UThixo Wayiphefumlela Njani IBhayibhile?

UNXIBELELWANO lubangela umdla namhlanje ngaphezu kwalo naliphi na elinye ixesha embalini. Iimfonomfono, oomatshini befax, iikhompyutha—kwiminyaka egqithileyo ngubani owayenokucinga ngexesha apho kwakunokudluliselwa imiyalezo phantse kuwo wonke umhlaba ngoko nangoko?

Kodwa olona hlobo lonxibelelwano lubangela umdla lolo lungenakufezwa ngumntu—ukuphefumlelwa nguThixo. UYehova waphefumlela ababhali abangabantu abanokuba ngama-40 ukuze bavelise iLizwi lakhe elibhaliweyo, iBhayibhile eNgcwele. Njengokuba abantu beneendlela zokunxibelelana eziliqela, ngoko noYehova wasebenzisa iindlela ezahlukahlukeneyo zonxibelelwano ukuze aphefumlele iZibhalo.

Ukuthetha Ngomlomo. UThixo wadlulisela izigidimi ezithile ezathi kamva zabhalwa kwingxelo yeBhayibhile.a Ngokomzekelo, khawucinge ngemiyalelo eyenza uMthetho womnqophiso. UYehova wathi kuMoses, “Wabhale la mazwi; kuba ndenze ngokuthetha kwala mazwi umnqophiso nawe noSirayeli.” (Eksodus 34:27) Loo “mazwi,” “ayedluliselwe ziingelosi,” akhutshelwa nguMoses yaye ngoku anokufumaneka kwiincwadi zeBhayibhile iEksodus, iLevitikus, iNumeri neDuteronomi.—IZenzo 7:53.

Abanye abaprofeti abaninzi, kuquka uIsaya, uYeremiya, uHezekile, uAmosi, uNahum noMika, bafumana izigidimi ezithile ezazivela kuThixo ethumele iingelosi. Maxa wambi la madoda ayeqala izigidimi zawo ngokuthi: “Utsho uYehova ukuthi.” (Isaya 37:6; Yeremiya 2:2; Hezekile 11:5; Amosi 1:3; Mika 2:3; Nahum 1:12) Emva koko ayekubhala phantsi oko uThixo akuthethileyo.

Imibono, Amaphupha Nozungubalo. Umbono yimeko, isihlandlo, okanye umyalezo ofika engqondweni yomntu ehleli, ngokuqhelekileyo ngenxa yesizathu esikhethekileyo. Ngokomzekelo, uPetros, uYakobi noYohane, “xa bavuka ngokupheleleyo,” babona umbono wokwenziwa kumila kumbi kukaYesu. (Luka 9:28-36; 2 Petros 1:16-21) Kwezinye iimeko isigidimi sasidluliselwa ngephupha, okanye embonweni wasebusuku, size sigxininiswe kulowo ungekho zingqondweni ngoxa elele. Ngaloo ndlela uDaniyeli ubhala ‘ngemibono yentloko yakhe esemandlalweni wakhe’—okanye, njengokuba umguquleli uRonald A. Knox esitsho, ‘njengokuba ndandilele ndibukele ephupheni lam.’—Daniyeli 4:10.

Umntu uYehova awayemenza abe kuzungubalo ngokucacileyo amilisele ingqondo kokuthile esezingcingeni ezinzulu, nangona engalalanga ngokupheleleyo. (Thelekisa IZenzo 10:9-16.) EBhayibhileni igama lesiGrike eliguqulelwe ngokuthi “uzungubalo” (ekʹsta·sis) lithetha ‘ukungabikho zingqondweni okanye ukudideka.’ Libonisa ukususa ingqondo kwimo efanelekileyo. Ngaloo ndlela, umntu okuzungubalo akayi kukuqonda oko kumngqongileyo ngoxa enikele ingqalelo enzulu kumbono othile. Kusenokwenzeka ukuba umpostile uPawulos wayekuzungubalo olunjalo xa “wathatyathelwa eparadesi waza weva amazwi angathethekiyo ekungekho mthethweni ngomntu ukuwathetha.”—2 Korinte 12:2-4.

Ngokwahlukileyo kwabo babhala izigidimi uThixo awayebaxelele ngomlomo wakhe, ababhali beBhayibhile ababona imibono okanye baphupha amaphupha okanye abakuzungubalo ngokufuthi babenenkululeko yokuchaza ngawabo amazwi oko bakubonileyo. UHabhakuki waxelelwa oku: “Bhala umbono, uwukrole kakuhle emacwecweni, ukuze abaleke owulesayo.”—Habhakuki 2:2.

Ngaba oku kuthetha ukuba la macandelo eBhayibhile ngandl’ ithile aphefumlelwe kancinane kunalowo wayewaxele ngomlomo wakhe? Akunjalo. Ngomoya wakhe, uYehova wabethelela isigidimi sakhe engqondweni yombhali ngamnye, ukuze kudluliselwe iingcinga zikaThixo hayi ezomntu. Ngoxa uYehova wayemvumela umbhali akhethe amazwi afanelekileyo, wayeyikhokela ingqondo nentliziyo yombhali ukuze kungabikho nkcazelo ibalulekileyo ilahlekayo ukuze ekugqibeleni loo mazwi ajongwe njengabhalwe nguThixo.—1 Tesalonika 2:13.

Isityhilelo SobuThixo. IBhayibhile iqulethe isiprofeto—imbali etyhilwe nebhalwe kusengaphambili—nto leyo engaphaya kwamandla omntu. Omnye umzekelo kukuqalisa nokuwa ‘kokumkani waseGrisi,’ uAlesandire Omkhulu, okwaxelwa kusengaphambili kangangeminyaka enokuba ngama-200! (Daniyeli 8:1-8, 20-22) Kwakhona iBhayibhile ityhila iziganeko ezingazanga zibonwe ngabantu. Omnye umzekelo kukudalwa kwamazulu nomhlaba. (Genesis 1:1-27; 2:7, 8) Kwakhona kukho iincoko ezaqhubeka ezulwini, njengezo zichazwe kwincwadi kaYobhi.—Yobhi 1:6-12; 2:1-6.

Ukuba azizange zityhilwe nguThixo ngokwakhe kumbhali, nguThixo owazazisa ezo ziganeko komnye umntu ukuze ezi zibe yinxalenye yembali ethethiweyo okanye ebhaliweyo, ukususela kwisizukulwana esithile ukusa kwesinye de zibe yinxalenye yengxelo yeBhayibhile. (Bona ibhokisi ekwiphepha 7.) Enoba kwenzeka ntoni na, sinokuqiniseka ukuba uYehova wayenguMthombo wayo yonke loo nkcazelo, yaye wabakhokela ababhali ukuze iingxelo zabo zingaxutywa nobuxoki, inkcazelo ebaxiweyo, okanye intsomi. UPetros wabhala wathi ngokuphathelele isiprofeto: “Abantu bathetha ngokuphuma kuThixo njengoko babeqhutywa ngumoya oyingcwele.”b—2 Petros 1:21.

Kufuneka Umgudu Wokwenene

Nangona ababhali beBhayibhile “babeqhutywa ngumoya oyingcwele,” sekunjalo kwakufuneka bacingisise nzulu. Ngokomzekelo, uSolomon ‘walinganisela, wagocagoca, wayila imizekeliso emininzi. [Yena] wafuna enga angafumana amazwi anandiphekayo, kuthi nokubhalwayo kulunge, ibe ngamazwi enyaniso.’—INtshumayeli 12:9, 10.

Abanye ababhali beBhayibhile kwafuneka baphande ngokunzulu ukuze bakwazi ukubhala umbandela wabo. Ngokomzekelo, uLuka wabhala oku ngokuphathelele ingxelo yakhe yeVangeli: “Ndiye ndazilanda zonke izinto ukususela kwasekuqaleni ngokuchanileyo, ndikubhalele zona ngolungelelwano olucwangcisiweyo.” Kakade ke, umoya kaThixo wayisikelela imigudu kaLuka, ngokungathandabuzekiyo umkhokelela ekubeni afumane amaxwebhu ayinyaniso ngokwembali aze adlan’ iindlebe namangqina athembekileyo, njengabafundi ababekho yaye mhlawumbi nonina kaYesu, uMariya. Ngaloo ndlela umoya kaThixo wawuza kumkhokela uLuka ukuba abhale ingxelo echanileyo.—Luka 1:1-4.

Ngokwahlukileyo kwiVangeli kaLuka, uYohane wayelingqina lokuzibonela laloo ngxelo, eyabhalwa kwiminyaka engama-65 emva kokufa kukaYesu. Ngokungathandabuzekiyo umoya kaYehova wayihlaziya inkumbulo kaYohane ukuze ingafiphali ngenxa yokuhamba kwexesha. Oku kuvisisana noko uYesu wakuthembisa abafundi bakhe esithi: “Umncedi umoya oyingcwele, lowo uBawo aya kumthumela egameni lam, lowo uya kunifundisa zonke izinto aze abuyisele ezingqondweni zenu zonke izinto endinixelele zona.”—Yohane 14:26.

Kwezinye iimeko ababhali beBhayibhile baquka iingxelo abaziqokelela kumaxwebhu amangqina okuzibonela ababhali bengxelo yamandulo, awayengaphefumlelwanga onke. Ubukhulu becala uYeremiya wadibanisa ngale ndlela eyokuQala neyesiBini yooKumkani. (2 Kumkani 1:18) UEzra wabhekisela kwimithombo engaphefumlelwanga ubuncinane eli-14 ukuhlanganisa umbandela okweyokuQala neyesiBini yeziKronike, kuquka ‘ingxelo yemicimbi yemihla yokumkani uDavide’ ‘kwanencwadi yookumkani bakwaYuda nabakwaSirayeli.’ (1 Kronike 27:24; 2 Kronike 16:11) UMoses wade wacaphula “encwadini yeemfazwe zikaYehova”—ngokucacileyo eyingxelo ethembekileyo yeemfazwe zabantu bakaThixo.—Numeri 21:14, 15.

Kwiimeko ezinjalo umoya oyingcwele wawubandakanyekile, ushukumisela ababhali beBhayibhile ukuba bakhethe kuphela umbandela onokuthenjwa, owaba yinxalenye yengxelo yeBhayibhile ephefumlelweyo.

Isiluleko Esisebenzayo—Sivela Kubani?

IBhayibhile iqulethe isiluleko esisebenzisekayo esisekelwe kwiimbono ezibukhali zabantu abathile. Ngokomzekelo, uSolomon wabhala: “Akukho nto ilungileyo ebantwini kunokuba badle, basele, bawubonise umphefumlo wabo okulungileyo emigudwini yabo. Kwanaloo nto ndiyibonile, ukuba ivela esandleni sikaThixo.” (INtshumayeli 2:24) UPawulos wathi icebiso ngokuphathelele umtshato ‘lalingokoluvo [lwakhe],’ nangona wongezelela esithi: “Ngokuqinisekileyo ndicinga ukuba nam ndinomoya kaThixo.” (1 Korinte 7:25, 39, 40) Ngokuqinisekileyo uPawulos wayenawo umoya kaThixo, njengoko kuphawulwe ngumpostile uPetros, oko uPawulos wakubhalayo ‘kwakungokobulumko awabunikwayo.’ (2 Petros 3:15, 16) Ngaloo ndlela, ekhokelwa ngumoya kaThixo, wayenikela uluvo lwakhe.

Xa ababhali beBhayibhile babonisa iimbono zabo zobuqu ezinjalo, bakwenza oko ngokuvisisana nolwazi ababenalo lokufunda nokusebenzisa izibhalo ababenazo. Sinokuqiniseka ukuba imibhalo yabo yayivisisana nendlela uThixo acinga ngayo. Oko bakubhalayo kwaba yinxalenye yeLizwi likaThixo.

Phofu ke, iBhayibhile ineengxelo zabathile ababeneengcinga ezinxaxhileyo. (Thelekisa uYobhi 15:15 nesama-42:7.) Kwakhona iquka iingcamango ezimbalwa ezithetha ngeemvakalelo ezibuhlungu zabakhonzi bakaThixo, nangona ezo zingazange zibonise ngokupheleleyo indlela izinto ezingayo.c Ngoxa wayesenza iingxelo ezinjalo zobuqu, umbhali wayesakhokelwa ngumoya kaThixo ukuze anikele ingxelo echanileyo, eyayenzelwe ukuba kuboniswe kuze kubhencwe ingqiqo engachananga. Ukongezelela, kwimeko nganye umongo wenza kucace kuye nawuphi umfundi oqiqayo enoba indlela acinga ngayo umbhali isengqiqweni kusini na.

Ngokufutshane, sinokuba nentembelo yokuba yonke iBhayibhile isisigidimi sikaThixo. Eneneni, uYehova waqinisekisa ukuba yonke into eyiquletheyo ivisisana nenjongo yakhe waza wanikela umyalelo osisiseko kwabo banomnqweno wokumkhonza.—Roma 15:4.

Ababhali Abangabantu—Kwakutheni?

Isizathu sokuba uYehova asebenzise abantu ukubhala iBhayibhile sibonisa indlela anobulumko ngayo. Khawucinge ngoku: Ukuba uThixo wayewunikele kwiingelosi lo mbandela, ngaba iBhayibhile ibiya kubangela umdla ngendlela eyiyo? Liyinyaniso elokuba, besiya kuvuyiswa kukufunda ngeempawu zikaThixo neenkqubano zakhe ngokwembono yeengelosi. Kodwa ukuba ibingathethi ngabantu, bekunokuba nzima ukuba sisiqonde isigidimi seBhayibhile.

Ngokomzekelo: IBhayibhile ibiya kusichazela nje ukuba uKumkani uDavide wenza umbulo wabulala yaye emva koko waguquka. Kodwa hayi indlela ekukuhle ngayo ukufumana amazwi kaDavide ngokwakhe, njengoko ebonisa intlungu awayenayo ngokuphuma kwintliziyo eyayidandathekiswe zizenzo zakhe waza wacela ukuxolelwa nguYehova! Wabhala: ‘Isono sam siphambi kwam ngamaxesha onke. Intliziyo eyaphukileyo, etyumkileyo, Thixo, akuyi kuyidela.’ (INdumiso 51:3, 17) Ngenxa yoko, iBhayibhile inomtsalane, inezinto ezahlukahlukeneyo, ibangela umdla kuba ibhalwe ngabantu.

Ewe, uYehova wakhetha eyona ndlela ilungileyo yokusinika iLizwi lakhe. Nangona kwasetyenziswa abantu abanobuthathaka neempazamo, babeqhutywa ngumoya oyingcwele ukuze kungabikho mpazamo koko babekubhala. Ngaloo ndlela, iBhayibhile ixabiseke ngokwenene. Icebiso layo lomelele, yaye iziprofeto zayo ngokuphathelele ikamva leParadesi emhlabeni zithembekile.—INdumiso 119:105; 2 Petros 3:13.

Kutheni ungaziqhelisi ukufunda inxalenye yeLizwi likaThixo yonke imihla? UPetros wabhala: “Yakhani ulangazelelo lobisi olungangxengwanga lwelizwi, ukuze ngalo nikhulele elusindisweni.” (1 Petros 2:2) Ekubeni iphefumlelwe nguThixo, uya kufumanisa ukuba sonke iSibhalo “siyingenelo ekufundiseni, ekohlwayeni, ekubekeni izinto ngokuthe tye, ekuqeqesheleni ebulungiseni, ukuze umntu kaThixo afaneleke ngokuzeleyo, ewuxhobele ngokupheleleyo wonke umsebenzi olungileyo.”—2 Timoti 3:16, 17.

[Imibhalo esemazantsi]

[Ibhokisi ekwiphepha 7]

UMoses Wayifumana Phi Inkcazelo Awayibhalayo?

UMOSES wabhala incwadi yeBhayibhile yeGenesis, kodwa yonke into awayibhalayo yenzeka kudala ngaphambi kokuzalwa kwakhe. Ngoko, wayifumana phi loo nkcazelo? Kusenokwenzeka ukuba wayityhilelwa ngokuthe ngqo nguThixo, okanye ulwazi ngeziganeko ezithile lwalunokudlula ngokuzenzekelayo ukususela kwisizukulwana ukusa kwesilandelayo. Ekubeni abantu babephila ixesha elide mandulo, uninzi lwezinto ezazibhalwe nguMoses kwincwadi yeGenesis zimele ukuba zazisusela kuAdam zaya kufikelela kuMoses ngenxa yabantu abahlanu nje kuphela—uMethusela, uShem, uIsake, uLevi noAmram.

Ukongezelela, kusenokuba uMoses wazijonga nezinye iingxelo ezibhaliweyo. Kulo mbandela, kuyaphawuleka ukuba uMoses ngokufuthi wayesebenzisa ibinzana elithi “le yimbali ka,” ngaphambi kokuba achaze umntu ekuza kuthethwa ngaye. (Genesis 6:9; 10:1; 11:10, 27; 25:12, 19; 36:1, 9; 37:2; thelekisa iNW.) Abanye abaphengululi bathi igama lesiHebhere eliguqulelwe ngokuthi “imbali,” toh·le·dhohthʹ, libhekisela kwimbali ebhaliweyo leyo uMoses wayisebenzisa ebhala ngokusuka kuyo. Eneneni, oku akunakuqinisekiswa.

Kusenokwenzeka ukuba le nkcazelo iqulethwe yincwadi yeGenesis yafunyanwa ngazo zonke ezi ndlela zintathu zingasentla—enye ngesityhilelo esithile, enye ngokudluliselwa ngomlomo, yaye enye ngengxelo ebhaliweyo. Ingongoma ebalulekileyo yeyokuba umoya kaYehova waphefumlela uMoses. Ngenxa yoko, oko wakubhalayo kugqalwa njengelizwi likaThixo.

[Umfanekiso okwiphepha 4]

Ngeendlela ezahlukahlukeneyo, uThixo waphefumlela abantu ukuba babhale iBhayibhile