. Ngapha koko, ubugcisa obufunekayo ukuze kuphindwe kuyilwe izixhobo zenyukliya busaya kubakho—bulungele yaye bulindele umqondiso wokuqala wokungavani okubangelwa zezobupolitika. Bambi, njengesazinzulu sezobupolitika uRichard Ned Lebow, bakwaphikisa ngelokuba: “Kunokwenzeka ukuba ukugcina izixhobo zenyukliya ezimbalwa zikufuphi nabantu kubenza bahlale belumkile.”

Kodwa lo gama nje izixhobo zenyukliya zisekho, ingcinga yembubhiso yenyukliya iya kulenza libe yinto yokuhlekisa naliphi na ibango lokufunyanwa koxolo; ibe kuya kuba njalo nangokuzingisa kweengxaki ezingezizo ezemfazwe eziphanga uxolo lwezigidi zabantu kubomi bazo bemihla ngemihla. Usosiba-jikelele weZizwe Ezimanyeneyo uJavier Pérez de Cuéllar wathetha “ngengxaki yezigidi zabemi abangoowethu abangenamakhaya okanye abahlala kwiimeko ezingaginyisi mathe. Le ngxaki iya isiba mbi ngokuthe ngcembe.” IUN Chronicle ngokubhekele phaya inikela ingxelo yokuba ukuwohloka kwezoqoqosho kuthwaxa “abantu ababini kwabathathu eluntwini, kwezinye iimeko kukho ubuhlwempu nokuswela okugqithiseleyo okungahlukanga nje kwaphela kwintlungu ebangelwa yimfazwe.” Ibe kuthekani ngemeko yeembacu zehlabathi eziqikelelwa zikwizigidi ezili-12? Ngaba ukuncitshiswa kwezixhobo okanye kwanokupheliswa kwazo ngokupheleleyo kuya kuzisa uxolo ebomini bazo?

Ngokucacileyo, iphupha labantu loxolo lwehlabathi ngumbono ongacacanga—ukucinga okungaphangalalanga, okusikelwe umda, okulinganiselweyo. Ngaba likho ithemba loxolo elilunge ngakumbi? Eneneni likho. Kwinkupho yangaphambilana yeli phephancwadi, sibonile ukuba iBhayibhile inikela ithemba eliqinisekileyo loxolo.a Kungekudala uYesu Kristu, njengoKumkani woBukumkani bukaThixo, uya kuzisa uxolo olukugqwesayo nakuphi na oko kulindelwe ngabantu. Kodwa olu xolo luya kuthetha ntoni ngokwenene kuluntu? Inqaku elilandelayo liza kuxubusha ngako oku.

[Umbhalo osemazantsi]