Ukuvuma Izono—Ngaba Kumele Kwenziwe Ngendlela Yomntu Okanye KaThixo?

KUMAKATOLIKA, inkqubo yokuvunywa kwezono iye yaguquka kakhulu kwiinkulungwane ezidluleyo. Kwiminyaka yokuqala yeCawa yamaKatolika, ukuvuma izono nokuzohlwaya kwakuyimfuneko kuphela ngenxa yezono ezinzulu. Ngokuphathelele oku, incwadi ethi Religion in the Medieval West ithi: “De kwasekupheleni kwenkulungwane yesithandathu inkqubo yokuzohlwaya yayinzima gqitha: isifungo sokuthembeka sasinokwenziwa kanye kuphela kwithuba likabani lokudla ubomi, izono zazivunywa ekuhleni, isohlwayo sasithabatha ithuba elide yaye sasiqatha.”

Sasiqatha kangakanani eso sohlwayo? Ngowe-1052 kwafuneka ukuba elinye iguquka lihambe yonke indlela esuka eBruges eBelgium ukuya eYerusalem libetha ngezikaTshiwo! Incwadi ethi Christianity in the West 1400-1700 ithi, “Ngowe-1700 amaKatolika ayesafunyanwa kumaqula nakwimithombo engcwele, eguqe ngamadolo eqolozele phantsi kumanzi abanda ceke ukuze avakalise imithandazo yawo ebonisa inguquko.” Ekubeni ngelo thuba ayengaxolelwa de kube semva kokuphela kwesohlwayo eso, uninzi lwalukurhoxisa ukuvuma izono zalo de lube sele luza kufa.

Lwaqalisa nini olu qheliselo lwanamhla lokuvunywa kwezono? IReligion in the Medieval West iyachaza: “Kwaqaliswa uhlobo olutsha lwesohlwayo eFransi ekupheleni kwenkulungwane yesithandathu luqaliswa ziimonki zaseCeltic. . . . Oku yayikukuvunywa kwezono okwenziwa ngasese, apho belisithi iguquka livume izono zalo emfihlekweni kumfundisi, ibe oku yayikukuguqulwa koqheliselo lokululekwa ngokomoya kweemonki noonongendi.” Ngokoqheliselo oludala lweemonki noonongendi, iimonki zazivuma izono zazo kwezinye ukuze zifumane uncedo olungokomoya lokoyisa ubuthathaka bazo. Noko ke, kuvumo lwezono lwangasese olutsha, icawa yathi ngumfundisi ‘owayenamandla okanye igunya elingakumbi lokuxolela izono.’—New Catholic Encyclopedia.

Ngaba ngokwenene uYesu wanika abanye babalandeli bakhe amandla anjalo? Yintoni awayithethayo eye yakhokelela abathile kwesi sigqibo?

“Izitshixo Zobukumkani”

Ngesinye isihlandlo, uYesu Kristu waxelela umpostile uPetros oku: “Ndiya kukunika izitshixo zobukumkani bamazulu; kuthi ke othe wakubopha emhlabeni, kubopheke emazulwini; kuthi othe wakukhulula emhlabeni, kukhululeke emazulwini.” (Mateyu 16:19) Wayethetha ukuthini uYesu ngokuthi “izitshixo zobukumkani”? Sinokukuqonda kakuhle ngakumbi oku ukuba sikhangela kwesinye isihlandlo xa uYesu wasebenzisa eli gama lithi “isitshixo.”

UYesu wakhe waxelela iinkokeli zonqulo zakwaYuda ezazinolwazi oluhle ngoMthetho kaMoses esithi: “Yeha nina, baqondisi-mthetho! Ngokuba nasisusa isitshixo sokwazi; nina anangena, nabangenayo nabalela.” (Luka 11:52) ‘Zabalela abangenayo ukuba bangene’ phi? UYesu uyasixelela kuMateyu 23:13 esithi: “Yeha, nina babhali, baFarisi, bahanahanisindini! Ngokuba nibuvala ubukumkani bamazulu phambi kwabantu; kuba aningeni nina, nabangenayo anibavumeli ukuba bangene.” Abefundisi abangamaYuda, ngokungathi kunjalo, babavalela ucango abaninzi, ngokubahlutha ithuba lokuba noYesu Kristu ezulwini. “Isitshixo” ezo nkokeli zonqulo ‘ezazisisusile’ sasingenanto yakwenza nokuxolelwa kwezono. Yayisisitshixo solwazi olunikelwa nguThixo.

Ngokufanayo, “izitshixo zobukumkani” ezanikwa uPetros azimeli amandla okunikela inkcazelo ezulwini malunga nokuba zezikabani izono ezifanele zixolelwe okanye zingaxolelwa. Kunoko, zimela ilungelo elikhulu likaPetros lokuvula indlela eya ezulwini ngokusasaza ulwazi olunikelwa nguThixo ngobulungiseleli bakhe. Okokuqala oku wakwenzela amaYuda nabo babeguqukele ebuYudeni, wandula ke wakwenzela amaSamariya waza ekugqibeleni wakwenzela abeeNtlanga.—IZenzo 2:1-41; 8:14-17; 10:1-48.

“Othe Wakubopha Emhlabeni”

Kamva, oko uYesu wayekuxelele uPetros wakuphinda kwabanye abafundi. UYesu wathi, “Inene, ndithi kuni, Konke enithe nakubopha emhlabeni, kobotshwa emazulwini; nako konke enithe nakukhulula emhlabeni, kokhululwa emazulwini.” (Mateyu 18:18) Liliphi igunya apha uKristu awalinika abafundi? Umongo ubonisa ukuba wayethetha ngokuzinziswa kweengxaki eziphakathi kwamakholwa nokugcinwa kwebandla licocekile kubenzi bobubi abangaguqukiyo.—Mateyu 18:15-17.

Kwimicimbi ebandakanya ukwaphulwa okunzulu komthetho kaThixo, amadoda anembopheleleko ebandleni ayeza kwenza ugwebo ngale mibandela aze agqibe enoba umenzi wobubi ufanele ‘abotshwe’ (agqalwe njengonetyala) okanye ‘akhululwe’ (avakaliswe emsulwa). Ngaba oku kwakuthetha ukuba izulu laliza kulandela izigqibo zabantu? Akunjalo. Kunjengokuba umphengululi weBhayibhile uRobert Young ebonisa, nasiphi na isigqibo esenziwa ngabafundi sasiya kwenziwa emva kwesigqibo sasezulwini, kungekhona ngaphambi kwaso. Uthi Mt 18 indinyana 18 ngokuchanileyo ifanele ifundeke ngolu hlobo: Enithe nakubopha emhlabeni “kufanele kube koko (sele) kubotshiwe” ezulwini.

Ngokwenene, akukho ngqiqweni ukucinga ukuba nawuphi na umntu ongafezekanga ebenokwenza izigqibo ebeziya kuba zezibophayo kwabo bakwiinkundla zasezulwini. Kuyinto esengqiqweni ngakumbi ukuthi abo bameli banyuliweyo bakaKristu bebeya kulandela ulwalathiso lwakhe ukuze bagcine ibandla lakhe licocekile. Bebeya kwenza oku ngokwenza isigqibo esisekelwe kwimigaqo esele ibekiwe ezulwini. NguYesu ngokwakhe obeya kubakhokelela ekwenzeni oku.—Mateyu 18:20.

Ngaba kukho nawuphi na umntu onokukwazi “ukumela uKristu njengobawo ongumgwebi” ukusa kwinqanaba lokugqiba ngekamva elingunaphakade lomnquli onguwabo? (New Catholic Encyclopedia) Abefundisi abaphulaphula ukuvunywa kwezono phantse ngokuthe rhoqo bayaxolela, kwanakuba “kubonakala kukho inkolelo engathethwayo [kubefundisi bezakwalizwi abangamaKatolika] yokuba kunqabile ukuba kubekho umntu oziva ebuhlungu ngokwenene ngenxa yezono zakhe.” (The New Encyclopædia Britannica) Enyanisweni, ugqibele nini ukuva ngomfundisi oye wala ukuxolela okanye ukuvakalisa umenzi bubi emsulwa? Kunokwenzeka ukuba, oku kungenxa yokuba umfundisi akacingi ukuba unamandla okugweba enoba umoni uguqukile okanye akunjalo kusini na. Kodwa ukuba oku kunjalo, kutheni esithi unamandla okuxolela?

Khawube nomfanekiso-ngqondweni wenkundla yomthetho apho umgwebi onolwazelelelo athi ngokuthe rhoqo avakalise abaphuli-mthetho bemsulwa, kwanabaphuli-mthetho abazingisileyo, kuba bethe ngokwesithethe bakuvuma ukuwaphula kwabo umthetho baza bathi baziva bebuhlungu ngako. Ngoxa oku kusenokubanelisa abenzi bobubi, imbono ephosakele ngolo hlobo yenceba ibiya kuyisingela phantsi ngokunzulu intlonelo yokusesikweni. Ngaba ukuvunywa kwezono njengoko kuqheliselwa kwiCawa yamaKatolika ngokwenyaniso kubaqaqadekisa ngakumbi abantu kwikhondo lesono?—INtshumayeli 8:11.

Echaza amava akhe okuvuma izono njengomKatolika ukususela kwiminyaka esixhenxe ubudala, uRamona uthi, “Ukuvuma izono akuvelisi naluphi na utyekelo lokuzama ukuphepha isono kwithuba elizayo.” Walek’ umsundulo esenjenje: “Ukuvuma izono kuvelisa imbono yokuba uThixo usoloko exolela neyokuba nakuphi na inyama yakho engafezekanga ekukhokelela ukuba ukwenze uya kukuxolela. Akuvelisi umnqweno onzulu wokwenza oko kulungileyo.”a

Kodwa kuthekani ngamazwi kaYesu akuYohane 20:22, 23, (TE)? Apho waxelela abafundi bakhe oku: “Yamkelani uMoya oyiNgcwele. Bonke abantu enibaxolelayo izono zabo baya kuxolelwa; kanti bonke eningabaxoleliyo abayi kuxolelwa.” Ngaba uYesu apha akathi ngokukhethekileyo anike abafundi bakhe igunya lokuxolela izono?

Xa ucinga ngayo yodwa, le ndinyana yeBhayibhile isenokubonakala isitsho. Noko ke, xa la mazwi egqalwa ndawonye nengxelo ekuMateyu 18:15-18 nayo yonke enye into efundiswa yiBhayibhile ngokuvunywa nokuxolelwa kwezono, simele sigqibe kwelithini? Simele sigqibe ngelokuba kuYohane 20:22, 23, uYesu wanika abafundi bakhe igunya lokugxotha ebandleni aboni abangaguqukiyo kwizono ezinzulu. Kwangaxeshanye, uKristu wanika abalandeli bakhe igunya lokwenzela inceba nokuxolela aboni abaguqukayo. Ngokuqinisekileyo uYesu wayengathi abafundi bakhe bafanele bavume zonke izono kumfundisi.

Ngaloo ndlela abanembopheleleko ebandleni babegunyaziswa ukuba bagqibe ngendlela yokuqhubana nabo benza izono ezinzulu. Izigqibo ezinjalo zaziza kwenziwa phantsi kokhokelo lomoya oyingcwele kaThixo nangokuvisisana nolwalathiso lukaThixo olunikelwa nguYesu Kristu neZibhalo Ezingcwele. (Thelekisa IZenzo 5:1-5; 1 Korinte 5:1-5, 11-13.) Loo madoda anembopheleleko ayeya kuthi ngaloo ndlela alandele ulwalathiso oluvela ezulwini engaphembeleli ukuba ezulwini kwamkelwe izigqibo zawo.

“Xelelanani Iziphoso”

Ngoko ke, kunini apho kufanelekileyo ngamaKristu ukuxelelana izono? Kwimeko yesono esinzulu (kungekhona nakuphi na ukusilela okuncinane), uthile ufanele asixele kumalungu anembopheleleko ebandleni isono sakhe. Kwanaxa isono singekho nzulu kodwa isazela somoni lowo simkhathaza ngokugqithiseleyo, kukho ingenelo enkulu ekusixeleni nasekufuneni uncedo olungokomoya.

Ngokubhekisele koku umbhali weBhayibhile uYakobi uthi: “Kukho mntu na ufayo [ngokomoya] phakathi kwenu? Makabizele kuye amadoda amakhulu alo ibandla, athandaze wona phezu kwakhe, akuba emthambisile ngeoli, egameni leNkosi; wothi umthandazo wokholo umsindise lowo uleleyo, iNkosi imvuse; nokuba ubethe wenza izono, wozixolelwa. Xelelanani iziphoso, nithandazelane.”—Yakobi 5:14-16.

Kula mazwi, alikho icebiso elingokuvuma izono okungokwesithethe okwenziwa ngasese. Kunoko, xa umKristu ebandezelekile sisono kangangokuba azive engakwazi nokuthandaza, ufanele abize abadala abamiselweyo, okanye abaveleli, bebandla, ibe baya kuthandaza naye. Ukuze bamncede aphile kwakhona ngokomoya, nabo baya kuthi basebenzise ioli yeLizwi likaThixo.—INdumiso 141:5; thelekisa uLuka 5:31, 32; ISityhilelo 3:18.

Isibongozo sikaYohane uMbhaptizi ‘sokuvelisa iziqhamo eziyifaneleyo inguquko’ sibalulekile. (Mateyu 3:8; thelekisa IZenzo 26:20.) Umenzi wobubi oguquke ngokwenyaniso uyalishiya ikhondo lakhe lesono. NjengoKumkani uDavide woSirayeli wamandulo, umoni oguqukayo obuvumayo ubugwenxa bakhe kuThixo uya kuxolelwa. UDavide wabhala: “Ndikwazisile isono sam, ubugwenxa bam andabugquma; ndathi, Ndoluvuma ukreqo lwam kuYehova; wabuxolela ke wena ubugwenxa besono sam.”—INdumiso 32:5.

Izenzo zokuzohlwaya azinakwenza ukuba ufumane ukuxolelwa okunjalo. NguThixo kuphela onokwenjenjalo. Unikela ingqalelo kwiimfuneko zokusesikweni okugqibeleleyo, kodwa ukuxolela kwakhe kubonisa uthando analo ngoluntu. Ukuxolela kwakhe kukwayimbonakaliso yobabalo olubangelwa lidini lentlawulelo likaYesu Kristu ibe ngokupheleleyo ludluliselwa kuboni abaguqukayo abathe bazihlambulula koko kubi emehlweni kaThixo. (INdumiso 51:7; Isaya 1:18; Yohane 3:16; Roma 3:23-26) Ngabo baxolelwe nguYehova uThixo kuphela abaya kuzuza ubomi obungunaphakade. Ibe ukuze sifumane uxolelo olunjalo, simele sivume izono ngokwendlela kaThixo, kungekhona eyomntu.

[Umbhalo osemazantsi]

[Umfanekiso okwiphepha 7]

UDavide wavuma isono sakhe kuYehova, owathi wamxolela