Unqabiseko Lomhlaba Wonke—Lobakho Njani?
KHAWUZITHELEKELELE uhlala kumhlaba ongenangozi nantswelo. Oko koko kuthethwa lunqabiseko lwehlabathi lonke. Ngaba elo liphupha nje?
Akunjalo. Khawucinge ngemihla kaKumkani uSolomon wamandulo. Ngokuphathelele ulawulo lwakhe lobulumko, iBhayibhile iyachaza: “Ahlala amaYuda namaSirayeli ekholosile [“enqabisekile,” NW], elowo ehleli phantsi komdiliya wakhe naphantsi komkhiwane wakhe, . . . yonke imihla kaSolomon.”—1 Kumkani 4:25.
Esikufunda Kulawulo LukaSolomon
Iingxelo zeBhayibhile ezingaqhelekanga, ezinjengale ingasentla, zichazwa ngabantu abathandabuzayo njengezibaxiweyo. Ngaloo ndlela, uthile usenokubuza: ‘Ndinokuqiniseka njani ukuba ulawulo lukaSolomon aluyontsomi nje?’ Ubungqina obungangqalanga obufumaneka kwizinto zakudala ezembiwayo bunikelwe kwinqaku elilandela eli. Kakade ke, obona bungqina bulungileyo bobunyaniso bolawulo lukaSolomon bukukuba kunikelwe ingxelo ngalo kwiLizwi elingenakuxoka loThixo ophilileyo, uYehova.—Yohane 17:17; 1 Petros 1:24, 25.
Imfihlelo yonqabiseko olwalunanditshwa kulawulo lukaSolomon isekusebenziseni imithetho kaYehova yobulungisa. Ngaphambi kokuba amaSirayeli angene kwiLizwe Ledinga, uThixo wayethe: ‘Ukuba nithe nahamba emimiselweni yam, nayigcina imithetho yam, ilizwe loninika indyebo yalo. Nihlale ezweni lenu nikholosile [“ninqabisekile,” NW], ndoninika uxolo ezweni elo, nilale; kungabikho bani unigubhisayo.’—Levitikus 26:3-6.
Kulusizi ukuthi, emva kokufa kukaSolomon amaSirayeli ayeka ukuthobela uYehova; abuyela ekukhonzeni izithixo nakunqulo olungcolileyo lwesini. Ngenxa yoko, aphulukana nonqabiseko lwawo, ibe ilizwe lahlaselwa nguFaro Shishaki waseYiputa. (1 Kumkani 14:21-26) UYehova wabacacisela oku abalawuli ababehlanganisene eYerusalem, “Nina nandishiya, nam ndinishiyile, ndaninikela esandleni sikaShishaki.”—2 Kronike 12:5.
Uthile Omkhulu KunoSolomon
UYesu Kristu wayiqinisekisa inyaniso engokwembali engoSolomon ‘nebingabo bonke ubunewunewu bakhe.’ (Mateyu 6:29) Kodwa ngokubhekisele kuye ngokwakhe, uYesu wathi: “Kanti ke omkhulu kunoSolomon nanku apha.” (Mateyu 12:42) Wayethetha ukuthini? Unqabiseko olwalunanditshwa phantsi kolawulo lukaSolomon lwalulolulinganiselweyo. Loo kumkani ungumntu wayengenakubakhulula abantu bakhe ekuguleni, esonweni nasekufeni. Noko ke, uYesu, wafundisa abantu abanesono indlela ababenokuzuza ngayo ubomi obufezekileyo kunqabiseko lukanaphakade.—Yohane 10:10; 13:34, 35; 17:3.
Isizinzi sokuzuza unqabiseko olugqibelele ngolo hlobo sabakho ngokufa nokuvuka kukaYesu. (Yohane 3:16; 1 Korinte 15:20) Engasekunene kukaThixo ezulwini, kungekudala uya kuzisa unqabiseko lwehlabathi lonke kubo bonke abazithoba kulawulo lwakhe. UKumkani uDavide wamandulo waphefumlelwa ukuba abhale ngoku kwiNdumiso yama-72 engumbongo. La mazwi azaliseka ngokuyinxenye ebudeni bolawulo lonyana kaDavide, kungenxa yoko le nto umbhalo osemantla usithi, “EkaSolomon.” Kanti, inzaliseko yokwenene iphathelele ulawulo loBukumkani bukaSolomon Omkhulu, uYesu Kristu.
Ngokutsho kweNdumiso 72:7, 8, unqabiseko oluza kunanditshwa phantsi kolawulo lukaKristu luya kuba semhlabeni wonke yaye luya kuba lolukanaphakade. “Malityatyambe ngemihla yakhe ilungisa, nobuninzi boxolo, ide ingabi sabakho inyanga. Makaphathe ubukhosi ethabathela elwandle ase elwandle, ethabathela kuwo uMlambo ase eziphelweni zehlabathi.”—Thelekisa uZekariya 9:9, 10.
Abantu abaya kuba bephantsi kolawulo lukaKristu nabo abasayi kuswela nto, ngenxa yokuba INdumiso 72:16 iyasiqinisekisa: “Makubekho intabalala yengqolowa ezweni, ise encotsheni yeentaba.” Njengoko kunokulindelwa, kwanocalucalulo, ingcinezelo nogonyamelo ezo zinto azisayi kubakho. “Ngokuba uya kulihlangula ihlwempu elizibikayo, nabaziintsizana abangenaluncedo. Akhulule imiphefumlo yawo ekuxinezelweni nasekugonyamelweni; linqabile emehlweni akhe igazi lawo.”—INdumiso 72:12, 14.
Njengakwixesha likaKumkani uSolomon, isizinzi sonqabiseko olunjalo lomhlaba wonke siya kuba kukusetyenziswa ngobulumko kwemithetho kaYehova iphela. Oku kuya kuba kukuzalisekiswa kwesicelo sikaDavide esibuprofeti: “Thixo, mnike ukumkani imigwebo yakho . . . Makagwebe ityala labaziintsizana ebantwini, asindise oonyana bamahlwempu, abatyumze abacudisi.”—INdumiso 72:1, 4.
Kuthekani Ngeentswelo Zethu Zangoku?
Ubani usenokuthi, konke oku kulungile, kodwa ndilufuna ngoku unqabiseko lokoqobo.’ Kuyinyaniso ukuba, amaKristu asengamaxhoba eemeko zokunganqabiseki ezithwaxa uluntu—ulwaphulo-mthetho, izifo, amashwa, ukwaluphala nokufa. Noko ke, amava akulo lonke ihlabathi aye abonisa ukuba ngolwazi lweBhayibhile, ayakwazi ukuhlangabezana nazo. (IMizekeliso 15:1; 22:3) Kwakhona, akwaneliswa lithemba eliqinileyo. Umfundi weBhayibhile osemtsha ohlala kwihlomela ledolophu yaseRhawutini elinolwaphulo-mthetho olugqithiseleyo, wacacisa enye indlela awancedwa ngayo ziZibhalo: “Ngoku ndiyazi ukuba ulwaphulo-mthetho aluyonto eya kuhlala ikho; kuphela nje lulolwekwexeshana.”
Ewe, kukwakho nethemba elingabo baye bafa njengamaxhoba ogonyamelo lwezaphuli-mthetho. UYesu wathembisa oku, “Ndim uvuko, ndim ubomi,” waza ke wongezelela esithi: “Lowo ukholwayo kum, nokuba ubethe wafa, wodla ubomi.”—Yohane 11:25.
Ukuze uzive unqabisekile, kufuneka ube nokholo olomeleleyo, oluzuzwa ngokufundisisa iLizwi likaYehova. Ngokuthi imihla ngemihla ubekele bucala ixesha lokufundisisa iBhayibhile, unokuyibona inzaliseko yedinga elimangalisayo elithi: “Ke yena ondivayo uhleli ekholosile, wonwabile ekunkwantyiseni kobubi.”—IMizekeliso 1:33; 2:21, 22.
[Ibhokisi ekwiphepha 6]
“Ngethuba lokulawula kukaSolomon, impucuko yamaSirayeli kokuphathekayo yahambela phambili ngokungakumbi kwiminyaka engamashumi amathathu kunokuba yenzayo ebudeni beminyaka yokuqala engamakhulu amabini. Kumaleko womhlaba ukususela kwixesha likaSolomon sifumana iintsalela zezakhiwo ezikhulu, izixeko ezikhulu ezineendonga ezomeleleyo, iqela lemimandla eyayimiwe neyayineengxikela zezakhiwo ezihle zezinhanha, impucuko enkulu gqitha yezinto zobugcisa ezazibunjwa ngodongwe neendlela zakhe zokuvelisa izinto. Kwakhona sifumana iintsalela zezinto ezenziwa ngezandla ekucaca ukuba zazenziwe kwiindawo ezikude, eziyimiqondiso yorhwebo noshishino olunamandla lwezizwe ngezizwe.”—The House of David, nguJerry M. Landay.
[Inkcazelo Ngomfanekiso okwiphepha 5]
NASA photo