Indima Yamagunya Awongamileyo

“Lingumlungiseleli kaThixo, wokuba kulungelwe wena. Ke, ukuba usuka wenze okubi, yoyika.”—ROMA 13:4.

1, 2. Abaninzi kwiNgqobhoko baye babandakanyeka njani kwizenzo zemvukelo?

KWIMINYAKA emibini edluleyo intlanganiso yoobhishopu baseLondon yabangela ukubhalwa kwenqaku lomhleli elishushu kwiNew York Post. Le ntlanganiso yayiyiNgqungquthela yaseLambeth, ekwakukho kuyo oobhishopu abangaphezu kwama-500 beemvaba ngeemvaba zaseTshetshi. Ubushushu babangelwa sisigqibo esadluliselwa kuloo ngqungquthela esasivakalisa ukuvumelana kwabo nabantu “ababethe, emva kokuzama zonke ezinye iindlela, bakhetha umzabalazo wezigalo njengekuphela kwendlela yokufumana okusesikweni.”

² Enyanisweni, le Post yathi oku yayikukwamkela ubugrogrisi. Noko ke, aba bhishopu babehamba nje nomndilili. Isimo sabo sengqondo sasingahlukanga nganto kweso somfundisi womKatolika eGhana owancomela imfazwe yabanqolobi njengeyona ndlela ikhawulezayo, iqinisekileyo nekhuselekileyo yokukhulula iAfrika; okanye asahlukanga kweso sobhishopu waseWesile eAfrika owafungela ukuqhubeka “nemfazwe yokulwela inkululeko kude kuqhawuk’ unobathana”; okanye asahlukanga kweso sabavangeli abaninzi beNgqobhoko abaye balwa kunye nabavukeli-mbuso eAsiya naseMzantsi Merika.

AmaKristu Okwenyaniso ‘Awalichasi Igunya’

3, 4. (a) Yiyiphi imigaqo eyaphulwa ngabo bafane babizwe ngokuba ngamaKristu abakhuthaza imvukelo? (b) Omnye umntu waphawula ntoni ngamaNgqina kaYehova?

³ Ngenkulungwane yokuqala, uYesu wathi ngabalandeli bakhe: ‘Abangabo abehlabathi, njengokuba nam ndingenguye owehlabathi.’ (Yohane 17:14) Nabani na ofane abizwe ngokuba ungumKristu okhuthaza imvukelo uyinxalenye yehlabathi ngokupheleleyo. Akanguye umlandeli kaYesu; ‘engawalulameli namagunya awongamileyo.’ (Roma 13:1) Ebeya kwenza kakuhle ukuthobela isiluleko sompostile uPawulos sokuba “olichasayo igunya, umelene nommiselo kaThixo; abo ke bameleneyo nawo, baya kuziguqulela ukugwetywa.”—Roma 13:2.

⁴ Ngokwahlukileyo kwabaninzi beNgqobhoko, amaNgqina kaYehova awafaki sandla kwaphela kugonyamelo lwezigalo. Enye indoda yaseYurophu yakuphawula oku. Ibhala isithi: “Ekuboneni oko unqulo nezobupolitika ziye zakuvelisa, ndazimisela ukubhukuqa imekobume yezentlalo. Ndathelela iqela labagrogrisi ndaza ndafumana uqeqesho lokusebenzisa zonke iintlobo zezixhobo; ndaba nenxaxheba kangangezihlandlo ezininzi ekuphangeni esasikwenza sixhobile. Ubomi bam babusoloko busengozini. Njengoko ixesha lalihamba, kwacaca ukuba sasisilwa umlo ongayi ndawo. Ndandiyindoda ekatyileyo, ndingenathemba nje kwaphela ebomini. Sandula ke satyelelwa liNgqina. Landixelela ngoBukumkani bukaThixo. Ndimi ngelokuba oku kwakuyinkcitha-xesha, ndathi makuphulaphule umfazi. Wakwenza oko, kwaza kwaqaliswa isifundo seBhayibhile sekhaya. Ekugqibeleni, ndavuma ukubakho kweso sifundo. Ayithetheki indlela endaziva ndikhululeke ngayo ndakuwaqonda amandla aqhubela uluntu ekwenzeni ububi. Idinga elimangalisayo loBukumkani liye landinika ithemba elizimasayo nenjongo ebomini.”

5. Kutheni amaKristu ehlala ngoxolo ewalulamela amagunya awongamileyo, yaye aya kuhlala esenjenjalo de kube nini?

⁵ AmaKristu angoonozakuzaku okanye abathunywa bakaThixo nabakaKristu. (Isaya 61:1, 2; 2 Korinte 5:20; Efese 6:19, 20) Ngenxa yoko, ahlala engoondilele kwimilo yeli hlabathi. Nangona iinkqubo zobupolitika ezithile zibonakala zinempumelelo kwezoqoqosho kunezinye, yaye ezinye zinikela inkululeko engakumbi kunezinye, amaKristu awaphakamisi enye inkqubo kunenye. Ayazi ukuba zonke iinkqubo azigqibelelanga. ‘Kungummiselo kaThixo’ ukuba ezi nkqubo ziqhubeke zikho de zithatyathelwe indawo buBukumkani bukaThixo. (Daniyeli 2:44) Ngenxa yoko, amaKristu ahlala ngoxolo ewalulamela amagunya awongamileyo ngoxa ehambisela phambili intlalo-ntle kanaphakade yabanye ngokushumayela iindaba ezilungileyo zoBukumkani.—Mateyu 24:14; 1 Petros 3:11, 12.

Ukuthobela Umthetho

6. Kutheni imithetho emininzi yabantu ilungile nangona “ihlabathi liphela lilele kongendawo”?

⁶ Oorhulumente bamazwe bamisela uludwe lwemithetho, yaye inkoliso yale mithetho ilungile. Ngaba oku kufanele kusimangalise, ekubeni “ihlabathi liphela lilele kongendawo”? (1 Yohane 5:19) Akunjalo. UYehova wanika ubawo wethu wokuqala, uAdam, isazela, yaye ke le ngqiqo yemvelo yokwazi okulungileyo nokubi ibonakaliswa ngeendlela ezininzi kwimithetho yabantu. (Roma 2:13-16) UHammurabi, ummisi-mthetho wamandulo waseBhabhiloni, wawutshayelela umthetho wakhe ngala magqabaza alandelayo: “Ngelo xesha bandinyulela ukuba ndihambisele phambili intlalo-ntle yabantu, mna, Hammurabi, inkosana ezinikeleyo, eyoyika uThixo, ukuba ndenze kubekho okusesikweni elizweni, ndiphelise ubungendawo nobubi, ukuze abanamandla bangabacinezeli ababuthathaka.”

7. Ukuba ubani waphula umthetho, uya kusifumana kubani isohlwayo?

⁷ Oorhulumente abaninzi banokuthi injongo yemithetho yabo iyefanayo: ukuhambisela phambili intlalo-ntle yabemi nocwangco ebuthweni. Ngenxa yoko, bayabohlwaya abo benza okuchasene nentlalo-ntle yabantu, njengokubulala nokuba, yaye bamisele imithetho, enjengeyemilinganiselo yesantya nemithetho yokupakisha iinqwelo-mafutha. Nabaphina abathi bayaphule ngabom imithetho yabo bazimisa ngokuchasene negunya yaye “baya kuziguqulela ukugwetywa.” Ukugwetywa ngubani? Hayi ngokuyimfuneko nguThixo. Igama lesiGrike eliguqulelwe apha ngokuthi umgwebo linokubhekisela kwinkqubo engokwasemthethweni kunemigwebo kaYehova. (Thelekisa eyoku-1 kwabaseKorinte 6:7.) Ukuba nabani na wenza okuchasene nomthetho, igunya elongamileyo linelungelo lokumohlwaya.

8. Ibandla liya kusabela njani ukuba ilungu lenza isenzo esinzulu?

⁸ AmaNgqina kaYehova adume kakuhle ngokungachasani namagunya abantu. Ukuba kuyenzeka ukuba uthile ebandleni aphule umthetho, ibandla aliyi kumnceda ukuba aphephe ukufumana isohlwayo ngokomthetho. Ukuba nabani na uyeba, uyabulala, uyanyelisa, uyaqhatha kwiirhafu zakhe, uyadlwengula, uyakhohlisa, usebenzisa iziyobisi ezingekho mthethweni, okanye nangayiphi na indlela uchasa igunya elisemthethweni, uya kufumana uqeqesho oluqatha ebandleni—yaye akafanele avakalelwe kukuba uyatshutshiswa xa esohlwaywa ligunya lehlabathi.—1 Korinte 5:12, 13; 1 Petros 2:13-17, 20.

Ngawokoyikwa

9. Abhenela enini ngokufanelekileyo amaKristu xa esongelwa zizaphuli-mthetho?

⁹ UPawulos uyaqhubeka nengxubusho yakhe engamagunya awongamileyo, esithi: “Kuba abaphathi aba asingabokoyikwa kwimisebenzi elungileyo, ngabokoyikwa kwemibi. Unga akungeloyiki na ke igunya? Yenza okulungileyo, wodunyiswa kwalilo.” (Roma 13:3) AsingomaKristu anyanisekileyo afanele oyike ukohlwaywa ligunya kodwa ngabenzi bobubi, abo benza ‘imisebenzi emibi,’ izenzo zolwaphulo-mthetho. Xa esongelwa zizaphuli-mthetho ezinjalo, ngokufanelekileyo amaNgqina kaYehova anokuyamkela inkuselo yamapolisa okanye yomkhosi elungiselelwa ligunya.—IZenzo 23:12-22.

10. AmaNgqina kaYehova aye akufumana njani ‘ukudunyiswa’ ligunya?

¹⁰ KumaKristu agcina umthetho wegunya elongamileyo, uPawulos uthi: “Wodunyiswa kwalilo.” Njengomzekelo woku, qwalasela ezinye zeeleta eziye zafunyanwa ngamaNgqina kaYehova eBrazil emva kweendibano zawo zesithili. Eyayisuka kwingqonyela yesebe lezemidlalo likamasipala yathi: “Nifanelwe kukunconywa ngokukhethekileyo ngehambo yenu enoxolo. Kuyathuthuzela kweli hlabathi lanamhlanje lineenkathazo ukwazi ukuba kukho abantu abaninzi kangaka abasakholelwa nabasanqula uThixo.” Eyayisuka kumphathi webala lemidlalo likamasipala yathi: “Phezu kwako nje ukuba beniyinkungu nelanga, akukho nento le eyenzekileyo eye yagxobha eso siganeko, siyixabisa kakhulu le ntlangano yenu engenabala.” Eyayisuka kwiofisi kasibonda wedolophu yathi: “Sithanda ukusebenzisa eli thuba ukuba sinincome ngokulungelelana nokuqeqesheka kwenu okumangalisayo nokuzenzekelayo, yaye sininqwenelela impumelelo kangangoko kwiindibano zexesha elizayo.”

11. Kutheni kungenakutshiwo nangayiphi na indlela ukuba ukushumayela iindaba ezilungileyo kusisenzo esibi?

¹¹ Ibinzana elithi “imisebenzi elungileyo” libhekisela kwizenzo zokuthobela imithetho yamagunya awongamileyo. Ukongezelela koku, umsebenzi wethu wokushumayela, owalathiswa nguThixo, kungekhona ngumntu, awusosenzo sibi—sibakala eso amagunya ezobupolitika afanele asiqonde. Uyinkonzo yasesidlangalaleni ephucula ukuziphatha kwabo basabelayo. Ngoko ke, kulithemba lethu ukuba amagunya awongamileyo aya kulikhusela ilungelo lethu lokushumayela kwabanye. UPawulos wabhena kumagunya ukuze amisele ngokusemthethweni ukushunyayelwa kweendaba ezilungileyo. (IZenzo 16:35-40; 25:8-12; Filipi 1:7) Kutshanje, amaNgqina kaYehova aye ngokufanayo afuna aza afumana ukugqalwa ngokusemthethweni komsebenzi wawo eMpuma Jamani, eHungary, ePoland, eRomania, eBenin naseMyanmar (eBurma).

“Lingumlungiseleli KaThixo”

12-14. Kungayiphi indlela athe amagunya awongamileyo angumlungiseleli kaThixo (a) ngamaxesha okubhalwa kweBhayibhile? (b) kumaxesha anamhlanje?

¹² Ethetha ngegunya lehlabathi, uPawulos uhlabela mgama esithi: “Lingumlungiseleli kaThixo, wokuba kulungelwe wena. Ke, ukuba usuka wenze okubi, yoyika; kuba alifumane laliphatha ikrele, kuba lingumlungiseleli kaThixo, umphindezeli ngengqumbo kowenza okubi.”—Roma 13:4.

¹³ Amagunya elizwe aye ngamathuba athile akhonza njengomlungiseleli kaThixo ngeendlela ezithile. UKoreshi wenza oko xa wayalela amaYuda ukuba ayishiye iBhabhiloni aye kwakha kwakhona indlu kaThixo. (Ezra 1:1-4; Isaya 44:28) UArtashashta waba ngumlungiseleli kaThixo xa wathumela uEzra kunye nomnikelo wokuba kubuye kwakhiwe loo ndlu nakamva xa wathumela uNehemiya ukuya kwakha kwakhona iindonga zeYerusalem. (Ezra 7:11-26; 8:25-30; Nehemiya 2:1-8) Igunya elongamileyo leRoma lakhonza ngaloo ndlela xa lahlangula uPawulos kwihlokondiba eYerusalem, lamkhusela ebudeni bokwaphukelwa ngumkhombe, laza lamlungiselela indlu eyeyakhe eRoma.—IZenzo 21:31, 32; 28:7-10, 30, 31.

¹⁴ Ngokufanayo, amagunya ehlabathi aye akhonza njengomlungiseleli kaThixo kumaxesha anamhlanje. Ngokomzekelo, ngowe-1959 iNkundla Ephakamileyo yaseKhanada yawisa isigwebo sokuba omnye wamaNgqina kaYehova owayetyholwe eQuebec ngokupapasha uncwadi olugxekayo nolunyelisayo wayengenatyala—ngaloo ndlela iphikisana nowayesakuba ngumongameli waseQuebec, uMaurice Duplessis owayenomoya wobutshaba.

15. Kungayiphi indlela ebanzi amagunya angumlungiseleli kaThixo ngayo, yaye oku kuwanika liphi ilungelo?

¹⁵ Ngokubhekele phaya, ngokubanzi, oorhulumente bamazwe bakhonza njengomlungiseleli kaThixo ngokugcina ucwangco de uBukumkani bukaThixo buthabathe iintambo. Ngokutsho kukaPawulos, ukuze lenze oku, igunya ‘liphatha ikrele,’ elifanekisela ilungelo lalo lokohlwaya. Ngokuqhelekileyo, oko kubandakanya ukuvalelwa entolongweni okanye ukubizwa kwemali yesohlwayo. Kumazwe athile oku kusenokuquka kwanesigwebo sokufa.a Kwelinye icala, amazwe amaninzi aye akhetha ukungabi naso isigwebo sokufa, yaye nelo ikwalilungelo lawo.

16. (a) Ekubeni igunya lingumlungiseleli kaThixo, yintoni abathile babakhonzi bakaThixo abaye bakugqala kufanelekile ukuyenza? (b) Luluphi uhlobo lomsebenzi wengqesho umKristu ebengayi kulwamkela, yaye ngoba?

¹⁶ Isibakala sokuba amagunya awongamileyo engabalungiseleli bakaThixo sichaza isizathu sokuba uDaniyeli, amaHebhere amathathu, uNehemiya, noMordekayi bakwazi ukwamkela izikhundla zembopheleleko kurhulumente waseBhabhiloni nowasePersi. Ngaloo ndlela babenokukwazi ukubhena kuRhulumente ukuze kulungelwe abantu bakaThixo. (Nehemiya 1:11; Estere 10:3; Daniyeli 2:48, 49; 6:1, 2) Nanamhlanje wambi amaKristu enza imisebenzi yaseburhulumenteni. Kodwa ekubeni ahlukile ehlabathini, awangeneleli kwimibutho yezobupolitika, awafuni zikhundla zobupolitika, okanye amkele izikhundla zowiso-mthetho kwimibutho yezobupolitika.

Imfuneko Yokholo

17. Ziziphi iimeko ezinokushukumisela abathile abangengomaKristu ukuvukela igunya?

¹⁷ Noko ke, kuthekani ukuba igunya livumela ukunganyaniseki okanye kwanengcinezelo? Ngaba amaKristu afanele azame ukulithabathel’ indawo elo gunya ngelinye elikhangeleka libhetele? Kaloku, ukungabikho kokusesikweni nokunganyaniseki koorhulumente akuyonto intsha. Kwinkulungwane yokuqala, uBukhosi baseRoma babusamkela izenzo ezingekho sikweni ezinjengobukhoboka. Kwakhona babusamkela amagosa aseburhulumenteni anganyanisekanga. IBhayibhile ithetha ngababuthi berhafu ababeqhatha, umgwebi ongenabulungisa, nerhuluneli eyayifuna ukunyotywa.—Luka 3:12, 13; 18:2-5; IZenzo 24:26, 27.

18, 19. (a) AmaKristu asabela njani ukuba kukho ukusetyenziswa kakubi kwegunya okanye ukunganyaniseki kwamagosa aseburhulumenteni? (b) AmaKristu aye abuphucula njani ubomi babantu ngabanye njengoko kuphawulwa ngumbhali-mbali othile nakwibhokisi engezantsi?

¹⁸ AmaKristu ngewayezame ukuphelisa oko kusetyenziswa kakubi kwegunya emva apho, kodwa awazange enjenjalo. Ngokomzekelo, uPawulos akazange ashumayele ngokupheliswa kobukhoboka, yaye akazange axelele amaKristu awayenamakhoboka ukuba akhulule amakhoboka awo. Kunoko, waluleka amakhoboka kwakunye neenkosi zawo ukubonakalisa intlonelo yobuKristu kwiinkqubano zawo. (1 Korinte 7:20-24; Efese 6:1-9; Filemon 10-16; bona kwaneyoku-1 kaPetros 2:18.) Ngokufanayo, amaKristu awazange abandakanyeke kwizenzo zemvukelo. Ayexakeke kakhulu eshumayela “iindaba ezilungileyo zoxolo.” (IZenzo 10:36) Ngowama-66 C.E., umkhosi waseRoma warhangqa iYerusalem waza wabuya warhoxa. Kunokuhlala nabakhuseli abanemvukelo beso sixeko, amaKristu angamaHebhere ‘asabela ezintabeni’ ethobela ulwalathiso lukaYesu.—Luka 21:20, 21.

¹⁹ AmaKristu okuqala aziyeka izinto zinjengokuba zinjalo aza azama ukuphucula ubomi babantu ngabanye ngokubanceda ukuba balandele imigaqo yeBhayibhile. Umbhali-mbali uJohn Lord, kwincwadi yakhe ethi The Old Roman World, wabhala oku: “Uloyiso lokwenyaniso lobuKristu lwabonwa ngokuthi bubenze babe ngabantu abalungileyo abo babezibanga belandela iimfundiso zabo, kungekhona ngokuguqula amaziko adumileyo, okanye oorhulumente, okanye imithetho.” Ngaba amaKristu namhlanje afanele enze okwahlukileyo?

Xa Urhulumente Engancedi

20, 21. (a) Elinye igunya lehlabathi lasilela njani ukuba ngumlungiseleli kaThixo wokulungileyo? (b) AmaNgqina kaYehova afanele asabele njani xa etshutshiswa ngemvume kaRhulumente?

²⁰ NgoSeptemba 1972, kwabakho intshutshiso eqatha nxamnye namaNgqina kaYehova kwilizwe elisembindi Afrika. Amawaka aphangwa zonke izinto zawo aza aphathwa kakubi ngokugqithiseleyo, kuquka ukubethwa, ukungcungcuthekiswa nokubulawa. Ngaba igunya elongamileyo layiphumeza indima yalo yokukhusela amaNgqina? Alizange! Kunoko, lakhuthaza ugonyamelo, linyanzelela la maKristu angenabungozi ukuba asabele kumazwe angabamelwane ukuze akhuseleke.

²¹ Ngaba amaNgqina kaYehova ebengafanele abavukele kusini na abangcikivi abanjalo? Akunjalo. AmaKristu afanele akunyamezele ngomonde ukuphathwa kakubi okunjalo, esiba ngazithobileyo ngokuxelisa uYesu: ‘Owathi esiva ubunzima, akaphindezela asongele; ke ubeyekele kulowo ugwebayo ngokobulungisa.’ (1 Petros 2:23) Akhumbula ukuba xa uYesu wabanjwayo emyezweni waseGetsemane, wamkhalimela umfundi owazama ukumkhusela ngekrele, waza kamva waxelela uPontiyo Pilato wathi: “Ubukumkani bam asibubo obeli hlabathi; ukuba bebububo obeli hlabathi ubukumkani bam, amakhonza am ange ezama, ukuze ndinganikelwa kumaYuda; ngoku ke ubukumkani bam asibobalapha.”—Yohane 18:36; Mateyu 26:52; Luka 22:50, 51.

22. Nguwuphi umzekelo omhle amaNgqina aseAfrika athile awawumiselayo xa ayebandezeleka ngenxa yentshutshiso eqatha?

²² Ekhumbula umzekelo kaYesu, loo maNgqina aseAfrika aba nenkalipho yokulandela isiluleko sikaPawulos: “Ningabuyekezi ububi ngobubi nakubani. Khathalelani okuhle emehlweni abantu bonke. Ukuba kunokwenzeka, okukokwenu nina, hlalani ninoxolo nabantu bonke. Musani ukuziphindezelela, zintanda; yikhweleleni ingqumbo; kuba kubhaliwe kwathiwa, Impindezelo yeyam, kuya kubuyekeza mna, itsho iNkosi.” (Roma 12:17-19; thelekisa amaHebhere 10:32-34.) Onjani wona ukuchukumisa umzekelo abazalwana bethu baseAfrika abanguwo kuthi sonke namhlanje! Kwanaxa igunya lisala ukwenza izinto ngokubekekileyo, amaKristu okwenyaniso awayityesheli imigaqo yeBhayibhile.

23. Yiyiphi imibuzo ekusafuneka ixutyushiwe?

²³ Noko ke, amagunya awongamileyo anokulindela ntoni kumaKristu? Ngaba kukho nayiphi na imida koko anegunya lokukufuna? Oku kuza kuxutyushwa kwinqaku elilandelayo.

[Umbhalo osemazantsi]

Unokucacisa Na?

◻ Ziziphi ezinye iindlela anokuthi umntu ‘awachase’ ngazo amagunya awongamileyo?

◻ Uyintoni ‘ummiselo kaThixo’ ngokubhekisele kwigunya laseburhulumenteni?

◻ Kungayiphi indlela athi amagunya abe ‘ngawokoyikwa’?

◻ Oorhulumente babantu bakhonza njani ‘njengomlungiseleli kaThixo’?

[Ibhokisi ekwiphepha 21]

Ileta Evela Kumphathi Wamapolisa

ILETA enophawu olunombhalo othi “Inkonzo Yaseburhulumenteni Yelizwana LaseMinas Gerais” yafika kwiofisi yesebe leWatch Tower Society eBrazil. Yayivela kumphathi wamapolisa wedolophu yaseConquista. Ngaba kwakukho nto ithile engahambi kakuhle? Masive oko ikuquletheyo. Ithi:

“Mhlekazi:

“Kuluvuyo kum ukuzazisa kuwe ngale leta. Bendisebenza njengomphathi wamapolisa kwidolophu yaseConquista, eMinas Gerais, kangangeminyaka emalunga nemithathu. Ndisoloko ndizama ukuba ngonenkathalo emsebenzini wam, kodwa bendidla ngokuba neengxaki ekulondolozeni uxolo entolongweni. Nangona amabanjwa ebeqeqeshelwa imisebenzi ethile, ebesuka angalawuleki.

“Kwiinyanga ezithile ezidlulileyo, uMnumzana O—wafika kwidolophu yethu waza wazazisa njengomnye wamaNgqina kaYehova. Waqalisa ukushumayeza athile kumabanjwa esinawo iBhayibhile, ewafundisa ukulesa nokubhala ibe ewabonisa izinto ezisisiseko kwezempilo nobugcisa kwezentlalo ekwawaxelela ngeBhayibhile Engcwele. Indlela awayesebenza ngayo lo mshumayeli yayibonakalisa ukuzinikela, uthando nokuzincama. Ngokukhawuleza isimo samabanjwa saguquka ngokuphawulekayo saphucuka, nto leyo eyabamangalisayo yaza yabenza banoxabiso kakhulu abo babekubona oku.

“Ngenxa yoko kwenzekayo kwintolongo yethu, ndinqwenela ukuyazisa ngokusemthethweni iWatch Tower Bible and Tract Society ngoxabiso esinalo ngomsebenzi omhle kangaka owenziwa kwibutho lethu ngulo mshumayeli ufanelekileyo.”

Ngokubhekisele kwigunya laseburhulumenteni, umpostile uPawulos wathi: “Yenza okulungileyo, wodunyiswa kwalilo.” (Roma 13:3) Ngokuqinisekileyo oku kwaba njalo kule meko ikhankanywe ngasentla. Obunjani bona ubungqina bokuba namandla aguqulayo kweLizwi likaThixo obubonakaliswe ziindaba ezilungileyo ngeenyanga nje ezimbalwa into ke leyo isigwebo esingenakuyenza kangangeminyaka emininzi!—INdu. 19:7-9.