Ufanele Unyaniseke Kubani?

“Ilizwe lethu: . . . Enoba kwenzeka ntoni, siya kuxhasa lona.”—Stephen Decatur, igosa leenqanawa laseUnited States, 1779-1820.

UKUNYANISEKA kwilizwe likabani enoba sekumnyam’ entla kubonakala kuyinto ephambili kwabaninzi. Abanye baya kuwabeka ngenye indlela amazwi kaStephen Decatur ngokuthi, ‘Ndazalwa kule cawa, ndiya kufela kuyo, enoba sekumnyam’ entla.’

Enyanisweni, sidla ngokunyaniseka kwilizwe okanye kunqulo esizalelwe kulo, kodwa isigqibo sokunyaniseka kothile sibaluleke gqitha ukuba ubani angasuka nje asenze. Noko ke, ukujamelana nembambano yokunyaniseka kufuna inkalipho yaye kulucelomngeni.

Imbambano Yokunyaniseka

Ibhinqa elithile elakhulela eZambia lithi: “Ndandiyithanda icawa ndisemncinane. Ekhaya sikhula sithandaza imihla ngemihla kwigumbi lentsapho elingcwele, sigcina iintsuku zonqulo, yaye sasisiya rhoqo etempileni. Unqulo lwethu lwaluyinxalenye yendlela yethu yokuphila ekhaya nasekuhlaleni.”

Noko ke, xa lalisele liyigabhule iminyaka yeshumi elivisayo, laqalisa ukufundisisa iBhayibhile namaNgqina kaYehova yaye kungekudala emva koko lagqiba kwelokuba litshintshe unqulo lwalo. Ngaba lalibonisa ukunganyaniseki?

UZlatko wakhulela eBosnia, yaye kangangexesha elithile wayesilwa kwimfazwe eyayisiliwa kwilizwe lakhe. Naye waqalisa ukufundisisa iBhayibhile namaNgqina kaYehova. Ngoku uyakwala ukulwa emfazweni. Ngaba akanyanisekanga?

Indlela oyiphendula ngayo loo mibuzo ixhomekeka kwindlela ocinga ngayo. Ibhinqa elikhankanywe ngaphambilana lithi: “Kwindawo endihlala kuyo, kulinyala elikhulu ukutshintsha unqulo lukabani; kugqalwa njengokunganyaniseki kwintsapho kabani nasekuhlaleni.” Ngokufanayo, amajoni awayekunye noZlatko abagqala njengabancethezi bonke abantu abangafuni ukulwela icala labo. Kodwa elo bhinqa noZlatko bavakalelwa kukuba oko bakwenzayo kubangelwa kukunyaniseka koyena mntu ubalulekileyo—ukunyaniseka kuThixo. Eyona nto ibalulekileyo kukuba, uThixo ubajonga njani abo bafuna ukunyaniseka kuye?

Ukunyaniseka Kokwenene—Imbonakaliso Yothando

UKumkani uDavide wathi kuYehova uThixo: “Kulowo unyanisekileyo uya kwenza ngokunyaniseka.” (2 Samuweli 22:26) Igama lesiHebhere eliguqulelwe ngokuthi “ukunyaniseka” apha lithetha ububele obuhambisana nokubambelela kuloo nto uyenzayo de ifezeke. Njengomama onomntwana oncancayo, uYehova ngothando uzisondeza kwabo banyanisekileyo kuye. UYehova wathi kubakhonzi bakhe abanyanisekileyo kuSirayeli wamandulo: “Umfazi angalulibala na usana lwakhe, angavakalelwa ngonyana wesisu sakhe? Nokuba bona abafazi banokulibala, kodwa mna andiyi kukulibala.” (Isaya 49:15) Abo bafuna ukunyaniseka kuThixo enoba iimeko zinjani na ubaqinisekisa ukuba uya kubanyamekela ngothando.

Ukunyaniseka kuYehova kusekelwe kuthando. Kwenza ubani athande oko uYehova akuthandayo aze athiye izinto ezimbi uYehova azithiyileyo. (INdumiso 97:10) Ekubeni olona phawu lukaYehova lubalaseleyo iluthando, ukunyaniseka kuThixo kunceda ukuba ubani angenzi izinto ngendlela engabonisi uthando kwabanye. (1 Yohane 4:8) Ngoko ke ukuba ngenxa yokunyaniseka kuThixo ubani utshintsha iinkolelo zakhe zonqulo, oku akuthethi ukuba akasayithandi intsapho yakhe.

Ukunyaniseka KuThixo—Eyona Nto Iyinzuzo

Ibhinqa elikhankanywe ngaphambilana lixela oko lakwenzayo ngale ndlela: “Ekufundisiseni kwam iBhayibhile, ndamazi uYehova njengoThixo oyinyaniso, yaye ndaba nolwalamano olusenyongweni naye. UYehova akafani noothixo endandibanqula ngaphambili; unothando olugqibeleleyo, okusesikweni, ubulumko namandla. Ekubeni uYehova efuna sizinikele kuye ngokupheleleyo, kwafuneka ndibashiye abanye oothixo.

“Abazali bam babesoloko bendixelela ukuba abayithandi kwaphela into endiyenzileyo yaye ndandibaphoxile. Ndandikufumanisa kunzima gqitha oko, ekubeni ndandikuthanda gqitha ukukholisa abazali bam. Kodwa njengokuba ndandiya ndihambela phambili ngolwazi lwenyaniso yeBhayibhile, kwazicacela ukuba ndifanele ndenze isigqibo. Ndandingenakumlahla uYehova.

“Ukukhetha ukunyaniseka kuYehova kunakwizithethe zonqulo akuthethi ukuba andinyanisekanga kwintsapho yakowethu. Ndizabalazela ukubabonisa ngamazwi nangezenzo ukuba ndiyayiqonda indlela abavakalelwa ngayo. Kodwa ukuba andinyanisekanga kuYehova, ngoko ndisenokuyithintela intsapho yakowethu ukuba ingabi nalwazi ngaye, yaye oko kuya kuba kokona kunganyaniseki.”

Ngokufanayo, ubani akangomncethezi ukuba ngenxa yokunyaniseka kuThixo uhlala engundilele kwezobupolitika aze angavumi ukulwa nabanye. UZlatko uyichaza ngale ndlela into awayenzayo: “Nangona ndakhuliswa njengomKristu nje ngegama, ndatshata umntu ongenguye. Xa kwaqalisa imfazwe, kwafuneka ndinyaniseke macala omabini. Kwafuneka ndikhethe icala endifanele ndilwe kulo. Ndandisemfazweni kangangeminyaka emithathu enesiqingatha. Ekugqibeleni mna nomfazi wam sabalekela eCroatia, apho sadibana namaNgqina kaYehova.

“Kwisifundo sethu seBhayibhile, saqonda ukuba sifanele ngokuyintloko sinyaniseke kuYehova yaye ufuna sibathande abamelwane bethu kungakhathaliseki ukuba ngaboluphi na unqulo okanye uhlanga. Ngoku mna nomfazi wam simanyene kunqulo lukaYehova, yaye ndiye ndafunda ukuba andinakunyaniseka kuThixo ndize ndilwe nommelwane wam.”

Ukunyaniseka Okusekelwe Kulwazi Oluchanileyo

Ekubeni uYehova enguMdali wethu, ukunyaniseka kuye kufanele kube yeyona nto iphambili kuthi. (ISityhilelo 4:11) Noko ke, ukuze siphephe ukunyaniseka kuThixo okubonisa impambano nto leyo eyingozi, ukunyaniseka kwethu kufanele kusekelwe kulwazi oluchanileyo. IBhayibhile iyasibongoza: ‘Mawahlaziyeke amandla engqondo yenu, nambathe ubuntu obutsha obadalwa ngokokuthanda kukaThixo nokunyaniseka kokwenyaniso.’ (Efese 4:23, 24) Indoda eyaziwayo eyabhala loo mazwi aphefumlelweyo yaba nenkalipho yokuzihlolisisa izinto eyayikhuliswe ukuba inyaniseke kuzo. Uhlolisiso lwayo lwakhokelela ekubeni iguqukele kwinto eluncedo.

Ewe, uSawule wajongana novavanyo lokunyaniseka, njengokuba kunjalo ngabaninzi kwixesha lethu. USawule wakhuliswa kwintsapho eyayibambelele ngokungqongqo kwizithethe zayo, yaye wanyaniseka ngokubalaseleyo kunqulo lwakowabo. Ukunyaniseka kwakhe kunqulo lwakhe kwade kwamenza ukuba alwe nabo babengavumelani neengcamango zakhe. USawule wayesaziwa ngokugqogqa izindlu zamaKristu aze awarhuqe ukuze ohlwaywe yaye de abulawe.—IZenzo 22:3-5; Filipi 3:4-6.

Sekunjalo, xa uSawule wafumana ulwazi oluchanileyo lweBhayibhile, wenza oko abahlobo bakhe babekujonga njengento angenakuyenza. Watshintsha unqulo lwakhe. USawule owaziwa kamva njengompostile uPawulos, wakhetha ukunyaniseka kuThixo kunakwizithethe. Ukunyaniseka kuThixo okusekelwe kulwazi oluchanileyo kwenza uSawule wangumntu obanyamezelayo abanye, onothando nolukhuthazo, nto leyo eyahlukileyo kwindlela awayephila ngayo ngaphambili eyayiyingozi neyempambano.

Kutheni Ufanele Unyaniseke?

Ukuvumela ukunyaniseka kwethu kusekelwe kwimilinganiselo kaThixo kuneenzuzo ezibonakalayo. Ngokomzekelo, ingxelo yowe-1999 yeAustralian Institute of Family Studies yathi phakathi kwezinto ezisisiseko sokuba nomtshato ohlala ixesha elide nowanelisayo “kukunyaniseka nokuthembeka . . . nokuxhalabela izinto zokomoya.” Kule ngxelo ifanayo kwafunyaniswa ukuba “imitshato eyomeleleyo neyanelisayo” iyawonwabisa amadoda namabhinqa, aba sempilweni, aze aphile ixesha elide nangakumbi yaye imitshato eyomeleleyo ibangela abantwana babe namathuba angakumbi okonwaba.

Kweli hlabathi lanamhlanje lingazinzanga, ukunyaniseka kunjengentambo yokunceda lowo udadayo xa etshona ukuze abambelele kwinqanawa yokumsindisa. Ukuba “lowo udadayo” akanyanisekanga, uya kuzifumana ephoswa ngapha nangapha ngamaza nangumoya. Kodwa ukuba unyaniseke kwinto engafanelekanga, kuya kuba njengokungathi intambo abambelele kuyo ibotshelelwe kwinqanawa ezikayo. NjengoSawule, unokukhokelelwa ekubeni enze izinto eziyingozi. Noko ke, ukunyaniseka kuYehova okusekelwe kulwazi oluchanileyo, kusenza sizinze yaye kusikhokelela elusindisweni.—Efese 4:13-15.

UYehova ubathembisa oku abo banyanisekileyo kuye: “UYehova ngumthandi wokusesikweni, yaye akayi kubashiya abanyanisekileyo bakhe. Ngokuqinisekileyo baya kulindwa ukusa kwixesha elingenammiselo.” (INdumiso 37:28) Kungekudala, bonke abo banyanisekileyo kuYehova baya kuvunyelwa ukuba bangene kumhlaba oyiparadesi, apho kungasayi kuphinda kubekho usizi neentlungu yaye baya kuvuyela ukuba nolwalamano olungapheliyo kungekho yantlukwano yezobupolitika neyonqulo.—ISityhilelo 7:9, 14; 21:3, 4.

Kwanangoku, izigidi zabantu emhlabeni wonke ziye zafumanisa ukuba ulonwabo lokwenyaniso lubakho kuphela ngokunyaniseka kwabo kuYehova. Kutheni ungavumeli amaNgqina kaYehova akuncede ukuba uhlolisise indlela okujonga ngayo ukunyaniseka usebenzisa inyaniso yeBhayibhile? IBhayibhile isixelela oku: “Hlalani nizivavanya enoba niselukholweni kusini na, hlalani nizicikida oko nikuko nina ngokwenu.”—2 Korinte 13:5.

Kufuna inkalipho ukuhlolisisa ukholo lwethu nesizathu sokuba sinyaniseke kulo, kodwa iinzuzo ziwufanele umgudu xa oko kuya kuphumela ekubeni sisondele ngakumbi kuYehova uThixo. Ibhinqa elikhankanywe ngaphambilana lichaza indlela abantu abaninzi abavakalelwa ngayo xa lisithi: “Ndiye ndafunda ukuba ukunyaniseka kuYehova nakwimilinganiselo yakhe kusinceda ukuba siziphathe ngendlela elungeleleneyo iintsapho zethu size sibe ngabantu abaluncedo ekuhlaleni. Enoba zinzima kangakanani na iimvavanyo, ukuba sinyanisekile kuYehova, uya kuhlala enyanisekile kuthi.”

[Imifanekiso ekwiphepha 6]

Ulwazi oluchanileyo lwenza ukuba uSawule atshintshe into awayenyaniseke kuyo

[Umfanekiso okwiphepha 7]

Kutheni ungahlolisisi izinto onyaniseke kuzo usebenzisa inyaniso yeBhayibhile?

[Inkcazelo Ngemifanekiso ekwiphepha 4]

Churchill, upper left: U.S. National Archives photo; Joseph Göbbels, far right: Library of Congress