Intsikelelo kaYehova Iye Yandityebisa

Ngokubaliswa nguElsie Meynberg

“INTSIKELELO kaYehova—yiyo etyebisayo, ibe akongezi mbulaleko kuyo.” (IMizekeliso 10:22, NW) Ndiye ndanamava obuqu obunyaniso balo mzekeliso weBhayibhile. Ndivumele ndikubalisele ukuba njani na.

Xa ndandineminyaka emithandathu kuphela ubudala, ndandidla ngokuphulaphula xa umama nomfundisi weBhayibhile owayedla ngokusityelela bexubusha, kwaye ndaphawula indlela umama awayethabatheke ngayo koko wayekufunda. Ngobunye ubusuku obubandayo basebusika, ndaya kumgangatho ongezantsi ukuya kufumana iglasi yamanzi ndaza ndafumana uMama efunda ecaleni kwesitovu esivuliweyo. Endaweni yokundingxolisa njengoko ndandilindele, wandiwola waza wandicacisela ukuba igama likaThixo nguYehova. Ukufudumala okwakuselizwini lakhe kwandixelela ukuba oko wayekufunda kwakubaluleke kakhulu kuye.

Emva kweengxubusho ezimbalwa ezingakumbi nalo mfundisi weBhayibhile, uMama wahamba ngeenyawo ukuya kwabelana nabamelwane ngeendaba ezilungileyo awayezifundile. Noko ke, wayengasoloko esamkelwa ngobubele. Sasihlala emaphandleni kufutshane naseBeatty, eSaskatchewan, eKhanada, yaye inkoliso yabamelwane bethu yayizizalamane zethu, amaLuthere anenzondelelo okanye amalungu eecawa zobuVangeli. Sekunjalo, uMama waqhubeka ebatyelela.

Ndandidla ngokubukela ngaphaya kweefestile ezineqabaka njengoko uMama wayezama ukukhupha amahashe esitalini, ndisazi ukuba wayengaqhelananga nokuwabopha. Ngamanye amaxesha wayedla ngokuhamba aye kwiintlanganiso okanye kubulungiseleli basentsimini phezu kwako nje ukukhalaza kukaTata. Wayengavumelani nokholo olutsha lukaMama, kodwa umama wayezimisele. Ngamaxesha onke wayedla ngokubuya onwabile ngaphakathi nto leyo eyayibonakala kuwonke wonke. Wayedla ngokuthi, “intsikelelo kaYehova, yiyo etyebisayo.” Ndandisoloko ndimangaliswa kukuba wayethetha ukuthini na ngoko. Nangona ndandineminyaka emithandathu kuphela ubudala, nam ndandifuna ukumkhonza uYehova.

Ngenye imini ndandiphezu kophahla notata, apho wayelungisa amaplanga ophahla. UMama nodade wethu uEileen babehamba neqela ngenqwelo-mafutha eyiModel T Ford ukuze babekho xa kwakusenziwa “uhambo longcelele lokubhengeza.” Babeza kujikeleza idolophu bephethe izibhengezo ezibhaliweyo ezichaza intetho yeBhayibhile.

UTata wandibuza wathi: “Akusoze ube sisibhanxa ngoluya hlobo, andibi kunjalo?” Kodwa nangona ndandiyintombazana ekuthandayo ukuqabela kwiindawo ziphezulu, ngendandikuvuyele ngakumbi ukuba kolo hambo longcelele lokubhengeza kunokuba lapho phezu kophahla. Phofu ke, bathi ndandimfutshane kakhulu ukuba ndingaphatha isibhengezo esibhaliweyo.

Ukuhlangabezana Nocelomngeni Lokuvalwa Komsebenzi

Ekugqibeleni, ithuba lam lokuqala lokuba nesabelo ekushumayeleni uBukumkani lavela ngoNovemba 1940. Hayi indlela endandichwayite ngayo! Ekubeni umsebenzi wokushumayela wamaNgqina kaYehova wawuvaliwe eKhanada ngelo xesha, saphuma ezinzulwini zobusuku saza sashiya incwadana ethi End of Nazism eminyangweni yazo zonke izindlu.

Xa ndandineminyaka esithoba ubudala, ndandizimisele ukwahlulela ubomi bam kuYehova ndize ndibhaptizwe. Ngenxa yentshutshiso, asizange sixelelwe ukuba iya kuba phi na intlanganiso, kodwa sakhokelelwa kwindawo esehlathini apho iqela elikhulu lamaNgqina kaYehova ‘lalinepikiniki’ khona. Apho mna nodade wethu omkhulu uEleanor sasiphakathi kwabaninzi ababhaptizwa kumanzi abandayo echibi elalikufutshane.

Ngaloo mihla isikolo sasiqalisa ngokuthi iklasi ikhahlele indwe ize icule umhobe wesizwe. Phezu kwako nje ukujanyelwa ngabo sasifunda nabo, ngentlonelo sasisala ukuba nenxaxheba ngenxa yemfundiso yeBhayibhile engonqulo zithixo. (Daniyeli, isahluko 3) Umza wam, uElaine Young, owayekwaliNgqina, kwakufuneka ehambe iikhilomitha ezintandathu ukuya esikolweni, kodwa suku ngalunye wayegxothwa ngenxa yokungakhahleli indwe. Emva koko wayedla ngokuyiphinda loo ndlela egoduka. Wakwenza oku isiqingatha sonyaka weentsuku zesikolo ukuze kungabhalwa ukuba akakho aze angaphumeleli kwelo banga.

Ukugqiba kwam esikolweni, ndasebenza ebhankini. Kodwa ndaba seluvavanyweni xa sasingazange sivunywe isicelo sam sokuya kwindibano yamaNgqina kaYehova yezizwe ngezizwe eNew York ngowe-1950. Ndandinemalana endandiyigcinile ndaza ndagqiba kwelokuba ndiyeke ndize ndiqalise kubulungiseleli bexesha elizeleyo. Ngoko mna noElaine safudukela kwisixeko saseRegina. Abathile babegculela besithi: “Kuya kuthi kufika intwasahlobo abe sele engqiba apha ekhaya.” Noko ke, ndakwazi ukuzixhasa ngokusebenza umsebenzi wesingxungxo njengesicakakazi. Ukutyebisa kweentsikelelo zikaYehova kuye kwandigcina ndikubulungiseleli bexesha elizeleyo ukususela ngoko.

Ukufikelela Usukelo Lwethu

Saba nemincili noElaine xa ngowe-1955 samenyelwa kwiklasi yama-26 yaseGiliyadi saza kamva safumana izabelo zokuya eBolivia, eMzantsi Merika. Kwakukho amaNgqina amalunga ne-160 kuphela kulo lonke elo lizwe ngelo xesha. Ekugqibeleni, sahamba saya eTarija ukuya kuthelela abanye abavangeli basemazweni ababini kwisabelo sethu sokuqala.

ITarija yayiyidolophu entle. Kwakubangela umdla ukubona abafazi benxibe isinxibo somthonyama bethwele imithwalo. Abantu babelungile yaye babengasokuze basixelele ukuba babengenamdla. Kuyacaca ukuba babevakalelwa kukuba kwakuyinkcubeko ukusixelela ukuba sibuye ngexesha ababesazi ukuba babeza kuba bengekho ngalo ekhaya. Kwathabath’ ithuba ukuba sikuqhele oko.

Ngenye imini sasithetha nendoda eyayimi emnyango wendlu yayo xa kwema loo nqwelo-mafutha ekuthiwa yijeep kwaza kwehla umfundisi ebomvu ngumsindo. Wangxolisa le ndoda esithi: “Ukuba akuyeki ukuthetha naloo mantombazana, uya kusikwa ecaweni!” Eguqukela kuthi, wasisongela esithi: “Aninalungelo lakushumayela apha. Ukuba aniyeki, ndiza kuthabatha amanyathelo abhekele phayaa.” Ngeli thuba abamelwane abaninzi babesele bephumile ukuza kubukela. Ngoko sasuka nje saqhubeka nomsebenzi wethu, sihambisa iincwadi neeBhayibhile ezininzi kwabo babukeli babefuna ukwazi.

Ekubeni sasigqibe iminyaka emibini kule ntlambo ibukekayo apho iipesika, amandongomane, neediliya zichumayo, ekuqaleni asizange sikuvuyele ukufumana isabelo esitsha sokuya ePotosí, isixeko esinemigodi nesibanda ngokuqhaqhazelis’ amazinyo esimi kwindawo eziimitha ezingama-4 000 ukuphakama. Sasibuqhelile ubusika obubandayo baseKhanada, kodwa umahluko yayikukuba ngokuqhelekileyo ePotosí amakhaya ayengenazinto zokuwenza afudumale. Phofu ke, ePotosí kwakukho unxulumano olufudumeleyo lwebandla lamaKristu, ngoxa kwakungekasekwa bandla eTarija.

Ukuqala Intsimi Entsha

Ngokulandelayo, mna noElaine sabelwa eVillamontes ukuya kuqala umsebenzi wokushumayela apho. Ilori esahamba ngayo yayithwele iswekile eyayihanjiswa ngokungekho mthethweni, ngoko ukuphepha iingxaki namapolisa emideni, umqhubi akazange ahambe kwada kwarhatyela. Hayi indlela esasinqwenela ngayo ukuba sibe sasiphethe isibane, kuba ngequbuliso kwashukuma into ecaleni kwethu ngaphantsi kweseyile! Yayingumncedisi womqhubi welori.

Ngentsimbi yesihlanu kusasa, semisa. Sikruqukile ngumsi ophuma kumbhobho wokukhupha umsi yaye sizele luthuli, sakhasa saphuma. Umhlaba odilikileyo wawuvale indlela yethu. Ekugqibeleni, emva kweeyure ezine zokusebenza nzima, umnini welori wathi umncedisi wakhe makawelise le lori kolo ngqameko lwenziweyo. Umnini welori akazange afune nokujonga njengoko ilori yayihamba kancinane ukunqumla, amavili asemacaleni kwamane angasemva ejikeleza emoyeni phezu kwaloo mwonyo wawubonakala ungenasiphelo ecaleni kwendlela. Mna noElaine sanqumla ngeenyawo. Njengokuba sasiqhubeka sisiya eVillamontes ngale lori, amagophe ayingozi kwiingxingwa zeentaba ayejikajika kakhulu kangangokuba izihlandlo eziliqela umqhubi wayenyanzeleka ukuba abuye umva aze achul’ ukunyathela ukujikela kuwo. Ekugqibeleni, emva kweeyure ezingama-35 ezinxaphisayo, safika.

Kwakungamava amatsha kum noElaine ukuba sibe sodwa ngokupheleleyo. Enye into eyayintsha kuthi zizinambuzane ezifumaneka kwelenjiko. Ooqongqothwane abakhulu abaneqokobhe elilukhuni babedla ngokuwela kuthi emva kokuntlitheka kwisibane esiphezu kwethu. Izinambuzane ezincinane ezibhabhayo zazidla ngokusiluma kabuhlungu, zibangela izigxala ezirhawuzelelayo nezichizayo. Ngobusuku bokuqala kwikhaya lethu elitsha, ndaphuma phandle ukuya kwindlu yangasese. Kodwa ndakukhanyisa isibane sam, umgangatho wavela wanyakazela amaphela. Amacikilishe abaleka, yaye amaxoxo amakhulu ayendijonge esezikoneni. Ndagqiba kwelokuba ndilinde kude kube kusasa.

Kamva, sasingasemlanjeni saza sacinga ukuba sasiya kuphumla kwisigodo esasibona apho. Noko ke, sagqiba kwelokuba kuqala senze ibuyelo kufutshane apho. Ukubuya kwethu, isigodo sasingasekho. Abantu abadlula ngendlela bothukile basixelela ukuba bekukho inyoka enkulu apho. Ndiyavuya kuba singazange sizame ukuhlala kweso “sigodo”!

Eyona nto sasiyinandipha kakhulu eVillamontes yayikukutyelela abantu ngokuhlwa. Sasidla ngokubafumana behleli kwizihlalo ezenziwe ngengcongolo ecaleni kwendlela, besela isiselo esenziwe ngamagqabi omthi esibizwa ngokuba yimaté. Sasichitha iiyure ezininzi ngovuyo sicacisa amadinga oBukumkani kwiimeko ezinjalo. Kodwa kwabakho amaxesha anzima ngakumbi emva kokuba uElaine etshatile ndaza ndabelwa eVallegrande neqabane elitsha.

NjengeNtshona Enobundlobongela

Ukuze ndiye kufika eVallegrande, kwafuneka ndithabathe olunye uhambo oludinisayo lweentsuku ezintathu, yaye ngoku ndandindedwa. Ezo ndlela zicutheneyo zomhlaba zabonakala zinamajikojiko ngokungenasiphelo ukungena emahlathini. Ekugqibeleni ndafika xa kurhatyelayo. Uduladula waphazamisa ukuzola kwedolophu apho amahashe ayexhaphake ngaphezu kweenqwelo-mafutha. Abantu babesakhele umkhanya bemi ngaphantsi kweeveranda ezixhaswe zizibonda nezazivelele phezu kweendledlana ezisecaleni kwendlela enkulu. Wambi amadoda awayengqiyame ngezibonda ayefake iibhanti zemipu ezineevolovolo. Kwakubonakala ukuba phantse wonk’ ubani wayefak’ ezimnyama. Ndacinga oku: ‘Kaloku le ndawo ifana nqwa neNtshona Merika enobundlobongela!”

Kakade, yayiyiyo. Iimbambano zazizinziswa ngompu. Nangona yayiyidolophu nje enabantu abangamawaka alishumi, ukubulala nogonyamelo zazixhaphakile ngelo xesha. Abantu babelawulwa liqela lezihange elalithabathele kulo ulawulo lwemida ekungeneni kwedolophu. Amalungu eli qela ayezixhasa ngokumisa ooduladula aze abaphange. Nabalimi babephangwa njengoko babesizisa isivuno sabo edolophini. Amantombazana ayedlwengulwa ejoliswe ngemipu phambi kwabazali bawo. Oomama babengawavumeli amantombazana abo ukuba ahambe odwa ukuya nje kufutshane esiya kuthenga.

Khawuthelekelele oko sasikucinga xa inkokeli yeli qela yangena eHolweni yoBukumkani ngenye imini. Yayinxilile. Umveleli wesiphaluka, owayenikela intetho, wothuka gqitha. “Ndiyakholwa!” yakhwaza isitsho le nkokeli yeqela lezihange njengoko yayibetha umva wesihlalo ngamandla kangangokuba saphuka. Yandula ke yamthi nqaku umveleli wesiphaluka. Kodwa ngequbuliso yazola, waza omnye kubaphulaphuli owayesakuba ngumhlobo wayo besesesikolweni wayikhuphela ngaphandle.

Ekugqibeleni, injengele yomkhosi yacel’ umngeni le nkokeli yeli qela ukuba balwe bobabini ngemipu. Le njengele yaxhoma inja efileyo kummandla weevenkile nombhalo othi: “Phuma uphele kule dolophu, okanye okufanayo kuya kwenzeka kuwe.” Esi sihange sahamba, yaye iimeko zaphucuka eVallegrande.

Ngamanye amaxesha sasihamba iiyure ezili-12 ngamahashe ukuya kushumayela kwiidolophana ezisemaphandleni. Kwenye yezi lali umfundisi-ntsapho wasamkela ngobubele waza kamva waba liNgqina likaYehova. Ngesinye isihlandlo ndaboleka imeyile ukuze ndiye emaphandleni, kodwa ngalo lonke ixesha idlula kwikhaya lomntu owayesakuba ngumniniyo, yayingena kulo, yaye kwakufuneka basikhuphe basibeke endleleni kwakhona.

Ucelomngeni—Kodwa Sekunjalo Ndaqhubeka Ndisisityebi

Njengokuba kunjalo ngabanye abavangeli basemazweni abaninzi, ndiye ndafumanisa ukuba olona celomngeni lukhulu lusenokungabi bubushushu okanye izinambuzane, ingqele okanye ukuphakama, isenokungabi zizo kwanezifo nobuhlwempu. Kunoko, lusenokuba kukungqubana kweempawu zobuntu. Zibangelwa yintoni ‘iinzima ezinjalo entlanganweni kaYehova?’ Oku kwandimangaliso, yaye ndade ndaqalisa nokuthandabuza ukuba uYehova wayendityebisa ngeentsikelelo. Ndandula ke ndakhumbula isibhalo esingentsikelelo kaYehova esikwiMizekeliso 10:22. Inxalenye yesibini yale ndinyana ithi, “Akongezi mbulaleko kuyo.” Ngoko asimele simbeke ityala uYehova ngezi nzima. Ndafikelela ekuqondeni ukuba ziyinxalenye yoko uAdam wakudlulisela kuthi yaye ziqukiwe koko uPawulos akuchaza kumaRoma 8:22: “Yonke indalo iyancwina, inenimba kunye.”

Ndandibhalelana noWalter Meynberg weBheteli yaseKhanada, yaye ngoxa ndandisekhefini eKhanada ngowe-1966, satshata saza sabelwa eLa Paz, isixeko esiyintloko saseBolivia. Enjani yona intsikelelo ekube yiyo ukubona amabandla apha ekhula ukusuka kwelinye kuphela ukufika kwam eBolivia ukuya kwangama-24, kwiimbombo zonke zesi sixeko. Kwenzeke okufanayo nakwezinye izixeko zeli lizwe. Eneneni, iqela labavakalisi abali-160 ababeshumayela iindaba ezilungileyo ukufika kwam okokuqala eBolivia ngowe-1955 liye lakhula ukusa kuma-7 000!

Umzekelo wozimiselo lukamama awasimisela wona kude kudala uye waphumela ekubeni abangaphezu kweshumi kwintsapho yakowethu esondeleyo babe kwinkonzo yexesha elizeleyo. Ndivuyiswa kukuba utata waba liNgqina elizahluleleyo, yaye abantu abangaphezu kwama-30 endaye ndaba nelungelo lokufundisisa nabo iBhayibhile baye babhaptizwa. Ngaba obo asibobutyebi? Ewe, ndikholelwa ukuba bubo. Eneneni, ‘intsikelelo kaYehova—yiyo eye yandityebisa.’

[Picture of Walter and Elsie Meynberg on page 10]