‘Imini YeNkosi’
“NDAYE ndikuMoya ngemini eyeyeNkosi.” (ISityhilelo 1:10) Watsho njalo umpostile uYohane osele ekhulile, oboniswe ngasentla, kwisahluko sokuqala sencwadi yeBhayibhile yeSityhilelo. Amazwi akhe asinceda siqonde ixesha lenzaliseko yemibono emangalisayo aqhubeka eyichaza.
Noko ke, asingabo bonke abavumelana noku kuguqulelwa kweSityhilelo 1:10. Ngokomzekelo, umguquleli weBhayibhile ongumJamani uJörg Zink uyiguqulela ngolu hlobo: “KwakungeCawa xa umoya kaThixo wathi wandithabatha.” Noko ke, inkoliso yeenguqulelo zeBhayibhile ziguqulela ibinzana lesiGrike elithi teiʹ ky·ri·a·keiʹ he·meʹrai ngokuthi “imini yeNkosi.” Kodwa kumbhalo osemazantsi abaninzi bathi libhekisela kusuku lwangeCawa. Ngaba oku kuchanile?
Incwadi yeembekiselo yamaKatolika engesiJamani, ethi Herders Bibelkommentar, ichaza indlela eqiqwa ngayo le ngcingane xa isithi: “Apha [kwiSityhilelo 1:10] kubhekiselwa kungekhona kwiMini Yomgwebo Wokugqibela, leyo ngokufanayo yaziwa ‘njengeMini yeNkosi’, kodwa kusuku olukhethekileyo lweveki. AmaKristu okuqala aqalisa ukubhiyozela usuku lokuqala lweveki njengosuku lweenkonzo zawo eziyintloko zebandla ukususela phakathi kwinkulungwane yokuqala. (IZe. 20:7; 1 Kor. 16:2)” Noko ke, izibhalo ezibini ezicatshulwe yiloo ncwadi yeembekiselo azingqini nangayiphi na indlela ukuba amaKristu enkulungwane yokuqala alujonga usuku lokuqala lweveki “njengosuku lweenkonzo zawo eziyintloko zebandla.”
Isibhalo sokuqala, IZenzo 20:7, sinikela nje ingxelo yokuba uPawulos, amaqabane akhe ahambahambayo namaKristu aseTrowa bahlanganisana kunye ngosuku lokuqala lweveki ukuze bafumane isidlo. Ekubeni uPawulos wayeza kuhamba ngosuku olulandelayo yaye wayengazukubabona kwakhona kangangexesha elithile, walisebenzisa kakuhle elo thuba ukuze athethe nabo ngokuzeleyo.
Isibhalo sesibini, eyoku-1 kwabaseKorinte 16:2, sakhuthaza amaKristu aseKorinte ukuba abekele ecaleni imali “ngolokuqala usuku, iiveki ngeeveki” ukuze abe nento anokuyinikela kwabo basweleyo kwelakwaYuda. Umphengululi uAdolf Deissmann ubonisa ukuba olu suku isenokuba yayilusuku lokwamkela. Nokuba imeko iyintoni na, icebiso likaPawulos lalisengqiqweni, ekubeni imali yayinokuphela ebudeni beveki.
Akukho ndawo eBhayibhileni ethi amaKristu ngexesha labapostile alujonga usuku lokuqala lweveki, ngoku olubizwa ngokuba yiCawa, njengohlobo lwesabatha yamaKristu, usuku olubekwe bucala ukwenzela nje ukuhlanganisana kwabo rhoqo ngezonqulo. Kuphela kwaba semva kokufa kwabapostile ekwathi iCawa yajongwa ngale ndlela yaza yabizwa ngokuba ‘yimini yeNkosi.’ Le yayiyinxalenye yowexuko olwaxelwa kwangaphambili nguYesu nangabapostile.—Mateyu 13:36-43; IZenzo 20:29, 30; 1 Yohane 2:18.
Ngoko, iyintoni ‘imini yeNkosi’? Umongo weSityhilelo 1:10 walatha kuYesu njengeNkosi imini eyiyeyayo. ILizwi likaThixo liwanxulumanisa amabinzana anjengelithi ‘imini yeNkosi yethu uYesu Kristu’ nexesha lokugwetywa koluntu nokubuyiselwa kweParadisi.—1 Korinte 1:8; 15:24-26; Filipi 1:6, 10; 2:16.
Ngenxa yoko, uHans Bruns, kwinguqulelo yakhe enamagqabaza abalaseleyo ethi, Das Neue Testament (ITestamente Entsha), uchanile xa esithi: “Abanye bathi [uYohane] apha uthetha ngeCawa, kodwa kunokwenzeka ngakumbi ukuba ubhekisela kwiMini yokomfuziselo yeNkosi, enyanisweni leyo yonke inkcazelo yakhe elandelayo ebhekisela kuyo.” UW. E. Vine uthi: “‘IMini yeNkosi’ . . . yiMini yomgwebo Wayo obonakalisiweyo wehlabathi.” ILexikon zur Bibel (Isichazi-magama SeBhayibhile) kaFritz Rienecker ithi “imini yeNkosi” ngokucacileyo ibhekisela “kwimini yomgwebo.”
Ukuliqonda ngokuchanileyo ibinzana elithi “imini yeNkosi” kusinceda siyiqonde yonke incwadi yeSityhilelo. Ngaphezu koko, ubungqina bubonisa ukuba loo mini sele iqalile. Ngoko, hayi indlela ekubaluleke ngayo ukuba ‘siweve amazwi esi siprofeto seSityhilelo size sizigcine izinto ezibhaliweyo kuso’!—ISityhilelo 1:3, 19.
[Umfanekiso okwiphepha 27]
Inkcazelo ecacileyo nesexesheni yendinyana nganye kwincwadi yeSityhilelo inikelwe kwincwadi ethi “ISityhilelo—Incopho Yaso Ezukileyo Isondele!” Olu ncedo lokufundisisa iBhayibhile lunomtsalane lufumaneka ngeelwimi ezingama-33