Hambisana Nesantya Senqwelo Yokulwa KaYehova Yasezulwini
“Wathethe ke kubo amazwi am, nokuba bathe beva, nokuba bathe bala.”—HEZEKILE 2:7.
1, 2. Yiyiphi inqwelo yasebukhosini eyabonwa nguHezekile, ibe kwathiwani kuye?
INQWELO yokulwa kaYehova yasezulwini ngoku imile phambi kwabakhonzi bakhe. Ngamehlo okholo, bayayibona loo nqwelo izukileyo yeNkosi yabo enguMongami. Izukile, iyoyikeka, inobungangamsha.
2 Ikwayiloo nqwelo yasebukhosini eyema phambi komprofeti kaThixo uHezekile embonweni kwiminyaka enokuba ngama-2 600 eyadlulayo. Ekule nqwelo yokulwa ithwele itrone—intlangano kaThixo yasezulwini yezidalwa zokomoya—uYehova wakhupha lo myalelo ophawulekayo oya kuHezekile: “Oonyana baziingwanyalala ubuso, balukhuni intliziyo. Ndikuthuma kubo; uze uthi kubo, Itsho iNkosi uYehova. Ke bona (nokuba bathe beva, nokuba bathe bala, kuba beyindlu eneenkani) baya kwazi ukuba bekukho umprofeti phakathi kwabo.”—Hezekile 2:4, 5.
3. Ngubani owenza umsebenzi kaHezekile namhlanje?
3 UHezekile waluphumeza ngokuzimisela olo thumo, ekhonza njengekuphela kwesixhobo esikhoyo sokusetyenziswa nguThixo. Ngokufanayo, ngoku uThixo unentlangano enye kuphela ayisebenzisayo. Udidi lukaHezekile, intsalela ethanjisiweyo, luyakhokela emsebenzini wokunikela ubungqina bokugqibela, lukunye ‘nesihlwele esikhulu’ ‘sezinye izimvu’ simanyene ekunikeleni inkxaso yaso. (ISityhilelo 7:9, 10; Yohane 10:16) Bonke ‘bangumhlambi omnye,’ benoMalusi Olungileyo, uYesu Kristu, obakhokelayo phantsi kolongamo loMkhweli ozukileyo Wenqwelo Yokulwa, uYehova uThixo.
4, 5. Yabakho njani intlangano kaThixo ebonakalayo, yaye ngawaphi amava eye yanawo ngokuvisisana noIsaya 60:22?
4 Phantsi kolwalathiso lukaYehova, le ntlangano yehlabathi lonke iye yakhula isusela kwiziqalo ezincinane isiba ngummeli onamandla wokuvakalisa umyalelo ‘wokoyika uThixo nokumzukisa, ngenxa yokuba ilixa lokugweba kwakhe lifikile.’ (ISityhilelo 14:7) Kanye njengokuba uHezekile engazange azivelele okanye azimisele ngokwakhe njengomprofeti, ngoko nentlangano kaThixo ebonakalayo ayikhange izibangele ibekho okanye izimisele ngokwayo. Ayikhange ivele ngokuthanda okanye ngomgudu womntu. UThixo onguMkhweli Wenqwelo Yokulwa nguye oyibangele yakho. Ekubeni besomelezwa ngumoya kaThixo kwaye bexhaswa zizithunywa zezulu ezingcwele, abantu bakaYehova baye banda kanobom ngokokude ‘omncinanana abe luhlanga olunamandla.’—Isaya 60:22.
5 AmaNgqina kaYehova angaphezu kwezi-4 000 000 avakalisa isigidimi soBukumkani kumazwe angama-212. Ahlulahlulwe angamabandla angaphezu kwangama-63 000 alungelelaniswe aziziphaluka nezithili. Izakhiwo zeeofisi zamasebe nezokushicilela zisebenza phantsi kolwalathiso lweQumrhu Elilawulayo njengezazulu zekomkhulu lentlangano. Ngokungathi angumntu omnye, onke atyhalela phambili, eshumayela iindaba ezilungileyo, efundisa abo basabelayo, esakha neendawo zokuqhubela iintlanganiso. Ewe, intlangano kaYehova ebonakalayo ihambisana nesantya senqwelo yokulwa yasezulwini nesoMkhweli wayo.
6. Yintoni ebandakanyekileyo ekuhambisaneni nesantya sentlangano kaYehova ebonakalayo?
6 Ukuba ungomnye wamaNqina kaYehova, ngaba uhambisana nesantya sentlangano kaThixo ebonakalayo? Ukwenjenjalo akungombandela nje wokuya kwiintlanganiso zamaKristu nokuchitha ixesha elithile kubulungiseleli. Ngokuyintloko, isantya siyinto enokuthanani nenkqubela nokukhula ngokomoya. Kuquka ukuba nesimo sengqondo esingqalileyo, ukumisela izinto eziza kuqala ezifanelekileyo nokuba nenkcazelo esexesheni. Ukuba sihambisana nesantya senqwelo yokulwa kaYehova yasezulwini, ubomi bethu buvisisana nesigidimi esisivakalisayo.
7. Kutheni sifanele siyiqwalasele ihambo kaHezekile njengomprofeti kaThixo?
7 Kumbandela wokuhambisana nesantya, abakhonzi bakaYehova banamhlanje banokufunda okuninzi kumzekelo kaHezekile. Nangona wayekhethwe ngokukhethekileyo njengomprofeti nguYehova, uHezekile wayeseneemvakalelo ngezinto, wayenenkxalabo yaye enezinto azisweleyo. Ngokomzekelo, njengoko ngokwentelekiso wayesengumfana otshatileyo, wehlelwa yintlungu yokufelwa ngumfazi wakhe. Sekunjalo, akazange aphulukane nombono wothumo lwakhe njengomprofeti kaYehova. Ngokuqwalasela indlela uHezekile awaziphatha ngayo nakwezinye iinkalo, sinokuzomeleza ukuze sikwazi ukuhambisana nentlangano kaThixo ebonakalayo. Oku kuya kusenza sikwazi ukuhambisana nesantya sentlangano yakhe engabonakaliyo.
Uthumo Luyamkelwa Luze Luzalisekiswe
8. Mayela nothumo lwakhe, nguwuphi umzekelo owamiselwa nguHezekile?
8 UHezekile wamisela umzekelo omhle wokwamkela uthumo nokuluzalisekisa. Noko ke, kwakufuneka intobelo nenkalipho ukuze luphunyezwe, kuba sifunda oku: “Wena ke, nyana womntu, musa ukuboyika, ungawoyiki amazwi abo; nangani usemarhawini nasemeveni, uhleli phezu koonomadudwane, musa ukuwoyika amazwi abo; ungaqhiphuki umbilini bubuso babo, kuba bayindlu eneenkani. Wathethe ke kubo amazwi am, nokuba bathe beva, nokuba bathe bala; ngokuba baneenkani. Wena ke, nyana womntu, yiva endikuthethayo kuwe; ungabi nankani, njengale ndlu ineenkani.”—Hezekile 2:6-8.
9. Kungokwenza ntoni kuphela uHezekile awayeya kuthi azikhulule kwityala legazi?
9 UHezekile akazange abe ngongakhathaliyo okanye abe lityutyusi, efuna ukusoloko ethundezwa ukuze aphumeze uthumo lwakhe. Wayeya kuzikhulula kwityala legazi kuphela ukuba wayethetha amazwi kaYehova ngokuvumayo nangokungafihlisiyo. UHezekile waxelelwa oku: “Wena ke, xa uthe wamvuselela ongendawo, akabuya endleleni yakhe, endleleni yakhe engendawo: wofa ngobugwenxa bakhe, kodwa wena uwuhlangule umphefumlo wakho.”—Hezekile 3:19.
10. Udidi lukaHezekile luzingqine njani lunjengomprofeti?
10 Njengakwimeko kaHezekile, udidi lukaHezekile oluthanjisiweyo lulwamkele uthumo olulunikwe nguThixo yaye luyaluphumeza. Ukuba singamaNgqina kaYehova, sifanele sikhumbule ukuba ubomi bethu nobabanye buxhomekeke kwintobelo yethu. (1 Timoti 4:15, 16) Ngqina ngalinye kufuneka lihambisane nesantya sentlangano kaYehova. UThixo akayi kusibophelela kwinqwelo yakhe yokulwa aze asirhuqe. Ukungakhathali nentliziyo eyahluleleneyo ziyamthoba uMkhweli Wenqwelo Yokulwa. Ngoko intlangano kaYehova ebonakalayo iyasibongoza ukuba sibeke izilangazelelo zobuthixo phambili kubomi bethu. Ukuqhubeka sisenza ngokuvisisana neso sibongozo kusigcina sihambisana nesantya sentlangano kaThixo yaye kuphakamisa ubulungiseleli bethu obungcwele ukuba bungabi yinto nje yokudlulisa usana kunina, ukwenza nje kuba kusenziwa. Ngokuqinisekileyo, bebonke abantu bakaYehova babonakalisa ukuzinikela okuphawulekayo. Indima yethu yomntu ngamnye kukuba sigcine isantya esifanelekileyo.
ILizwi LikaThixo Lamkelwa Ngentliziyo
11. Nguwuphi umzekelo owamiselwa nguHezekile mayela namazwi kaThixo?
11 UHezekile wakwamisela umzekelo omhle ngokuwamkela ngentliziyo yakhe amazwi kaThixo. Ekuthunyweni kwakhe, wayitya incwadi esongwayo awayeyinikwa nguThixo. UHezekile wathi: “Yaba nencasa emlonyeni wam, njengobusi.” Nakubeni incwadi leyo isongwayo yayizaliswe ‘zizimbonono, nezikhwino, nezimema,’ yayinencasa kuHezekile kuba wayeluqonda uzuko lokumela uYehova. Yayingamava amyoli kulo mprofeti ukuphumeza isabelo awayesinikwe nguThixo. UThixo wamxelela oku: “Nyana womntu, onke amazwi am endiya kuwathetha kuwe, wamkelele entliziyweni yakho, uweve ngeendlebe zakho.” (Hezekile 2:9–3:3, 10) Loo mibono yamenza uHezekile ukuba akuphaphele kakuhle oko uThixo wayemvumele ukuba abe nenxaxheba kuko yaye yomeleza ulwalamano lwakhe noYehova.
12. Yintoni eyenziwa nguHezekile kwiminyaka engaphezu kwamashumi amabini yokukhonza kwakhe njengomprofeti?
12 UHezekile wanikwa imibono nezigidimi ngeenjongo ezahlukahlukeneyo nokulungiselela abaphulaphuli abahlukahlukeneyo. Wayemele aphulaphule ngenyameko aze athethe kwaye enze njengoko wayeyalelwe. Watyhilelwa ngokwamabakala inkcazelo neenkqubo ezintsha ezazigubungela iminyaka enokuba ngama-22 yokukhonza kwakhe njengomprofeti. Maxa wambi uHezekile wayethetha isigidimi esinamazwi akhethekileyo. Ngamanye amaxesha, wayebhenela ekuzilinganiseni ezo ziganeko, njengokulala phambi kwesitena esifuzisela iYerusalem. (Hezekile 4:1-8) Umzekelo wakhe kwimicimbi yobuqu, njengokusabela kwakhe kwimeko yokufa komfazi wakhe, nako oko kwadlulisela isigidimi esithile. (Hezekile 24:15-19) Wayemele ahlale enenkcazelo esexesheni, ngalo lonke ixesha adlulisele isigidimi esichanileyo aze athabathe inyathelo elichanileyo ngexesha elililo. UHezekile wayenolwalamano olusenyongweni, lokusebenza ngokuqhubekayo noYehova.
13. Sinokulwakha njani ulwalamano olusondeleyo noYehova?
13 Ngokufanayo, ukuze sakhe size silondoloze ulwalamano oluhle nolusondeleyo noYehova njengabantu abasebenza naye, simele silamkelele entliziyweni iLizwi likaThixo. (1 Korinte 3:9) Ukuhambisana nesantya sentlangano kaThixo ebonakalayo kule nkalo kufuna ukuba sihambisane nejelo lokutya kokomoya njengokuba kulungiselelwa ngexesha elililo. (Mateyu 24:45-47) Iyaqhubeka isanda inkcazelo ‘yentetho enyulu.’ (Zefaniya 3:9) Kungokuzigcina ngenkcazelo esexesheni kuphela esiya kuthi sikwazi ukusabela ngentobelo kulwalathiso olunikelwa nguMkhweli Wenqwelo Yokulwa.
14, 15. Luluphi ucwangciso esifanele silulandele ukuze sihambisane nesantya sentlangano kaThixo?
14 Ukuze sikwazi ukwenza oko, kufuneka sibe nocwangciso oluhle lokuthandaza ngokobuqu, isifundo sobuqu nokuba nenxaxheba kubulungiseleli obungcwele beendaba ezilungileyo. (Roma 15:16) Khumbula umzekelo kaHezekile wokutya incwadi esongwayo eyayiqulethe isigidimi sikaThixo. UHezekile wayitya yonke loo ncwadi isongwayo, kungekhona inxalenye yayo. Akazange ayigunuze ecubungula iindawana ezithandwa nguye. Ngokufanayo, ufundisiso lwethu lobuqu lweBhayibhile neempapasho zamaKristu lumele lulungelelaniswe ukuze sihambisane nejelo lokutya kokomoya, yaye sifanele sitye kwanto ephezu kwesithebe sokomoya, kuquka neenyaniso ezinzulu.
15 Ngaba siyawenza umgudu wokuthandazela ukufumana ingqiqo yokutya okuqinileyo? Ukuhambisana nesantya kufuna ukuba ulwazi nenkqubela ekuqondeni izinto kube kokuhambele phambili ukudlulela ngaphaya kweziqalelo, kuba siyafunda: “Kuba bonke abasasezwa amasi abanamava elizwi lobulungisa, kuba beziintsana. Kokwabakhulileyo ke ukudla okuqinileyo, abo bathi, ngenxa yobugcisa, babe nezimvo eziqheliselwe ukucalula okuhle kwanokubi.” (Hebhere 5:13, 14) Ewe, ukwenza inkqubela yokomoya kuyindima ebalulekileyo ekuhambisaneni nesantya sentlangano kaThixo.
Ukungatyhafiswa Kukungabikho Komdla
16, 17. UHezekile waqhubana njani nokungabi namdla kwabantu, ukuhlekwa nokungasabeli kwabo kakuhle?
16 UHezekile wamisela umzekelo omhle ngokuzithoba nokuba angazivumeli ukuba atyhafiswe kukungabikho komdla ebantwini okanye ukuhlekwa ngabo. Ngokufanayo, ngokuhambisana nenkqubela eyenzekayo kwintetho enyulu, sisiwa ngakwicala aya ngakulo uMkhweli wasebukhosini Wenqwelo Yokulwa. Ngaloo ndlela sixhotyiselwa ukuba sisabele kwimiyalelo yakhe, siyomelezwa ukuba singatyhafiswa kukungabikho komdla ebantwini nokusihleka kwabo ngoxa sithetha kubo isigidimi somgwebo kaYehova. NjengakuHezekile, uThixo uye wasilumkisa kwangaphambili ukuba abantu abathile baya kusichasa ngokwenene, ekubeni beneenkani kwaye beqaqadekile. Abanye abayi kuva kuba bengafuni kumphulaphula uYehova. (Hezekile 3:7-9) Sekunjalo abanye baya kuba ngabahanahanisi, njengokuba uHezekile 33:31, 32 esithi: “Beza kuwe njengokuza kwabantu, bahlale phambi kwakho ngokwabantu bam, baweve amazwi akho, bangawenzi; kuba benza okukhanukwa ngumlomo wabo; intliziyo yabo ilandela inzuzo yabo embi. Yabona, kubo unjengovuma ingoma emnandi, ozwi liyolileyo, olungisayo ukubetha uhadi; baweve amazwi akho, bangawenzi noko.”
17 Wawuya kuba yintoni umphumo? Hez 33 Indinyana 33 iyongezelela: “Kothi ke kwakufika oko—nanko kusiza—bazi, ukuba bekukho umprofeti phakathi kwabo.” Loo mazwi atyhila ukuba uHezekile akazange ancame ngenxa yokungabikho komdla ebantwini. Ukungakhathali kwabanye akuzange kumenze ukuba naye angakhathali. Enoba abantu babephulaphula okanye bengaphulaphuli, yena wathobela uThixo waza waphumeza uthumo awayelunikiwe.
18. Yiyiphi imibuzo onokuzibuza yona?
18 Ngoku intlangano kaYehova ebonakalayo igxininisa ukuba kuvakaliswe ukuba bonke abantu boyike uThixo nokuba bamzukise. Ngaba uyazingisa xa ugxekwa ngokukumela ngokuqinileyo ukunikela ubungqina ngoBukumkani, ngokuziphatha kakuhle kwindlela ophila ngayo? Ngaba uma uqinile xa ulixhoba lengcinezelo ngenxa yokungamkeli igazi, ngenxa yokungakhahleli ndwe nangenxa yokungabhiyozeli iiholide zehlabathi?—Mateyu 5:11, 12; 1 Petros 4:4, 5.
19. Mayela nolwalathiso, yintoni esiya kuyenza ukuba sihambisana nesantya senqwelo yokulwa kaYehova yasezulwini?
19 Akulula ukuhamba ngeli khondo, kodwa abo banyamezela kude kuse ekupheleni baya kusindiswa. (Mateyu 24:13) Ngoncedo lukaYehova, asisayi kuvumela abantu behlabathi ukuba basenze sibe njengabo baze ngaloo ndlela basenze sishiyekele ngasemva kwinqwelo yokulwa kaYehova yasezulwini. (Hezekile 2:8; Roma 12:21) Ukuba sihambisana nesantya sale ntlangano yezithunywa zezulu enjengenqwelo yokulwa, asiyi kulibazisa ekwenzeni ngokuvisisana nolwalathiso nemiyalelo efunyanwa ngentlangano kaThixo ebonakalayo. UYehova uyakulungiselela oko sikufunayo ukuze sihlangabezane neentlaselo kukholo lwethu, ukuze sihlale sinamathele kanobom kwiLizwi lobomi, nokuze sigcine amehlo ethu siwatsolise kwizinto eziyinene zokomoya ezisekelwe kuMkhweli Wasebukhosini wenqwelo yokulwa yasezulwini.
Ukushukunyiselwa Ukuhambisana Nesantya Sayo
20. Ziziphi ezinye zezinto ezabhalwa nguHezekile ezifanele zisishukumisele ukuba sihambisane nesantya esifanelekileyo?
20 Imibono kaHezekile ifanele isishukumisele ukuba sihambisane nesantya. Akazange avakalise kuphela nje imigwebo kaThixo kuSirayeli kodwa wakwabhala neziprofeto zokubuyiselwa kwakhe. UHezekile walatha kuLowo wayeya kuba nelungelo elingokwasemthethweni lokulawula kwitrone kaYehova ekufikeni kwexesha elimisiweyo. (Hezekile 21:27) Loo Mkhonzi Wasebukhosini, “uDavide,” wayeya kuhlanganisa abantu bakaThixo aze abaluse. (Hezekile 34:23, 24) Nangona babeza kuhlaselwa nguGogi wakwaMagogi, uThixo wayeza kubahlangula, kwaye iintshaba Zakhe zaziza kunyanzelelwa ukuba ‘zimazi uYehova’ kanye njengokuba zatshatyalaliswayo. (Hezekile 38:8-12; 39:4, 7) Babeza kwandula ke abakhonzi bakaThixo banandiphe ubomi obungunaphakade kwinkqubo yonqulo olunyulu olubandakanya itempile yokomoya. Amanzi obomi aqukuqela ephuma engcweleni ayeza kuba ngumthombo wesondlo aze abe ngaphilisayo, yaye ilizwe elililifa laliza kuba sisabelo sentsikelelo yabo.—Hezekile 40:2; 47:9, 12, 21.
21. Kutheni le nto indima yamaNgqina kaYehova anamhla inkudlwana kunaleyo kaHezekile?
21 Hayi indlela amele ukuba wayechwayite ngayo uHezekile ekubhaleni kwakhe ezo ziprofeto! Kanti, indima yamaNgqina kaYehova anamhla iyenkudlwana. Siphila kwixesha laxa zizalisekiswa ezinye zezo ziprofeto. Enyanisweni, singabona banenxaxheba ecacileyo ekuzalisekiseni iinkalo ezithile zazo. Ngendlela esiphila ngayo, ngaba thina ngokwabantu ngabanye sibonakalisa ukweyiseka kukuba ngoku uYesu uyalawula njengaLowo unelungelo elingokwasemthethweni? Ngaba thina ngokobuqu seyisekile kukuba uYehova kungekudala uza kuzingcwalisa aze abasindisele kwihlabathi elitsha abo bahambisana nesantya sentlangano yakhe? (2 Petros 3:13) Ukweyiseka okunjalo, okuphelekwa yimisebenzi yokholo, kubonisa ukuba ngenene sihambisana nesantya senqwelo yokulwa kaYehova yasezulwini.
Qhubekani Nihamba Ngesantya Esifanelekileyo
22. Yintoni enokwenziwa ukuze kuphetshwe izinto eziphazamisayo khon’ ukuze kulondolozwe umbono wokomoya ocace kakuhle?
22 Ekubeni ‘isandla sethu sisibeke epuluweni,’ asimele sikhangele emva silangazelela nantoni na enikelwa leli hlabathi. (Luka 9:62; 17:32; Tito 2:11-13) Masiluthintele naluphi na utyekelo lokuziqwebela ubutyebi basemhlabeni, yaye masigcine iliso lethu lingenakumbi, litsoliswe kuBukumkani. (Mateyu 6:19-22, 33) Ukwenza lula indlela esiphila ngayo, sisusa naziphi na izinto ezisindayo, kuya kusinceda sihambisane nesantya sentlangano kaYehova. (Hebhere 12:1-3) Izinto eziphazamisayo zinokuwenza luzizi umbono wethu wenqwelo yokulwa yasezulwini noMkhweli wayo. Kodwa ngokuncedwa nguye, sinokuhlala sibona kakuhle, njengokuba kwakunjalo ngoHezekile.
23. Yintoni ekufuneka amaNgqina athembekileyo eyenzele abasebatsha?
23 Inxalenye yembopheleleko yethu njengamaNgqina kaYehova ibandakanya ukunceda abaninzi abasebatsha bahambisane nesantya senqwelo yokulwa kaThixo yasezulwini. Ngowe-1990 kwabakho abaphantse babe li-10 000 000 kwiSikhumbuzo sokufa kukaYesu Kristu. Ngoxa abaninzi baba bantu basenokuba bayaya kwiintlanganiso ezimbalwa zamaKristu, kufuneka bayibone imbaluleka yokwenza inkqubela nentlangano kaYehova ebonakalayo. NjengamaNgqina athembekileyo, sinokubanceda ngomoya esiwubonakalisayo nangokhuthazo esibanika lona.
24. Yintoni esifanele siyenze kula maxesha ovutho-ndaba?
24 Ngoku siphila kumaxesha ovutho-ndaba. Ngamehlo okholo, siyibonile inqwelo yokulwa yasezulwini ihamba phambi kwethu. UMkhweli ozukileyo waloo Nqwelo Yokulwa unike intlangano yakhe ebonakalayo uthumo lokushumayela kwiintlanga khon’ ukuze, xa kufika incopho yazo zonke izinto, zimazi lowo anguye uYehova. (Hezekile 39:7) Eli thuba lihle kangaka lisebenzise ekubeni nesabelo ekuthethelelweni kolongamo lukaThixo nasekungcwalisweni kwegama lakhe elingcwele ngokuhambisana nesantya senqwelo yokulwa kaYehova.
Ubuya Kuphendula Njani?
◻ UHezekile wamisela umzekelo onjani ngokuphathelele uthumo lwakhe?
◻ Kuthetha ukuthini ukuhambisana nesantya sentlangano kaThixo?
◻ UHezekile wawajonga njani amazwi kaYehova?
◻ Sinokwenza njani ngokuvisisana nomzekelo kaHezekile ekuqhubaneni nokungabi namdla kwabantu?
◻ Yintoni efanele ishukumisele abakhonzi bakaYehova ukuba bahambisane nesantya senqwelo yokulwa yasezulwini?
[Imifanekiso ekwiphepha 15]
Yintoni efunekayo ukuze kuhanjiswane nesantya senqwelo yokulwa kaYehova yasezulwini?
[Umfanekiso okwiphepha 16]
UHezekile wawaxabisa amalungelo awayewanikwe nguThixo. Ngaba wena uyawaxabisa?