“Zenzeleni Uzuko LukaThixo Izinto Zonke”
Iimbalasane ZeyokuQala KwabaseKorinte
UZUKO lukaYehova uThixo lolwembaluleka enkulu kubo bonke abo bamnqula “ngomoya nangenyaniso.” (Yohane 4:23, 24) Ngenxa yoko, umpostile uPawulos wawaxelela amaKristu angoowabo kwiKorinte yamandulo oku: “Nokuba niyadla, nokuba niyasela, nokuba nenza yiphi na into, zenzeleni uzuko lukaThixo izinto zonke.” (1 Korinte 10:31) Ukwenza oku kufuna ukuba samkele indlela kaYehova yokucombulula iingxaki zethu kweli hlabathi lithe gxwabha kunqulo lobuxoki, lithanda izinto eziphathekayo neliziphethe kakubi.
AmaKristu aseKorinte ayelufuna uncedo lukaThixo ukuze acombulule iingxaki, kuba ayephila kwisixeko esichumileyo nesiziphethe kakubi esizaliswe lunqulo lobuxoki. Imi kwisiqwenga somhlaba esidibanisa iGrisi nePeloponnisos, iKorinte yayilikomkhulu lephondo laseRoma iAkaya kwaye yayinabemi abaqikelelwa kuma-400 000. UPawulos waseka ibandla apho malunga nowama-50 C.E.—IZenzo 18:1-11.
AmaKorinte ayembhalele uPawulos embuza ngomtshato nokudliwa kwenyama ebingelelwe kwizithixo. (7:1) Wayenxunguphele kuba kwakukho iiyantlukwano netyala lokuziphatha okubi okunzulu phakathi kwawo. Ayefuna ukucetyiswa ngendlela efanelekileyo yokugcina iSidlo SeNkosi Sangokuhlwa. Kwakukwakho nentsongelo yowexuko, yaye ibandla lalifuna ukululekwa mayela nothando. Ngenxa yezo zizathu, uPawulos wabhala incwadi yakhe yokuqala ephefumlelweyo eya kwabaseKorinte ese-Efese malunga nowama-55 C.E. Kodwa nathi sinokungenelwa kuyo.
Umanyano Nokucoceka Ngokokuziphatha Kubalulekile
Ukuba ‘izinto zonke sizenzela uzuko lukaThixo,’ asiyi kulandela nabani na ofuna ukubangela iiyantlukwano ebandleni—enye yeengxaki amaKorinte awayejamelene nazo. (1:1–4:21) UPawulos wawabongoza ukuba ‘athethe nto-nye, agqibelele ngqiqweni-nye, nasicamangweni sinye.’ Umanyano luya kubakho ukuba silandela esi siluleko size sihlakulele iimpawu zokomoya. Endaweni yokuqhayisa ngaye nawuphi na umntu onesono, sifanele sikhumbule ukuba nangona ‘sityala size sinkcenkceshe, nguThixo ohlumisayo’ ngokomoya. Abo babeqhayisa eKorinte babengenanto babengayizuziswanga; ngoko masingaze sibe noluvo lokuba silunge ngakumbi kunamakholwa angoowethu. Umoya wokuzithoba onjalo uya kusinceda sikhulise umanyano.
Ukuba kuza kubakho umanyano, abadala abamiselweyo bamele basebenzele ukugcina ibandla licocekile ngokomoya. (5:1–6:20) Ekubeni “igwele elincinane libilisa intlama iphela,” abenzi bombulo, abantu ababawayo, abakhonzi bezithixo, abatshabhisi, amanxila, okanye abaphangi abangaguqukiyo bamele basuswe kubudlelane. Ukungacoceki ngokokuziphatha, okungcolisa itempile kaThixo, akumele kunyanyezelwe phakathi kwabantu bakaYehova. Endaweni yoko, bamele benze izinto ezizukisa uThixo.
Yiba Ngonolwazelelelo Ngabanye
Ukuze sibe ‘ngabazenzela uzuko lukaThixo izinto zonke,’ kufuneka sisebenzise isiluleko sikaPawulos esingokutshata nokungatshati. (7:1-40) Abo bamanyene ngeqhina lomtshato bamele babonise ulwazelelelo kwiintlobano zesini. UmKristu otshatileyo akafanele ahlukane neqabane elingakholwayo, kuba ukuhlala kunye kusenokumnceda lowo ungakholwayo azuze usindiso. Ngoxa umtshato uzisa amaxhala awongezelelekileyo, ukungatshati kunokumzisela iingenelo umntu onqwenela ukunceda abanye ngokomoya ngokukhonza iNkosi ngaphandle kokuphazanyiswa.
Ukubonakalisa ulwazelelelo ngempilo-ntle yabanye yokomoya kungumsebenzi wawo onke amaKristu, enoba akatshatanga okanye atshatile. (8:1–10:33) Ngenxa yoko, amaKorinte alulekwa ukuba angabakhubekisi abanye ngokudla ukudla okwakubingelelwe kwizithixo. Ukuze aphephe ukuthintela nabani na ukuba amkele iindaba ezilungileyo, uPawulos akazange alisebenzise kwanelungelo lakhe lokwamkela uncedo lwezinto eziphathekayo. Kwaye ‘wayewuqoba nomzimba wakhe ukuze angathi akuba ezivakalisile iindaba ezilungileyo kwabanye, yena abe ngumlahlelwa phandle.’ Ukunikela ingqalelo ngenyameko kumava asentlango amaSirayeli anesono kuya kusinceda siphephe unqulo zithixo nokwenza okuphosakeleyo. Ngaphezu koko, ‘ukuzenzela uzuko lukaThixo izinto zonke’ kuya kusinceda siphephe ukukhubekisa abanye.
Bonakalisa Intlonelo Yaye Gcina Ulungelelwano
‘Ukuzenzela uzuko lukaThixo izinto zonke’ kufuna ukuba sibonise intlonelo efanelekileyo. (11:1-34) Umfazi ongumKristu wenkulungwane yokuqala wayebonisa intlonelo ngobuntloko ngokugqubuthela xa ethandaza okanye eprofeta ebandleni. Intlonelo efanayo ngobuntloko iyabonakaliswa ngabafazi abahlonel’ uThixo namhlanje. Ngaphezu koko, ukuze siphephe ukufana namaKorinte awayefuna ukulungiswa, sonke simele sibonise intlonelo ngeSidlo SeNkosi Sangokuhlwa.
Ukuze ‘sizenzele uzuko lukaThixo izinto zonke,’ simele siziqhube iintlanganiso ngendlela elungeleleneyo. (12:1–14:40) Xa amaKristu okuqala ayehlanganisana, iziphiwo zomoya ezinjengokuthetha ngeelwimi zazimele zisetyenziswe ngentlonelo noxabiso ngomthombo nenjongo yazo. Nangona ngoku singenazo ezi ziphiwo, sizisa uzuko kuThixo ngokubonakalisa uthando, oluzigqithayo. Kwaye sizukisa uYehova ngenxa yokuba iintlanganiso zethu zilungelelaniswe kakuhle, yaye ngentlonelo sisebenzisa isiluleko sikaPawulos esithi: “Zonke izinto mazenziwe ngokubekekileyo, nangolungelelwano.”
‘Ukuzenzela uzuko lukaThixo izinto zonke’ kufuna ukuba siyihlonele imfundiso esisiseko yeBhayibhile size sime siqinile ngokomoya. (15:1–16:24) Ngokunokwenzeka bephenjelelwe yintandabulumko yamaGrike, abathile kwibandla laseKorinte bathi: “Akukho luvuko lwabafileyo.” (Thelekisa IZenzo 17:18, 32.) Basenokuba babebambelele kwimbono yabawexuki yokuba akusayi kubakho luvuko luzayo koko amaKristu ayefumene olokomfuziselo, olokomoya. (2 Timoti 2:16-18) UPawulos waxhasa ithemba lokwenyaniso ngokucaphula uvuko lukaYesu yaye wakwabonisa ukuba amaKristu athanjisiweyo amele afe ukuze avuselwe kubomi bokungafi ezulwini. Kwanangezinye iindlela, amazwi akhe ayasinceda ukuphepha uwexuko size ‘sime elukholweni.’
Ngalo Lonke Ixesha Zenzele Uzuko LukaThixo Izinto
Isiluleko sikaPawulos kweyokuQala kwabaseKorinte siyingenelo namhlanje njengokuba sasinjalo kwinkulungwane yokuqala yeXesha Eliqhelekileyo. Sishukumisela amaNgqina kaYehova anamhlanje ukuba akhonze uThixo emanyene njengabantu abacocekileyo. Amazwi alo mpostile afanele asishukumisele ukuba sibe ngabanolwazelelelo ngabanye nokuba sibonise intlonelo efanelekileyo. Oko uPawulos wakutshoyo kukwanokusomelezela ukuba simelane nowexuko size silumele ngokuqinileyo ukholo lokwenyaniso.
Ngokuqinisekileyo, kungumnqweno osuka entliziyweni wabo bonke abakhonzi abathembekileyo bakaYehova ukumbonga, ukuvakalisa uBukumkani bakhe nokuzukisa igama lakhe elingcwele. (INdumiso 145:1, 2, 10-13) Enyanisweni, incwadi yokuqala kaPawulos kwabaseKorinte iyasinceda ukuba ‘sizenzele uzuko lukaThixo izinto zonke.’
[Ibhokisi/Umfanekiso okwiphepha 24, 25]
UKUFA OKUQINISEKISIWEYO: Izihlandlo ezingaphezu kwesinye kwiincwadi zakhe eziya kwabaseKorinte, uPawulos wabhekisela kukufa kwibala lemiboniso. Ngokomzekelo, wabhala: “Kum ngathi uThixo thina bathunywa bakhe usinike eyona ndawo iphantsi, ngathi singabamiselwe ukufa, senziwe umboniso oyintlekisa ehlabathini, kwizithunywa zezulu nasebantwini.” (1 Korinte 4:9, TE) Kusenokuba uPawulos wayecinga ngemiboniso yeebestiarii (amadoda awayesilwa namarhamncwa) kunye namadoda awayesilwa namadoda. Amanye ayesilwela umvuzo, kodwa abaphuli-mthetho babenyanzelwa ukulwa. Ekuqaleni amabanjwa ayevunyelwa ukusebenzisa izixhobo, kamva ayekhutshwa enganxibanga, engenazinto zakuzikhusela, yaye eqinisekile ngokufa.
Bebukelwe “zizithunywa zezulu nabantu” (kungekhona nje “ihlabathi” loluntu), abapostile babefana nabo babeza kufa kumboniso omagazana ngolo hlobo. UPawulos wathi ‘wayelwe namarhamncwa e-Efese,’ kodwa bambi bayakuthandabuza ukuba ummi waseRoma wayenokwenziwa oku yaye bathi wayebhekisela kubachasi abanjengamarhamncwa. (1 Korinte 15:32) Kanti, amazwi kaPawulos okuba uThixo wamhlangula “kwezo ngxingongo zokufa” kummandla waseAsiya (apho iEfese yayikhona) ayawafanelekela amava okulwa namarhamncwa asendle okoqobo kwibala lemiboniso kunokuba ebeya kuyifanela inkcaso yabantu.—2 Korinte 1:8-10, TE; 2Ko 11:23; IZenzo 19:23-41.
[Ibhokisi/Umfanekiso okwiphepha 25]
HLALA UTSOLISE AMEHLO EMVUZWENI: UPawulos wasebenzisa iimbalasane zemidlalo yamaGrike yamandulo ukuphuhlisa iingongoma ezibalulekileyo. (1 Korinte 9:24-27) Kukhuphiswano olunjengolo lwalubakho kwiMidlalo eyayibanjelwa eIsthmus qho emva kweminyaka emibini kufuphi neKorinte, ucwangciso lwaluquka ukubaleka, amanqindi, neminye imidlalo. Ngoxa zilungiselela olu khuphiswano, iimbaleki nabadlali bezamanqindi babemele baqhelisele ukuzeyisa, badle ukudla okusempilweni nokungatyebanga, baze bangaseli wayini kangangeenyanga ezilishumi. Noko ke, endaweni yesithsaba esinokonakala sompayini okanye seivy (isityalo esithandelayo) esasithweswa abaphumeleleyo kwiMidlalo yaseIsthmus, umKristu othanjisiweyo uzabalazela isithsaba esingenakonakala sobomi bokungafi. Ukuze aphumelele ekufumaneni loo mvuzo, ufanele agcine amehlo akhe etsoliswe kuwo aze abe nokuzeyisa. Umgaqo ofanayo uyasebenza kumaNgqina kaYehova anethemba lobomi obungunaphakade emhlabeni.