Ngaba Uzabalazela Amalungelo Angakumbi?
“Ukuba ubani ungxamele ubuveleli, unqwenela umsebenzi omhle.”—1 TIMOTI 3:1.
1. Kukufezwa kwayiphi injongo okukokona kubalulekileyo kumaNgqina kaYehova?
AMANGQINA KAYEHOVA aneenjongo ezifanelekileyo ezalathiswa neziphunyezwa ngendlela yobuthixo. Oku akumangalisi, ekubeni uThixo wawo eneenjongo eziphakamileyo yaye esoloko eziphumeza iinjongo zakhe. (Isaya 55:8-11) Abakhonzi bakaYehova abafanele babe njengabantu abangenazinjongo zilungileyo nabaphila ubomi bokungakhathali bexhalabele ingenelo yobuqu ngakumbi kuneyabanye abantu. Okona kubalulekileyo kumaNgqina kaThixo kukufezwa kwenjongo ephakamileyo yokuvakaliswa kwesigidimi soBukumkani nokwabelana nabanye ngolwazi olunik’ ubomi lweLizwi likaThixo.—INdumiso 119:105; Marko 13:10; Yohane 17:3.
2. Yiyiphi injongo efanele ibe lusukelo lwamadoda angamaKristu eyakhankanywa nguPawulos kweyoku-1 kuTimoti 3:1?
2 Kwintlangano kaYehova, kukwakho nezinye iinjongo eziphakamileyo. Umpostile uPawulos wacaphula enye yazo xa wabhala oku: “Lithembekile ilizwi eli lithi, Ukuba ubani ungxamele ubuveleli, unqwenela umsebenzi omhle.” Indoda enjalo ifuna ukufeza okuthile ukuze kungenelwe abanye. Inqwenela “umsebenzi omhle,” kungekhona ubomi obulula nobutofotofo. Enye inguqulelo ithi: “Liyinyaniso elokuba indoda elangazelela ubunkokeli inebhongo elincomekayo.”—1 Timoti 3:1, Phillips.
Iingozi Kubadala
3, 4. Kutheni le nto indoda ezabalazela amalungelo angakumbi okuba ngumveleli ifanele iyilinde intliziyo yayo?
3 Kungayiphi indlela ethi indoda elangazelela ukuba ngumveleli ongumKristu ibe “nebhongo elincomekayo”? Kaloku, ibhongo ngumnqweno wenzondelelo wokufeza injongo ethile. Enyanisweni, akho amabhongo aphakamileyo nangaphakamanga. Kodwa ukuba indoda ngokuzithoba izabalazela ukuba ngumveleli ngenxa yokuba ifuna ukukhonza abanye, inkonzo yayo inikelwa ngeentshukumisa ezifanelekileyo yaye inokuphumela kwiintsikelelo zokomoya. Kodwa ifanele iyilinde intliziyo yayo.—IMizekeliso 4:23.
4 Abantu abathile abanamabhongo bafuna uzuko. Abanye bafuna ukulawula abantu abangoowabo. Ukubawela udumo okanye igunya kufana nengcambu ebolileyo enokubangela umthi okhangeleka uphilile uwe bhuma. KwanomKristu usenokunikezela kwibhongo elinentshukumisa engafanelekanga ngolo hlobo. (IMizekeliso 16:18) Umpostile uYohane wathi, “Ndalibhalela ibandla; ke usuke lowo uthanda ukuzenza mkhulu kubo [“ofuna ukuba phambili entweni yonke,” Phillips], uDiyotrefe, angasamkeli. Ngenxa yoko, ukuba ndithe ndafika, ndomkhumbuza imbopheleleko yakhe ayenzayo, ephololoza ngathi ngamazwi angendawo; enganeli koko, usuka angabamkeli abazalwana ngokwakhe, abalele abanga bangenjenjalo, abakhuphe ebandleni.” (3 Yohane 9, 10) Ibhongo likaDiyotrefe lalingelolabuKristu. Ikratshi nokufuna ngamabhongo igunya phezu kwabanye akwamkelekanga phakathi kwabalandeli bakaYesu bokwenyaniso.—IMizekeliso 21:4.
5. Abaveleli bafanele bazinyamekele ngasiphi isimo sengqondo imbopheleleko zabo?
5 Umveleli ongumKristu onyamekela imisebenzi yakhe ngentshukumisa efanelekileyo akayi kusukela amabhongo okuzingca. Uya kuwugqala lo msebenzi mhle wobuveleli bobuKristu njengelungelo elivela kuThixo aze awaluse umhlambi kaThixo ‘kungengakunyanzelwa, kodwa ngokuzithandela; kungengenxa yenzuzo embi, kodwa ngokuthumekelela; kungabi njengozigagamelayo izahlulo zawo kodwa, njengomzekelo kumhlambi.’ (1 Petros 5:2, 3) Ewe, abaveleli bafanele bakulumkele ukuba nekratshi nokufuna ukusebenzisa igunya kakubi.
6. Kutheni umdala engamele abagagamele nje abantu bakaThixo?
6 Umdala akafanele awagagamele amanye amaKristu, kuba ungumsébenzi kunye nawo, kungekhona ‘olugagamelayo ukholo lwawo.’ (2 Korinte 1:24) Xa abapostile abathile babefuna ukubalasela, uYesu wathi: “Niyazi ukuba abaphathi beentlanga bayazigagamela, nabo bazizikhulu benza ngegunya kuzo. Ze kungabi njalo ke phakathi kwenu nina; osukuba enga angaba mkhulu phakathi kwenu, makabe ngumlungiseleli wenu; nosukuba enga angaba ngowokuqala phakathi kwenu, makabe ngumkhonzi wenu; kwanjengokuba uNyana woMntu engezanga kulungiselelwa; weza kulungiselela, nokuncama ubomi bakhe, bube yintlawulelo yokukhulula abaninzi.” (Mateyu 20:20-28) Umdala akangoMalusi Omkhulu kodwa ungumalusi ongaphantsi kuphela. Ukuba uyawugagamela umhlambi, ubonakalisa umoya wekratshi. Umphumo uya kuba yintlekele ngakumbi ukuba uhendela nabanye ukuba bamncedise ekuhambiseleni phambili iinjongo zakhe zekratshi. Umzekeliso uthi: “Balisikizi kuYehova bonke abantliziyo izidlayo; kakade ke, ababi msulwa.”—IMizekeliso 16:5.
7, 8. (a) Kutheni kuyimfuneko nje ukuba abadala abangamaKristu babe ngabazithobileyo? (b) Nikela umzekelo womdala ozithobileyo.
7 Ngoko abadala abangamaKristu bafanele ‘bazithobe ngaphantsi kwesandla esinamandla sikaThixo.’ Ikratshi liyakuthintela ukuba ungabi ngosebenzisekayo ngokomoya, kuba ngabathobekileyo kuphela abanesimo esifanelekileyo sentliziyo nesengqondo sokwenza ukuthanda kukaThixo. “UThixo uyabachasa abanekratshi, abababale ke abazithobileyo.” (1 Petros 5:5, 6) Ewe, uYehova uyabasikelela abazithobileyo. Kukhethwa kubo ukuze kumiselwe amadoda afanelekayo okukhonza njengabadala abangamaKristu.
8 Imbali yanamhla yamaNgqina kaYehova izaliswe ziingxelo zenkonzo yokuzithoba enikelwe ngabantu ngabanye abahlonel’ uThixo. Ngokomzekelo, qwalasela uW. J. Thorn onobulali, owayekhe wangumhambi ngezonqulo, okanye umveleli ohambahambayo, nomsébenzi waseBheteli kangangethuba elide. Ethetha ngaye, omnye umKristu wathi: “Andisokuze nakanye ndiwalibale amazwi awawathethayo uMzalwana uThorn andinceda ukuza kufikelela kulo mhla. Wathi, yaye ndiyacaphula, ‘Nanini na ndingenwa kukuzicingela ngaphezu kokuba ndimele ndenjenjalo, ndizithabatha ndizise ekoneni, ngokungathi kunjalo, ndize ndithi: “Lusuntswanandini lothuli. Yintoni onayo ukuba ungade ube nekratshi?”’” Olunjani ukuncomeka uphawu abafanele balubonakalise abadala nabanye! Khumbula, ‘umvuzo wolulamo nowokoyika uThixo, bubutyebi, nozuko, nobomi.’—IMizekeliso 22:4.
Umnqweno Ovela KuThixo Wokukhonza
9. Kutheni le nto kusenokuthiwa umnqweno wokukhonza njengomveleli uvela kuThixo?
9 Ngaba umnqweno wokukhonza njengomveleli uvela kuThixo? Ewe, kuba umoya kaYehova unikela ukhuthazo, inkalipho namandla okunikela inkonzo engcwele kuye. Ngokomzekelo, kwenzeka ntoni xa abalandeli bakaYesu ababetshutshiswa bathandazela ukungafihlisi ekushumayeleni? “Yazanyazanyiswa indawo ababehlanganisene kuyo, bazaliswa bonke nguMoya oyiNgcwele, balithetha ilizwi likaThixo ngokungafihlisiyo.” (IZenzo 4:27-31) Ekubeni umoya oyingcwele uvelisa iziqhamo ezinjalo, usekwanokumshukumisela umntu ekubeni azabalazele amalungelo angakumbi.
10. (a) Sisiphi esinye isizathu esinokubangela indoda engumKristu ingawazabalazeli amalungelo angakumbi? (b) Ukuba uThixo usinika amalungelo enkonzo, yintoni esinokuqiniseka ngayo?
10 Kusenokubangelwa yintoni ukuba umKristu okhulileyo angawazabalazeli amalungelo angakumbi? Usenokuba yindoda etyekele kwizinto zokomoya kodwa evakalelwe kukuba ayifaneleki. (1 Korinte 2:14, 15) Kambe ke, sifanele sibe ngabathozamileyo, sikuqonda ukusikelwa kwethu imida. (Mika 6:8) Kunokuthi ngekratshi sizicingele ukuba singabona bayifanelekelayo imbopheleleko ethile, kulungile ukukhumbula ukuba “bunabathozamileyo ubulumko.” (IMizekeliso 11:2) Kodwa sikwafanele sikhumbule ukuba ukuba uThixo usinika ilungelo lenkonzo, uya kusipha kwanamandla afunekayo okuliphumeza. Kunjengokuba uPawulos wathi: “Ndinokuzenza izinto zonke, ndikulowo undomelezayo.”—Filipi 4:13.
11. Yintoni enokwenziwa ngumKristu ongawazabalazeliyo amalungelo angakumbi ngenxa yokuba evakalelwa kukuba uswele ubulumko obaneleyo bokunikela isiluleko?
11 UmKristu usenokungazabalazeli amalungelo angakumbi kuba evakalelwa kukuba uswele ubulumko obaneleyo bokunikela isiluleko. Mhlawumbi usenokuzuza ubulumko ngokuba ngumfundi okhutheleyo weLizwi likaThixo, yaye ngokuqinisekileyo ufanele abuthandazele ubulumko. UYakobi wabhala oku: “Ukuba ke ubani kuni uswele ubulumko, makacele kuThixo, onika bonke engenakumbi, engangcikivi; wobunikwa. Ke makacele ekholwa, engathandabuzi; kuba lowo uthandabuzayo ufana nokulatyuza kolwandle, luqhutywa ngumoya, luntsileka. Kuba loo mntu makangabi uya kwamkela nto kuyo iNkosi. Indoda emphefumlo umbaxa iyahlozinga kuzo zonke iindlela zayo.” (Yakobi 1:5-8) Ephendula umthandazo, uThixo wanika uSolomon “intliziyo enobulumko enokuqonda” eyamenza wakwazi ukwahlula phakathi kokulungileyo nokubi xa egweba. (1 Kumkani 3:9-14) Imeko kaSolomon yayikhethekile, kodwa ngofundisiso lwenkuthalo noncedo lukaThixo, amadoda aphathiswe imbopheleleko ebandleni anokubaluleka abanye ngobulungisa. “UYehova upha ubulumko; emlonyeni wakhe kuphuma ukwazi nokuqonda.”—IMizekeliso 2:6.
12. Ukuba indoda ayiwazabalazeli amalungelo angakumbi ngenxa yokuzixhalela, yintoni esenokuyinceda?
12 Umlinganiselo othile wokuzixhalabela usenokuyenza indoda irhoxobise ekuzabalazeleni amalungelo angakumbi. Isenokucinga ukuba ayinakukwazi ukuthwala imbopheleleko enzima yokuba ngumdala. KwanoPawulos wavuma wathi: “Ndingungelwe imihla ngemihla kukuwaxhalela onke amabandla.” (2 Korinte 11:28) Kodwa lo mpostile wayeyazi into amakayenze xa enexhala, kuba wabhala wathi: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.” (Filipi 4:6, 7) Ewe, umthandazo nokukholosa ngoThixo kunokuba luncedo ekuthomalaliseni ixhala.
13. Isenokuthandaza njani indoda ukuba imathidala ngokuzabalazela amalungelo angakumbi?
13 Ukuba ixhala elithile liyazingisa, indoda emathidala ngokuzabalazela amalungelo angakumbi isenokuthandaza njengoko uDavide wenzayo: “Ndigocagoce, Thixo, uyazi intliziyo yam; ndicikide, uzazi iingcinga-ngcinga [“iingcinga eziphazamisayo,” NW] zam; ubone ukuba kukho ndlela yobubi na kum, undikhaphele kwindlela engunaphakade.” (INdumiso 139:23, 24) Nokuba ziluhlobo luni na iingcinga zethu “eziphazamisayo” okanye “ezixhalabisayo,” uThixo unokusinceda simelane nazo ukuze senze inkqubela ngokomoya. (Bona iThe New International Version.) Oku kuchazwe kakuhle kwenye indumiso ngokuthi: “Ukuba ndithi, Lwatyibilika unyawo lwam, isuka inceba yakho, Yehova, indixhase. Ebuninzini beengcinga-ngcinga [“iingcinga eziphazamisayo,” NW] zam ngaphakathi kwam, iintuthuzelo zakho ziyawuyolisa umphefumlo wam.”—INdumiso 94:18, 19.
Khonza Ngovuyo Ngokuvisisana Nokuthanda KukaYehova
14. Kutheni le nto indoda engawazabalazeliyo amalungelo angakumbi ifanele ithandazele umoya oyingcwele kaThixo?
14 Ukuba indoda engumKristu iyasilela ukuzabalazela amalungelo angakumbi ngenxa yokuzixhalela, iimvakalelo zokungafaneleki, okanye ukuswela ukhuthazo, ngokuqinisekileyo bekuya kuba kokufanelekileyo ukuthandazela umoya kaThixo. UYesu wathi: “Ukuba ke ngoko nina, ningendawo nje, niyakwazi ukubapha abantwana benu izipho ezilungileyo, wobeka phi na ke yena uYihlo wasemazulwini, ukugqithisela ukubapha uMoya oyiNgcwele abo bamcelayo?” (Luka 11:13) Ekubeni uxolo nokuzeyisa kuzezinye zeziqhamo zomoya, lo moya unokusinceda simelane nexhala okanye iimvakalelo zokungafaneleki.—Galati 5:22, 23.
15. Yimithandazo eluhlobo luni enokunceda abo baswele intshukumisa ukuba bazenze bafumanekele amalungelo enkonzo?
15 Kuthekani ngokuswela iintshukumisa? NjengamaKristu abhaptiziweyo, sifanele sithandazele ukuba uThixo asincede senze oko kumkholisayo. UDavide wabongoza: “Ndazise iindlela zakho, Yehova . . . Ndinyathelise enyanisweni yakho, undifundise.” (INdumiso 25:4, 5) Imithandazo enjengale iya kusinceda siphephe ikhondo eliphosakeleyo, yaye sinokuthandaza ngendlela efanayo ukuba siswele iintshukumisa zokuba sizabalazele amalungelo angakumbi. Sinokumcela uYehova ukuba asenze sifune ukwamkela amalungelo enkonzo. Enyanisweni, ukuba sithandazela umoya kaThixo size sithobele ulwalathiso lwawo, ngokungathandabuzekiyo siya kuzenza sifumaneke ukuba sinikwa amalungelo enkonzo. Ngapha koko, umkhonzi kaThixo akanakuze awuxhathise umoya wakhe.—Efese 4:30.
16. Sisiphi isimo sengqondo esilukhuthazo olunamandla lokuzabalazela amalungelo angakumbi ebandla?
16 Ekubeni “sinengqiqo kaKristu,” sivuyiswa kukwenza ukuthanda kukaThixo. (1 Korinte 2:16) UYesu wayenesimo esifanayo nesomdumisi, owathi: “Ukwenza okulikholo kuwe, Thixo wam, ndikunanzile; nomyalelo wakho usezibilinini zam ngaphakathi.” (INdumiso 40:8) UKristu wathi: “Yabona, ndiza kwenza ukuthanda kwakho,” yaye wakwenza kwada kwesa ekufeni emthini wentuthumbo. (Hebhere 10:9, 10) Umnqweno wokwenza nantoni na esinokuyenza enkonzweni kaYehova ulukhuthazo olunamandla lokuzabalazela ukufumana amalungelo ebandleni.
Khangela Kwikamva
17. (a) Kutheni le nto amadoda ngoku angasakwaziyo ukunikela inkonzo ngokuzeleyo njengoko ayekade esenza engafanele adimazeke? (b) Liliphi elona lungelo likhulu kunawo onke?
17 Ngenxa yeengxaki zempilo okanye ngenxa yezinye izizathu, abathile ababekade benyamekela iimbopheleleko ezibalulekileyo zebandla ngoku abanawo amalungelo anjalo. Aba bantu abafanele badimazeke. Siyazi ukuba amadoda athembekileyo amaninzi angasakwaziyo ukunikela inkonzo ngokuzeleyo njengoko ayekade esenza asemi ngokuqinileyo njengabagcini bengqibelelo. (INdumiso 25:21) Enyanisweni, abadala abazithobileyo abangamagqala banokuqhubeka benikela ngamava abo ngokuqhubeka bekwiqumrhu labadala. Nangona bexhwalekile ngenxa yobudala okanye iziphene, akuyomfuneko ukuba barhoxe. Okwangoku, Ngqina ngalinye likaYehova limele lilixabise ilungelo eligqwesileyo ‘lokuthetha ngozuko lobukumkani bukaThixo’ njengoko singabaphakamisi begama lakhe elingcwele.—INdumiso 145:10-13.
18. (a) Ukuba ubani uye wasuswa kuluhlu lwabadala okanye lwezicaka zolungiselelo, yintoni ekusenokufuneka eyenzile? (b) Sisiphi isimo sengqondo esihle omnye umdala owayesusiwe kuluhlu awasibonakalisayo?
18 Ukuba wawukhe wangumdala okanye isicaka solungiselelo kodwa ngoku awukhonzi kweso sigxina, qinisekiswa kukuba uThixo usakukhathalela, yaye mhlawumbi uya kukunika amalungelo ongawalindelanga kwithuba elizayo. (1 Petros 5:6, 7) Ukuba kufuneka wenze iinguqulelo ezithile, yiba ngokulungeleyo ukuvuma impazamo uze uyilungise ngoncedo lukaThixo. Bambi abaye basuswa kuluhlu lwabadala baye banesimo sengqondo esingesosabuKristu, yaye abambalwa baye baphola okanye baye bayishiya inyaniso. Kodwa hayi indlela ekububulumko ngayo ukufana nabo baye babonisa umoya omhle! Ngokomzekelo, xa umdala owayekhonze iminyaka emininzi kuMbindi Merika wasuswayo kuluhlu lwabadala, wathi: “Kubuhlungu kakhulu kum ukuba ndiye ndaphulukana nelungelo ebendilixabisa kangangethuba elide kangaka. Kodwa ndiza kusebenza nzima ngayo nayiphi na indlela abazalwana abafuna ukundisebenzisa ngayo ndize ndisebenzele ukulifumana kwakhona ilungelo lam lenkonzo.” Ekuhambeni kwexesha, lo mzalwana waba nelungelo lokukhonza njengomdala kwakhona.
19. Liliphi icebiso elifanelekileyo elinikelwa kumzalwana oye wasuswa kuluhlu lwabadala okanye lwezicaka zolungiselelo?
19 Ngoko, ukuba ubuthe wasuswa kuluhlu lwabadala okanye lwezicaka zolungiselelo, yiba nomoya wokuzithoba. Siphephe isimo sengqondo sokubonakalisa ingqumbo esiya kukwenza ungawafanelekeli amalungelo kwixesha elizayo. Umoya wokuhlonel’ uThixo uzisa intlonelo. Endaweni yokudimazeka, cinga ngendlela uYehova abusikelela ngayo ubulungiseleli bakho okanye abendlu yakho. Yakhe intsapho yakho ngokomoya, tyelela abagulayo, uze ukhuthaze ababuthathaka. Ngaphezu kwako konke, lixabise ilungelo lakho lokuzukisa uThixo nelokuvakalisa iindaba ezilungileyo njengomnye wamaNgqina kaYehova.—INdumiso 145:1, 2; Isaya 43:10-12.
20. Iqumrhu labadala linokumnceda njani owayesakuba ngumveleli okanye isicaka solungiselelo?
20 Iqumrhu labadala lifanele liqonde ukuba ukususwa kuluhlu lwabadala kusenokubangela ingcinezelo kowayesakuba ngumveleli okanye isicaka solungiselelo, kwanokuba uthe ngokuzithandela walincama elo lungelo. Ukuba akasuswanga kubudlelane, kodwa abadala bayabona ukuba loo mzalwana udandathekile, bafanele banikele uncedo lokomoya lothando. (1 Tesalonika 5:14) Bafanele bamncede aqonde ukuba uyafunwa libandla. Kwanokuba bekuye kwafuneka elulekiwe, kusenokungabi lixesha elide kangako ngaphambi kokuba indoda ezithobileyo nenombulelo iphinde ifumane amalungelo angakumbi enkonzo ebandleni.
21. Ngoobani abaye bawalinda amalungelo enkonzo, yaye yintoni ecetyiswayo kwabo bawalindileyo namhlanje?
21 Ukuba uzabalazela amalungelo angakumbi, kusenokufuneka ulinde ithutyana ngaphambi kokuba ufumane amalungelo angakumbi enkonzo. Musa ukuphelelwa ngumonde. UMoses walinda iminyaka engama-40 ngaphambi kokuba uThixo amsebenzise xa wayekhulula amaSirayeli ebukhobokeni eYiputa. (IZenzo 7:23-36) Ngaphambi kokumiselwa njengelandela likaMoses, uYoshuwa wayesele ekhonze ithuba elide njengomlungiseleli wakhe. (Eksodus 33:11; Numeri 27:15-23) UDavide walinda kangangethuba elithile ngaphambi kokubekwa kwitrone yakwaSirayeli. (2 Samuweli 2:7; 5:3) Kuyacaca ukuba uPetros noYohane Marko babekhe bacikidwa kangangethuba elithile. (Mateyu 26:69-75; Yohane 21:15-19; IZenzo 13:13; 15:36-41; Kolose 4:10) Ngoko ukuba ngoku akunazimbopheleleko ebandleni, kusenokuba uYehova ukunika ithuba lokuba uxonxwe ngokufumana amava angakumbi. Nokuba imeko iyintoni na, funa uncedo lukaThixo njengoko uqhubeka uzabalazela amalungelo angakumbi, ibe usenokukusikelela ngamalungelo awongezelelekileyo enkonzo. Okweli thuba, sebenza ngokukhutheleyo ukuze ufanelekele ilungelo ebandleni yaye ubonakalise umoya kaDavide, owathi: “Umlomo wam mawuthethe indumiso kaYehova, inyama yonke ilibonge igama lakhe elingcwele ngonaphakade kanaphakade.”—INdumiso 145:21.
Ubuya Kuphendula Njani?
◻ Ziziphi iingozi abafanele abadala abangamaKristu bazilumkele?
◻ Yintoni enokubanceda abo bangawazabalazeliyo amalungelo angakumbi ngenxa yokuzixhalela okanye iimvakalelo zokungafaneleki?
◻ Yintoni enokushukumisela umntu ukuba azenze afumanekele imbopheleko yebandla?
◻ Kungasiphi isimo sengqondo abafanele ababesakuba ngabadala nezicaka zolungiselelo bakhangele ngaso kwikamva?
[Umfanekiso okwiphepha 19]
UW. J. Thorn wamisela umzekelo omhle njengomdala ozithobileyo
[Umfanekiso okwiphepha 21]
NjengoYesu, ngaba ukulungele ukwenza nantoni na onokuyenza enkonzweni kaYehova?