Mzukise UYehova Ngobutyebi Bakho

‘ANDISOSITYEBI; ndiselula yaye ndinezinto ezimbalwa.’ ‘Andifundanga kuyaphi; ndinokumnika ntoni na uYehova?’ ‘Ndinesiphene; uYehova wosel’ endixolela.’ ‘Iintsuku sele zihambile kum; andisenakubuye ndizuze ubutyebi.’

Ngaba uneengcinga ezinjengezi engqondweni yakho njengokuba uqwalasela umxholo weli nqaku? Ukanti, usenokuba usisityebi kunokuba ucinga. Khumbula amazwi eNkosi uYesu kwibandla laseSmirna athi: “Ndiyayazi imisebenzi yakho, nembandezelo, nobuhlwempu (noko usisityebi).” (ISityhilelo 2:9) Ngaphambilana kwiNtshumayelo yaseNtabeni uYesu wayethe: “Ningaziqwebeli ubutyebi emhlabeni . . . Ziqwebeleni ke ubutyebi emazulwini . . . Kuba apho bukhona ubutyebi benu, yoba lapho nentliziyo yenu.” (Mateyu 6:19-21) Ngaba la mazwi eNkosi yethu ayakukhuthaza? Ewe, kusenokwenzeka ukuba ikho into onayo uBawo wethu osemazulwini, uYehova, noNyana wakhe abayigqala ixabisekile. Makhe sihlolisise.

Ubuhle Bobutsha—Amandla Nenzondelelo

Umntu oselula unokuyinikela njani inkonzo exabisekileyo kuYehova? IMizekeliso 20:29 iyasiqinisekisa ukuba abantu abaselula banobutyebi obungummangaliso—amandla omzimba. Hayi indlela okuhlaziya ngayo ukubona umntu oselula enikela amandla nokuhlaziyeka kwakhe ekukhonzeni uThixo wethu!

Makhe sibuyele emva kancinane embalini siye ekuqaleni kweminyaka yee-1930 xa iqela lolutsha layivayo inyaniso eseBhayibhileni. Omnye one-16 leminyaka ubudala waboleka kumhlobo wakhe incwadi ethi Creation eyayiluncedo lokufundisisa iBhayibhile, neyayipapashwe yiWatch Tower Society. Xa wafika kwisahluko esithi “Isidalwa Esitsha” waza wafunda ngokuzinikela, wakwazi awayefuna ukukwenza ngobomi bakhe. Ngokukhawuleza, wazahlulela kuMdali ongusomandla. Ngonyaka olandelayo wafunda enye impapasho, ethi Vindication (Incwadi Yokuqala), waza wafunda ngethemba lokuba nesabelo ekuthethelelweni kwegama nolongamo lukaThixo. Le nkcazelo yavuselela kuye umnqweno ovuthayo wenkonzo yexesha elizeleyo. Kwangaloo nyaka wenza isicelo sobuvulindlela, yaye ukuza kuthi ga kulo mhla usaqhubeka kwinkonzo yexesha elizeleyo. Nangona ngoku iqela loontanga bakhe sele liligqibile ikhondo lalo lasemhlabeni, uninzi lwabo baseleyo lusabonisa umoya wokuzinikela ngomphefumlo uphela kuBawo wethu osemazulwini.

Namhlanje ngaba ulutsha olungamaKristu lubonisa kwaolu phawu luxabisekileyo? Ngokuqinisekileyo lwenjenjalo! Iingxelo ezikwiYearbook zibonisa ukuba isihlwele sabantu abaninzi ngoku sithelela izintlu zoovulindlela. (INdumiso 110:3) EPhilippines kunikelwa ingxelo yokuba i-13 ekhulwini labo bonke oovulindlela ngabangaphantsi kwama-20 eminyaka ubudala. Ngaba oko kunjalo nakwezinye iindawo? Ewe, kunjalo. Ngokomzekelo, uhlolisiso olwenziwe kwisiqithana saseTrinidad nesaseTobago lutyhila ukuba kwabhaliswa oovulindlela abatsha abangama-282 phakathi koSeptemba 1, 1986, noSeptemba 30, 1988. Kwelo nani, ama-48 ayengaphantsi kweminyaka engama-20 ubudala. Ubungathanda ukuva komnye wabo?

Phulaphula uCharmaine Francis. Uthi: “Ukususela kwimihla yobusana bam, abazali bam babethetha nam ngokukhonza uYehova nokuhlala ndithembekile kuye. Xa abazali bam babendibuza ukuba ndandiya kuthini na ukuba babevalelwe entolongweni ngenxa yokushumayela iindaba ezilungileyo, ndandidla ngokuthi, ‘Ndiya kukhonza uYehova.’ Ndazinikela xa ndandine-13 leminyaka ubudala, ndaza ndabhaptizwa xa ndine-14 leminyaka ubudala. Ngokukhawuleza emva koko, ngazo zonke iiholide zesikolo, ndandithabatha ubuvulindlela bobuncedani. Ngowe-1983 ndangenelela inkonzo yobuvulindlela obuthe ngxi. Kunyaka wam wokuqala wobuvulindlela, ndaba novuyo lokunceda umama othile ongaphangeliyo ukuba abe ngumkhonzi kaYehova. Ngoku ndiqhuba izifundo zeBhayibhile ezisithoba. Esinye silungiselela ukubhaptizwa, yaye ezinye ezithathu ziyeza kwiintlanganiso.

Ngoku, lutsha, anivumi na ukuba ninokuthile okuxabisekileyo eninokumzukisa ngako uYehova? Kakade ninako! Nangona ngoku nisenokuba anikho kwinkonzo yexesha elizeleyo, ninokumzukisa uYehova ngokweemeko zenu. Kusenokwenzeka ukuba niseneminyaka emininzi eniseza kuyichithela esikolweni. Ukanti, ninethuba elixabisekileyo lokudumisa uYehova kubafundisi-ntsapho benu kwanakwabo nifunda nabo. UChristian Kalloo, oneminyaka elishumi ubudala, weza esikolweni nencwadi yakhe ethi Life—How Did It Get Here—By Evolution or by Creation? Waba yintoni umphumo? Wahambisa imibhalo esixhenxe kwabo banomdla kulo mbandela. Wahambisa nenye kubulungiseleli bendlu ngendlu. Nawe unokwenza okufanayo.—Thelekisa uMateyu 21:15, 16.

UMyaleli Wethu Ozukileyo Uyasifundisa

Umprofeti uIsaya wathi: “INkosi uYehova indinike ulwimi lwabafundileyo.” Uzuko walunika uYehova ngobuchule bakhe bokuthetha. Wakwanikela ingxelo ngedinga likaYehova elithi: “Umoya wam ophezu kwakho, nelizwi lam endilibeke emlonyeni wakho, aliyi kusuka emlonyeni wakho, nasemlonyeni wembewu yakho, nasemlonyeni wembewu yembewu yakho.” (Isaya 50:4; 59:21) Kanye njengokuba abantu abangafundanga nabaqhelekileyo baba ngabapostile bakaYesu waza uThixo wabenza izilumko kwizinto zokomoya, ngaloo ndlela uYehova uye wenza abantu abaqhelekileyo bazizilumko namhlanje.

IYearbook yowe-1986 inenkcazelo ekhuthazayo kwabo bangafundanga kuyaphi okanye bangafundanga kwaphela. Kumazwe amaninzi amaNgqina kaYehova alungiselela iiklasi zokufundisa ukulesa nokubhala ukuze kufundiswe abantu abadala ukufunda. Hayi indlela uYehova aye wabasikelela ngayo abanjalo! Phakathi kowe-1962 nowe-1984 eNigeria, abantu abangama-19 238 benza inkqubela entle kakhulu ekufundeni ukulesa nokubhala yaye ngoku bayakwazi ukuzifundela iBhayibhile kwanokufundela abo banikela ubungqina kubo. Enjani yona ukutyeba intsikelelo ababenayo! Omnye umzalwana waqhuba kakuhle kangangokuba waba ngumyaleli weklasi yokufunda ebandleni lakhe.

Kwaye qwalasela umzekelo kaEzekiel Ovbiagele. Ngethuba lokubhaptizwa kwakhe ngowe-1940 wayengakwazi ukufunda. Ngemva kokufunda ukulesa, wenza inkqubela kangangokuba waba nguvulindlela, yaye kamva, ngowe-1953, wamiselwa njengomveleli ohambahambayo.

Imfundo ayinabudala. Abanye basenokucaphula iqhalo elidala elithi: “Ugotywa uselula!” Oko kusenokuba yinyaniso ngemithi, kodwa abantu abayomithi. Kwanabantu abakhulileyo banako ukufunda yaye benjenjalo ukuba ngokwenene banqwenela ukwazi nokukhonza uYehova. Usenokuba unabathile obaziyo abaye benjenjalo. Ngokomzekelo, eNigeria uAlice Okon wakhuthazwa ukuba afunde iBhayibhile aze eve ngethemba elinikelayo; wakwamkela oko waza wavuyiswa lithemba elizayo. Eneminyaka engama-80, wayengekho mdala ukuba angafunda. Akucingi na ukuba wayivuyisa intliziyo kaYehova? Usisityebi elukholweni. IMizekeliso 3:14 isiqinisekisa ngelokuba ukuba nobulumko ‘kulungile ngaphezu korhwebo lwesilivere, nongeniso lwabo ngaphezu kwegolide embiweyo.’ Xa ubani enokuthetha inyaniso ngokuchanileyo, amazwi akhe aye afane ‘neelamuni zegolide kwizitya zesilivere ezimakhazikhazi.’—IMizekeliso 25:11; Kolose 3:16.

Ukuba Sisityebi Elukholweni Nasemisebenzini Emihle Phezu Kwako Nje Ukuba Nesiphene

Umntu ozelwe enesiphene emzimbeni usenokuziva edimazeke kakhulu njengokuba esiya ekhula yaye esiya ecacelwa yimeko yakhe. Yaye kubuhlungu xa umntu eye wanesiphene emzimbeni ebudaleni. Ngaba akukho themba ngemeko yabanjalo? Akunjalo, loo meko isenokude ibavulele indlela esa kubomi obungunaphakade.

Ebudeni beMfazwe yeHlabathi I, uEdward Stead wayenesitali sokuqeshisa ngamahashe kwidolophana yaseArvada, eWyoming, eUnited States, kwaye inkosikazi yakhe iqhuba ishishini lehotele encinane. Ukuchanabeka kumbathalala owoyikekayo kwawanciphisa amandla akhe okumelana nezifo, waza wahlaselwa sisifo samathambo, esenza amalungu akhe oma waza umzimba wakhe wagogeka kwimo yesihlalo sakhe esinamavili. Nangona wayengakwazi kuzenzela nto, wayesakwazi ukuthetha yaye wayekwazi ukuzishukumisa kancinane izandla zakhe. Okwethuba elithile wayecinga ngokuzibulala. Wandula ke wadibana nenyaniso, waza wayamkela ngovuyo.

Ekuqaleni wayehlala emnyango wehotele aze athethe neendwendwe ezazisiza apho ngokholo lwakhe olutsha. Wayekwazi ukusishukumisa isandla sakhe ngokwaneleyo ukuba avule impapasho yeBhayibhile ukuze abonise abo babesima ukuze baphulaphule. Abathile ababeyixabisa imigudu yakhe babembiza ngokuba ngunyawo-ntle osisiqhwala. Ngokulandelayo, wagqiba kwelokuba wayenokunikela ubungqina nakwezinye iidolophu ukuba wayenokwenzelwa inqwelo-mafutha efanelekele imeko yakhe. Oku kwenziwa, yaye kangangeminyaka emininzi wayenguvulindlela ngale ndlela ingaqhelekanga, ehamba amawaka eekhilomitha phakathi kweWyoming neTexas, ekunye noovulindlela abaselula ababini okanye abathathu ababemnyamekela. Ngalo lonke ithuba lokuphila kwakhe, ubelukhuthazo olukhulu kubo bonke ababemazi.

Ukuba uziva udimazekile ngenxa yesiphene, nceda ufunde ingxelo ekwiphepha 22-5 kwiMboniselo kaNovemba 15, 1986. Onke loo madoda akhankanyiweyo apho angabadala, abaluleki abangokomoya, abafanelekayo ukuthuthuzela abazalwana babo abasenokuba baphilile ngokomzimba kodwa bafuna ukwakhiwa ngokomoya. Hayi indlela abazizityebi ngayo emehlweni kaThixo!—1 Timoti 6:18.

UEsterleta Dick, oneminyaka engama-63 ubudala, ebeliNgqina elibhaptiziweyo kangangeminyaka eli-16. Ngowe-1978 waba yimfama, kodwa ebekhonza njengovulindlela othe ngxi kule minyaka mibini idlulileyo. Kwenzeka njani oku? Kaloku, masimyeke aphendule ngokwakhe.

Uthi, “ngenye imini udade oselula onguvulindlela wandibuza wathi: ‘Dade Dick, usoloko ulufikelela usukelo lwakho njengovulindlela ongumncedani, kutheni ungazami ukuba nguvulindlela othe ngxi nje?’”

UEsterleta wayesoyikela ukuba sisiphazamiso kubazalwana, kodwa wakhumbula ukuba umveleli wesiphaluka wayemkhuthazele inkonzo yobuvulindlela. Uthi: “Ndaqalisa, yaye ngoku ndiye ndachithela iminyaka emibini enkonzweni yobuvulindlela. Ndinikela ubungqina esitratweni kwaye ndinamabuyelo amaninzi. Ngaphezu koko, ndiqhuba izifundo zeBhayibhile zamakhaya ezithandathu. Njani? Ngaphambi kokutyelela umnini-khaya, ndifundelwa umbandela esiza kuwufundisisa nazo zonke izibhalo ezalathisiweyo, ukuze ndikwazi ukugqabaza esifundweni. Abathathu kubantu endifunda nabo iBhayibhile bayaya kunye nam kwiintlanganiso, yaye omnye ubhaptiziwe.”

Nabani Na ‘Unokuzalisa Isandla Sakhe’ Ngomnikelo

Ngaba ukupha kusikelw’ umda kwizinto zokomoya? Akunjalo. Xa uKumkani uDavide wakudala wayesenza amalungiselelo okwakha itempile, wabuza oku: “Ngubani na ke oqhutywa yintliziyo ukuzalisa namhla isandla sakhe ngomnikelo kuYehova?” (1 Kronike 29:5, NW) Nabani na wayenokwenjenjalo. Ngokufanayo namhlanje, abaselula okanye abakhulileyo, abaphile qete okanye abagulayo, abaninzi banqwenela ukwenza umnikelo wokuphathekayo wokuzithandela ukuhambisela phambili izilangazelelo zoBukumkani. Oku kusenokwenziwa kwiofisi yesebe yelizwe likabani okanye kwibandla lasekuhlaleni. Ngale ndlela nabani na anganako, ngokwamandla akhe, ukuncedisa kwiindleko zokubona ukuba iindaba ezilungileyo zivakalisiwe kulo lonke elimiweyo. Oku kulilungelo.—2 Korinte 9:8-12.

Okubaluleke ngakumbi kukuba, unabo ubutyebi bokomoya bokumzukisa uYehova. Oselula unamandla nokuhlaziyeka kobutsha. Ongafundanga unokufunda ukunikela kuYehova isiqhamo semilebe yakhe. Onesiphene unako yaye abathile baye benza inkqubela elwazini, kubulumko, nokuqonda, kangangokuba abaninzi abangobadumisi bakaYehova bexesha elizeleyo nje kuphela kodwa bakwangabaluleki nabalusi ebandleni lamaKristu. Ngaba akusosityebi kunokuba ubucinga? Ngoko, zukisa uYehova ngobutyebi bakho.—Hebhere 13:15, 16.