Ukungatshati—Umnyango Okhokelela Kwinkonzo Engenaziphazamiso
“Kuthetha ukukhonza iNkosi rhoqo ngaphandle kwesiphazamiso.”—1 KORINTE 7:35.
1. Ziziphi iindaba eziphazamisayo ezafunyanwa nguPawulos ngokuphathelele amaKristu aseKorinte?
UMPOSTILE UPAWULOS wayebaxhalabele abazalwana bakhe abangamaKristu baseKorinte, eGrisi. Malunga neminyaka emihlanu ngaphambilana, wayeseke ibandla kweso sixeko sityebileyo nesidume ngokuziphatha okubi. Ke kaloku, malunga nowama-55 C.E., ngoxa wayese-Efese, eAsia Minor, wafumana ingxelo ephazamisayo evela eKorinte ngoqhekeko nokunyanyezelwa kokuziphatha okubi okugqithiseleyo. Ukongezelela, uPawulos wafumana ileta evela kumaKristu aseKorinte ecela ukhokelo kwimibandela yeentlobano zesini, ukungatshati, umtshato, ukwahlukana kwabatshatileyo nokuphinda utshate.
2. Ukuziphatha okubi okwakwesamele eKorinte kwakuwachaphazela njani amaKristu awayekweso sixeko?
2 Kubonakala ukuba ukuziphatha okubi okwakwesamele eKorinte kwakulichaphazela ibandla lasekuhlaleni ngeendlela ezimbini. Amanye amaKristu ayeyekelela umxakatho kumbandela wokuziphatha yaye ayekunyamezela ukuziphatha okubi. (1 Korinte 5:1; 6:15-17) Kubonakala ukuba wambi, ebonakalisa ukukuchasa ukuziphatha okubi ngokwesini okwakwesamele kweso sixeko, azibaxa izinto ngokukhuthaza ukuzinxwema kuzo zonke iintlobano zesini, naphakathi kwezibini ezitshatileyo.—1 Korinte 7:5.
3. Yiyiphi imibandela awaqala wayisingatha uPawulos kwileta yakhe yokuqala eya kwabaseKorinte?
3 Kwileta ende awayibhalela abaseKorinte, uPawulos waqala wasingatha ingxaki yokungabikho komanyano. (1 Korinte, isahluko 1-4) Wababongoza ukuba bakuphephe ukulandela abantu, nto leyo enokukhokelela kwiiyantlukwano eziyingozi. Babefanele bamanyane ‘njengabasebenzi abangamadlelane’ kaThixo. Emva koko wabanika imiyalelo engqalileyo ngokugcina ibandla licocekile ngokokuziphatha. (1Ko Isahluko 5, 6) Ngokulandelayo lo mpostile waphethulela ingqalelo yakhe kwileta yabo.
Ukuncomela Ukungatshati
4. Wayethetha ukuthini uPawulos xa wayesithi “kuhle ngendoda ukuba ingamchukumisi umfazi”?
4 Waqalisa ngelithi: “Ke kaloku ngokuphathelele izinto ezo benibhale ngazo, kuhle ngendoda ukuba ingamchukumisi umfazi.” (1 Korinte 7:1) Ibinzana elithi “ingamchukumisi umfazi” kule nkalo lithetha ukukuphepha ukuchukumisa umfazi ngenjongo yokuziyolisa ngokwesini. Ekubeni uPawulos wayesele elugwebile uhenyuzo, ngoku wayethetha ngeentlobano zesini kwilungiselelo lomtshato. Ngamanye amazwi, uPawulos ngoku wayencomela ukungatshati. (1 Korinte 6:9, 16, 18; thelekisa iGenesis 20:6; IMizekeliso 6:29.) Kamva wabhala: “Ke kaloku kubantu abangatshatanga nabahlolokazi, ndithi kuhle ngabo ukuba bahlale kwanjengoko ndinjalo mna.” (1 Korinte 7:8) UPawulos wayengatshatanga, mhlawumbi wayengumhlolo.—1 Korinte 9:5.
5, 6. (a) Kutheni licacile nje elokuba uPawulos wayengakhuthazi ubomi obuphilwa kwizindlu zoonongendi? (b) Kwakutheni ukuze uPawulos ancomele ukungatshati?
5 AmaKristu aseKorinte amele ukuba ayesazi okuthile ngentanda-bulumko yamaGrike, yaye iimfundiso zayo ezithile zazikhuthaza ukuzibandeza uyolo ngokupheleleyo. Ngaba eso yayisisizathu sokuba abaseKorinte babuze uPawulos enoba “kungakuhle” na ukuba amaKristu azinxweme kwiintlobano zesini? Impendulo kaPawulos yayingasekelwanga kwintanda-bulumko yamaGrike. (Kolose 2:8) Ngokwahlukileyo kubefundisi bamaKatolika, akazange ancomele ubomi bokungatshati nobokuzibandeza uyolo kumakhaya eemonki okanye oonongendi, ngokungathi abantu abangatshatanga bangcwele ngokukodwa yaye banokufak’ isandla ekusindisweni kwabo ngendlela abaphila ngayo nangemithandazo yabo.
6 UPawulos wancomela ukungatshati “ngenxa yentswelo esinayo.” (1 Korinte 7:26) Usenokuba wayebhekisela kubunzima awayejamelene nabo loo maKristu, obabunokwenziwa mandundu ngumtshato. (1 Korinte 7:28) AmaKristu angatshatanga wawanika esi siluleko: “Kuhle ngabo ukuba bahlale kwanjengoko ndinjalo mna.” Kubahlolo, wathi: “Ukhululwe na emfazini? Yeka ukufuna umfazi.” Ethetha ngomhlolokazi ongumKristu, wabhala: “Unoyolo ngakumbi ukuba uhlala enjengoko anjalo, ngokoluvo lwam. Ngokuqinisekileyo ndicinga ukuba nam ndinomoya kaThixo.”—1 Korinte 7:8, 27, 40.
Akukho Sinyanzelo Sokuhlala Ungatshatanga
7, 8. Yintoni ebonisa ukuba uPawulos wayenganyanzeli namnye umKristu ukuba ahlale engatshatanga?
7 Ngokungathandabuzekiyo uPawulos wayekhokelwa ngumoya oyingcwele kaYehova xa wayedlulisela esi siluleko. Indlela awawubeka ngayo umbandela wokungatshati nowokutshata ibonisa ulungelelwano nokuzeyisa. Akakwenzi umbandela wokuthembeka okanye wokungathembeki. Kunoko, ngumbandela wokuzikhethela, encomela ukungatshati kwabo banokukwazi ukuhlala benyulu ngoxa bengatshatanga.
8 Emva nje kokubonisa ukuba “kuhle ngendoda ukuba ingamchukumisi umfazi,” uPawulos wongezelela: “Kanti, ngenxa yokuxhaphaka kohenyuzo, ndoda nganye mayibe nowayo umfazi yaye umfazi ngamnye abe neyakhe indoda.” (1 Korinte 7:1, 2) Emva kokucebisa abantu abangatshatanga nabahlolokazi ukuba “bahlale kwanjengoko ndinjalo mna,” ngokukhawuleza wongezelela oku: “Kodwa ukuba abanako ukuzeyisa, mabatshate, kuba kulunge ngakumbi ukutshata kunokutshiseka yinkanuko.” (1 Korinte 7:8, 9) Kwakhona, abahlolo wabaluleka esithi: “Yeka ukufuna umfazi. Kodwa kwanokuba ubuthe watshata, ubungayi kuba wenza sono.” (1 Korinte 7:27, 28) Esi siluleko silungeleleneyo sibalaselisa inkululeko yokuzikhethela.
9. Ngokutsho kukaYesu noPawulos, kutheni ukutshata nokungatshati kusisiphiwo esivela kuThixo?
9 UPawulos wabonisa ukuba ukutshata nokungatshati zizipho ezivela kuThixo. “Ndinqwenela ukuba bonke abantu bebenjengoko mna ndinjalo. Noko ke, ngamnye unesiphiwo sakhe esivela kuThixo, omnye ngale ndlela, omnye ngalaa ndlela.” (1 Korinte 7:7) Ngokungathandabuzekiyo wayecinga ngamazwi awayethethwe nguYesu. Emva kokuchaza ukuba umtshato lilungiselelo likaThixo, uYesu wabonisa ukuba ukukhetha ukungatshati ngenxa yezilangazelelo zoBukumkani kusisiphiwo esikhethekileyo: “Asingabo bonke abantu abalivulela ithuba elo lizwi, kodwa kuphela ngabo banesiphiwo. Kuba kukho amathenwa azalwa enjalo ukususela esizalweni sikanina, yaye kukho amathenwa enziwe amathenwa ngabantu, ibe kukho amathenwa azenze amathenwa ngenxa yobukumkani bamazulu. Lowo unako ukukuvulela ithuba makakuvulele ithuba.”—Mateyu 19:4-6, 11, 12.
Ukuvulela Ithuba Isiphiwo Sokungatshati
10. Umntu ‘unokusivulela njani ithuba’ isiphiwo sokungatshati?
10 Nangona uYesu noPawulos bathetha ngokungatshati ‘njengesiphiwo,’ abazange bathi sisiphiwo esingummangaliso esifunyanwa ngabathile. UYesu wathi ‘asingabo bonke abantu abasivulela ithuba’ eso siphiwo, yaye wabongoza abo banako ukwenjenjalo ukuba ‘basivulele ithuba,’ nto leyo uYesu noPawulos bayenzayo. Liyinene elokuba uPawulos wabhala: “Kulunge ngakumbi ukutshata kunokutshiseka yinkanuko,” kodwa wayethetha ngabo ‘bangenako ukuzeyisa.’ (1 Korinte 7:9) Kwimibhalo yakhe yangaphambilana, uPawulos wabonisa ukuba amaKristu anokukuphepha ukutshiseka yinkanuko. (Galati 5:16, 22-24) Ukuhamba ngomoya kuthetha ukuvumela umoya kaYehova ukhokele inyathelo ngalinye esilithabathayo. Ngaba amaKristu aselula anokukwenza oku? Ewe, ukuba anamathela kwiLizwi likaYehova. Umdumisi wabhala: “Umfana [okanye umfazi] uya kuwuqaqambisa ngantoni na umendo wakhe? Ngokuzigcina ngokwelizwi lakho.”—INdumiso 119:9.
11. Kuthetha ntoni ‘ukuhamba ngokuvumelana nomoya’?
11 Oku kuquka ukuzilinda nxamnye nengcamango kavula zibhuqe yeenkqubo ezininzi zikamabonwakude, yemifanekiso eshukumayo, yamanqaku amaphephancwadi, yeencwadi namazwi eengoma. Iingcamango ezinjalo zizinto zenyama. UmKristu oselula enoba ungowasiphi isini ofuna ukukuvulela ithuba ukungatshati ufanele ‘ahambe, kungekhona ngokuvumelana nenyama, kodwa ngokuvumelana nomoya. Kuba abo bavumelana nenyama babeka iingqondo zabo kwizinto zenyama, kodwa abo bavumelana nomoya bazibeka kwizinto zomoya.’ (Roma 8:4, 5) Izinto zomoya zibubulungisa, zinyulu, ziyathandeka, zinesidima. AmaKristu, aselula namadala, enza kakuhle ‘ngokuqhubeka ezigqala ezi zinto.’—Filipi 4:8, 9.
12. Yintoni ebandakanyeke kakhulu ekusivuleleni ithuba isiphiwo sokungatshati?
12 Ubukhulu becala ukusivulela ithuba isiphiwo sokungatshati ngumbandela wokuzibekela olo sukelo entliziyweni nokuthandazela uncedo lokuluphumeza kuYehova. (Filipi 4:6, 7) UPawulos wabhala: “Ukuba nabani na uma ezinzile entliziyweni yakhe, engenayo intswelo, kodwa enegunya phezu kokuthanda kwakhe yaye enze esi sigqibo entliziyweni yakhe, ukugcina ubunyulu bakhe, uya kwenza kakuhle. Ngenxa yoko kwanalowo unikela ubunyulu bakhe emtshatweni wenza kakuhle, kodwa lowo ungabunikeliyo emtshatweni uya kwenza kakuhle ngakumbi.”—1 Korinte 7:37, 38.
Ukungatshati Ngenxa Yenjongo
13, 14. (a) Luluphi ufaniso olwenziwa ngumpostile uPawulos phakathi kwamaKristu angatshatanga natshatileyo? (b) UmKristu ongatshatanga unokuba wenza “kakuhle ngakumbi” njani kunalowo utshatileyo?
13 Ukungatshati kukodwa akuyonto ibalulekileyo. Ngoko, kunokuba “kuhle ngakumbi” ngayiphi ingqiqo? Kuxhomekeke kwindlela umntu ayisebenzisa ngayo inkululeko eza nokungatshati. UPawulos wabhala: “Eneneni, ndifuna ukuba nikhululeke exhaleni. Indoda engatshatanga ixhalela izinto zeNkosi, indlela esenokuzuza ngayo inkoliseko yeNkosi. Kodwa indoda etshatileyo ixhalela izinto zehlabathi, indlela esenokuzuza ngayo inkoliseko yomfazi wayo, yaye yahlulelene. Ngokubhekele phaya, umfazi ongatshatanga, yaye eyintombi, uxhalela izinto zeNkosi, ukuze abe ngcwele kokubini emzimbeni wakhe nasemoyeni wakhe. Noko ke, umfazi otshatileyo uxhalela izinto zehlabathi, indlela asenokuzuza ngayo inkoliseko yendoda yakhe. Kodwa oku ndikutsho ngenxa yokulungelwa kwenu kobuqu, kungekhona ukuze ndiniphosele irhintyela, kodwa ukuze ndinishukumisele koko kufanelekileyo noko kuthetha ukukhonza iNkosi rhoqo ngaphandle kwesiphazamiso.”—1 Korinte 7:32-35.
14 UmKristu ongatshatanga osebenzisa ithuba lokungatshati kusukelo lokuzingca akenzi “kakuhle ngakumbi” kunamaKristu atshatileyo. Uhlala engatshatanga, ‘kungengenxa yobukumkani,’ kodwa ngenxa yezizathu zobuqu. (Mateyu 19:12) Indoda okanye ibhinqa elingatshatanga lifanele ‘lixhalele izinto zeNkosi,’ lixhalele ‘ukuzuza inkoliseko yeNkosi,’ yaye ‘likhonze iNkosi rhoqo ngaphandle kwesiphazamiso.’ Oku kuthetha ukunikela ingqalelo epheleleyo ekukhonzeni uYehova noKristu Yesu. Kungokwenza oko kuphela athi amadoda namabhinqa angatshatanga angamaKristu abe enza “kakuhle ngakumbi” kunamaKristu atshatileyo.
Inkonzo Ngaphandle Kwesiphazamiso
15. Uyintoni umongo woko kuthethwa nguPawulos kweyoku-1 kwabaseKorinte isahluko 7?
15 Eyona nto athetha ngayo uPawulos kwesi sahluko yile: Ngoxa kufanelekile ukutshata yaye, ngaphantsi kweemeko ezithile, kucebiseka kwabathile, alinakukhanyelwa elokuba ukungatshati kuyingenelo kumadoda nakumabhinqa angamaKristu afuna ukukhonza uYehova ngaphandle kweziphazamiso. Ngoxa umntu otshatileyo ‘ehlulelene,’ umKristu ongatshatanga unenkululeko yokunikela ingqalelo ‘kwizinto zeNkosi.’
16, 17. UmKristu ongatshatanga unokuyinikela njani ingqalelo engakumbi ‘kwizinto zeNkosi’?
16 Ziintoni ezi zinto zeNkosi anokuba nenkululeko engakumbi yokunikela ingqalelo kuzo umKristu ongatshatanga kunabantu abatshatileyo? Ngesinye isihlandlo, uYesu wathetha ‘ngezinto zikaThixo’—izinto umKristu angenakuzinika uKesare. (Mateyu 22:21) Ngokusisiseko ezi zinto zinokuthanani nobomi, unqulo nobulungiseleli bomKristu.—Mateyu 4:10; Roma 14:8; 2 Korinte 2:17; 3:5, 6; 4:1.
17 Ngokuqhelekileyo, abantu abangatshatanga banenkululeko engakumbi yokunikela ngexesha labo enkonzweni kaYehova, nto leyo enokubenza bangenelwe ngokomoya baze babandise ubulungiseleli babo. Banokuchitha ixesha elingakumbi kufundisiso lobuqu nasekucamngceni. Ngokufuthi kulula ngakumbi ngamaKristu angatshatanga ukuba azibekele ixesha lokufunda iBhayibhile kunokuba kunjalo ngabantu abatshatileyo. Anokuzilungiselela kakuhle ngakumbi iintlanganiso nenkonzo yasentsimini. Konke oku kuthetha ‘ukulungelwa kwawo ngokobuqu.’—1 Korinte 7:35.
18. Abazalwana abaninzi abangatshatanga banokukubonakalisa njani ukuba bafuna ukukhonza uYehova “ngaphandle kwesiphazamiso”?
18 Abazalwana abaninzi abangatshatanga abakhonza njengezicaka zolungiselelo banenkululeko yokuthi kuYehova: “Ndikho, thuma mna.” (Isaya 6:8) Banokufaka izicelo zokuya kwiSikolo Sokuqeqesha Abalungiseleli, esifunyanwa zizicaka zolungiselelo nangabadala abangatshatanga abakhululekileyo ukuya kukhonza apho kukho imfuneko enkulu khona. Nabazalwana abangenako ukuwashiya amabandla abo banokuzenza bafumaneke ukuze bakhonze abazalwana babo njengezicaka zolungiselelo okanye abadala.—Filipi 2:20-23.
19. Oodade abaninzi abangatshatanga basikelelwe njani, yaye yiyiphi enye indlela abanokuba yintsikelelo ngayo emabandleni?
19 Oodade abangatshatanga, ekungeyomfuneko ukuba bazithobe okanye bazityand’ igila kwintloko engumntu, banethuba elingakumbi ‘lokuwulahlela kuYehova umthwalo wabo.’ (INdumiso 55:22; 1 Korinte 11:3) Oku kubaluleke ngokukodwa koodade abahlala bengatshatanga ngenxa yothando lwabo ngoYehova. Ukuba ekuhambeni kwexesha baye batshata, baya kwenjenjalo “kuphela eNkosini,” oko kukuthi, kuphela nomntu ozahlulele kuYehova. (1 Korinte 7:39) Abadala bayakuxabisa ukuba noodade abangatshatanga emabandleni, ngokufuthi abaye batyelele yaye bancede abagulayo nabalupheleyo. Oku kubenza bafumane uyolo xa bebonke.—IZenzo 20:35.
20. AmaKristu amaninzi akubonakalisa njani ukuba ‘akhonza iNkosi rhoqo ngaphandle kwesiphazamiso’?
20 AmaKristu amaninzi aselula aye ayilungelelanisa imicimbi yawo ukuze ‘akhonze iNkosi rhoqo ngaphandle kwesiphazamiso.’ (1 Korinte 7:35) Akhonza uYehova njengabalungiseleli bexesha elizeleyo abangoovulindlela, abavangeli basemazweni, okanye kwiiofisi zamasebe eWatch Tower Society. Yaye hayi indlela onwabe ngayo njengeqela! Hayi indlela ekukhuthaza ngayo ukuba kunye nawo! Ewe, emehlweni kaYehova nakaYesu, afana ‘nombethe.’—INdumiso 110:3.
Akukho Sifungo Sokuhlala Ungatshatanga
21. (a) Kutheni kucacile nje ukuba uPawulos wayengakhuthazi ukwenziwa kwesifungo sokungatshati? (b) Wayebhekisela entwenini xa wayethetha ‘ngokudlula entlahleni yobutsha’?
21 Ingongoma eyintloko kwisiluleko sikaPawulos kukuba bekuya kuba “kuhle” ukuba amaKristu akuvulele ithuba ukungatshati. (1 Korinte 7:1, 8, 26, 37) Noko ke, akawakhuthazi ukuba enze isifungo sokuhlala engatshatanga. Ngokwahlukileyo koko, wabhala: “Ukuba nabani na ucinga ukuba uziphatha ngokungafanelekanga ngobunyulu bakhe, ukuba uthe wadlula entlahleni yobutsha, yaye le yindlela ekufanele kwenzeke ngayo, makenze oko akufunayo; akoni. Mabatshate.” (1 Korinte 7:36) Elinye igama lesiGrike (hy·peʹra·kmos) eliguqulelwe ngokuthi “wadlula entlahleni yobutsha” ngokoqobo lithetha “ukudlulela ngaphaya kwelona nqanaba liphezulu” yaye libhekisela ekudluleni ekuvutheni kwenkanuko yesini. Ngoko abo bachithe iminyaka eliqela bengatshatanga nabaye bavakalelwe kukuba bafanele batshate ekugqibeleni, bakhululekile ukuba batshate kunye nelinye ikholwa.—2 Korinte 6:14.
22. Kutheni kuyingenelo ngandlela zonke ukuba umKristu angatshati eselula gqitha?
22 Iminyaka echithwa ngumKristu ongatshatanga enkonzweni kaYehova ngaphandle kwesiphazamiso ifana notyalo-mali. Imnika ithuba lokuzuza ubulumko, amava nolwazi oluluncedo. (IMizekeliso 1:3, 4) Umntu oye wahlala engatshatanga ngenxa yoBukumkani uye akulungele ngakumbi ukusingatha imbopheleleko yobomi bomtshato nokuba ngumzali, xa kamva egqiba ukwenjenjalo.
23. Basenokuba bacinga ngantoni abathile abafuna ukutshata, kodwa nguwuphi umbuzo oza kuxutyushwa kumanqaku alandelayo?
23 Amanye amaKristu achitha iminyaka eliqela ekhonza uYehova ixesha elizeleyo engatshatanga aye awakhethe ngenyameko amaqabane awo enenjongo yokuqhubeka nohlobo oluthile lwenkonzo yexesha elizeleyo. Oku kuyancomeka ngokwenene. Bambi basenokuwujonga ngelinye iliso umtshato, bengafuni ukuba umtshato wabo ubaphazamise enkonzweni yabo nangayiphi na indlela. Kodwa ngaba umKristu otshatileyo ufanele azive ekhululekile ukuba anikele ingqalelo ekukhonzeni uYehova njengaxa wayengekatshati? Lo mbuzo uza kuxutyushwa kumanqaku alandelayo.
Impinda
◻ Kwakutheni ukuze umpostile uPawulos azive enyanzelekile ukuba alibhalele ibandla laseKorinte?
◻ Kutheni sisazi nje ukuba uPawulos wayengancomeli ubomi obuphilwa kwizindlu zoonongendi?
◻ Umntu ‘unokukuvulela njani ithuba’ ukungatshati?
◻ Oodade abangatshatanga banokungenelwa njani ngokuhlala bengatshatanga?
◻ Abazalwana abangatshatanga banokuyisebenzisa njani inkululeko yabo ekukhonzeni uYehova “ngaphandle kwesiphazamiso”?