Ubomi Nobulungiseleli BukaYesu

Phambi Kwentlanganiso Yamatyala, Kwandule Kuyiwe KuPilato

UBUSUKU buya esiphelweni. UPetros uye wamkhanyela uYesu isihlandlo sesithathu, yaye amalungu eNtlanganiso Yamatyala akugqibile ukuvavanywa kwetyala okugculelayo aza achithakala. Noko ke, ayahlanganisana kwakhona ngentsasa yangoLwesihlanu ngokukhawuleza nje kwakuba kusile, ngeli xesha kwiHolo yeNtlanganiso Yamatyala. Injongo yawo isenokuba kukwenza ukuvavanywa kwetyala ebusuku kubonakale kusemthethweni. Xa uYesu eziswa phambi kwawo, athi, njengoko ebetshilo ebusuku: “Ukuba unguye uKristu wena, sixelele.”

UYesu uphendula athi: “Ukuba ndithe ndanixelela, anisayi kukholwa; nokuba ke ndithe ndanibuza, anisayi kundiphendula.” Noko ke, uYesu uzichaza ngenkalipho ukuba ungubani na, esithi: “Ethabatha kweli xa, uNyana woMntu uya kuba ehleli ekunene kwamandla kaThixo.”

“Unguye na ke wena uNyana kaThixo?” bonke bafuna ukwazi.

UYesu uphendula athi: “Nani nithi ndinguye.”

Kwaba bantu bazimisele ukubulala, le mpendulo yanele. Bayigqala ilunyeliso. Babuza besithi: “Sisabufunelani na ubungqina, kuba thina ngokwethu sivile ngomlomo wakhe.” Ngoko bayambopha uYesu, bahambe naye, baze bamnikele kwirhuluneli yamaRoma uPontiyo Pilato.

UYuda, umngcatshi kaYesu, ebekubukele okuqhubekayo. Xa ebona ukuba uYesu ugwetyiwe, uziva enetyala. Ngoko uya kubabingeleli abakhulu namadoda amakhulu ukuze abuyisele amaqhosha esilivere angama-30, ecacisa esithi: “Ndonile, kuba ndingcatshe igazi elingenatyala.”

“Iyini na kuthi loo nto? Zibonele wena,” baphendula ngokungenalusizi besitsho. Ngoko uYuda uwaphosa phantsi etempileni amaqhosha esilivere aze ahambe azame ukuzixhoma. Noko ke, kubonakala ukuba isebe uYuda abophelele kulo intambo liye laphuka, yaye umzimba wakhe uwa ubetheke elulwalweni olungezantsi, uze ugqabhuke phakathi.

Ababingeleli abakhulu abaqinisekanga ngento amabayenze ngala maqhosha esilivere. Bagqiba ngokuthi: “Akuvumelekile ukuwagalela emkhombeni weminikelo, ngokuba elinani legazi.” Ngoko, emva kokubhunga, bathenga ngale mali umhlaba wombumbi ukuze bangcwabe abasemzini kuwo. Ngaloo ndlela loo mhlaba ubizwa ngokuba ‘nguMhlaba weGazi.’

Kusekusasa kakhulu xa uYesu esisiwa kwibhotwe lerhuluneli. Kodwa amaYuda abemphelekile ayala ukungena ngenxa yokuba akholelwa ukuba ukusondelelana okunjalo nabeeNtlanga kuya kuwenza iinqambi. Ngoko ukubalungiselela, uPilato uyaphuma. Ubuza athi: “Nimisa tyala lini na kuye lo mntu?”

“Ukuba ebengenguye umenzi wobubi yena, singe singamnikelanga kuwe,” baphendula batsho.

Engafuni kuzibandakanya koku, uPilato uphendula athi: “Mthabatheni nina, nimgwebe ngesiko lenu.”

Etyhila injongo yawo yokubulala, amaYuda ame ngelithi: “Akuvumelekile kuthi ukuba sibulale umntu.” Eneneni, ukuba ayembulele uYesu ebudeni boMthendeleko wePasika, oko kwakusenokubangela isiphithiphithi esidlangalaleni, ekubeni abaninzi bemhlonela uYesu. Kodwa ukuba anokwenza amaRoma ukuba ambulale ngesityholo sobupolitika, oku kuya kuwenza angabi natyala phambi kwabantu.

Ngoko iinkokeli zonqulo, zingakukhankanyi ukuvavanya kwazo ityala kwangaphambili ezithe kuko zamgweba uYesu ngokunyelisa, ngoku zivelisa zityholo zimbi. Zenza isityholo esintlu-ntathu zisithi: “Simfumene lo [1] elulahlekisa uhlanga, [2] engavumi ukuba kunikelwe irhafu kuKesare, [3] esithi, unguKristu ukumkani yena ngokwakhe.”

UPilato ukhathazwa sisityholo sokuba uYesu uzibanga engukumkani. Ngoko ke, ungena ebhotwe kwakhona, abizele uYesu kuye, aze ambuze oku: “Unguye na uKumkani wamaYuda?” Ngamanye amazwi, ngaba uye waphula umthetho ngokuzivakalisa ungukumkani ochasene noKesare?

UYesu ufuna ukwazi oko uPilato sele ekuvile ngaye, ngoko ubuza oku: “Uyithetha le nto iphuma kuwe, wayixelelwa ngabanye ngam, sini na?”

UPilato uzenza ongazi nto ngaye nomnqweno wokufuna ukwazi inyaniso. Uphendula athi: “Kanene, mna ndingumYuda na? Luhlanga lwakowenu nababingeleli abakhulu abakunikeleyo kum; wenze ntoni na?”

UYesu akazami nangayiphi na indlela ukuyiphepha le mbambano, leyo ingobukumkani. Impendulo ayinikelayo ngoku uYesu ngokungathandabuzekiyo iyamothusa uPilato. Luka 22:66–23:3; Mateyu 27:1-11; Marko 15:1; Yohane 18:28-35; IZenzo 1:16-20.

◆ Kungayiphi injongo ethi iNtlanganiso Yamatyala iphinde ihlanganisane ngayo kusasa?

◆ UYuda ufa njani, yaye yintoni eyenziwayo ngamaqhosha esilivere angama-30?

◆ Kutheni amaYuda efuna amaRoma abulale uYesu, kunokuba ambulale ngokwawo njengoko eye azama ukumbulala kumathuba angaphambili?

◆ AmaYuda ambeka ziphi izityholo uYesu?