Nguwuphi UThixo Ofanele Umnqule?

OKOKUQALA, ngubani uThixo omnye ekufanele kunqulwe yena yedwa? IBhayibhile iphendula ngendlela engqale kakhulu. Incwadi yeSityhilelo ivakalisa oku: “Ufanele, Nkosi [“Yehova,” NW], ukwamkela uzuko, nembeko, namandla; ngokuba inguwe owadala zonke izinto, nangenxa yokuthanda kwakho zikho, zadalelwa oko.” (ISityhilelo 4:11) Ewe, uYehova, uMdali, ungokuphela koThixo esifanele simnqule. Ngoba? Siza kubuyela kuloo mbuzo kungekudala. Kodwa okokuqala, makhe sithethe ngabanye oothixo abanqulwa luluntu.

Lowo Ulawula Bonke Oothixo Bobuxoki

Nangona abantu bekhonza oothixo abaninzi, inyaniso ikukuba lonke unqulo olunikelwa kubo bonke oothixo kuzo zonke izizwe—ngaphandle konqulo olunikelwa kuYehova, uMdali—luphumeza injongo yothixo nje omnye. Ngayiphi indlela? Funda amazwi ompostile uPawulos aya kumaKristu aseKorinte. Kweso sixeko kwakunqulwa izithixo ezininzi, ukususela kuAphrodite oziphethe kakubi ukusa kuAesculapius, uthixo wabo wokuphilisa. Phofu ke, uPawulos wabonisa ukuba eneneni kwakukho umthombo nje omnye wamandla angendawo awayelawula bonke abo thixo. Wabhala oku: “Amadini eziwenzayo iintlanga, ziwenzela iidemon, aziwenzeli uThixo.” (1 Korinte 10:20) Ewe, amaKorinte angabahedeni ayenqula iidemon.

Iidemon zabakho ngenxa yemvukelo. Eyokuqala neyona inkulu kuzo yayisisidalwa esisisithunywa sezulu esahenda uEva ukuba aphule umthetho kaThixo emva phayaa emyezweni wase-Eden. (Genesis 3:1-6; Yohane 8:44) Ngokwenjenjalo, esi sidalwa savukela nxamnye nolongamo loMdali. Emva koko, sabizwa ngokuba nguSathana, gama elo lithetha “uMchasi.” Kamva, ezinye izidalwa zokomoya zamthelela ekuvukeleni. Nazo zaba ziidemon, yaye uSathana uchazwa ‘njengomphathi weedemon.’ (Mateyu 12:24, 26) Kwincwadi yeSityhilelo, ezi demon zibizwa ngokuba ‘zizithunywa’ zikaSathana. (ISityhilelo 12:7) Ngoko ukunqula iidemon kuyafana nokunqula uSathana.

USathana unempembelelo enkulu kakhulu. Umpostile uYohane wathi “ihlabathi liphela” lilele emandleni akhe, yaye uPawulos wambiza ngokuthi ‘nguthixo weli phakade.’ (1 Yohane 5:19; 2 Korinte 4:4) Ngenxa yoko, ukunqula nawuphi na uthixo ngaphandle koYehova ngokwenene kukunqula uSathana. Ubuncinane, oku kuphumeza iinjongo zikaSathana kuba usukelo lwakhe lukukuhenda abantwana baka-Adam noEva ukuba bavukele uYehova. Ekubeni uSathana ‘elahlekisa elimiweyo liphela,’ ngokucacileyo uye waphumelela kwiimeko ezininzi kakhulu. (ISityhilelo 12:9) Kodwa akaphumeleli kuzo zonke. Kusekho izigidi ezizama ngamandla ukunqula uYehova. Kutheni zisenjenjalo?

Iziqhamo Zonqulo Oluphosakeleyo

Phakathi kwezinye izinto, ziyazi ukuba ukunqula oothixo ngaphandle koYehova kuyilahleko enkulu. Ekumbiweni kwezinto zakudala kwiCarthage yamandulo eMntla Afrika kwavunjululwa amangcwaba abantwana. Kuwo kwakukho amathambo abaselula ekwakubingelelwe ngabo kuthixo welaseFenike uBhahali. Ukubingelela ngabantwana kwakuyilahleko enkulu kwabo bantu baseCarthage ngenxa yokunqula kwabo uBhahali. UbuKatolika bamaxesha aphakathi nabo babangela ilahleko xa bazisa intlungu engathethekiyo ngeeMfazwe Zomnqamlezo ezinxanelw’ igazi nangeeNkundla Zokuncina Amakholwa ezikhohlakeleyo. Ukunqulwa koothixo bamaInca beMerika yangaphambi kukaColumbus kwabandakanya ukubulawa kwamawaka okungokwesithethe.

Kumaxesha akutshanje, iindidi ezahlukahlukeneyo zonqulo ziye zabandakanyeka ekubulaweni kwabantu ngolunya eIndiya, yaye ziye zafak’ isandla kwiingxaki ezinzulu zobupolitika eMbindi Mpuma naseMntla Ireland. Ukungazi, inkolelo noloyiko zifanele zibalwe njengenxalenye yelahleko efunyanwa ngumntu ngenxa yokunqula oothixo bakhe abaninzi.

Kutheni Ufanele Ukhonze UYehova UThixo?

Kwelinye icala, ukunqula uYehova kuzisa iingenelo kuphela. Phakathi kwezinye izinto, ‘ungulowo udla ubomi, ase emaphakadeni asemaphakadeni, owadala izulu nezinto ezikulo, nomhlaba nezinto ezikuwo, nolwandle nezinto ezikulo.’ (ISityhilelo 10:6) Ngaloo ndlela, sifanele simnqule ngenxa yokuba unguMdali wethu.

Kwakhona, sifanele simnqule uYehova uThixo ngenxa yokuba iimpawu zakhe zisikhuthazela ukuba simnqule. Umpostile uYohane wathi “uThixo uluthando.” (1 Yohane 4:8) Indoda ethembekileyo uYobhi yathi “[uThixo] ulumkile ngentliziyo, ukhaliphile ngamandla.” (Yobhi 9:4) UMoses wavuma ingoma ngaye esithi: “NguLiwa; ugqibele umsebenzi wakhe, ngokuba zonke iindlela zakhe zisesikweni; nguThixo wentembeko, tu ubugqwetha; lilungisa, uthe tye yena.” (Duteronomi 32:4) Ngubani obeya kuthandabuza ukunqula uThixo onjalo?

Ukongezelela, iBhayibhile ithi: “Ukuhlonela uThixo kunceda ngako konke, kunedinga lobomi bakalokunje, nobobo buza kubakho.” (1 Timoti 4:8) Hayi indlela okuyinyaniso ngayo oku! UYehova ufunela uluntu okulungileyo. Walungiselela indalo yakhe umhlaba njengekhaya elihle, yaye wenza amalungiselelo ayintabalala ukuze ubomi bube nokunandipheka. Phezu kwako nje ukuvukela komntu, uThixo uye waqhubeka ezimasa ubomi kulo mhlaba, elungiselela zonke iimfuno zokuphathekayo zoluntu njengoko “ilanga lakhe elenza liphume phezu kwabakhohlakeleyo nabalungileyo.”—Mateyu 5:45.

Kodwa ‘idinga lobomi bakalokunje’ libhekele phayaa. Ukukhonza uThixo kuyanelisa. Koko sasenzelwe ukukwenza. Yaye uThixo uyabanceda abo bamkhonza ngokuthembeka ukuba baphumelele ebomini. NgeBhayibhile, unikela ukhokelo kubantu abangatshatanga, kwizibini ezitshatileyo, ebantwaneni—abantu bazo zonke iindidi. Unikela ubulumko obunokuthenjwa nobusebenzisekayo bokunceda kuzo zonke iimeko ukuze sibe nokucombulula iingxaki zokuphila njengabantu abangafezekanga kwihlabathi eliphantsi kwempembelelo kaSathana. Ukuba sinqula uThixo ngendlela emkholisayo, sinokunandipha “uxolo lukaThixo, olugqithisele kuko konke ukuqonda.”—Filipi 4:7.

Kwakhona, okubalulekileyo ‘lidinga lobomi obuza kubakho.’ UYesu waxelela umFarisi uNikodemo oku: “Wenjenje uThixo ukulithanda kwakhe ihlabathi, ude wancama uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade.” (Yohane 3:16) Ubomi obungunaphakade! Nguwuphi uthixo ngaphandle koYehova onokuthembisa into enjalo aze azalisekise idinga lakhe? Imeko yokugqibela yabo bafumana eso sipho sizukileyo ichazwa kwiSityhilelo: “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.” (ISityhilelo 21:4, 5) Enyanisweni, amathemba obomi obuza kubakho afanele asenze sifune ukukhonza uYehova!

Ngoko, nguwuphi uThixo esifanele simnqule? NguYehova kuphela, uMdali. Kubo bonke oothixo, la mazwi asebenza kuye kuphela: “Mikhulu, ingummangaliso imisebenzi yakho, Nkosi, Thixo Somandla; zinobulungisa, ziyinyaniso iindlela zakho, Kumkani weentlanga. Ngubani na ongekhe akoyike wena, Nkosi, angalizukisi igama lakho? Ngokuba inguwe wedwa ongcwele; ngokuba zonke iintlanga ziya kuza ziqubude phambi kwakho, ngokuba imisebenzi yakho yobulungisa ibonakalisiwe.” (ISityhilelo 15:3, 4) Hayi indlela abalumke ngayo abo basabelayo kwisibongozo somdumisi: “Yizani, masiqubude, siguqe, sithobe phambi koYehova umenzi wethu”!—INdumiso 95:6.

[Umfanekiso okwiphepha 6]

Abanye boothixo uSathana aye waphembelela uluntu ukuba lubanqule

[Umfanekiso okwiphepha 7]

Amathemba obomi obuza kubakho afanele asenze sifune ukukhonza uYehova