Ukunyaniseka—Kunexabiso Elingakanani?

“Konyanisekileyo uya kwenza ngokunyaniseka.”—INDUMISO 18:25, “NW.”

1, 2. (a) Kuyintoni ukunyaniseka, yaye iinkalo zako zibuchaphazela njani ubomi bethu? (b) Kutheni kulungile nje ukukhangela kuYehova njengoMzekelo wethu obalaseleyo?

UKUTHEMBEKA, imfanelo, uthando, imbopheleleko, ukuthobeka. La magama adibana ngantoni? Aziinkalo ezahlukahlukeneyo zokunyaniseka. Ukunyaniseka luphawu lobuthixo oluphuma kuzinikelo olusuka entliziyweni. Noko ke, kubantu abaninzi namhlanje, ukunyaniseka kuthetha okuncinane. Ukuthembeka kwiqabane lomtshato, ukuziva unembopheleleko kumalungu akhulileyo entsapho, ukunyaniseka komqeshwa kumqeshi wakhe—konke kuthatyathwa lula ibe ngokufuthi kuyagatywa. Ibe kwenzeka ntoni xa kuphakama ukungqubana kweeendidi zokunyaniseka? Kutshanje, kwelaseNgilani, xa umphathi-mali wachaza inyaniso ngemali yenkampani kubahloli berhafu, waphulukana nomsebenzi wakhe.

² Kulula ukuthetha nje ngokunyaniseka, kodwa ukunyaniseka kokwenyaniso kumele kuxhaswe yimisebenzi engabandakanyi ukulalanisa ngenxa yoloyiko. Njengabantu abangafezekanga, ngokufuthi siyasilela kule nkalo. Ngoko kusilungele ukuba siqwalasele umzekelo walowo ukunyaniseka kwakhe kungenakuthandatyuzwa, uYehova uThixo ngokwakhe.

Umzekelo Wokunyaniseka

3. UYehova uzingqine njani enyanisekile kwinjongo yakhe echazwe kwiGenesis 3:15?

³ Xa uAdam wathi wona, uYehova wayivakalisa ngokucacileyo injongo yakhe yokuhlawulela intsapho yoluntu eyayingekazalwa. Isizinzi seli nyathelo yayiluthando lwakhe ngendalo yakhe engabantu. (Yohane 3:16) Ngexesha elifanelekileyo, uYesu Kristu, imbewu yedinga eyaxelwa ngenx’ engaphambili kwiGenesis 3:15, wangqineka elidini lentlawulelo, yaye kwakunokuba yinto engenakwenzeka ngoYehova ukuba ayirhoxise injongo yakhe awayeyivakalisile. Ngokwamkela idini likaYesu, ukholo lwethu aluyi kusikhokelela kudano.—Roma 9:33.

4. UYehova wazingqina njani enyanisekile kuYesu, ibe waba yintoni umphumo?

⁴ Ukunyaniseka kukaYehova kuYesu kwamomeleza kanobom uNyana ebudeni bexesha lakhe emhlabeni. UYesu wayesazi ukuba umele ajamelane nokufa, yaye wayezimisele ngokuqinileyo ukuhlala enyanisekile kuThixo wakhe ukusa esiphelweni. Ulwazi olupheleleyo olungobukho bakhe bangaphambi kokuba abe ngumntu lwatyhilwa kuye ekubhaptizweni kwakhe nokuthanjiswa kwakhe ngomoya oyingcwele. Ngobusuku bokungcwatywa kwakhe, wathandazela ukubuyiselwa kuYise wasezulwini, ‘kuzuko awayenalo kuYehova lingekabikho ihlabathi.’ (Yohane 17:5) Oku kwakuza kwenzeka njani? Kuphela ngokuthi uYehova angamshiyi uNyana wakhe onyanisekileyo engcwabeni ukuze abole. UYehova wamvusa ekufeni emvusela kubomi bokungafi, ngaloo ndlela ezalisekisa ngokunyanisekileyo idinga elingokwesiprofeto elibhalwe kwiNdumiso 16:10: “Akuyi kuwushiya umphefumlo wam kwelabafileyo.”—IZenzo 2:24-31; 13:35; ISityhilelo 1:18.

5. Ziziphi ezinye izenzo zokunyaniseka ezinxulumene namadinga kaYehova kuYesu?

⁵ Emva kokuvuka kwakhe, uYesu ngokufanayo wayesazi ukuba wayenokukholosa ngamazwi kaYehova okuba ‘iintshaba zakhe uya kuzenza isitulo seenyawo zakhe.’ (INdumiso 110:1) Elo xesha lafika ngowe-1914, ekupheleni ‘kwamaxesha eentlanga,’ xa kwathi kwamiselwa uBukumkani emazulwini. Igunya elithenjisiweyo likaYesu phezu kweentshaba zakhe laqalisa ngokukhutshwa kukaSathana needemon zakhe emazulwini. Liya kufikelela incopho xa bephoswa enzonzobileni kangangeminyaka eliwaka yaye “ookumkani bomhlaba, nemikhosi yabo” betshatyalalisiwe.—Luka 21:24; ISityhilelo 12:7-12; 19:19; 20:1-3.

6. Liliphi ithemba eliqinisekileyo uThixo asinika lona, yaye sinokulubonakalisa njani uxabiso lwethu ngalo?

⁶ Umdumisi wabongoza wathi: “Thembela kuYehova, ugcine indlela yakhe; wokuphakamisa, ulidle ilifa ilizwe.” (INdumiso 37:34) Sinokuba nentembelo yokuba uYehova uya kuqhubeka eligcina ilizwi lakhe, yaye ukutyhubela ukupheliswa kweli hlabathi lingendawo, uya kusindisa amadoda, abafazi nabantwana ‘abagcina indlela yakhe.’ Elo binzana ngokolwimi lwesiHebhere santlandlolo lidlulisela ingcamango yokukhuthala nokuthembeka ekukhonzeni uYehova. Ngoko ke, eli asiloxesha lokuba buthathaka okanye lokudlalisa ngamalungelo enkonzo esiwanikiweyo. Eli lixesha lokuba sizibhokoxe kwinkonzo yokunyaniseka kuThixo wethu nakuBukumkani bakhe. (Isaya 35:3, 4) Sinemizekelo emihle yokusikhuthaza. Makhe siqwalasele eminye yayo.

Oosolusapho Babonakalisa Ukunyaniseka

7, 8. (a) Ziziphi izabelo zomsebenzi uYehova awazinika uNowa nentsapho yakhe? (b) Intsapho kaNowa yazingqina njani ikufanelekele ukukhuselwa nguThixo ebudeni bukanogumbe womhlaba wonke?

⁷ Xa uYehova wagqiba kwelokuba alitshabalalise ngamanzi kanogumbe ibutho labantu abangendawo, wenza umnqophiso nentloko-ntsapho engusolusapho uNowa ukuze kulondolozwe intsapho yakhe nokuze ubomi buqhubeke kulo mhlaba. (Genesis 6:18) UNowa wayenombulelo ngenxa yethemba lokukhuselwa nguThixo, kodwa yena nentsapho yakhe kwafuneka bazingqine bekufanelekele oko. Njani? Ngokwenza oko uYehova wayekuyalele. Okokuqala babejongene nomsebenzi omkhulu wokwakha umkhombe. Wakuba ugqityiwe, kwafuneka uNowa awuzalise ngazo zonke iintlobo zezilwanyana nokutya okwaneleyo kokuzondla kangangethuba elide. Kodwa kwakungaphelelanga apho. Ebudeni bexesha elide lokulungiselela, uNowa wayesenza konke awayenokukwenza kumsebenzi omkhulu wokushumayela, elumkisa ngomgwebo kaThixo ozayo.—Genesis, isahluko 6 nesesi-7; 2 Petros 2:5.

⁸ IBhayibhile isixelela ukuba “wenza uNowa konke uThixo abemwisele umthetho ngako, wenza njengoko.” (Genesis 6:22; 7:5) UNowa nentsapho yakhe bazingqina benyanisekile ekuphumezeni izabelo zabo. Umoya wabo wokuzincama wathetha ukuba ixesha labo balichitha ngendlela eyingenelo, kodwa umsebenzi wawunzima yaye ukushumayela kungelula. Ngokungabi nabantwana kwabo ngaphambi koMkhukula, kwabanceda oonyana bakaNowa nabafazi babo ukuba banikel’ ingqalelo kumsebenzi abawabelweyo baze balungelelanise imicimbi yabo. Loo ntlekele yoMkhukula yezisa isiphelo sobulungisa kwelo hlabathi lingendawo. Kuphela yaba nguNowa, umfazi wakhe, noonyana bakhe abathathu noomolokazana bakhe abasindayo. Sinokuvuya kuba baba ngabanyanisekileyo kuThixo nakulwalathiso lwakhe, njengoko ngamnye wethu eyinzala kaNowa ngoShem, uHam okanye uYafete.—Genesis 5:32; 1 Petros 3:20.

9. (a) Ukuvavanya kukaYehova uAbraham kwaba luvavanyo lokunyaniseka kwakhe ngayiphi indlela? (b) UIsake wakubonisa njani ukunyaniseka koku?

⁹ Xa uAbraham walungiselela ukunikela ngoIsake njengedini, wakwenza oko ngenxa yokuwuthobela ngokunyanisekileyo umyalelo kaYehova. Okunjani kona ukuvavanywa kokunyaniseka kwakhe! Kambe ke, uYehova wamnqanda uAbraham, esithi: “Ndiyazi ngoku ukuba uyamoyika uThixo; akunqabanga nonyana wakho kum, emnye kuwe.” Noko ke, senza kakuhle ukucinga ngoko kwenzekayo ngaphambi koko. Ebudeni bohambo lweentsuku ezintathu ukuya kwiNtaba yaseMoriya, ngokuqinisekileyo uAbraham wayenexesha elaneleyo lokuzihlolisisa ngenyameko izinto aze acinge ngeny’ indlela. Kuthekani ngoIsake, owayethwele iinkuni zedini nowathi wavuma ukubotshwa izandla neenyawo? Akazange athandabuze ukumthobela uyise, uAbraham, engazange athandabuze nendima awayeza kuyiphumeza, nakubeni kwakubonakala ukuba ikhondo lakhe lokunyaniseka laliza kumphulukanisa nobomi bakhe.—Genesis 22:1-18; Hebhere 11:17.

Ukunyaniseka KobuKristu

10, 11. AmaKristu okuqala anikela yiphi imizekelo yokunyaniseka?

¹⁰ UYehova ebesoloko esenza izinto ngokunyaniseke ngokwenene. Umpostile uPawulos ubongoza esithi: “Yibani ngabaxelisa uThixo.” (Efese 5:1, 2) Njengoko oosolusapho basabelayo, ngoko amaKristu ayeza kusabela kwangaloo ndlela. AmaKristu okuqala amisela umzekelo omhle kunqulo olunyanisekileyo, njengoko amava alandelayo ebonisa.

¹¹ Kubonakala ukuba umlawuli waseRoma uConstantius I, uyise woMlawuli uConstantine, wayenentlonelo enzulu ngabalandeli bakaKristu. Ukuvavanya ukunyaniseka kwamaKristu awayeqhagamshelene ngokusondeleyo nebhotwe lakhe, wawaxelela ukuba ayenokuhlala engabakhonzi bakhe kuphela ukuba ayekuvuma ukubingelela kwizithixo. Axelelwa ukuba ukwala kwakuya kukhokelela ekubeni agxothwe nasekubeni awaphathe gadalala. Ngokusebenzisa eli cebo lilula, uConstantius wayefuna ukubona abo babengasokuze balalanise ekunyanisekeni kwabo. Abo bazingqina benyanisekile kuThixo nakwimigaqo yakhe bagcinwa bengabakhonzi balo mlawuli, bambi bade baba ngabacebisi abathenjiweyo. Abo bangazange bathembeke kumyalelo kaThixo bagxothwa ngendlela ehlazisayo.

12. Abaveleli abangamaKristu bafanele bakubonakalise njani ukunyaniseka, yaye kutheni kuyimfuneko nje oku ukwenzela impilo-ntle yebandla?

¹² Nangona ukunyaniseka kufanele kuphawule ubomi bawo onke amaKristu, kuTito 1:8 (NW) kukhankanywa ngokukhethekileyo uludwe lweempawu ezifunekayo kwindoda eza kuba ngumveleli ongumKristu. UWilliam Barclay uthi uhoʹsi·os, igama lesiGrike eliguqulelwe apha ngokuthi “onyanisekileyo,” lichaza “umntu othobela imithetho engunaphakade eyayikho ngaphambi kwemithetho yabantu nesekhoyo nangoku.” Kuyimfuneko ukuba abadala banyaniseke ngolo hlobo ekuthobeleni imithetho kaThixo. Lo mzekelo ulungileyo uya kulinceda ibandla ukuba likhule lize lomelele ngokwaneleyo ukuba lijamelane neemvavanyo neengcinezelo ezisenokulisongela njengomzimba okanye amalungu awo angamanye. (1 Petros 5:3) Abadala abamiselweyo banembopheleleko enkulu emhlambini yokungaze balalanise ekunyanisekeni kwabo kuYehova, kuba ibandla lilulekwa ukuba ‘lixelise bona elukholweni lwabo.’—Hebhere 13:7.

Ukunyaniseka—Kunokunaniswa Ngantoni?

13. Intetho eqhelekileyo ethi “Bonke abantu banokunanisa ngokunyaniseka kwabo” ithetha ukuthini, yaye yiyiphi imizekelo ebonakala ikungqinela oku?

¹³ “Bonke abantu banokunanisa ngokunyaniseka kwabo” ngokutsho kwentetho eqhelekileyo ekuthiwa yathethwa nguMhlekazi uRobert Walpole, inkulumbuso yaseBritani yenkulungwane ye-18. Isishwankathela kakuhle isibakala sokuba ukutyhubela imbali ukunyaniseka kuye kwananiswa ngako ngengenelo yokuzingca. Khawucinge ngomguquleli weBhayibhile uWilliam Tyndale, owathi ngempazamo wamkela uHenry Phillips njengomhlobo onyanisekileyo. Ngowe-1535 uPhillips ngokunganyanisekanga wangcatsha uTyndale kwiintshaba zakhe, nto leyo eyakhokelela ekuvalelweni kukaTyndale ngokukhawuleza nasekufeni kwakhe ngaphambi kwexesha. Omnye umbhali-mbali uthi lo kaPhillips, ekunokwenzeka ukuba wayeligosa lokumkani wamaNgesi okanye lamaKatolika angamaNgesi, “wafumana umvuzo oncumisayo ngenxa yomsebenzi wakhe ofana nokaYuda.” Kakade ke, lo mbhali-mbali wayebhekisela kuYuda Sikariyoti, owamkela iingqekembe zesilivere ezingama-30 njengexabiso lokungcatsha uYesu Kristu. Noko ke, asifanele sigqibe ngokusuka kule mizekelo ukuba “ixabiso” lokunanisa ngokunyaniseka komntu lisoloko liyimali. Akunjalo.

14. Ukunyaniseka kukaYosefu kuYehova kwavavanywa njani, ibe waba yintoni umphumo?

¹⁴ Xa umfazi kaPotifare wabongoza uYosefu ukuba ‘alale naye,’ ukunyaniseka kwakhe kuYehova kwavavanywa. Wayeza kwenza ntoni? Enengqondo ephangaleleyo ngemigaqo eyayibandakanyekile, uYosefu wabaleka waphuma endlwini, ezimisele ukuba wayengenakuze ‘enze obu bubi bukhulu kangaka, one uThixo.’ Ithemba lokuyoliswa ziintlobano zesini alizange likoyise ukunyaniseka kukaYosefu kuThixo wakhe, uYehova.—Genesis 39:7-9.

15. UAbhisalom wakubonisa njani ukunganyaniseki, ibe waba yintoni umphumo?

¹⁵ Ukanti, kukho ezinye iingozi; ukuba namabhongo kunokukusingela phantsi ukunyaniseka. Leyo yayiyintshukumisa awayenayo uAbhisalom ekuvukeleni uyise, uKumkani uDavide. Ngokwenza iyelenqe nobuqhophololo, uAbhisalom wafuna ukuzenza athandwe ngabantu. Ekugqibeleni, wagaya umkhosi wokuvukela abaxhasi abanyanisekileyo bakayise. Ukufa kwakhe ebulawa nguYowabhi kwakufikisa esiphelweni ukunganyaniseki kukaAbhisalom kuyise, uDavide, kodwa elinjani ixabiso ekwafuneka elihlawule ngenxa yokuzama ukubhukuqa ilungiselelo lolawulo lobuthixo!—2 Samuweli 15:1-12; 18:6-17.

Ukunyaniseka Okungenakunaniswa Ngako

16. Eyesi-2 kwabaseKorinte 11:3 ityhila ntoni ngeentshukumisa zikaSathana?

¹⁶ Nangona uSathana esithi wonke ubani unokunanisa ngokunyaniseka kwakhe, yaye oku kwaba njalo ngoAbhisalom, kwakungenjalo ngoYosefu, ibe akuzange kube njalo ngabanquli bakaYehova abanyanisekileyo. Sekunjalo, uSathana uya kwenza konke anokukwenza ukusenza singayigcini ingqibelelo yethu kuMdali wethu. Umpostile uPawulos wavakalisa uloyiko lwakhe lokuba “njengokuba inyoka yamlukuhlayo uEva ngobuqhetseba bayo,” ukucinga kwethu kusenokonakaliswa, nto leyo enokusikhokelela ekulalaniseni ukunyaniseka kwethu kuYehova nakunqulo lwakhe.—2 Korinte 11:3.

17. Abanye baye bananisa ngamalungelo axabisekileyo enkonzo ngenxa yantoni?

¹⁷ Kuyinto efanelekileyo ukuba sizibuze oku: ‘Ngaba kukho naliphi na ixabiso ebendiya kulamkela ukuze nditshintshise ngelungelo lam lokukhonza uMdali wam ngokunyaniseka?’ Kulusizi ukuthi, ngokungafaniyo noYosefu, bambi ababengabakhonzi bakaYehova abazahluleleyo baye bakutshintshisa ngexabiso elingephi ukunyaniseka kwabo. Kwanabadala abathile baye bananisa ngamalungelo abo axabisekileyo enkonzo engcwele ngenxa yokuziyolisa kokomzuzwana ngokwanelisa iminqweno yenyama. Enoba bangabadala okanye akunjalo, uninzi lwabo baye benza oku luye lwaphulukana nomanyano lwentsapho, ukuthandwa nokuhlonelwa libandla kwanenkoliseko kaYehova—Lowo kanye unako ukunika amandla okulondoloza ukunyaniseka nokuxhathisa nasiphi na isilingo esivela kuSathana.—Isaya 12:2; Filipi 4:13.

18. Kutheni kubalulekile nje ukuthobela isilumkiso esikweyoku-1 kuTimoti 6:9, 10?

¹⁸ Abanye, beqhutywa ngamabhongo osukelo lwezinto zehlabathi, baye “bazibhodloza ngobuhlungu obuninzi,” phezu kwazo nje izilumkiso ezicacileyo zeBhayibhile. (1 Timoti 6:9, 10) UDemas, umKristu okhankanywe nguPawulos, woyisakala kule nkalo, mhlawumbi okwexeshana okanye ngokusisigxina. (2 Timoti 4:10) Ukunyaniseka kuYehova akunakuze kulalaniswe kuze kungabikho miphumo iyintlekele. “UThixo yena asingowokuhlekisa. Kuba into athe wahlwayela yona umntu, wovuna kwayona.”—Galati 6:7.

19, 20. (a) Ziziphi ezinye zeengozi ezinxulumene nokubukela umabonwakude ngokugqithiseleyo? (b) Nguwuphi umzekelo omiselwe yenye intsapho engamaNgqina?

¹⁹ Maxa wambi izinto ezibonakala zingenamsebenzi zisenokusikhohlisela ekunaniseni ngokunyaniseka kwethu. Ngokomzekelo, ingxelo evela eUnited States ithi iintsapho ezininzi zichitha malunga nesiqingatha sexesha lazo laxa ziphaphamile zisemakhaya ekubukeleni umabonwakude, abantu abaselula bekhotyokiswa koku ngokugqithiseleyo. Ukuba umKristu ebeya kondla ingqondo yakhe ubukhulu becala ngomabonwakude, ngesini nogonyamelo olulapho, kungekudala ebenokuyisingela phantsi imilinganiselo yakhe yobuKristu. Ngokulula oko bekunokumkhokelela ekubeni anganyaniseki, aphambuke kwiindlela zikaYehova. Unxulumano olubi ngolo hlobo lonakalisa imikhwa elungileyo. (1 Korinte 15:33) Asimele silibale ukuba iZibhalo zisiluleka ukuba sizinike ixesha lokufundisisa nokucamngca ngeLizwi likaYehova. Ngaba ixesha elininzi elichithwa kuphunyulwe phambi komabonwakude kukutshintshisa okufanelekileyo ngexesha ebelinokusetyenziselwa ukuzuza ulwazi olukhokelela kubomi obungunaphakade njengomnquli onyanisekileyo kaYehova? Namhlanje abaninzi abazuze ulwazi lwenyaniso kuye kwafuneka benze uhlengahlengiso olukhulu kwindlela abacinga ngayo kulo mba.—1 Timoti 4:15, 16; 2 Timoti 2:15.

²⁰ UTakashi ngusomashishini ongumJapan ohlala eNgilani. Wayedla ngokuchitha iiyure ezintathu okanye ezine phantse busuku ngabunye ebukele umabonwakude nentsapho yakhe. Emva kokuba yena nomfazi wakhe bebhaptiziwe kwiminyaka emithathu edluleyo, wagqiba ekubeni isifundo seBhayibhile sobuqu nesentsapho zibe kwindawo yokuqala. Ngokunciphisa ixesha lakhe lokubukela umabonwakude ukusa nje kumlinganiselo wemizuzu eli-15 okanye engama-30 ngosuku, wakwazi ukukhokela kakuhle entsatsheni. Nangona uTakashi kufuneka afundisise esebenzisa iiBhayibhile ezimbini, eyesiNgesi neyesiJapan, uye wakhula msinya ngokomoya, ibe ngoku ukhonza njengesicaka solungiselelo kwibandla elintetho isisiNgesi. Umfazi wakhe unguvulindlela ongumncedani. Uthi, “ukuze silondoloze ubumoya bamakhwenkwana ethu amabini, kwakhona mna nomfazi wam siyaqiniseka suku ngalunye ngoko sibavumela ukuba bakubone kumabonwakude.” Ukuziqeqesha okunjalo kunomvuzo.

21. Yintoni esiyaziyo ngamacebo kaSathana, ibe sinokuzikhusela njani?

²¹ Sinokuqiniseka ngako oku: USathana uyabazi ubuthathaka bethu, mhlawumbi ngaphezu kokuba sibazi thina. Akayi kuvumela nantoni na imthintele njengoko ezabalazela ukuba silalanise okanye ukwenza buthathaka umoya wethu wokunyaniseka kuYehova. (Thelekisa uMateyu 4:8, 9.) Ngoko ke, sinokuzikhusela njani? Ngokuthi rhoqo sihlale sikhumbula uzahlulelo lwethu nangokuthi sikuvuyele ukuvelisa ubuchule njengoko silungiselela iintswelo zabanye ezingokomoya. Njengabakhonzi abanyanisekileyo bakaYehova, sifanele sihlale sixakekile kwinkonzo yakhe size ngamaxesha onke sikhokelwe liLizwi lakhe elingcwele. Oku kuya kusinceda kuzimiselo lwethu olomeleleyo lokuba akukho nto uSathana anokusinanisela ngayo eya kuze isiphambukise ekubeni ngabanyanisekileyo kuThixo.—INdumiso 119:14-16.

Ithini Impendulo Yakho?

◻ UYehova noYesu baye bakubonakalisa njani ukunyaniseka?

◻ Yiyiphi eminye imizekelo yeBhayibhile engokunyaniseka?

◻ Yintoni uSathana asenokusithembisa yona okanye azame ukuyenza?

◻ Sinokuzomeleza njani ukuze sihlale sinyanisekile kunqulo lwethu kuYehova?