Hlalani Niphilile Elukholweni!
Iimbalasane ZekaTito
AMABANDLA amaKristu kwisiqithi saseKrete esikwiMeditera ayefuna ukunyanyekelwa ngokomoya. Ngubani owayenokuwanceda? Kaloku, nguTito owayesebenza kunye nompostile uPawulos! Wayekhaliphile, ekufanelekela ukufundisa, ezondelela imisebenzi emihle yaye ephilile elukholweni.
UPawulos watyelela eKrete kwithuba eliphakathi kokuvalelwa kwakhe eRoma okwesihlandlo sokuqala nesesibini. Washiya uTito kweso siqithi ukuze alungise izinto ezithile nokuze amisele abadala bamabandla. UTito kwakukwafuneka eluleke abafundisi bobuxoki aze amisele umzekelo omhle. Konke oku kubonakala kwincwadi kaPawulos eya kuTito, ekusenokuba wayithumela eseMakedoni phakathi kowama-61 nowama-64 C.E. Ukusebenzisa isiluleko salo mpostile kunokubanceda abaveleli namaKristu angoowabo anamhlanje ukuba bakhaliphe, babe nenzondelelo, baze baphile ngokomoya.
Yintoni Efunekayo Kubaveleli?
Kwakufuneka kumiselwe abaveleli kuze kusingathwe iingxaki ezinzulu. (Tit 1:1-16) Ukuze indoda imiselwe njengomveleli, kwakufuneka ibe yengenakumangaleleka, ibe yengumzekelo ngokobuqu nakwintsapho yayo, ibuke iindwendwe, ilungelelane, ize ibe nokuzeyisa. Kwakufuneka ifundise inyaniso yaye iluleke ize ikhalimele abo babeneembono eziphikisayo. Kwakufuneka inkalipho ukuze abo baswele intobeko emabandleni bathuliswe. Oku kwakuyimfuneko ngokukodwa ngabo babebambelele kulwaluko, kuba babebhukuqa izindlu ziphela. Isohlwayo esiqatha sasiyimfuneko ukuze amabandla ahlale ephilile ngokomoya. Namhlanje, kukwafuneka inkalipho kubaveleli abangamaKristu ukuze bohlwaye baze baluleke, ngenjongo yokwakha ibandla.
Sebenzisa Imfundiso Ephilileyo
UTito kwakufuneka edlulisele imfundiso ephilileyo yokomoya. (2:1-15) Amadoda amakhulu kwakufuneka abe ngumzekelo ngokuba ngcathu, ngokundileka, ngesidima, ngokholo, ngothando nonyamezelo. Abafazi abakhulu babemele babe “nesimilo esibafaneleyo.” ‘Njengababefundisa okuhle,’ babenokunceda abafazana ukuba babe nembono efanelekileyo ngemisebenzi yabo njengabafazi noomama. Amadoda asematsha ayemele abe nesidima, yaye amakhoboka ayemele athobele iinkosi zawo ngendlela eyayiya kuyivathisa imfundiso kaThixo. Onke amaKristu ayemele akuncame ukungahloneli Thixo aze aphile ngesidima kule nkqubo yezinto ngoxa elinde imbonakaliso yobuqaqawuli bukaThixo nobukaYesu Kristu, “owazinikela ngenxa yethu, ukuze asikhulule ngokusihlawulela kuko konke ukuchasa umthetho, azihlambululele abantu abangabakhe, abazondelela imisebenzi emihle.” Ngokusebenzisa isiluleko esiphilileyo esinjalo, nathi ‘masiyivathise imfundiso kaThixo.’
Isiluleko sikaPawulos sokuqukumbela sikhuthaza impilo yokomoya. (3:1-15) Kuyimfuneko ukubonakalisa ukuzithoba okukuko kubalawuli nokuhlakulela ukuthantamisa. AmaKristu anethemba lobomi obungunaphakade, yaye amazwi kaPawulos ayemele agxininiswe ukuze awakhuthaze ukuba ahlale ecinga ngemisebenzi emihle. Imibuzo yobudenge nokuphikisana ngoMthetho kwakumelwe kuphetshwe, yaye umahlukanisi wayemele agatywe emva kokululekwa kabini. Njengoko abadala besebenzisa isiluleko esinjalo namhlanje, bona namakholwa angoowabo baya kuhlala bephilile elukholweni.
[Ibhokisi/Umfanekiso okwiphepha 22]
Bengazilahleli Kwiwayini: Nangona abafazi bengamele bafundise amadoda ebandleni, oodade abakhulileyo banokuyalela abafazana ngasese. Kodwa ukuze babe nempumelelo kule nkalo, abafazi abakhulileyo bamele bathobele amazwi kaPawulos athi: “Abafazi abakhulu kwangokunjalo babe nesimilo esibafaneleyo, bangabi ngabatyholi; bangazilahleli kwiwayini eninzi; bafundise okuhle.” (Tito 2:1-5; 1 Timoti 2:11-14) Ngenxa yenkxalabo ngemiphumo yokusela, abaveleli, izicaka zolungiselelo nabafazi abakhulileyo bamele babe ziingcathu, bengazinikeli kwiwayini eninzi. (1 Timoti 3:2, 3, 8, 11) Onke amaKristu amele akuphephe ukunxila yaye kufuneka angaseli ziselo zinxilisayo ngoxa esenza “umsebenzi ongcwele” wokushumayela iindaba ezilungileyo.—Roma 15:16; IMizekeliso 23:20, 21.