Ngaba Kukho Ubomi Emva Kokufa?
“UKUBA indoda eyomeleleyo iyafa ngaba inokuphila kwakhona?” wabuza usolusapho uYobhi kwiminyaka engama-3 500 eyadlulayo. (Yobhi 14:14) Lo mbuzo uye wadida uluntu kangangamawaka eminyaka. Kususela kudala, abantu kuyo yonke indawo baye bawuphonononga lo mbandela yaye baye bavela neengcamango ezahlukahlukeneyo.
Abaninzi abathi bangamaKristu bakholelwa kwizulu nesihogo. AmaHindu wona, akholelwa ekuveleni ngokutsha. Ephefumla ngembono yamaSilamsi, uEmir Muawiyah, igosa kwinkonzo yamaSilamsi, uthi: “Sikholelwa kwelokuba kuza kubakho imini yomgwebo emva kokufa, apho uza kuya kuma phambi kukaThixo, uAllah, nto leyo eya kufana nqwa nokuma enkundleni.” Ngokwenkolelo yamaSilamsi, uAllah uya kubuhlolisisa ngelo xesha ubomi bomntu ngamnye aze akuthumele eparadesi okanye esihogweni.
ESri Lanka, amaBhuda namaKatolika ahlala ezivule ng’a iifestile neengcango azishiye zithe genge xa kukho umntu ofileyo emakhayeni abo. Kukhanyiswa ngofinyafuthi, yaye ibhokisi ibekwa ngendlela yokuba iinyawo zikamfi zijonge ngasemnyango wangaphambili. Bakholelwa ukuba benzela umoya, okanye umphefumlo kamfi, uphume kakuhle endlwini.
URonald M. Berndt weUniversity of Western Australia uthi iiNzalelwane zaseOstreliya zikholelwa kwelokuba “abantu banomoya ongenakutshatyalaliswa.” Izizwe ezithile zaseAfrika zikholelwa kwelokuba amakhatshakhowana nje abantu aba zizithunzela xa efile, ngoxa abantu abadumileyo besiba zizinyanya, eziza kuhlonelwa kuze kucanyagushwe kuzo njengeenkokeli ezingabonakaliyo zasekuhlaleni.
Kwamanye amazwe, iinkolelo ngokuphathelele imeko yabafi yingxubevange yezithethe zabantu noko kufane kubizwe ngokuba bubuKristu. Ngokomzekelo, amaKatolika namaProtestanti amaninzi aseNtshona Afrika, anesiko lokugquma izipili xa kufe umntu ukuze umoya kamfi ungabonwa.
Ufumana iimpendulo ezahlukahlukeneyo xa ubuza abantu lo mbuzo, ‘Kwenzeka ntoni kuthi xa sisifa?’ Ukanti, ingcamango esisiseko yazo zonke ezo mpendulo yile: Kukho nto ithile emntwini engafiyo neqhubeka iphila emva kokufa. Abanye abantu bakholelwa ukuba loo “nto” ngumoya. Ngokomzekelo, kweminye imimandla yaseAfrika naseAsia kuquka ummandla wePasifiki oyiPolynesia, iMelanesia, neMicronesia, abantu abaninzi bakholelwa ukuba umoya—kungekhona umphefumlo—awufi. Enyanisweni, ezinye iilwimi azinalo kwagama elithi “umphefumlo.”
Ngaba umntu ophilayo unomoya? Ngaba ngokwenene loo moya uyaphuma emzimbeni ekufeni? Ukuba kunjalo, kwenzeka ntoni kuwo? Yaye liliphi ithemba elikhoyo ngabafileyo? Le mibuzo ayifanele ityeshelwe. Enoba unayiphi imvelaphi yesiko okanye yonqulo, ukufa yinto ekhoyo efanele kujanyelwane nayo. Ngoko ke le mibandela ibandakanya wena ngokobuqu. Siyakukhuthaza ukuba ukhe uwuqwalasele lo mbandela.