Yenza Imfundiso Ephilileyo Ibe Yindlela Yakho Yobomi
“Ukuhlonela uThixo kunceda ngako konke.”—1 TIMOTI 4:8.
1, 2. Abantu bayibonisa ukusa kuwuphi umkhamo inkxalabo ngempilo yabo, yaye uba yintoni umphumo?
ABANTU abaninzi baya kuvuma ngokukhawuleza ukuba impilo entle yenye yezona zinto zixabisekileyo ebomini. Bachitha imali nexesha elininzi gqitha bezama ukuzigcina benemizimba esempilweni yaye beqinisekisa ukuba bafumana unyango olufanelekileyo xa lufuneka. Ngokomzekelo, eUnited States kutshanje imali eye yachithelwa ekunyamekeleni impilo ngonyaka omnye ibingaphezu kwamawaka amathathu ezigidi zeerandi. Oko kuthetha ukuba kuchithwe ngaphezulu kuhle kwe-R10 000 ngendoda, umfazi nomntwana ngamnye kwelo lizwe, yaye imali eye yachithwa ngomntu ngamnye ngokwesilinganiso kwamanye amazwe ahambele phambili ayikude apho.
2 Uye waba yintoni ke umphumo walo lonke eli xesha, amandla nemali eye yachithwa? Ngokuqinisekileyo akukho namnye onokukhanyela ukuba, xa sithetha ngokubanzi, izakhiwo nezixhobo zonyango esinazo namhlanje ziphucuke gqitha kunazo naziphi na ezazikhe zakho nanini na ngaphambili. Kodwa, oku akuthethi ukuba ngokuzenzekelayo siyimiqabaqaba. Enyanisweni, kwintetho awayechaza kuyo inkqubo yezonyango yelaseUnited States, umongameli welo wabonisa ukuba ukongezelela “kwiindleko ezingathethekiyo ezibangelwa lugonyamelo kweli lizwe,” abemi baseUnited States “bahamba phambili kuGawulayo, ekutshayeni nasekuseleni ngokugqithiseleyo, ekumitheni kwabeshumi elivisayo, kubantwana abazalwa bebancinane kakhulu” kunamanye amazwe ahambele phambili. Wagqiba ngelithini? “Simele siziguqule iindlela zethu ukuba ngokwenene sifuna ukuba ngabantu abasempilweni.”—Galati 6:7, 8.
Indlela Yobomi Esempilweni
3. Ngenxa yendlela awayephila ngayo amaGrike amandulo, uPawulos wanikela siphi isiluleko?
3 Ngenkulungwane yokuqala, amaGrike ayesaziwa ngokuzinikela kwawo ekwenzeni imithambo, ekwakheni izoso zomzimba nakukhuphiswano lweembaleki. Ngenxa yezi meko, umpostile uPawulos waphefumlelwa ukuba abhalele umfana ogama linguTimoti athi: “Eyeyomzimba ingqeqesho inceda kancinane; ke kona ukuhlonela uThixo kunceda ngako konke, kunedinga lobomi bakalokunje, nobobo buza kubakho.” (1 Timoti 4:8) Ngaloo ndlela, uPawulos wayebonisa oko abantu namhlanje bakuvumayo, ukuthi, uncedo olufumaneka kwezonyango nangokuqeqesha umzimba aluqinisekisi indlela yobomi esempilweni ngokwenene. Noko ke, uPawulos uyasiqinisekisa ukuba eyona na nto ixabisekileyo kukuhlakulela impilo-ntle yokomoya nokuhlonela uThixo.
4. Ziziphi iingenelo zokuhlonel’ uThixo?
4 Ikhondo elinjalo liyingenelo ‘kubomi bakalokunje’ kuba lisikhusela kuzo zonke izinto eziyingozi abantu abangahloneli Thixo, okanye abo ‘banokumila [okanye, inkangeleko] kokuhlonela uThixo’ kuphela, bazibhodloza ngazo. (2 Timoti 3:5; IMizekeliso 23:29, 30; Luka 15:11-16; 1 Korinte 6:18; 1 Timoti 6:9, 10) Abo bavumela ukuhlonela uThixo kuxonxe ubomi babo banentlonelo ephilileyo ngemithetho nezinto ezifunwa nguThixo, yaye oko kubashukumisela ekubeni benze imfundiso ephilileyo kaThixo ibe yindlela yabo yobomi. Ikhondo elinjalo libazisela impilo, ulwaneliseko nolonwabo ngokomoya nasemzimbeni. Ibe ‘baziqwebela isiseko esihle, base exesheni eliza kuza, ukuze babubambe ubomi obungunaphakade.’—1 Timoti 6:19.
5. Yiyiphi imiyalelo uPawulos awayinikelayo kwisahluko sesibini sencwadi yakhe eya kuTito?
5 Ekubeni ubomi obukhokelwa yimfundiso ephilileyo kaThixo busizisa iintsikelelo ezinjalo ngoku nakwixesha elizayo, kufuneka sazi, ngokucacileyo, ukuba sinokuyenza njani imfundiso kaThixo ephilileyo ibe yindlela yethu yobomi. Umpostile uPawulos wanikela impendulo kwincwadi yakhe eya kuTito. Siza kuphawula ngokukhethekileyo isahluko sesibini saloo ncwadi, apho wayalela uTito ukuba ‘athethe izinto eziyifaneleyo imfundiso ephilileyo.’ Ngokuqinisekileyo sonke, abaselula nabadala, amadoda namabhinqa, sinokungenelwa ‘kwimfundiso ephilileyo’ enjalo namhlanje.—Tito 1:4, 5; 2:1.
Isiluleko Samadoda Amakhulu
6. Wawaluleka wathini uPawulos ‘amadoda amakhulu,’ ibe kutheni yayibububele ukuba enjenjalo?
6 Okokuqala, uPawulos waluleka amadoda amakhulu ebandleni. Nceda ufunde uTito 2:2. “Amadoda amakhulu,” xa ewonke, anikwa imbeko yaye kujongwa kuwo njengemizekelo yokholo nokunyaniseka. (Levitikus 19:32; IMizekeliso 16:31) Ngenxa yoku, abanye basenokuba mathidala ukululeka okanye ukucebisa amadoda amakhulu kwimicimbi engekho nzulu kangako. (Yobhi 32:6, 7; 1 Timoti 5:1) Ngoko ke, bububele obabangela ukuba uPawulos athethe namadoda amakhulu kuqala, yaye bekuya kuba kokufanelekileyo ukuba anikele ingqalelo kumazwi kaPawulos aze aqiniseke ukuba nawo, njengoPawulos, anokuxeliswa.—1 Korinte 11:1; Filipi 3:17.
7, 8. (a) Ukuba “ziingcathu” kubandakanya ntoni? (b) Kutheni ‘ukundileka’ kumele kulungelelaniswe ‘nokuphila engqondweni’?
7 Amadoda amakhulu angamaKristu, okokuqala, amele abe “ziingcathu.” Nangona igama lantlandlolo lisenokubhekisela kwindlela yokusela (“aqabuke,” Kingdom Interlinear), likwathetha ukuphapha, ukuthi qwa, okanye ukuba sezingqondweni. (2 Timoti 4:5; 1 Petros 1:13) Ngaloo ndlela, enokuba kusekuseleni okanye kwezinye izinto, amadoda amakhulu amele abe ziingcathu, angabi ngagqithisayo okanye abaxayo.
8 Kwakhona akwamele “andileke” yaye “abe ngaphilileyo engqondweni.” (NW) Ukundileka, okanye ukuba nesidima, ukuba ngobekekileyo, nokufanelwa yintlonelo, ngokuqhelekileyo kuhamba neminyaka yobudala. Noko ke, bambi basenokuba ngabandileke ngokugqithiseleyo, bangakunyamezeli ukudlamka kolutsha. (IMizekeliso 20:29) Kungenxa yoko ‘ukundileka’ kuhanjiswa ‘nokuphila engqondweni.’ Amadoda amakhulu kufuneka akugcine ukundileka kwawo okuhambisana nobudala, kodwa kwangaxeshanye alungelelane, ezilawula ngokupheleleyo iimvakalelo neentshukumisa zawo.
9. Kutheni amadoda amakhulu emele aphile elukholweni naseluthandweni yaye ngokukhethekileyo elunyamezelweni?
9 Okokugqibela, amadoda amakhulu amele “aphile elukholweni, eluthandweni, elunyamezelweni.” Izihlandlo ezininzi xa ebhala, uPawulos wadwelisa ukholo nothando kunye nethemba. (1 Korinte 13:13; 1 Tesalonika 1:3; 5:8) Apha “ithemba” ulithabathela indawo ‘ngonyamezelo.’ Mhlawumbi kungenxa yokuba ukwaluphala kusenokubangela iimvakalelo zokuphelelwa lithemba. (INtshumayeli 12:1) Noko ke, njengokuba uYesu wabonisayo, “onyamezele kwada kwaba sekupheleni, lowo uya kusindiswa.” (Mateyu 24:13) Ukongezelela, amadoda amakhulu yimizekelo efanelekileyo kuthi sonke kungekuphela ngenxa yeminyaka okanye amava anawo kodwa ngenxa yeempawu zawo ezomeleleyo zokomoya—ukholo, uthando nonyamezelo.
Esabafazi Abakhulu
10. UPawulos ubaluleka ngelithini “abafazi abakhulu” ebandleni?
10 Ngokulandelayo uPawulos waphethulela ingqalelo yakhe kubafazi abakhulu ebandleni. Nceda ufunde uTito 2:3. “Abafazi abakhulu” ngamalungu amakhulu phakathi kwabafazi ebandleni, kuquka abafazi ‘bamadoda amakhulu’ noomama noomakhulu bamanye amalungu. Ngenxa yoko, banokuba nempembelelo engathethekiyo, yokulungileyo okanye yokubi. Kungenxa yoko uPawulos watshayelela amazwi akhe ngokuthi “kwangokunjalo,” ethetha ukuba “abafazi abakhulu” bakwaneembopheleleko ezithile abamele baphile ngokuvisisana nazo ukuze bazalise indima yabo ebandleni.
11. Kukuthini ukuziphatha ngokuhlonel’ uThixo?
11 Okokuqala, “Abafazi abakhulu mabaziphathe ngokuhlonel’ uThixo,” watsho uPawulos. (NW) ‘Ukuziphatha’ yimbonakaliso yangaphandle yesimo sengqondo nobuntu bukabani bangaphakathi, njengoko bubonakala kwihambo nembonakalo. (Mateyu 12:34, 35) Ngoko ke, simele sibe njani isimo sengqondo okanye ubuntu bomfazi omkhulu ongumKristu? Ngamafutshane, ‘bobokuhlonel’ uThixo.’ Oku kuguqulelwe kwigama lesiGrike elithetha “oko kubafaneleyo abantu, izenzo okanye izinto ezinikezelwe kuThixo.” Ngokuqinisekileyo esi sisiluleko esifanelekileyo ngenxa yempembelelo abanayo kwabanye, ngokukodwa kubafazana ebandleni.—1 Timoti 2:9, 10.
12. Kukuphi ukusebenzisa kakubi ulwimi sonke esifanele sikuphephe?
12 Emva koku ulandelisa ngeempawu ezimbini ezimbi: “bangabi ngabadla izithende, bangakhotyokiswa nayiwayini eninzi.” (NW) Kubangela umdla ukubona ukuba ezi zinto zihamba zombini. UNjingalwazi E. F. Scott uphawula ukuba, “Kumaxesha amandulo, ngoxa iwayini yayisekuphela kwesiselo esikhoyo, kwakusemathekweni abo amancinane okusela iwayini ababesithi abafazi abadala babadle izithende abamelwane babo.” Ngokuqhelekileyo abafazi banenkxalabo ngakumbi ngabantu kunamadoda, nto leyo encomekayo. Kodwa, le nkxalabo inokuphela sele ikukuhleba okanye ulwimi, ngokukodwa xa ulwimi selukhululwe yiwayini. (IMizekeliso 23:33) Ngokuqinisekileyo, bonke abo basukela indlela ephilileyo yobomi, amadoda nabafazi, benza kakuhle ukuwuphaphela lo mgibe.
13. Abafazi abakhulu banokuba ngabafundisi ngaziphi iindlela?
13 Ukuze balisebenzise ngendlela eyakhayo ixesha abanalo, abafazi abakhulu bakhuthazwa ukuba “bafundise okuhle.” Kwenye indawo, uPawulos wanikela imiyalelo ecacileyo yokuba abafazi abamele bafundise ebandleni. (1 Korinte 14:34; 1 Timoti 2:12) Noko ke, oku akubathinteli ekudluliseleni ulwazi oluxabisekileyo lukaThixo ezindlwini zabo nasesidlangalaleni. (2 Timoti 1:5; 3:14, 15) Bakwanokufeza lukhulu ngokuba ngamaKristu angumzekelo kubafazana ebandleni, njengoko iindinyana ezilandelayo zibonisa.
Esabafazana
14. Abafazana abangamaKristu banokukubonisa njani ukulungelelana ekunyamekeleni imisebenzi yabo?
14 Xa wayekhuthaza abafazi abakhulu ukuba “bafundise okuhle,” uPawulos wakhankanya abafazana ngokukhethekileyo. Nceda ufunde uTito 2:4, 5. Ngoxa imiyalelo emininzi inokuthanani nemicimbi yekhaya, abafazana abangamaKristu abamele bagqithise, bavumele ukuxhalela izinto eziphathekayo kulawule ubomi babo. Kunoko, bamele “[baphile engqondweni, NW], babe nyulu, . . . babe nokulunga,” yaye ngaphezu kwako konke, bakulungele ukuxhasa ilungiselelo lobuntloko lobuKristu, “ukuze ilizwi likaThixo linganyeliswa.”
15. Kutheni abafazana abaninzi emabandleni bemele banconywe?
15 Namhlanje, intsapho itshintshe gqitha koko yayikuko ngomhla kaPawulos. Iintsapho ezininzi zahlulelene kumba wokholo, yaye ezinye zinomzali omnye kuphela. Nakwezo ntsapho zisadla ngendeb’ endala, kuya kunqaba ngokunqaba ukufumanisa ukuba inkosikazi okanye umama uhlala ekho ekhaya. Konke oku kuzisa ingcinezelo nembopheleleko engathethekiyo kumfazana ongumKristu, kodwa oku akubakhululi kwiimbopheleleko zabo ezichazwe eZibhalweni. Ngoko ke, kuyavuyisa gqitha ukubona abafazana abaninzi abathembekileyo besebenza nzima ukuze balungelelanise imisebenzi yabo emininzi baze sekunjalo bakwazi ukubeka izilangazelelo zoBukumkani kuqala, abanye bade bangenele nobulungiseleli bexesha elizeleyo njengoovulindlela abangabancedani nabathe ngxi. (Mateyu 6:33) Bamele banconywe ngokwenene!
Esamadoda Aselula
16. Wawaluleka wathini uPawulos amadoda aselula, yaye kutheni oku kufike ngexesha?
16 Wandula ke uPawulos wabhekisela kumadoda aselula, kuquka uTito. Nceda ufunde uTito 2:6-8. Ngenxa yokuba ulutsha oluninzi namhlanje lungakhathali yaye luziphethe ngendlela yokuzibhubhisa—ukutshaya, ukusebenzisa kakubi iziyobisi notywala, isini esingekho mthethweni, nezinye izinto ezisukelwa leli hlabathi, njengemidlalo yogonyamelo nomculo othoba isidima nezolonwabo—ngokwenene eli licebiso elifike ngexesha kulutsha olungamaKristu olufuna ukulandela indlela yobomi ephilileyo neyanelisayo.
17. Indoda eselula inokuba ‘yephilileyo njani engqondweni’ ize ibe ‘ngumzekelo wemisebenzi emihle’?
17 Ngokwahlukileyo kulutsha lwehlabathi, indoda eselula engumKristu ifanele “iphile engqondweni” (NW) yaye izenze “umzekelo wemisebenzi emihle.” UPawulos wacacisa ukuba ingqondo ephilileyo neqolileyo, ayizuzwa ngabo bafundisisayo nje kuphela, kodwa izuzwa ngabo bathi “ngenxa yobugcisa, babe nezimvo eziqheliselwe ukucalula okuhle kwanokubi.” (Hebhere 5:14) Hayi indlela okuhle ngayo ukubona abantu abaselula benikela ngokuzithandela ngexesha namandla abo ukuze babe nenxaxheba ngokupheleleyo kwimisebenzi emininzi ebandleni lamaKristu, kunokuchithela amandla abo obutsha kusukelo lokuzingca! Ngokwenjenjalo, nabo, njengoTito, banokuba yimizekelo ‘yemisebenzi emihle’ ebandleni lamaKristu.—1 Timoti 4:12.
18. Kuthetha ukuthini ukuba nemfundiso emsulwa, izenzo ezindilekileyo, nentetho ephilileyo?
18 Amadoda aselula ayakhunjuzwa ukuba afanele ‘emfundisweni yawo abe ngamsulwa, ngandilekileyo, ngalizwi liphilileyo, lingenakugwetywa.’ Imfundiso ‘emsulwa’ imele isekelwe ngokuqinileyo eLizwini likaThixo; ngenxa yoko, amadoda aselula amele ayifundisise ngenkuthalo iBhayibhile. Njengamadoda amakhulu, amadoda aselula akwamele abe ngandilekileyo. Kufuneka aqonde ukuba, ukuba ngumlungiseleli weLizwi likaThixo kuyimbopheleleko enzulu, ibe ngoko ke amele “aziphathe ngendlela ezifaneleyo iindaba ezilungileyo.” (Filipi 1:27, NW) Ngokufanayo intetho yawo imele ibe ‘yephilileyo’ kangangokuba ibe ‘yengenakugwetywa’ ukuze kungabikho nanye into abanokukhalaza ngayo abachasi.—2 Korinte 6:3; 1 Petros 2:12, 15.
Esamakhoboka Nezicaka
19, 20. Abo baqeshwe ngabanye abantu ‘banokuyivathisa njani imfundiso yoMsindisi wethu uThixo’?
19 Ekugqibeleni, uPawulos uphethulela ingqalelo yakhe kwabo baqeshwe ngabanye. Nceda ufunde uTito 2:9, 10. Abasekho baninzi kuthi namhlanje abangamakhoboka okanye izicaka, kodwa abaninzi baqeshiwe yaye basebenzela abanye. Ngaloo ndlela, imigaqo eyachazwa nguPawulos isasebenza nanamhlanje.
20 ‘Ukubalulamela ezintweni zonke abo bazinkosi zawo’ kuthetha ukuba abaqeshwa abangamaKristu bamele babahlonele ngokwenene abaqeshi nabaphathi babo. (Kolose 3:22) Bakwamele badume ngokuba ngabasebenzi abanyanisekileyo, basebenze imini yonke njengoko kubafanele abaqeshi babo. Ibe bamele bagcine imigaqo yamaKristu ephakamileyo yokuziphatha kwiindawo asebenza kuzo ingakhathaliseki ihambo yabanye abalapho. Konke oku bakwenzela ‘ukuze bayivathise imfundiso yoMsindisi wethu uThixo ezintweni zonke.’ Hayi indlela esiyiva ngokufuthi ngayo imiphumo evuyisayo xa ababukeli abanyanisekileyo besabela enyanisweni ngenxa yehambo entle yamaNgqina abasebenza nawo okanye abawaqeshileyo! Lo ngumvuzo uYehova awujizeka abo balandela imfundiso ephilileyo kwanakwiindawo abaqeshwe kuzo.—Efese 6:7, 8.
Abantu Abahlambulukileyo
21. Kutheni uYehova elungiselele imfundiso ephilileyo, ibe sifanele sisabele njani?
21 Imfundiso ephilileyo uPawulos awayicacisayo ayiyomigaqo yokuziphatha okanye imilinganiselo esisenokuyithobela xa sithanda. UPawulos wahlabela mgama wachaza injongo yayo. Nceda ufunde uTito 2:11, 12. Ngenxa yothando nobabalo lwakhe ngathi, uYehova uThixo ulungiselele imfundiso ephilileyo ukuze sifunde ukuphila ubomi obunenjongo nobanelisayo kula maxesha anomngcipheko nayingozi. Ngaba ukulungele ukuyamkela imfundiso ephilileyo uze uyenze indlela yakho yobomi? Ukwenjenjalo kuya kukhokelela ekubeni usindiswe.
22, 23. Sivuna ziphi iintsikelelo ngokwenza imfundiso ephilileyo ibe yindlela yethu yobomi?
22 Ngaphezu koko, ukwenza imfundiso ephilileyo ibe yindlela yethu yobomi kusizisela ilungelo elikhethekileyo ngoku nethemba lolonwabo kwixesha elizayo. Nceda ufunde uTito 2:13, 14. Eneneni, ukwenza imfundiso ephilileyo ibe yindlela yethu yobomi kuyasahlula kweli hlabathi lonakeleyo nelifayo njengabantu abahlambulukileyo. Amazwi kaPawulos ayafana noko uMoses wakukhumbuza oonyana bakaSirayeli eSinayi: “NoYehova . . . aniphakamise ngaphezu kweentlanga zonke azenzileyo, ukuba nibe yindumiso, negama, nendili; nibe ngabantu abangcwele kuYehova uThixo wenu, njengoko wakuthethayo.”—Duteronomi 26:18, 19.
23 Ngamana singasoloko silixabisa ilungelo lokuba ngabantu bakaYehova abahlambulukileyo ngokwenza imfundiso ephilileyo ibe yindlela yethu yobomi! Hlala ukuphaphele ukungalwamkeli naluphi na uhlobo lokungahloneli Thixo neminqweno yehlabathi, ngaloo ndlela uhlale uhlambulukile yaye ulungele ukusetyenziswa nguYehova kumsebenzi ozukileyo ayalela ukuba wenziwe namhlanje.—Kolose 1:10.
Uyakhumbula Na?
◻ Kutheni imfundiso yobuthixo iyingenelo kwizinto zonke?
◻ Amadoda nabafazi abakhulu abangamaKristu banokuyisukela njani imfundiso ephilileyo njengendlela yobomi?
◻ Yiyiphi imfundiso ephilileyo uPawulos awayidlulisela kumadoda aselula nabafazana ebandleni?
◻ Liliphi ilungelo nentsikelelo esinokuyifumana ukuba senza imfundiso ephilileyo ibe yindlela yethu yobomi?
[Imifanekiso ekwiphepha 18]
Abaninzi namhlanje bayasisebenzisa isiluleko esiku- Tito 2:2-4