Imibuzo Evela Kubafundi

◼ Nguwuphi umbhali weBhayibhile “owayeyinjengele,” njengoko kukhankanywe kwincwadi ethi IBhayibhile—Ngaba Ililizwi LikaThixo Okanye Lomntu?a

Loo ncwadi iluncedo ngeLizwi likaThixo ithi kwiphepha 10: “IBhayibhile ikwakhethekile ngenxa yebango elenziwa ngababhali bayo abaninzi. Abantu abahlukahlukeneyo abangama-40, abaquka ookumkani, abelusi, abalobi beentlanzi, amagosa aseburhulumenteni, ababingeleli, ubuncinane injengele enye nogqirha, baba nenxaxheba ekubhaleni iinxalenye ezahlukahlukeneyo zeBhayibhile. Kodwa ngokuphindaphindiweyo, ababhali benza eli bango linye: lokuba babengabhali oko kwakuziingcamango zabo kodwa oko kwakuziingcamango zikaThixo.”

Bambi baye babuza ukuba ngabaphi ababhali beBhayibhile abanxulunyaniswa nezo zigxina okanye imisebenzi. Kule nkalo, nceda uqwalasele oku kulandelayo:

Ookumkani: Baliqela ababhali beBhayibhile ababengookumkani. UDavide noSolomon basenokuthi qatha engqondweni yakho ngokukhawuleza kakhulu. (INdumiso 3:0, umbhalo ongaphezulu; IMizekeliso 1:1; INtshumayeli 1:1) Noko ke, ingoma ekuIsaya 38:10-20 yabhalwa nguHezekiya. (Isa 38 Indinyana 9) Abaphengululi abaninzi bakholelwa ekubeni wakwabhala INdumiso 119, mhlawumbi ngaphambi kokuba ngukumkani. Yaye uHezekiya waba nendima ekuhlanganiseni nasekubhaleni Miz isahluko 25–29 seMizekeliso. (IMizekeliso 25:1) Isahluko sokugqibela seMizekeliso salungiselelwa ‘ngukumkani uLemuweli.’ Abanye bamnxulumanisa noKumkani uHezekiya, nangona abanye becinga ukuba uLemuweli wayenguKumkani uSolomon.—IMizekeliso 31:1.

Abelusi: UDavide nomprofeti uAmosi basebenza njengabelusi. (1 Samuweli 16:11-13; 17:15, 28, 34; Amosi 1:1) UAmosi wabhala incwadi yeBhayibhile ebizwa ngegama lakhe, yaye uDavide wabhala iindumiso eziliqela. INdumiso 23 edumileyo ngokuqinisekileyo ibonakalisa ukuqhelana kukaDavide nokwalusa.

Abalobi beentlanzi: Kubapostile bakaYesu ababengabalobi beentlanzi, uYohane noPetros kamva baphefumlelwa ukubhala iincwadi zeBhayibhile. (Mateyu 4:18-22) Ephantsi kwempefumlelo kaThixo uYohane wabhala ingxelo yeVangeli kunye neencwadi ezintathu nencwadi yeSityhilelo. UPetros wabhala iincwadi ezimbini eziphefumlelweyo.

Amagosa aseburhulumenteni: UDaniyeli noNehemiya babengamagosa aseburhulumenteni orhulumente wasemzini owayenegunya phezu kwabantu bakaThixo. (Nehemiya 1:1, 11; 2:1, 2; Daniyeli 1:19; 2:49; 6:1-3) Iincwadi ezimbini zeBhayibhile zibizwa ngamagama ala madoda.

Ababingeleli: Abaprofeti ababini bakaThixo abasetyenziswa ukubhala iincwadi zeBhayibhile babengababingeleli. YayinguYeremiya noHezekile. (Yeremiya 1:1; Hezekile 1:1-3) Ukongezelela, uEzra wayengumbingeleli wodidi luka-Aron ‘owayengumbhali oyinkunkqele emyalelweni kaMoses.’ “Intliziyo yakhe wayeyibhekisele ekuwufuneni umyalelo kaYehova, awenze, afundise ummiselo nesiko kwaSirayeli.”—Ezra 7:1-6, 10, 11.

Injengele: Indima uYoshuwa awaba nayo ekukhokeleni umkhosi njengoko amaSirayeli ayefudukela kwiLizwe Ledinga aza alwa nabantu abaninzi abaziintshaba yamenza wakufanelekela ukuba yinjengele. (Yoshuwa 1:1-3; 11:5, 6) Waba nelungelo lokubhala incwadi kaYoshuwa. Kwakhona, bambi abafundi beBhayibhile basenokumjonga uDavide njengomntu owasebenza njengenjengele ngaphambi kokuba abe ngukumkani.—1 Samuweli 19:8; 23:1-5.

Ugqirha: Okokugqibela, eyabaseKolose 4:14 ikhankanya “uLuka, igqirha [ugqirha, NW] eliyintanda.” ULuka wabhala iVangeli ebizwa ngegama lakhe, yaye ngokucacileyo neyeZenzo Zabapostile.

[Umbhalo osemazantsi]