Ngaba UThixo Ufuna Sizixele Izono Zethu?

Kusaqhubeka kuyinto eqhelekileyo kumarhamente eecawa ezininzi ukuxela izono zawo kumfundisi. Kodwa, ngaba ukuxela izono kuyimfuneko kule mihla kavula zibhuqe?

IZIMVO zabantu ziyabethabethana ngalo mbandela. Ngokomzekelo, iNational Post yaseKhanada ithi omnye umntu wavuma ukuba nangona kunzima ukuxelela omnye umntu izono zakho, “kunika isiqabu esikhulu ukuchazela omnye umntu ngazo aze athandaze kunye nawe akuchazele nento omele uyenze.” Ngokwahlukileyo koko incwadi ethi Bless Me, Father, for I Have Sinned icaphula indoda eyathi: “Ukuchaza izono yenye yezona zinto zidandathekisayo ecaweni. Kwenza abantu bangonwabi.” Ithini yona iBhayibhile ngalo mbandela?

Oko Kuthethwa YiBhayibhile

UMthetho uThixo awunika uSirayeli uchaza izinto ezimele zenziwe ngumntu owonileyo. Ngokomzekelo, xa umntu one omnye umntu okanye ophule umthetho kaThixo, kwakufuneka azixele kumbingeleli wesizwe sakwaLevi aze umbingeleli amcamagushele kuThixo ngokwenza umnikelo wesono.—Levitikus 5:1-6.

Wathini uDavide xa umprofeti uNathan wamngxolisa ngenxa yezono awayezenzile? Wathi: “Ndonile kuYehova.” (2 Samuweli 12:13) Kwakhona wathandaza kuThixo emcela ukuba amxolele. Kwenzeka ntoni emva koko? Kamva uDavide wabhala wathi: “Ekugqibeleni isono sam ndisivumile kuwe, nesiphoso sam andisigubungelanga. Ndithe: ‘Ndiya kukuvuma ukunxaxha kwam kuYehova.’ Waza wena wasixolela isiphoso sezono zam.”—INdumiso 32:5; 51:1-4.

Nangenkulungwane yokuqala yeXesha Eliqhelekileyo uThixo wayefuna amaKristu azixele izono zawo. Umninawa kaYesu uYakobi owayeyenye yamadoda abalaseleyo ebandla laseYerusalem wathi kumaKristu: “Zivumeni ekuhleni izono zenu omnye komnye nize nithandazelane, ukuze niphiliswe.” (Yakobi 5:16) Yintoni ke ngoko le kufuneka ayixele amaKristu yaye afanele ayixele kubani?

Ziziphi Izono Ezifanele Zixelwe?

Yonke imihla thina bantu bangafezekanga siyakhubekisana ngezinto esizenzayo nesizithethayo. (Roma 3:23) Ngaba loo nto ithetha ukuba sifanele sixelele umntu othile ngazo zonke ezo zono?

Nangona sonke isono singamkelekanga kuThixo kodwa ke usenzela inceba kuba esazi ukuba asifezekanga. Kaloku nomdumisi wathi: “Ukuba ubulinda iziphoso, Ya, Owu Yehova, ngubani na obenokuma? Kuba ukuxolela kokwenyaniso kukuwe, ukuze woyikwe.” (INdumiso 130:3, 4) Yintoni ke ngoko esimele siyenze xa sone omnye umntu ngempazamo? Khumbula ukuba kumthandazo awawufundisa abafundi bakhe uYesu waquka namazwi athi: “Sixolele izono zethu, kuba nathi siyabaxolela bonke abanamatyala kuthi.” (Luka 11:4) UThixo uyasixolela xa sicela uxolo egameni likaYesu.—Yohane 14:13, 14.

Phawula ukuba uYesu uthi sixolelwa xa nathi sibaxolela abo “banamatyala kuthi.” Nompostile uPawulos wathi kwamanye amakholwa: “Yibani nobubele omnye komnye, nibe nemfesane, nixolelane ngesisa kanye njengokuba noThixo wanixolelayo ngesisa ngaye uKristu.” (Efese 4:32) Xa sibaxolela abanye abantu sinokulindela ukuba noThixo asixolele.

Kuthekani ngezono ezinje ngokuba, ukuxoka ngabom, ukuziphatha kakubi ngokwesondo, ukunxila nezinye? Umntu owenza izono ezinjalo wona uThixo. Ufanele enze ntoni loo mntu?

Zimele Zixelwe Kubani Izono?

UThixo akanikanga namnye umntu igunya lokuxolela izono kuba nguye kuphela onelo gunya. IBhayibhile isixelela ngokucacileyo ukuba: “Ukuba siyazivuma izono zethu, uthembekile yaye ulilungisa ukuba asixolele izono zethu aze asihlambulule kuyo yonke intswela-bulungisa.” (1 Yohane 1:9) Kodwa ke zifanele zixelwe kubani ezo zono?

Izono zifanele zixelwe kuThixo kuba nguye kuphela onegunya lokuzixolela. Yiloo nto kanye eyenziwa nguDavide. Kodwa ke yintoni awayefanele ayenze ukuze axolelwe? IBhayibhile ithi: “Guqukani, ke ngoko, nijike khon’ ukuze zicinywe izono zenu, ukuze amaxesha okuhlaziya eze evela kuYehova ngenkqu.” (IZenzo 3:19) Ukuxolelwa akuxhomekekanga nje ekuvumeni isono kodwa kufuneka loo mntu wonileyo azimisele ukungaphindi one. Kudla ngokuba nzima ukungaphindi wone. Kodwa ke lukho uncedo.

Khumbula kaloku ukuba umfundi uYakobi ebesithethe ngaye ekuqaleni wathi: “Zivumeni ekuhleni izono zenu omnye komnye nize nithandazelane, ukuze niphiliswe.” Woleka umsundulo esithi: “Isikhungo somntu olilungisa, xa sisebenza, sinamandla amakhulu.” (Yakobi 5:16) ‘Umntu olilungisa’ athetha ngaye uYakobi kwivesi 14 isenokuba ngomnye ‘wabadala bebandla.’ Kwibandla lamaKristu kukho “amadoda amakhulu” okanye abadala abanceda abantu abafuna ukuxolelwa nguThixo. Kodwa ke loo “madoda makhulu” akakwazi kuzixolela izono kuba akukho ndoda inikwe igunya lokuxolela izono ezenziwe kuThixo.a Noko ke analo igunya lokohlwaya nokunceda umntu owenze isono esinzulu aqonde ubunzulu besono sakhe nemfuneko yokuguquka.—Galati 6:1.

Kutheni Ufanele Uzixele Izono Zakho?

Enoba isono sinzulu okanye akunjalo, umntu owonileyo uxabene nabanye abantu kunye noThixo. Loo nto inokumenza angonwabi kuba edliwa sisazela awasinika sona uThixo. (Roma 2:14, 15) Ufanele enze ntoni?

Kwakhona incwadi kaYakobi ithi: “Ngaba kukho nabani na ogulayo phakathi kwenu? Makabizele kuye amadoda amakhulu ebandla, aze wona amthandazele, amthambise ngeoli egameni likaYehova. Yaye umthandazo wokholo uya kumphilisa lowo ungaphilanga, uYehova amvuse. Kanjalo, ukuba uye wenza izono, uya kuxolelwa.”—Yakobi 5:14, 15.

Nakule vesi kuthiwa amadoda amakhulu okanye abadala bafanele bancede umhlambi. Bawunceda njani? Akuxelwa nje izono kubo, kodwa ekubeni umntu owenze isono enokholo olubuthathaka kufuneka bamncede ukuze ‘bamphilise lowo ungaphilanga.’ UYakobi ukhankanya izinto ezimbini ezinokwenziwa.

Okokuqala, uthetha ‘ngokuthambisa ngeoli.’ Oku kubhekisela kumandla aphilisayo eLizwi likaThixo. Umpostile uPawulos wathi “ilizwi likaThixo liphilile, linamandla . . . yaye liyakwazi ukuphicotha iingcamango notyekelo lwentliziyo.” (Hebhere 4:12) Xa eyisebenzisa ngobuchule iBhayibhile, amadoda amakhulu anokunceda umntu onokholo olubuthathaka abone unobangela wengxaki yakhe aze athathe namanyathelo okuyilungisa noThixo.

Okwesibini, kukho “umthandazo wokholo.” Nangona imithandazo yala madoda makhulu ingenakukujika okusesikweni kukaThixo, ibalulekile kuThixo oxolela izono ngenxa yedini lentlawulelo likaKristu. (1 Yohane 2:2) UThixo ukulungele ukunceda umoni oguquke ngokwenene nobonisa “imisebenzi efanele inguquko.”—IZenzo 26:20.

Esona sizathu sokuxela isono enoba senziwe nxamnye nabantu okanye noThixo, kukulungisa ubuhlobo bakho noThixo. UYesu Kristu wathi sifanele silungise nakuphi na ukungevani esinako nabanye ngaphambi kokuba sikwazi ukunqula uThixo ngesazela esihle. (Mateyu 5:23, 24) IMizekeliso 28:13 ithi: “Okugubungelayo ukunxaxha kwakhe akayi kuphumelela, kodwa okuvumayo aze akushiye uya kwenzelwa inceba.” Xa sizithoba kuThixo size sicele uxolo, uya kusithanda aze asiphakamise ngexesha elililo.—1 Petros 5:6.

[Umbhalo osemazantsi]

[Amagama acatshulweyo akwiphepha 23]

UThixo uyazixolela izono zethu xa simcela egameni likaYesu

[Umfanekiso okwiphepha 24]

Esona sizathu sokuxela isono kukulungisa ubuhlobo bakho noThixo