Ubomi Emva Kokufa—Imibuzo Engaphendulwanga
“UKUBA uthe umfo wafa, wophila na?” (Yobhi 14:14) Lo mbuzo, owaphakanyiswa kumakhulu eminyaka eyadlulayo ngusolusapho uYobhi, uye waphononongwa ziindidi zonke zabantu ukutyhubela iminyaka, yaye kuye kwanikelwa intaphane yeempendulo.
AmaGrike amandulo ayesithi imiphefumlo yabafi yayiqhubeka iphila. Le miphefumlo yayiwezwa umlambo iStyx ukuya kwilizwe elikhulu elingaphantsi komhlaba ekuthiwa lelemimoya. Apho abagwebi babegwebela le miphefumlo kwintuthumbo kwintolongo eneendonga eziphakamileyo okanye kulonwabo olungapheliyo kwiparadisi yase-Elysium. Abanye abantu bamandulo babecinga ukuba imiphefumlo yayisiba ziinkwenkwezi okanye oozatshoba. Ukanti abanye babekholelwa ekubeni imiphefumlo yayikhanya kwaye yayitsalelwa enyangeni; nyanga nganye xa inyanga ithwasile, yayidluliselwa elangeni.
Namhlanje, iingcamango ezingobomi basemva kokufa ziyaqhubeka zisanda. AmaHindu namaBhuda akholelwa ekuzalweni ngokutsha. AmaSilamsi afundisa ukuba umphefumlo uyasinda ekufeni komzimba yaye kumgwebo wokugqibela uya kuya eparadisi okanye esihogweni. Inkoliso yamaProtestanti ifundiswa ukuba imiphefumlo iyaqhubeka iphila emva kokufa ukuze inandiphe ulonwabo ezulwini okanye ithuthunjiswe kumadangatye esihogo. Kuyo yonke le mbudede ubuKatolika bongezelela imfundiso yeLimbo neyendawo yentlambululo-miphefumlo.
Kumazwe athile, iinkolelo zoko kufane kucingelwe ngokuba yimiphefumlo yabafi zingumxube ongaqhelekanga wesithethe sasekuhlaleni nobuKristu begama. Ngokomzekelo, kulisiko phakathi kwamaKatolika namaProtestanti amaninzi eNtshona Afrika ukugquma izipili xa uthile esifa ukuze kungabikho bani unokujonga aze abone umoya waloo mntu ufileyo. Kwiintsuku ezingamashumi amane emva kokufa kothandekayo, intsapho nezihlobo zenza umgidi wokubhiyozela ukunyukela komphefumlo wakhe ezulwini. Emva koko, ngokuqhelekileyo ngeKrismesi okanye ngoSuku Lonyaka Omtsha, izalamane ziya emangcwabeni zize zigalele utywala engcwabeni lakhe. Zide zithethe nofileyo, zicele amathamsanqa zize zimbalisele nangemeko yentsapho.
Ngokucacileyo, iinkonzo zehlabathi azivumelani kuyaphi mayela neyona nto kanye yenzekayo emva kokufa. Kanti, phantse zibe zivumelana ngaxhatha linye ngebango elisisiseko: ukungafi komphefumlo womntu. Iimfundiso ezininzi ezingobomi basemva kokufa ziziinkalo nje ezahlukahlukeneyo zale mfundiso isisiseko.
Sekunjalo, ingqondo iyabethabethana ngenxa yothotho lwemibuzo: Kanye kanye ivela phi ingcamango yokuba umphefumlo awufi? Ngaba iyafundiswa eSibhalweni? Ukuba kunjalo, kutheni kwaneenkonzo ezingezozabuKristu ziyifundisa? Le asiyomibuzo yokubethwa nje ngoyaba. Nokuba unqulo lwakho lukholelwa entwenini na, ukufa kusisibakala ekumelwe kujanyelwane naso. Ngaloo ndlela le mibandela ikubandakanya ngokobuqu ngokupheleleyo. Ngoko ke siyakumema ukuba uyiqwalasele ngengqondo ephangaleleyo le mibandela.