Inqwelo Yokulwa KaYehova Yasezulwini Iyahamba
“Iivili ezo zabizwa ezindlebeni zam, kwathiwa, ziivili ezijikelezayo.”—HEZEKILE 10:13.
1. UYehova unohlobo olunjani lwesithuthi?
KULE mihla yeenqwelo-moya zomgangatho ophezulu, iinkokeli zehlabathi zisenokuvakalelwa kukuba zihamba ngezingayiwayo kwezothutho. Kanti, kwiminyaka engama-2 600 eyadlulayo, uYehova uThixo watyhila into yokuba unohlobo olubalaseleyo lwesithuthi, olungazange lubonwe nanguwuphi na unonjineli. Siyinqwelo yokulwa enkulu neyoyikekayo! Ngaba oku kubonakala kuyinto engaqhelekanga ukuba uMdali wendalo iphela akhwele isithuthi esinjengenqwelo yokulwa? Akunjalo, kuba isithuthi sikaYehova sasezulwini sahluke ngokupheleleyo kuso nasiphi na esakhe saveliswa ngumntu.
2. UHezekile isahluko 1 uyichaza njani inqwelo yokulwa kaYehova yasezulwini, yaye okokuqala nje umprofeti uyitsalela kubani ingqalelo yethu?
2 Kwisahluko 1 sesiprofeto sikaHezekile, uYehova uchazwa njengokhwele kwinqwelo enkulu yokulwa yasezulwini. Le nqwelo yokulwa eneevili ezine nekhwankqisayo iyazihambela ngaphandle komqhubi yaye inokwenza izinto ezimangalisayo. UHezekile wayibona le nqwelo yokulwa yasezulwini embonweni ngowama-613 B.C.E., xa wayengakomnye wemijelokazi eyayikwiBhabhiloni yamandulo. Okokuqala lo mprofeti utsalela ingqalelo yethu kubaququzeleli bale nqwelo yokulwa kaYehova yasezulwini. Njengoko sifunda, masizame ukuba nomfanekiso-ngqondweni woko kwabonwa nguHezekile.
Izinto Eziphilileyo Ezine
3. Yintoni ephawulwa bubuso obune kwikerubhi nganye?
3 UHezekile unikela le ngxelo: “Ndabona ke, nanko kusiza umoya ovuthuzayo, uvela ngasentla, unelifu elikhulu nomlilo obumbeneyo njengembumbulu, nobumhlophe obungeenxa zonke kulo . . . Ngaphakathi kwawo yimfano yezinto eziphilileyo ezine.” (Hezekile 1:4, 5) Nganye yezi zinto zine ziphilileyo, okanye iikerubhi, yayinamaphiko amane nobuso obune. Zazinobuso bengonyama, obuphawula ukuba sesikweni kukaYehova; ubuso benkunzi yenkomo, obuphawula amandla kaThixo; nobuso bokhozi, obuphawula ubulumko Bakhe. Zazikwanobuso bomntu, obufanekisela uthando lukaYehova.—Duteronomi 32:4; Yobhi 12:13; Isaya 40:26; Hezekile 1:10; 1 Yohane 4:8.
4. Kutheni le nto iikerubhi zinobuso obune, ibe ezi kerubhi zibaleka ngesantya esingakanani?
4 Ikerubhi nganye yayinobuso obukhangele kwicala ngalinye kumacala amane. Ngenxa yoko, ezi kerubhi zazinokujikela ngokukhawuleza kuyo nayiphi na indlela zize zilandele ubuso obukhangele kwicala ekufuneka kuyiwe ngakulo. Kodwa zazihamba ngasiphi isantya ezo kerubhi? Ewe, zazinokuhamba ngesantya sombane! (Hezekile 1:14) Akukho sithuthi senziwe ngumntu esakhe sahamba ngeso santya.
5. UHezekile uzichaza njani iivili neefeleni zenqwelo yokulwa?
5 Ngequbuliso, kubonakala iivili zale nqwelo yokulwa. Hayi indlela ezingaqhelekanga ngayo! Hez 1 Indinyana 16 neye-18 zithi: “Ukubonakala kwazo nokusetyenzwa kwazo kungathi ivili ingaphakathi kwevili. Iifeleni zazo beziphakamile, bezisoyikeka; iifeleni zazo bezizele ngamehlo ngeenxa zonke kuzo zone.” Ivili elingakwicala lekerubhi nganye laliziivili ezine ezazinokuya kumacala amane, njengokuba kwakunjalo ngobuso obune beekerubhi. Ezi vili zazikhazimla njengekrizolite, ilitye elikhanyayo nokwaziyo ukubona ngaphaya kwalo, elimthubi okanye eliluhlaza. Liwenza ukhanye uze uqaqambe ngakumbi lo mbono uzukileyo. Ekubeni iifeleni zezi vili ‘zazizele ngamehlo,’ zazingahambi zityhobeka nje kulo naliphi na icala. Ibe ezo vili zaziphakame kakhulu, ngaloo ndlela zikwazi ukuwukhathula kanobom umgama ngokujikeleza nje kube kanye kwiiasi zazo. Nazo, njengeekerubhi ezine, zazinokuhamba ngokukhawuleza ngesantya sombane.
Iivili Kwiivili
6. (a) Kwenzeka njani ukuba inqwelo yokulwa kuthiwe ineevili ezivilini? (b) Iivili zazilazi njani icala ekwakufuneka zisinge kulo?
6 Kwakukho nenye into engaqhelekanga. Ivili ngalinye lalinevili ngaphakathi kwalo—ivili elilinganayo nelifakwe lajonga kwelinye icala kwelona vili lisebenzayo. Kungale ndlela kuphela ekunokuthiwa iivili ‘zihamba kumacala azo omane.’ (Hez 1 Indinyana 17) Ngephanyazo, iivili zazinokujikela nakuliphi icala kuba kwakukho icala levili elalijonge kwicala ngalinye. Ezi vili zazihamba zisinge kwicala ezazisiya ngakulo iikerubhi ezine. Phezu kwezi vili zine, umzimba wenqwelo yokulwa kaThixo wawunokuhamba uxhaswe ngamandla angabonakaliyo oku kanye kwephenyane elinamandla elithi liphakanyiswe kancinane ngumoya njengoko lihamba phezu kwamanzi.
7. Zaziwafumana phi amandla ezi vili?
7 Ezi vili zaziwafumana phi amandla okuhamba zisiya kuwo onke amacala ezazisiya ngakuwo iikerubhi ezine? Zaziwafumana kumoya oyingcwele kaThixo uSomandla. Indinyana yama-20 ithi: “Apho sukuba usiya khona umoya, zaya apho . . . Umoya wezinto eziphilileyo ubukho ezivilini ezo.” Yayikwangulo moya kaThixo ungabonakaliyo nongamandla asebenzayo owawungaphakathi kwiikerubhi owawukwezo vili.
8. Zathiywa liphi igama iivili, yaye ngoba?
8 Ezi vili zibizwa ngegama lokuba “ziivili ezijikelezayo.” (Hezekile 10:13) Kubonakala ukuba zathiywa ngoko kwakusenziwa yivili nganye. Yayijikeleza kuhle. Ukuthiywa kwale nxalenye yenqwelo yokulwa yasezulwini ngegama elinjalo kutsalela ingqalelo kwisantya ehamba ngaso inqwelo yokulwa yasezulwini. Nangona iivili zenqwelo yokulwa yasezulwini zijikeleza ngesantya esingako ukuba sikhulu, zisoloko zibona apho ziya ngakhona ngenxa yokuba zizaliswe ngamehlo.
9. UHezekile ukuchaza njani oko kwakungaphezu kweevili ezine zenqwelo yokulwa ezibaleka ngesantya esoyikekayo?
9 Kodwa ngoku makhe sijonge size sibone oko kuphezu kwezo vili zine ziphakamileyo nezibaleka ngesantya esoyikekayo. Indinyana yama-22 kaHezekile isahluko 1 ithi: “Naphezu kweentloko zezinto eziphilileyo bekukho into efana nesibhakabhaka, ngathi ngembonakalo yikristale eyoyikekayo, sanekiwe phezu kwentloko yazo ngaphezulu.” Nangona isibhakabhaka sibungqimbarha, wawukwazi ukubona ngaphaya kwaso, “ngathi ngembonakalo yikristale eyoyikekayo.” Sasimenyenzela njengeedayimani ezininzi ezikhanyiselwe lilanga. Le yinto ekhwankqisa ngokwenene!
Umkhweli Onobuqaqawuli Wenqwelo Yokulwa
10. (a) Ichazwa njani itrone naLowo uhleli phezu kwayo? (b) Yintoni ephawulwa sisibakala sokuba uMkhweli wenqwelo yokulwa egutyungelwe bubuqaqawuli?
10 Ngokucacileyo, inqwelo iyema khon’ ukuze uMkhweli wayo athethe noHezekile. Ngaphaya kwesibhakabhaka, kubonakala umfanekiso wetrone, unga ulilitye lesafire, okanye okuthile okunebala elimsobo. Phezu kwetrone kukho uThile ongathi yimbonakalo yomntu. Le mbonakalo yomntu yaba ngumfanekiso omhle ekuncedeni uHezekile aqonde le mbonakaliso kaThixo. Kodwa le mbonakalo yomntu igutyungelwe bubuqaqawuli ngokokude ibengezele, ikhazimle okomxube wesilivere negolide. Obunjani bona ubuhle obubangela ukuba kubethane amadolo! Ubuqaqawuli obungenakulinganiswa boko kubonakala njengomntu, bususela phezulu behlise. Ngaloo ndlela wonke lo mfanekiso ugutyungelwe bubuqaqawuli. Oku kubonisa ukuba uYehova unobuqaqawuli obungenakuchazwa. Ngaphezu koko, uMkhweli wenqwelo yokulwa uphelekwa ngumnyama omhle ngokwenene. Esinjani sona isiqabu nenzolo emva koqhwithela njengoko zibonakaliswa ngomnyama! Ekubeni eneso simo sengqondo sokuzola, uYehova uzisebenzisa ngokulungelelana okugqibeleleyo iimpawu zakhe ezibubulumko, okusesikweni, amandla nothando.
11. UHezekile wachatshazelwa njani ngumbono wenqwelo yokulwa kaYehova netrone?
11 Inqwelo yokulwa netrone kaYehova zijikelezwe kukukhanya nayimibala emihle. Onjani wona umahluko ngoSathana, inkosi yobumnyama neyezenzo zasemfihlekweni! Yaye ngaba uHezekile wachaphazeleka njani kuko konke oku? Uthi: “Ndabona ke, ndawa ngobuso, ndaliva izwi lothethayo.”—Hezekile 1:28.
Oko Kwakufuziselwa Yinqwelo Yokulwa
12. Yintoni efanekiselwa yinqwelo yokulwa kaYehova yasezulwini?
12 Yintoni efanekiselwa yile nqwelo yokulwa emangalisayo? Yintlangano kaYehova uThixo yasezulwini. Ibunjwa zizo zonke izidalwa zakhe zomoya oyingcwele kuloo mmandla ungabonakaliyo—iiserafi, iikerubhi nezithunywa zezulu. Ekubeni uYehova enguThixo Osenyangweni, zonke izidalwa zakhe zomoya zingaphantsi kwakhe, yaye ukhwele kuzo ngengqiqo yokuba uzilawula ngobubele kwaye uzisebenzisa ngokwenjongo yakhe.—INdumiso 103:20.
13. (a) Kunokutshiwo njani ukuba uYehova ukhwele kwintlangano yakhe? (b) Ukuchaphazela njani wena umbono wenqwelo yokulwa kaYehova eneevili ezine nehambayo?
13 UYehova ukhwele kule ntlangano ngokungathi ukwinqwelo yokulwa, eyenza ukuba iye naphi na apho umoya wakhe uyiqhubela khona. Ayibaleki ngokudlokovayo, ingalawuleki okanye ngokungathi ayiqhutywa nguthile okrelekrele. UThixo akayivumeli le ntlangano ukuba iye nangaphi na apho ifuna ukuya khona. Kunoko, ilandela ulwalathiso lwakhe. Kunye, thina sonke sityhalela phambili kuse ekuzalisekisweni ngokupheleleyo kweenjongo zikaThixo. Enjani yona ukumangalisa intlangano yasezulwini etyhilwa ngulo mbono wenqwelo yokulwa kaYehova yasezulwini eneevili ezine ehambayo! Ngokuvisisana noku, intlangano kaYehova ifanekiselwa njengenamacala amane, nto leyo eyenza ukuba ibe yelungelelene ngokugqibeleleyo.
Umiselwe Njengomlindi
14. Ngubani ofanekiselwa ngumprofeti uHezekile?
14 Kodwa ngubani ofanekiselwa ngumprofeti uHezekile? Ngokusekelwe kwizibakala zembali, kuyabonakala ukuba iqumrhu lamaNgqina kaYehova athanjiswe ngomoya belinxulunyaniswa nenqwelo yokulwa yasezulwini. Ngaloo ndlela, uHezekile uyifanekisela kakuhle intsalela ethanjisiweyo yamaNgqina kaYehova ukususela kunyaka we-1919. Ngokomoya, intlangano kaThixo yasezulwini yaqalisa ukuqhagamshelana nentsalela ethanjisiweyo ngaloo nyaka, ukuze iyihlaziye njengamaNgqina kaYehova kulo lonke ihlabathi. (Thelekisa ISityhilelo 11:1-12.) Ngelo xesha, loo ntlangano enjengenqwelo yokulwa yayihamba, kwanjengokuba isenjenjalo namhlanje. Enyanisweni, iivili zayo ezifuzisela ukwenza inkqubela zijikeleza ngokukhawuleza kunanini na ngaphambili. UYehova uqhuba ngesantya esiphakamileyo ukubheka phambili!
15. Lithini ilizwi loMkhweli wenqwelo yokulwa yasezulwini, yaye luluphi uthumo olufunyanwa nguHezekile?
15 UHezekile wayenqwenela ukwazi isizathu sokuba le nqwelo yokulwa yasezulwini yeza kuma phambi kwakhe. Wasiqonda njengoko ilizwi laLowo wayehleli kwinqwelo yokulwa lalithetha libhekisa kuye. Ekhwankqisiwe ngulo mbono umangalisayo, uHezekile uwa ngobuso phantsi. Phulaphula njengoko ilizwi loMkhweli wenqwelo yokulwa yasezulwini lithetha: “Nyana womntu, yima ngeenyawo zakho, ndithethe nawe.” (Hezekile 2:1) Wandula ke uYehova athume uHezekile ukuba abe ngumlindi nokuba alumkise indlu kaSirayeli enemvukelo. Ude athunywe ukuba athethe egameni likaThixo. Igama likaHezekile lithetha ukuba “UThixo Uyomeleza.” Ngoko ke ngulo Thixo oye womeleza udidi lukaHezekile waza waluthuma, elumisela njengomlindi kwiNgqobhoko.
16, 17. (a) UHezekile wangenelwa njani kumbono wenqwelo yokulwa yasezulwini? (b) Kumhla wethu, ukuqondwa kombono wenqwelo yokulwa yasezulwini kuluchaphazele njani udidi lukaHezekile nesihlwele esikhulu?
16 Lo mbono wenqwelo yokulwa yasezulwini wamenza uHezekile wazola ibe wakhwankqiswa, kodwa wakwamxhobisela ukuba aphumeze uthumo awalunikwayo njengomlindi lokuhlokomisa isilumkiso sentshabalalo eyayiza kufikela iYerusalem. Kuye kwenzeka okufanayo kudidi lomlindi namhlanje. Ukuqonda kwalo umbono wenqwelo yokulwa kaYehova yasezulwini ehambayo kuye kwabangela ifuthe elikhulu kwintsalela ethanjisiweyo. Ngowe-1931 lafunda okungakumbi ngombono kaHezekile, njengoko kwatyhilwayo kuMqulu Wokuqala wencwadi ethi Vindication. Ngelo xesha lazaliswa luxabiso oluhambisana nenzolo ngokokude kwiphepha elingaphandle lenkupho kaOktobha 15, 1931, kuse kweka-Agasti 1, 1950, yephephancwadi iWatchtower ngasentla kwesokunene kuzotywe umfanekiso wobugcisa wombono kaHezekile wenqwelo yokulwa yasezulwini. Ngaloo ndlela, udidi lukaHezekile luye lwenza ngokuvisisana nothumo olulunikiweyo, yaye belukhonza njengomlindi, luhlokomisa isilumkiso sikaThixo. Ixesha lokutshatyalaliswa kweNgqobhoko ngokuqatha nguYehova ohleli etroneni kwinqwelo yakhe yokulwa yasezulwini alizange laba lelisondele kangaka nanini na ngaphambili!
17 Namhlanje, “isihlwele esikhulu” sabantu ababumvu sisebenzisana nentsalela ethanjisiweyo. (ISityhilelo 7:9) Bonke, bahlokomisa isilumkiso sentshabalalo eza kufikela iNgqobhoko nayo yonke le nkqubo ingendawo yezinto. Lo msebenzi wokuhlokomisa isilumkiso wenziwa ngesantya esiphakamileyo, ibe njengoko kuboniswa kwiSityhilelo 14:6, 7, izithunywa zezulu ziyawuxhasa.
Ukuhambisana Nenqwelo Yokulwa Yasezulwini
18. Yintoni emele yenziwe ukuze kufunyanwe inkxaso ethe rhoqo yezithunywa zezulu, kwaye yintoni esimele sisabele kuyo ngokukhawuleza?
18 Izithunywa zezulu ezithobekileyo zihamba ngemvisiswano elungeleleneyo njengenxalenye yentlangano kaThixo yasezulwini ngoxa zincedisa abakhonzi bakaYehova basemhlabeni ekuzaliseni uthumo lwabo lokuvakalisa izilumkiso zomgwebo kaThixo. Ukuba sinqwenela ukuba aba bakhonzi banamandla bakaThixo abazizithunywa zezulu baqhubeke besikhusela yaye besikhokela, nathi sikwamele sihambe ngemvisiswano elungeleleneyo kwaye sihambe ngesantya seevili ezijikelezayo zokomfuziselo. Ngaphezu koko, njengenxalenye yentlangano kaYehova ebonakalayo ethe chu kuhle ngakwinqwelo yokulwa yasezulwini, simele sisabele ngokukhawuleza kukhokelo lomoya kaThixo. (Thelekisa abaseFilipi 2:13.) Ukuba singamaNgqina kaYehova, simele siye kanye kwelo cala inqwelo yokulwa yasezulwini eya ngakulo. Ngokuqinisekileyo asimele siye ngapha kodwa yona isithi makuyiwe ngaphaya. Xa sinikwe ulwalathiso lwendlela esimele sihambe ngayo, sifanele siye apho ke. Ngaloo ndlela, ibandla liba nemvisiswano.—1 Korinte 1:10.
19. (a) Kanye njengokuba inqwelo yokulwa yasezulwini izaliswe ngamehlo, yintoni abamele bayiphaphele abantu bakaYehova? (b) Liliphi ikhondo esifanele sililandele kula maxesha ezidubedube?
19 Ukuzaliswa ngamehlo kweevili zenqwelo yokulwa kaThixo kubonisa ukuphapha. Kanye njengokuba intlangano yasezulwini iphaphile, nathi sikwamele sikuphaphele ukuxhasa intlangano kaYehova yasemhlabeni. Ebandleni, sinokubonakalisa inkxaso enjalo ngokusebenzisana nabadala basekuhlaleni. (Hebhere 13:17) Ibe kula maxesha ezidubedube, kufuneka amaKristu anamathele kakhulu entlanganweni kaYehova. Asifuni kukhokelisa indlela yethu yokuchaza iziganeko, kuba ngokwenjenjalo besingayi kuba sihambisana nenqwelo yokulwa kaYehova yasezulwini. Masisoloko sizibuza oku ‘Iya ngaphi inqwelo yokulwa yasezulwini?’ Ukuba sityhalela phambili nentlangano kaThixo ebonakalayo, siya kuba sikwahambisana nenxalenye yentlangano kaThixo engabonakaliyo.
20. Sithini isiluleko esihle esinikelwa ngumpostile uPawulos kwabaseFilipi 3:13-16?
20 Kule nkalo, uPawulos wabhala: “Bazalwana, mna andizibaleli ekuthini ndigangile; ke ndenza nto-nye: ndithi, ndizilibala izinto ezisemva, ndisolulela kweziphambili, ndiphuthume ngokoxunele umvuzo wobizo lwaphezulu lukaThixo kuKristu Yesu. Ngoko masithi, ngangoko singako thina bagqibeleleyo, sicinge oko; kanjalo ukuba nicinga into ngokukumbi, uThixo wonityhilela naleyo. Noko ke, apho sifikelele khona, masihambe ngamgca mnye, masicinge nto-nye.”—Filipi 3:13-16.
21. Kungokuhamba ngawuphi umgca ekunokwenzeka ngawo ukwenza inkqubela yokomoya nentlangano kaThixo?
21 Apha igama elithi “ngamgca mnye,” alibhekiseli kwinkqubo enye esingenakushukuma kuyo. Abakhonzi bakaYehova banomgca omnye omhle abathi ngawo bakwazi ukwenza inkqubela yokomoya. Ngumgca omnye wofundisiso lobuqu lweBhayibhile, ukuya kwiintlanganiso zebandla, ukuba ngothe rhoqo ekushumayeleni iindaba ezilungileyo zoBukumkani nokubonakalisa iimpawu zentlangano kaThixo yasezulwini. Umgca omnye onjalo ubabangela bakwazi ukulandela ukhokelo lwentlangano kaYehova enjengenqwelo yokulwa yasezulwini. Ngokuzingisa ekwenzeni ngolo hlobo, siya kulufikelela usukelo lwethu, enoba lungumvuzo wobomi bokungafi emazulwini okanye ubomi obunganaphakade kumhlaba owenziwe iparadisi.
22. (a) Ukuze intsalela ethanjisiweyo nesihlwele esikhulu sezinye izimvu balungelelaniswe ngokumanyeneyo, yintoni emele yenziwe? (b) Yintoni engenakungaphawulwa nguYehova?
22 Kunjengokuba uYohane 10:16 ebonisa, “ezinye izimvu” nodidi lukaHezekile babeya kulungelelaniswa ngokumanyeneyo. Ngaloo ndlela, kubalulekile ukuba bonke abo bakwintlangano kaYehova bayiqonde ngokupheleleyo intsingiselo nokubaluleka kombono kaHezekile isahluko 1 ukuba baza kukwazi ukuhamba ngesantya senqwelo yokulwa kaThixo yasezulwini. Umbono wayo uyasinceda siqonde ukuba nathi sifanele sihambe ngesantya sentlangano kaThixo, ebonakalayo nengabonakaliyo. Kwakhona, khumbula ukuba amehlo kaYehova “asingasinga ehlabathini lonke, ukuba azomelezele abantliziyo ziphelele kuye.” (2 Kronike 16:9) Akukho nanye into angayiphawuliyo uYehova, ngokukodwa into emayela nenjongo yakhe yokuzithethelela njengoMongami Wendalo Iphela.
23. Sikunye nenqwelo yokulwa kaYehova yasezulwini ehambayo, yintoni esimele siyenze?
23 Ngokuqinisekileyo inqwelo yokulwa kaYehova yasezulwini iyahamba namhlanje. Kungekudala zonke izinto ziya kuziswa kubuqaqawuli ngokuvisisana naLowo uzukileyo ukhwele inqwelo yokulwa—ibe zonke ezo zinto ziya kumthethelela njengeNkosi enguMongami wendalo iphela. Iiserafi, iikerubhi nezithunywa zakhe zasezulwini ziyasixhasa namhlanje kumsebenzi wethu omkhulu wokushumayela kwihlabathi lonke. Ngoko ke, masityhalele phambili nentlangano kaYehova yasezulwini. Kodwa sinokuhambisana njani nale nqwelo yokulwa yasezulwini ehamba ngesantya sombane?
Ubuya Kuphendula Njani?
◻ Ziziphi iimpawu ezifanekiselwa zizinto ezine eziphilileyo ezabonwa nguHezekile?
◻ Yintoni efanekiselwa yinqwelo yokulwa kaYehova yasezulwini?
◻ Ngubani ofanekiselwa ngumprofeti kaThixo uHezekile?
◻ Ukuqondwa kombono wenqwelo yokulwa kaYehova yasezulwini kuluchaphazele njani udidi lukaHezekile nesihlwele esikhulu?