Zaliswani Luvuyo
“Baye ke abafundi bezaliswe luvuyo nanguMoya oyiNgcwele.”—Izenzo 13:52.
1. (a) Uvuyo luluhlobo luni lwesiqhamo? (b) Kungenxa yaliphi ilungiselelo elivuyisayo le nto simele simzukise uThixo?
UVUYO! Olu phawu lobuKristu ludweliswe kwindawo yesibini ukusuka kuphawu oluyintloko, uthando, kwinkcazelo kaPawulos yesiqhamo somoya. (Galati 5:22-25) Yaye uyintoni umthombo wolo vuyo? Ziindaba ezilungileyo ezavakaliswa sisithunywa sezulu kubalusi abathobekileyo kwiminyaka engaphezu kwe-1 900 eyadlulayo, sisithi: “Yabonani, ndinishumayeza iindaba ezilungileyo zovuyo olukhulu, oluya kuba kubo bonke abantu; ngokuba nizalelwe namhlanje emzini kaDavide uMsindisi, onguKristu iNkosi.” Kwandula ke kwabonakala umkhosi wezithunywa zezulu waza wathelela eso sithunywa sezulu ekudumiseni ngovuyo uThixo usithi: “Uzuko kuThixo enyangweni, uxolo emhlabeni, inkolelo ebantwini.”—Luka 2:10-14.
2, 3. (a) Kutheni kwakufanelekile nje ukuba uThixo athumele uNyana wakhe wamazibulo ukuza kuba nguMhlawuleli woluntu? (b) Ziziphi ezinye iindlela uYesu awaziphumeza ngazo iinjongo zikaThixo ngoxa wayesemhlabeni?
2 Inceba kaYehova ngabantu ibonakaliswa ngokulungiselela usindiso ngoKristu iNkosi. Lo Nyana olizibulo kaThixo ungumfuziselo wobulumko bokwenyaniso yaye uchazwa njengothetha la mazwi ngoYise ngexesha lokudala: “Ndaye ndinaye, ndiyingcibi yomsebenzi, ndiziyolisa ngokwam iimini ngeemini; ndidlala phambi kwakhe ixesha lonke, ndidlala kwelimiweyo ihlabathi lakhe; nokuziyolisa kwam kukoonyana babantu.”—IMizekeliso 8:30, 31.
3 Ngoko ke, kwakufanelekile ukuba uYehova athumele lo Nyana, owayeyoliswa kangako kukubona oonyana babantu, ukuba abe nguMhlawuleli woluntu. Yaye oku kwakuya kuluzisa njani uzuko kuThixo? Kwakuya kumvulela indlela yokuphumeza injongo yakhe ezukileyo yokuzalisa umhlaba ngabantu abangamalungisa nabathanda uxolo. (Genesis 1:28) Ngaphezu koko, ngoxa lo Nyana onguYesu wayelapha emhlabeni, wabonisa phantsi kolona vavanyo luqatha ukuba umntu ofezekileyo unako ukumthobela ngokunyanisekileyo uYehova njengeNkosi enguMongami, ngaloo ndlela eluthethelela ngokupheleleyo ulawulo lobulungisa lukaYise kwindalo Yakhe. (Hebhere 4:15; 5:8, 9) Kwakhona ikhondo likaYesu lokugcina ingqibelelo lishiye umzekelo wokuba onke amaKristu okwenyaniso alandele ngokusondeleyo emanyathelweni akhe.—1 Petros 2:21.
4. Ukunyamezela kukaYesu kuphumele kuluphi uvuyo olukhulu, yaye oku kufanele kusikhuthaze njani?
4 UYesu waba novuyo olugqithiseleyo ngokwenza ukuthanda kukaYise, yaye ekwalindele uvuyo olukhulu ngakumbi, njengokuba umpostile uPawulos ebonisa kumaHebhere 12:1, 2: “[Masilubaleke] ngomonde ugqatso olubekwe phambi kwethu; sise amehlo kuyo iMbangi noMgqibelelisi wokholo lwethu, uYesu, owathi, ngenxa yovuyo olwalubekwe phambi kwakhe, wawunyamezela [“umthi wentuthumbo,” NW], elidelile ihlazo, waza wahlala phantsi ngasekunene kwetrone kaThixo.” Luluphi olu vuyo? Luvuyo uYesu analo, kungekuphela nje ngenxa yokungcwalisa igama likaYise nangokuhlawulela uluntu ekufeni kodwa kwakhona lolokulawula njengoKumkani noMbingeleli Omkhulu njengoko ebuyisela abantu abathobelayo kubomi obungenasiphelo kumhlaba oyiparadisi.—Mateyu 6:9; 20:28; Hebhere 7:23-26.
5. Bangoobani “abazalwana” bakaYesu, yaye luluphi uvuyo olukhethekileyo abalunandiphayo?
5 Ewe, uNyana kaThixo ebesoloko ekuvuyela ukukhonza uluntu. Yaye bekusoloko kumvuyisa ukusebenza noYise ekunyuleni iqela labantu abagcina ingqibelelo ababiza ngokuba ‘ngabazalwana’ bakhe nabathi ekufeni kwabo bavuselwe ezulwini. Aba banandipha uvuyo olukhethekileyo noYesu. Bachazwa ‘njengabanoyolo nabangcwele,’ yaye baya kuba “ngababingeleli bakaThixo nabakaKristu, babe ngookumkani kunye naye iminyaka eliwaka.”—Hebhere 2:11; ISityhilelo 14:1, 4; 20:6.
6. (a) Sisiphi isimemo esivuyisayo uKumkani asidlulisela ‘kwezinye izimvu’ zakhe? (b) Ngawaphi amalungelo ezininzi zezi zimvu eziwanandiphayo namhlanje?
6 Ngokungakumbi, isihlwele esikhulu ‘sezinye izimvu,’ eso uKumkani olawulayo akholiswayo siso aze asimise ngasekunene kwakhe, sifumana esi simemo: “Yizani, nina nisikelelweyo nguBawo, nibudle ilifa ubukumkani obalungiselwa nina kwasekusekweni kwehlabathi.” (Yohane 10:16; Mateyu 25:34) Elinjani lona ukuvuyisa ilungelo! Abaninzi baba abaza kuwudla ilifa ummandla wasemhlabeni woBukumkani, bade babambisane nabathanjisiweyo ekusingatheni izabelo ezinzima, kanye njengokuba uYehova wayexele kwangaphambili, esithi: “Baya kuma abasemzini, baluse imihlambi yenu, oonyana bezinye iintlanga babe ngabalimi bomhlaba wenu, nabezidiliya zenu. Ke nina ukubizwa kwenu, kuya kuthiwa ningababingeleli bakaYehova; kuya kuthiwa kuni, ningabalungiseleli boThixo wethu.” Bonke aba bathelela umprofeti kaThixo ekuthini: “Ndinemihlali ndanemihlali ngoYehova, umphefumlo wam uya kugcoba kuThixo wam; kuba endinxibe iingubo zosindiso.”—Isaya 61:5, 6, 10.
7. Kutheni le “mini” eqale ngowe-1914 ikhetheke kangaka nje?
7 Ngoku siphila kwimini ekhetheke kakhulu. Ukususela ngowe-1914 ibiyimini yokulawula kukaKristu njengoKumkani wasezulwini, mini leyo echazwe kwiNdumiso 118:24, 25 ngokuthi: “Le yimini ayenzileyo uYehova, masigcobe sivuye ngayo. Yehova, camagu, khawusindise, Yehova camagu, khawuhlangule [“khawusinike impumelelo,” NW].” Yimini eya kufikelela encotsheni xa uYehova etshabalalisa unqulo lweBhabhiloni aze amanyanise umtshakazi kaKristu wabazalwana abali-144 000 kunye noKumkani wabo wasezulwini. Bonke abantu bakaThixo baya ‘kuvuya bagcobe’ ngenxa yeso senzo. Kwakhona baya kuchulumanca luvuyo njengoko uKumkani wabo onguMesiya eya kube esilwa ngeArmagedon aze asindisele uhlanga lwakhe olunyanisekileyo kwihlabathi lakhe elitsha lobulungisa. (ISityhilelo 19:1-7, 11-16) Ngaba uYehova ubenza baphumelele abantu bakhe njengoko bevakalisa eli themba livuyisayo? Le ngxelo ilandelayo iza kucacisa.
Ulwando Lwazwenibanzi
8. (a) Luboniswe njani uvuyo ngomoya oyingcwele kwingxelo ekwiphepha 18 ukusa kwelama-21 leli phephancwadi? (b) Ziziphi ezinye zeembalasane zale ngxelo?
8 AmaNgqina kaYehova anamhlanje ‘aphuphuma ithemba ngamandla omoya oyingcwele.’ (Roma 15:13) Oku kuboniswe kwisicangca esikwiphepha 18 ukusa kwelama-21 leli phephancwadi, ekwandlalwe kuso ngokweenkcukacha ingxelo yazwenibanzi yenkonzo yoBukumkani ngowe-1990. Hayi indlela esivuya ngayo kukubona incopho entsha yabalungiseleli abakhutheleyo entsimini abazizi-4 017 213! Oku kuphawula ulwando lwe-77 ekhulwini ebudeni beminyaka elishumi edluleyo, njengoko ukuhlanganiswa kwezimvu kusenziwa ngokukhawuleza kumazwe angama-212 ehlabathini lonke. Emva kweminyaka eli-15, kwakhona ababhaptiziweyo benze inani eliyincopho ephawulekayo—ama-301 518! Kubekho amanani amakhulu ngokugqithiseleyo abantu ababhaptiziweyo kwiindibano ezininzi, ngokukodwa kwezo zazinamaNgqina awayevela kwiMpuma Yurophu. Phakathi kwaba bekukho abantu abaninzi abaselula, belingqina libubuxoki ibango lobusoshiyali lokuba unqulo lwaluya kubhanga njengoko isizukulwana sabantu abakhulileyo siphela.
9. (a) Ukubaqeqesha kwabazali besebancinane abantwana babo kuzisa wuphi umphumo ovuyisayo? (b) Ngawaphi amava asekuhlaleni okanye nokuba ngawaphi nje amanye akubalaselisayo oku?
9 Inkitha yabantu abaselula iyasamkela isibongozo esikwiNdumiso 32:11, esithi: “Vuyani kuYehova, nigcobe, nina malungisa, nimemelele, nina nonke abantliziyo zithe tye.” Kubonakala ukuba abazali abaninzi bayasisebenzisa isiluleko sokuqeqesha abantwana babo “kwasebusaneni.” (2 Timoti 3:15, NW) Balusebenzisa kakuhle uncwadi neekhasethi ezilungiselelwe abo baselula. Njengoko aba baselula beqalisa esikolweni, zisuka nje banikela ubungqina obuhle, njengokuba ngokomzekelo kwakunjalo ngentombazana yaseJapan eyayineminyaka esibhozo ubudala eyanikela le ngxelo: “Emva kweeholide zehlobo, ndaya kumfundisi-ntsapho wam ndaza ndambuza oku: ‘Ngaba wakhe walityelela ingcwaba likatata wakho ebudeni beholide?’ Waphendula ngelithi: ‘Ewe, utata wayenobubele gqitha, yaye nyaka ngamnye ndiyalityelela ingcwaba lakhe.’ Ndathi: ‘Ukuba ufundisisa iBhayibhile uze uthobele iimfundiso zikaThixo, uza kumbona utata wakho onothando kwiparadisi esemhlabeni.’ Ndandula ke ndamnika Incwadi Yam Yamabali EBhayibhile. Ngoku umfundisi-ntsapho wethu ufundela iklasi yonke isahluko esinye sale ncwadi rhoqo ngethuba lesidlo sasemini veki nganye.”
10. Yiyiphi injongo entle eye yaphunyezwa yincwadi ethi Abantu Abaselula, yaye yiyiphi eminye imizekelo yoku?
10 Abantu abaselula abakwishumi elivisayo baye bayisebenzisa kakuhle gqitha incwadi ethi Imibuzo Yabantu Abaselula—Iimpendulo Eziluncedo, kufundisiso lobuqu nasekunikeleni ubungqina kwabanye abaselula. Kwanabazali bayayixabisa le ncwadi. Omnye udade waseSwitzerland, owabhalisa njengovulindlela ongumncedani, wagqiba ekubeni atyelele abazali babantwana abafunda kwibanga elinye nomntwana wakhe. Oku kwavulela ithuba lengxubusho entle kunye nabazali abaninzi, waza wabashiyela iincwadi ezingama-20 (ubukhulu becala ethi Abantu Abaselula) namaphephancwadi angama-27. Xa intombazana yesikolo yaseTrinidad yahambisa le ncwadi kumfundisi-ntsapho wayo esikolweni, unina wenza ibuyelo, waza wahambisa imibhalo yayo engama-25 kubafundisi-ntsapho abangama-36. Kwinyanga elandelayo wanikela ingqalelo ekhethekileyo kubazali awayebazi ngokobuqu, ehambisa kubo ezinye iincwadi ezingama-92 waza waqalisa izifundo zeBhayibhile zamakhaya ezitsha. EKorea umfundisi-ntsapho wesikolo semfundo yamabanga aphakathi wayesebenzisa incwadi ethi Abantu Abaselula ekunikeleni iintshumayelo ezimfutshane kwimixholo enjengethi “Ndinokuwaphucula Njani Amanqaku Endiwafumanayo?” nothi “Ndinokuqhubana Njani Nomfundisi-ntsapho Wam?” waza ke wahambisa incwadi. Emva kokuba abafundi bamkele iincwadi ezingama-39, bambi abazali baqalisa ukukhalaza. Kodwa inqununu yahlolisisa umbhalo wale ncwadi, yaza yayichaza njengencwadi “ebalaseleyo,” yaza yaodolela intombi yayo enye yazo.
Eyona Mfundiso Isemgangathweni
11, 12. Bubuphi ubungqina obuthile besibakala sokuba iimpapasho zeWatch Tower Society zinikela imfundiso esemgangathweni?
11 Kwakhona abantu abaninzi bayayixabisa imfundiso esemagqabini yeempapasho zethu, njengokuba ngokomzekelo isikolo saseUnited States saodola imibhalo eli-1 200 kaVukani! (wesiNgesi) kaJulayi 22, 1990 (owayexubusha ngokukhotyokiswa sisiyobisi icrack) khon’ ukuze isetyenziswe kumagumbi aso okufundela. Ngaphezu koko, ihambo engumzekelo yabantwana bamaNgqina kaYehova esikolweni iyaqhubeka ixhokonxa umdla wabantu. Kwigumbi lokufundela ekwakungxolwa kakhulu kulo eThailand, umfundisi-ntsapho wabiza uRacha owayeneminyaka eli-11 ubudala ukuba eze kuma phambi kweklasi waza wamncoma ngehambo yakhe entle, esithi: “Kutheni le nto nonke ningalandeli umzekelo wakhe? Uzikhuthalele izifundo zakhe yaye unesimilo.” Wandula ke wongezelela esithi: “Phofu ke, ndiyaqonda ukuba kofuneka nibe ngamaNgqina kaYehova njengoRacha ukuze niphucule ihambo yenu.”—Thelekisa IMizekeliso 1:8; 23:22, 23.
12 Omnye udade oselula weRiphabliki yaseDominican ubhala oku: “Xa ndandineminyaka nje emine ubudala, ndandisele ndiza kunyuselwa kwisikolo sabasaqalayo esingokonqulo, apho ndathi ndafunda khona ukulesa nokubhala. Ndanika unongendi owayengumfundisi-ntsapho wam, isipho sencwadi ethi Unokuphila Ngonaphakade KwiParadisi Esemhlabeni ndaza ndanyengeza nombhalo omfutshane othi: ‘Ndivuya kakhulu kuba uye wandifundisa ukulesa nokubhala. Ndinqwenela ukuba uziqonde iinkolelo zam ezingokonqulo uze ube nethemba nam endinalo lokuphila ngonaphakade kulo mhlaba xa wenziwe iparadisi.’ Ngenxa yoku ndagxothwa esikolweni. Kwiminyaka esibhozo kamva ndadibana naye kwakhona lo mfundisi-ntsapho. Wandibalisela indlela awathi wakwazi ngayo ukuyifunda loo ncwadi, phezu kwayo nje inkcaso ekrakra yomfundisi. Wafudukela kwikomkhulu, apho wathi wakwazi ukufundisisa iBhayibhile kunye nelinye iNgqina. Sibhaptizwe kunye kwiNdibano Yesithili ‘Yentetho Enyulu.’” Njengoko kwakuprofetiwe, ubulumko bunokuphuma ‘nasemlonyeni weentsana’!—Mateyu 21:16; INdumiso 8:1, 2.
13. Ulutsha oluninzi lusabela njani kwisiluleko sikaSolomon, yaye oku kuboniswa njani kwingxelo yehlabathi liphela?
13 USolomon wanikela esi siluleko sikhuthazayo: “Vuya, ndodana, ebutsheni bakho, ikuchwayithise intliziyo yakho ngemihla yobudodana bakho, uhambe ngeendlela zentliziyo yakho.” (INtshumayeli 11:9) Kuyavuyisa namhlanje ukubona abantwana abaninzi kangaka bamaNgqina kaYehova bewasebenzisa la mazwi, besebenzisa iminyaka yabo yeshumi elivisayo ekwenzeni amalungiselelo enkonzo yexesha elizeleyo kuYehova baze bangenele lo msebenzi ungowona uzukileyo njengoko begqiba esikolweni. Amanani oovulindlela ayaqhubeka esanda ngokukhawuleza, kuba sibe nabangama-821 108 abaye bafak’ ingxelo ebudeni bonyaka. Xa kuhlanganiswa nabazalwana noodade abali-11 092 abebekhonza ebheteli, oko kulingana nama-21 ekhulwini sesimbuku sabavakalisi!
14. Liliphi igalelo oodade wethu abanalo, ibe yiyiphi enye inkalo abafanele banconywe kuyo?
14 Kubangel’ umdla ukwazi ukuba kumazwe amaninzi, njengaseUnited States, malunga nama-75 ekhulwini abo bonke abavakalisi abangoovulindlela bangoodade, nto leyo egxininisa ubunyaniso bamazwi eNdumiso 68:11, athi: “INkosi iya kukhupha izwi elinamandla, ube mkhulu umkhosi weentokazi ezishumayela iindaba ezilungileyo.” Simele sibancome oodade bethu kuba benza inxalenye enkulu yomsebenzi wasentsimini. Ukufundisa kwabo ngobuchule kwizifundo zeBhayibhile zamakhaya kukhokelela abaninzi enyanisweni, yaye simele sibancome ngokufudumeleyo noodade abatshatileyo abawaxhasa ngokunyanisekileyo amadoda abo kwimisebenzi yawo emininzi yebandla.—IMizekeliso 31:10-12; Efese 5:21-25, 33.
Imfundiso YeBhayibhile Iyanda
15. (a) Wambi amazwe adweliswe kwingxelo yehlabathi liphela aye abalasela njani kumsebenzi wokuqhuba izifundo zeBhayibhile zamakhaya? (b) Ngawaphi amava onokuwabalisa, abonisa indlela okunokuba nomphumo omhle ngayo ukuqhuba izifundo zeBhayibhile?
15 Umsebenzi wokufundisa abantu ngeBhayibhile uqhuba kakuhle kakhulu, kuba kuqhutywa izifundo ezingama-3 624 091 nyanga nganye ehlabathini lonke. Inyaniso yeBhayibhile inokubuguqula ubuntu, njengokuba ingxelo engezantsi ibonisa. Ekuqaleni kukaJanuwari 1987, enye indoda yaseOstreliya yagxothelwa eNew Zealand emva kokuvalelwa iinyanga ezingama-25 entolongweni ngenxa yokuphanga nobuqhetseba. Yayilikhoboka leziyobisi ibe yayizithengise kangangethuba elingaphezu kweminyaka eli-17. Kunyaka olandelayo umfazi wayo waqalisa ukufundisisa iBhayibhile namaNgqina kaYehova, yaye njengoko ulwazi lwakhe lwalukhula, indoda yakhe yaphawula inguqulelo enkulu kwihambo yakhe. Waba ngumfazi nomama olunge ngakumbi. Ngokubongozwa ngumfazi wayo, le ndoda yaya kwindibano yesiphaluka ngoJuni 1989. Ngoku yasamkela isifundo seBhayibhile sekhaya, yaye kwaqalisa ukubonakala iinguqulelo ezinkulu kwinkangeleko yayo nakuhlobo lobomi eyayibuphila. Onke amalungu aloo ntsapho asixhenxe aqalisa ukuya kwiintlanganiso. Le ndoda yabhaptizwa ngoJanuwari 1990 njengalowo uye wathobela isiluleko esibalaseleyo sikaPawulos esikwabase-Efese 4:17-24.
16. (a) Iingxelo zeSikhumbuzo sowe-1990 zinguwo njani umthombo wovuyo? (b) Yiyiphi inkalo esimele siyinikele ingqalelo ngokungxamisekileyo, yaye nguwuphi umgudu esifanele siwenze ukuze sincede abo banomdla?
16 Inkalo ebalaseleyo kwingxelo yonyaka yeyabantu abazizi-9 950 058 ababekho eSikhumbuzweni, esasingoLwesibini, ngoAprili 10, 1990. Amazwe angaphezu kwama-70 kwangama-212 afake iingxelo ezilinani eliyiphinda kathathu incopho yabavakalisi baloo mazwe! Ngokomzekelo, amazwe asixhenxe aseAfrika abumba isimbuku sencopho yabavakalisi abangama-62 712 afaka ingxelo yabo babekho kwiSikhumbuzo abangama-204 356 phezu kwako nje ukuvalwa komsebenzi. Abavakalisi baseLiberia abali-1 914 abathwaxwe ziimeko zemfazwe bavuya kakhulu kukuba nama-7 811 abantu abeza eSikhumbuzweni. IHaiti, enencopho yabavakalisi abangama-6 427, yafaka ingxelo yabangama-36 551. Abavakalisi abangama-886 abakwiziqithi ezigqagqeneyo zaseMicronesia baba nama-3 958. Abavakalisi baseSri Lanka abali-1 298 bafaka ingxelo yabangama-4 521, yaza yona iZambia, enabavakalisi abangama-73 729 yaba nabantu abangama-326 991 abeza eSikhumbuzweni, umntu omnye kwabangama-25 ngokomlinganiselo wabemi baseZambia. Kwakhona ingxelo yehlabathi lonke ityhila ukuba kukho izigidi zabantu abanyanisekileyo abalindele ukuhlanganiselwa kubuhlanti bezimvu. Kodwa ukunyaniseka akwanele. Ngaba sinokuwandisa size siwuphucule kusini na umgangatho womsebenzi wethu wezifundo zeBhayibhile zamakhaya, sinceda abo bezayo eSikhumbuzweni bakhe ukholo olomeleleyo? Sifuna babe ngamadlelane ethu akhutheleyo ekudumiseni uYehova. Oko kuthetha ukusindiswa kobomi babo!—INdumiso 148:12, 13; Yohane 17:3; 1 Yohane 2:15-17.
Uvuyo Olupheleleyo
17. Yiyiphi imizekelo yenkulungwane yokuqala efanele incede ekomelezeni uzimiselo lwethu lokunamathela ngokuqinileyo kuvuyo lwethu?
17 Zingakhathaliseki izilingo esihlangabezana nazo, masizimisele ukunamathela ngokuqinileyo kuvuyo lwethu. Mhlawumbi akusayi kuba yimfuneko ukuba sithubeleze kumava abuhlungu njengalawo kaStefano, kodwa sekunjalo umzekelo wakhe unokusomeleza. Nakubeni wayetyholwa, wakwazi ukulondoloza uvuyo lwakhe. Iintshaba zakhe ‘zabubona ubuso bakhe, ngathi bubuso besithunywa sezulu.’ UThixo waba ngakuye ebudeni bengcinezelo. Wanikela ubungqina ngenkalipho, “ezele nguMoya oyiNgcwele” de kwasekufeleni kwakhe ukholo. Njengoko uPawulos noBharnabhas baya kushumayela kwabeentlanga, nabo “bavuya, balizukisa ilizwi leNkosi.” Kwaphinda kwaqhambuka intshutshiso. Kodwa ayizange ibatyhafise abo bakholwayo. “Baye ke abafundi bezaliswe luvuyo nanguMoya oyiNgcwele.” (IZenzo 6:15; 7:55; 13:48-52) Kungakhathaliseki ukuba iintshaba zethu zisenza ntoni na, zingakhathaliseki izilingo zemihla ngemihla ebomini bethu, asimelanga siluvumele uvuyo lwethu lomoya oyingcwele ludangale. UPawulos ululeka esithi: “Mayela nethemba, vuyani; mayela nembandezelo, nyamezelani; mayela nomthandazo, zingisani.”—Roma 12:12.
18. (a) Iyintoni iYerusalem Entsha, yaye kutheni abantu bakaThixo befanele bagcobe kunye nayo? (b) “Amazulu amatsha nehlabathi elitsha” aya kulusikelela njani uluntu?
18 Hayi indlela elizuke ngayo elo themba! Kubo bonke abantu bakhe, uYehova uvakalisa oku: “Niyabona, ndidala amazulu amatsha nehlabathi elitsha; angakhunjulwa awokuqala, angenyuki athi qatha entliziyweni. Hayi, yibani nemihlali, nigcobe nanini yiloo nto ndiyidalayo.” UKristu iNkosi kunye ‘neYerusalem Entsha’ (ngoku elikomkhulu lentlangano kaThixo yasezulwini, ‘iYerusalem ephezulu’) nebutho lehlabathi elitsha emhlabeni baya kuzisa uvuyo olukhulu kuluntu. (Galati 4:26) Ukuvuswa kwabantu abafileyo, ukujizekwa kwabo bonke abantu abathobekileyo ngobomi obungunaphakade befezekile, ukuhlala kwabo beyimiqabaqaba yaye bephila ubomi obunenjongo kumhlaba oyiparadisi—elinjani lona ukuzuka ithemba nonobangela wokuba nemihlali! Njengokuba uYehova ‘egcoba ngeYerusalem yaye esiba nemihlali ngabantu bakhe,’ ngoko umprofeti wakhe uhlab’ ikhwelo ngokubhekele phaya kubantu bakaThixo esithi: “Vuyisanani neYerusalem, nigcobe ngayo, nonke bayithandayo; yenzani imihlali nibe nemihlali.” (Isaya 65:17-19; 66:10; ISityhilelo 14:1; 20:12, 13; 21:2-4) Kwanga singasoloko sizaliswe luvuyo nangumoya oyingcwele njengoko sithobela isibongozo sompostile uPawulos, esithi: “Vuyani eNkosini amaxesha onke; ndiyaphinda ndithi, Vuyani.”—Filipi 4:4.
Ukushwankathela Uvuyo Lwethu:
◻ Nguwuphi umzekelo wokunyamezela ngokunovuyo uYesu asishiyele wona?
◻ Amaqela amabini azahluleleyo anaziphi izizathu zokugcoba?
◻ Abaselula nabakhulileyo namhlanje banemihlali njani ngenyaniso?
◻ Ekuhlolisiseni ingxelo yowe-1990, yiyiphi impendulo enikelwayo ngoku kumthandazo othi, “Yehova, khawusinike impumelelo”?
◻ Luya kufunyanwa nini yaye njani uvuyo olupheleleyo?
[Isicangca esikwiphepha 18-21]
INGXELO YONYAKA WENKONZO WE-1990 YAMANGQINA KAYEHOVA ZWENIBANZI
(Bona imiqulu)
[Umfanekiso okwiphepha 16]
Isithunywa sezulu sikaYehova savakalisa ukuzalwa kukaKristu iNkosi ‘njengeendaba ezilungileyo zovuyo olukhulu’