Ukugqala UYesu—OnguDavide Omkhulu NoSolomon Omkhulu
“Khangelani! okuthile okungaphezu koSolomon kulapha.”—MAT. 12:42.
1, 2. Yintoni eyayinokubangela abantu bamangaliswe kukuba uSamuweli ayalelwe ukuba athambise uDavide njengokumkani?
WAYENGAKHANGELEKI njengokumkani. Umprofeti uSamuweli wayezibonela nje inkwenkwana engumalusi. Ngapha koko, idolophu awazalelwa kuyo, iBhetelehem, yayingabalulekanga. Yachazwa ‘njengencinane gqitha ukuba ibe phakathi kwamawaka akwaYuda.’ (Mika 5:2) Sekunjalo, umprofeti uSamuweli wayeza kumthambisa njengokumkani wakwaSirayeli wexa elizayo lo mfana uhlala kule dolophu incinane.
2 USamuweli akazange acinge ukuba uDavide unyana kaYese, uyafaneleka ukuba ngukumkani. UDavide, ongoyena mncinane koonyana abasibhozo bakaYese, wayengekho xa uSamuweli eze kuthambisa omnye woonyana bakaYese ukuba abe ngukumkani. Kodwa uYehova wayenyule uDavide.—1 Sam. 16:1-10.
3. (a) Yiyiphi eyona nto ibalulekileyo ayijongayo uYehova emntwini? (b) Kwenzeka ntoni kuDavide emva kokuba ethanjisiwe?
3 UYehova wayekwazi ukubona oko uSamuweli wayengakuboni. UThixo wayekubona oko kusentliziyweni kaDavide, yaye wayekholiswa nguye. UThixo akajongi imbonakalo; kodwa ujonga intliziyo yomntu. (Funda eyoku-1 kaSamuweli 16:7.) Ngoko wathi uSamuweli akuqonda ukuba uYehova akanyulanga namnye koonyana bakaYese abasixhenxe abadala, wacela ukuba kuye kubizwa oyena mncinane emadlelweni. Ingxelo ithi: ‘Ngako oko uYese wathumela waza uDavide waziswa. Ke kaloku wayebubomvurha, umfana onamehlo amahle noyinzwana ngembonakalo. Wandula ke uYehova wathi: “Sukuma, mthambise, kuba nguye lo!” Ngako oko uSamuweli wathabatha uphondo lweoli waza wamthambisa phakathi kwabantakwabo. Yaye umoya kaYehova waqalisa ukusebenza kuDavide ukususela loo mini.’—1 Sam. 16:12, 13.
UDavide Wayefanekisela UKristu
4, 5. (a) Chaza ezinye zezinto abafana ngazo uDavide noYesu. (b) Kutheni uYesu ebizwa ngokuba nguDavide Omkhulu?
4 NjengoDavide, uYesu wazalelwa eBhetelehem malunga neminyaka eli-1 100 emva kokuzalwa kukaDavide. Naye uYesu, abantu abaninzi babengamjongi njengokumkani. Uninzi lwabantu bakwaSirayeli lwalungalindelanga ukuba nokumkani onjalo. Kanti naye njengoDavide, wayenyulwe nguYehova. Naye wayethandwa nguYehova.a (Luka 3:22) NakuYesu, ‘umoya kaYehova waqalisa ukusebenza.’
5 Zininzi izinto abafana ngazo uDavide noYesu. Ngokomzekelo, uDavide wangcatshwa ngumcebisi wakhe uAhitofele, noYesu wangcatshwa ngumpostile wakhe uYudas Skariyoti. (INdu. 41:9; Yoh. 13:18) Bobabini uDavide noYesu babenenzondelelo ngendlu kaYehova. (INdu. 27:4; 69:9; Yoh. 2:17) UYesu wayeyindlalifa kaDavide. Ngaphambi kokuba uYesu azalwe, ingelosi yathi kunina: “UYehova uThixo uya kumnika itrone kaDavide uyise.” (Luka 1:32; Mat. 1:1) Noko ke, ekubeni zonke iziprofeto ezingoMesiya ziza kuzaliseka kuYesu, ungaphezulu lee kunoDavide. UnguDavide Omkhulu, uKumkani onguMesiya ekwakukudala elindelwe.—Yoh. 7:42.
Landela UKumkani OnguMalusi
6. Singatsho njani ukuba uDavide wayengumalusi olungileyo?
6 UYesu ukwangumalusi. Ubonakala njani umalusi olungileyo? Ubonakala ngokwalusa, ukondla nokunyamekela izimvu ngenkuthalo. (INdu. 23:2-4) Ekukhuleni kwakhe, uDavide wayengumalusi yaye enyamekela izimvu zikayise. Wabonakalisa inkalipho waza wabeka ubomi bakhe esichengeni xa wayehlangula izimvu engonyameni nakwibhere.—1 Sam. 17:34, 35.
7. (a) Yintoni eyaxhobisa uDavide ukuze akwazi ukuphumeza imbopheleleko yakhe njengokumkani? (b) Yintoni ebonisa ukuba uYesu unguMalusi Olungileyo?
7 Iminyaka uDavide awayichitha esalusa izimvu yamxhobisela imbopheleleko enkulu yokwalusa uhlanga lwakwaSirayeli.b (INdu. 78:70, 71) NoYesu ukwangumalusi ongumzekelo. UYehova uyamomeleza yaye uyamkhokela njengoko esalusa ‘umhlambi wakhe omncinane’ “nezinye izimvu.” (Luka 12:32; Yoh. 10:16) Ngenxa yoko, uYesu unguMalusi Olungileyo. Uwazi kakuhle umhlambi wakhe kangangokuba izimvu zakhe uzibiza ngamagama. Uyazithanda izimvu zakhe, kangangokuba xa wayesemhlabeni wancama ubomi bakhe ngenxa yazo. (Yoh. 10:3, 11, 14, 15) NjengoMalusi Olungileyo, uYesu wenza izinto uDavide awayengenakuze akwazi ukuzenza. Idini lakhe lentlawulelo lavulela abantu indlela yokuba bakwazi ukukhululwa ekufeni. Akukho nto iya kuze imthintele ekuvuseleni ‘umhlambi wakhe omncinane’ kubomi basezulwini nasekukhokeleleni ‘ezinye izimvu’ zakhe kubomi obungunaphakade kwihlabathi elitsha lobulungisa elingenazo iintshaba ezifana neengcuka.—Funda uYohane 10:27-29.
Landela UKumkani Owoyisayo
8. UDavide waba nguye njani ukumkani owoyisayo?
8 UKumkani uDavide owayelikroti, wakhusela ilizwe labantu bakaThixo, yaye “uYehova waqhubeka emsindisa uDavide naphi na apho wayesiya khona.” Ngexesha lokulawula kukaDavide, umda welizwe wawususela kumlambo waseYiputa uye kuma ngomlambo umEfrate. (2 Sam. 8:1-14) UYehova wamomeleza waza waba ngoyena mlawuli unamandla. IBhayibhile ithi: “Udumo lukaDavide lwaphumela kuwo onke amazwe, uYehova wazenza zonke iintlanga ukuba zinkwantye nguye.”—1 Kron. 14:17.
9. Chaza indlela oyisa ngayo uYesu onguKumkani Onyuliweyo.
9 Ngokufanayo noKumkani uDavide, noYesu kwakungekho nto ayoyikayo. NjengoKumkani Onyuliweyo, wabonakalisa igunya lakhe ngokukhulula abantu ababecinezelwe ziidemon. (Marko 5:2, 6-13; Luka 4:36) Kwanotshaba olukhulu, uSathana uMtyholi, alunakumoyisa. UYehova wanika uYesu amandla okoyisa ihlabathi, elisemandleni kaSathana.—Yoh. 14:30; 16:33; 1 Yoh. 5:19.
10, 11. Yintoni indima kaYesu njengoKumkani Owoyisayo?
10 Kwiminyaka emalunga nama-60 emva kokufa nokuvuselwa kukaYesu ezulwini, umpostile uYohane wabona uYesu embonweni enguKumkani Owoyisayo ezulwini. UYohane uthi: “Khangela! ndabona nalo ihashe elimhlophe; lowo wayehleli phezu kwalo wayenesaphetha; yaye wanikwa isithsaba, waza waphuma esoyisa nokuze akuphelelise ukoyisa kwakhe.” (ISityhi. 6:2) Umkhweli wehashe elimhlophe nguYesu. “Wanikwa isithsaba” ngowe-1914 ekumiselweni kwakhe njengoKumkani woBukumkani basezulwini. Emva koko, “waphuma esoyisa.” Ngokufanayo noDavide, uYesu ungukumkani owoyisayo. Emva nje kokumiselwa kwakhe njengoKumkani woBukumkani bukaThixo, woyisa uSathana edabini waza wamphosa emhlabeni yena needemon zakhe. (ISityhi. 12:7-9) Uya kuqhubeka esoyisa de “akuphelelise ukoyisa kwakhe,” ayitshabalalise ngokupheleleyo inkqubo kaSathana engendawo.—Funda ISityhilelo 19:11, 19-21.
11 NjengoDavide, noYesu ungukumkani onovelwano, yaye uya kukhusela “isihlwele esikhulu” ngeArmagedon. (ISityhi. 7:9, 14) Ngaphezulu, xa kulawula uYesu neendlalifa zakhe ezivusiweyo ezili-144 000, kuya kubakho “uvuko lwamalungisa nabangengomalungisa.” (IZe. 24:15) Abo bavuselwe emhlabeni baya kuphila ngonaphakade. Balindelwe likamva eliqaqambileyo ngokwenene! Ngamana sonke singazimisela ukuqhubeka ‘sisenza okulungileyo,’ ukuze sibe phakathi kwabantu abangamalungisa nabonwabileyo abaya kube belawulwa nguDavide Omkhulu.—INdu. 37:27-29.
Umthandazo KaSolomon Wokucela Ubulumko Uyaphendulwa
12. Yintoni eyathandazelwa nguSolomon?
12 USolomon unyana kaDavide naye wayefanekisela uYesu.c Xa uSolomon wayengukumkani, uYehova wabonakala kuye ephupheni waza wathi makacele nantoni na yaye uya kumnika. USolomon wayenokucela ubutyebi, igunya nokuphila ixesha elide. Kunoko, wathi kuYehova: “Ndinike ke ubulumko nolwazi ukuze ndiphume ndingene phambi kwesi sizwana, kuba ngubani onokugweba esi sizwana sakho sikhulu kangaka?” (2 Kron. 1:7-10) UYehova wawuphendula umthandazo kaSolomon.—Funda eyesi-2 yeziKronike 1:11, 12.
13. Kutheni sinokuthi uSolomon wayenobulumko ngaphezu kwakhe wonke umntu, yaye wayebufumana phi obo bulumko?
13 Ngoxa uSolomon wayethembekile kuYehova, wayenobulumko ngaphezu kwabo bonke abantu ababephila ngexesha lakhe. USolomon wayenokuthetha “imizekeliso engamawaka amathathu.” (1 Kum. 4:30, 32, 34) Emininzi yale mizekeliso yabhalwa yaye iyabanceda abantu abafuna ubulumko. Ukumkanikazi waseShebha wahamba umgama oziikhilomitha ezingama-2 400 ukuze avavanye ubulumko bukaSolomon “ngemibuzo entsonkothileyo.” Wachukunyiswa zizinto ezathethwa nguSolomon nayindlela awayelawula ngayo abantu. (1 Kum. 10:1-9) IBhayibhile ichaza oyena Mntu wayebufumana kuye ubulumko: “Bonke abantu bomhlaba babefuna ubuso bukaSolomon ukuze beve ubulumko bakhe obabubekwe nguThixo entliziyweni yakhe.”—1 Kum. 10:24.
Landela UKumkani Osisilumko
14. Sinokutsho njani ukuba uYesu ‘wayekokuthile okungaphezu koSolomon’?
14 Mnye kuphela umntu owayenobulumko ngaphezu kukaSolomon. NguYesu Kristu, owazichaza wathi ‘ukokuthile okungaphezu koSolomon.’ (Mat. 12:42) UYesu wathetha ‘amazwi obomi obungunaphakade.’ (Yoh. 6:68) Ngokomzekelo, kwiNtshumayelo yakhe yaseNtabeni unikela iinkcukacha ezingakumbi zemizekeliso kaSolomon. USolomon uchaza izinto ezininzi ezibangela ukuba umnquli kaYehova onwabe. (IMize. 3:13; 8:32, 33; 14:21; 16:20) UYesu wabethelela into yokuba ulonwabo lokwenene luxhomekeke ekunquleni uYehova nasekuzalisekeni kwezithembiso zikaThixo. Wathi: “Banoyolo abo bayiphapheleyo intswelo yabo yokomoya, kuba ubukumkani bamazulu bobabo.” (Mat. 5:3) Abo basebenzisa imigaqo efumaneka kwiimfundiso zikaYesu, basondela kuYehova, “umthombo wobomi.” (INdu. 36:9; IMize. 22:11; Mat. 5:8) UKristu ‘ububulumko bukaThixo.’ (1 Kor. 1:24, 30) NjengoKumkani onguMesiya, uYesu Kristu ‘unomoya wobulumko.’—Isa. 11:2.
15. Bunokusinceda njani ubulumko bukaThixo?
15 Thina balandeli bakaSolomon Omkhulu, sinokungenelwa njani kubulumko bukaThixo? Ekubeni ubulumko bukaYehova bufumaneka eLizwini lakhe, sifanele senze umgudu wokubufumana ngokufunda iBhayibhile, ingakumbi amazwi kaYesu, nangokucamngca ngezinto esizifundayo. (IMize. 2:1-5) Ngaphezulu, simele sihlale sicela ubulumko kuThixo. ILizwi likaThixo liyasiqinisekisa ukuba xa sithandaza ngokunyanisekileyo sicela uncedo, uya kusiphendula. (Yak. 1:5) Umoya oyingcwele uya kusinceda sifumane ubulumko obuseLizwini likaThixo obuya kusinceda sikwazi ukujamelana neengxaki size senze izigqibo zobulumko. (Luka 11:13) USolomon wayebizwa ngokuba ‘ngumhlanganisi’ yaye “wafundisa abantu ukwazi ngokuqhubekayo.” (INtshu. 12:9, 10) NjengeNtloko yebandla lamaKristu, noYesu ungumhlanganisi wabantu bakhe. (Yoh. 10:16; Kol. 1:18) Ngoko ke, kubalulekile ukuba siye kwiintlanganiso zebandla, kuba apho ‘sifundiswa ngokuqhubekayo.’
16. Ziziphi izinto abafana ngazo uSolomon noYesu?
16 UKumkani uSolomon wenza izinto ezininzi. Walungiselela ukuba kuqaliswe umsebenzi wokwakha amabhotwe, iindlela, amaqula amanzi, izixeko ezingoovimba, izixeko zeenqwelo nezixeko zabakhweli-mahashe. (1 Kum. 9:17-19) Ezi zinto zaba luncedo kubo bonke abantu. NoYesu ungumakhi. Wakhela ibandla lakhe ‘phezu kolwalwa.’ (Mat. 16:18) Uya kunikela ulwalathiso kumsebenzi wokwakha oza kwenziwa kwihlabathi elitsha.—Isa. 65:21, 22.
Landela UKumkani Woxolo
17. (a) Yintoni eyayibalasele kulawulo lukaSolomon? (b) Yintoni uSolomon angazange akwazi ukuyiphelisa?
17 Igama elithi Solomon lithatyathwe kwigama elithi “uxolo.” Ibhotwe likaKumkani uSolomon laliseYerusalem, yaye elo gama lithetha “Indawo Yoxolo Oluntlu-mbini.” Ebudeni beminyaka engama-40 yolawulo lwakhe, uhlanga lwakwaSirayeli lwaluseluxolweni. Xa ithetha ngaloo minyaka, iBhayibhile ithi: “UYuda noSirayeli baqhubeka behleli ngonqabiseko, wonk’ ubani phantsi komdiliya wakhe naphantsi komkhiwane wakhe, ukusuka kwaDan kuse eBher-shebha, yonke imihla kaSolomon.” (1 Kum. 4:25) Nakuba uSolomon wayenobulumko obungako, akazange akwazi ukuphelisa ukugula, isono nokufa. Noko ke, uSolomon Omkhulu uya kuziphelisa zonke ezi zinto.—Funda eyabaseRoma 8:19-21.
18. Ziziphi iintsikelelo ezikhoyo kwibandla lamaKristu?
18 Nakwibandla lamaKristu lanamhlanje, kukho uxolo. Eneneni, sikwiparadesi yokomoya. Kukho uxolo phakathi kwethu noThixo naphakathi kwethu nabanye. Phawula oko kwathethwa ngumprofeti uIsaya ngokuphathelele le paradesi yokomoya, wathi: “Ziwakhande amakrele azo abe ngamakhuba nemikhonto yazo ibe zizikere zokuthena imithi. Uhlanga aluyi kuphakamisela uhlanga ikrele, zingayi kuphinda zifunde nemfazwe kwakhona.” (Isa. 2:3, 4) Xa sivuma ukuba sikhokelwe ngumoya kaThixo, sibangela ukuba olu xolo luhlale lukho.
19, 20. Ziziphi izinto ezisenza sonwabe?
19 Noko ke, izinto ziya kuba bhetele ngakumbi kwixa elizayo. Njengoko abantu beya kuba seluxolweni olungenakuthelekiswa nanto xa kulawula uYesu, ngokuthe ngcembe baya “kukhululwa ekukhotyokisweni kukonakala” de bafezeke. (Roma 8:21) Emva kokuba bephumelele uvavanyo lokugqibela ekupheleni koLawulo Lwewaka Leminyaka, “abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.” (INdu. 37:11; ISityhi. 20:7-10) Ngokuqinisekileyo, ulawulo lukaKristu Yesu luya kuba ngaphezulu lee kunolukaSolomon!
20 Njengoko abantu bakwaSirayeli babonwabile phantsi kolawulo lukaMoses, lukaDavide noSolomon, siya konwaba ngakumbi xa kulawula uKristu. (1 Kum. 8:66) Oko kuya kubangelwa kukuba uYehova wanikela ngoNyana wakhe okuphela kwakhe—uMoses, uDavide noSolomon Omkhulu!
[Imibhalo esemazantsi]
a Kusenokwenzeka ukuba igama elithi Davide lithetha “Oyintanda.” Ekubhaptizweni kukaYesu naxa wayesenziwa kumila kumbi, uYehova wathetha esemazulwini wathi, “lo nguNyana wam, oyintanda.”—Mat. 3:17; 17:5.
b Kwangaxeshanye, uDavide wafana nemvana ethembele kumalusi wayo. Wayethembele kwinkuselo nakukhokelo loMalusi Omkhulu, uYehova. Eqinisekile wathi: “UYehova ngumaLusi wam. Andiyi kuswela nto.” (INdu. 23:1) UYohane umBhaptizi wathi uYesu ‘yiMvana kaThixo.’—Yoh. 1:29.
c Okubangel’ umdla kukuba, elinye igama likaSolomon nguYedidiya, elithetha ukuthi “Othandwayo nguYa.”—2 Sam. 12:24, 25.
Ngaba Unokuchaza?
• Sinokutsho njani ukuba uYesu nguDavide Omkhulu?
• Sinokutsho njani ukuba uYesu nguSolomon Omkhulu?
• Yintoni ebangela ukuba ube noxabiso ngoDavide Omkhulu okwanguSolomon Omkhulu?
[Umfanekiso okwiphepha 31]
Ubulumko uSolomon awayebunikwe nguThixo babufanekisela ubulumko bukaSolomon Omkhulu
[Umfanekiso okwiphepha 32]
Ulawulo lukaYesu luya kuba ngaphezu lee kunolukaSolomon nolukaDavide!