Iya Kuthetha Ntoni Kuwe Imini YeNkosi?
“Hamba usoyisa phakathi kweentshaba zakho.”—INDUMISO 110:2, “NW.”
1-3. (a) Kutheni le nto ukuqalisa kwemini yeNkosi kuye kwalixesha longquzulwano, ibe ziziphi izinto aye uYesu waphumelela kuzo? (b) UYesu uya ‘kuluphelelisa njani uloyiso lwakhe’?
EMVA phayaa ngowe-1914, uYesu wamiselwa njengoKumkani woBukumkani bukaThixo, ibe imini yeNkosi yaqalisa. Zisuka nje, loo Kumkani mtsha wajongana nenkcaso yogonyamelo eyayivela kuSathana uMtyholi nakubameli bakhe abalapha emhlabeni. (INdumiso 2:1-6) Ngoko le minyaka yokuqala yemini yeNkosi iye yalixesha longquzulwano athe uYesu kuyo wahamba ‘esoyisa phakathi kweentshaba zakhe.’—INdumiso 110:2.
2 Iindlela athe woyisa ngazo lo Kumkani mtsha ziye zazezichukumisayo. Emva kowe-1914, uSathana wazama ‘ukuqwenga’ obo Bukumkani babusandul’ ukumiselwa kodwa, kunoko, wakhutshelwa phandle emazulwini ngokuhlazisayo. (ISityhilelo 12:1-12) Wandula ke ‘walwa’ nabo baseleyo abangabathanjiswa, kodwa akazange akwazi ukukuthintela ‘ukuma’ kwabo ngowe-1919 okanye ukwamkela kwabo ‘incwadana esongwayo’ eyayivela esandleni sikaYesu Kristu. (ISityhilelo 10:8-11; 11:11, 12; 12:17) Ngokufanayo akazange abe namandla okuthintela ukuhlanganiswa kwabokugqibela be-144 000 nokuhlanganiswa kwesihlwele esikhulu (esiphuma kuzo zonke izizwe), ‘esikhonza imini nobusuku etempileni kaYehova.’—ISityhilelo 7:1-3, 9-15.
3 Eneneni, ukususela ngowe-1914 uYesu uye ‘wahamba esoyisa.’ Sekunjalo, kusasele okuninzi okumele kwenziwe. UYesu kusafuneka “aphelelise uloyiso lwakhe.” Kusafuneka athabathe inyathelo lokushenxisa onke amabango enkqubo yezinto yehlabathi likaSathana. (ISityhilelo 6:1, 2, NW; ISi 19:11-21) Eli nyathelo libalulekileyo liya kuthetha ntoni kuthi ngokwabantu ngabanye?
Ukutyhilwa Ekuhleni Kobuze BeBhabhiloni Enkulu
4. Luchazwa njani unqulo lobuxoki kwiSityhilelo?
4 Ukutshatyalaliswa kwehlabathi likaSathana kuqalisa ngokupheliswa konqulo lobuxoki. ISityhilelo sichaza bonke ubukhosi behlabathi bonqulo lobuxoki—kuquka iNgqobhoko—njengehenyukazi, iBhabhiloni Enkulu, elineentlobano ezithile nookumkani bomhlaba nelinxilisa uluntu ngobuhenyu balo. Nalo linxilile—ngendlela enemvukelo—kukusela igazi, igazi labakhonzi bakaThixo. (ISityhilelo 17:1-6) Kwakhona ISityhilelo sichaza isiphelo seli henyukazi lidala nelilisikizi, ibe sinokuyiqonda kakuhle into ekuya kuthetha yona oku ukuba siqwalasela oko kwenzeka kwelinye ihenyukazi lonqulo elalikho emva phayaa kwinkulungwane yesixhenxe ngaphambi kweXesha lethu Eliqhelekileyo.
5, 6. Kwakutheni ukuze iYerusalem engathembekanga ibizwe ngokuba lihenyukazi, ibe oku kwayizisela wuphi umgwebo owawuvela kuYehova?
5 Elo henyukazi lalisisixeko saseYerusalem. Yayifanele ibe sisazulu sonqulo lukaYehova emhlabeni, kodwa uThixo wathi kuyo: “Ngegazi lakho olithululeyo uzeke ityala.” (Hezekile 22:4) Kwakhona yayifanele ibe nyulu ngokomoya, kodwa yazenza ihenyukazi ngokumanyana neentlanga. UYehova wathi kuyo, “Hayi indlela endiphuphuma ngayo umsindo ngenxa yakho, ukuba wenze zonke ezo zinto, imisebenzi yenkazana ehenyuzayo, esileyo.”—Hezekile 16:30, NW; Hez 23:1-21; Yakobi 4:4.
6 Ngoko, qwalasela umgwebo kaYehova kweli henyukazi: “Ngako oko, yabona, ndiya kuzithabatha zonke izithandane zakho owakholisana nazo, nabo bonke owabathandayo, . . . bakuhlube iingubo zakho bazithabathe iimpahla zakho zokuhomba, bakushiye uze kanye. Bazitshise izindlu zakho ngomlilo.” (Hezekile 16:37, 39, 41; 23:25-30) Imbali inengxelo yoko kwenzekayo. AmaBhabhiloni afika ngowama-607 B.C.E. aze ayihluba yaze iYerusalem. Abantu bayo nobutyebi bayo bathatyathelwa eBhabhiloni. Eso sixeko satshatyalaliswa, itempile yatshiswa, laza elo lizwe lashiywa liphanzisiwe.—2 Kronike 36:17-21.
7. Siya kuba yintoni isiphelo seBhabhiloni Enkulu?
7 Okufanayo kuya kwenzeka kwiBhabhiloni Enkulu. ISityhilelo siyalumkisa: “Ngabo [“ookumkani” banamhla okanye abalawuli ethe iBhabhiloni Enkulu yahenyuza ngokomoya nabo] baya kulithiya ihenyukazi, baliphanzise, balihlube, bayidle inyama yalo, balitshise ngomlilo.” (ISityhilelo 17:2, 16) Ngokusuka kumzekelo weYerusalem yamandulo, siyayazi into ekuya kuthetha yona oku. Unqulo lobuxoki luya kutshatyalaliswa ngoorhulumente beentlanga ‘ababethandana’ nalo ngaphambili. Ubutyebi balo buya kuthatyathwa, ibe lona luya kutshiswa, lutshatyalaliswe ngokupheleleyo. Eso sisiphelo esifanelekileyo kwintlangano elisikizi!
Amazulu Enziwa Mnyama
8. Imbandezelo enkulu iya kuba lixesha elinjani kuluntu?
8 Ngokutshatyalaliswa kweBhabhiloni Enkulu, siya kuba singene ‘kwimbandezelo enkulu’ awaprofeta ngayo uYesu. (Mateyu 24:21; ISityhilelo 7:14) Sithetha ngelo xesha, ISityhilelo sithi: “Kubakho unyikimo lomhlaba olukhulu, lathi ilanga laba mnyama, njengengubo erhwexayo yoboya; yathi inyanga yaba njengegazi; zathi iinkwenkwezi zezulu zawela emhlabeni.” (ISityhilelo 6:12, 13) Le nyikima inkulu yomhlaba ‘kukunyikima okukhulu emhlabeni wakwaSirayeli’ awaprofeta ngako uHezekile. (Hezekile 38:18, 19; Yoweli 3:14-16) Yintshabalalo yokugqibela yale nkqubo ingendawo yezinto. Ngaba kuya kubakho nantoni na eya kwenzeka elangeni, enyangeni nasezinkwenkwezini zokoqobo ngelo xesha?
9, 10. UHezekile waprofeta ntoni ngemeko yaseYiputa, ibe oku kwazaliseka njani?
9 UHezekile, elumkisa ngokuwa okuzayo kwelizwe elikhulu elikumzantsi nelingummelwane wakwaSirayeli, iYiputa, wathi: “[Faro] ndiya kulisibekelisa izulu ekukucimeni kwam, ndizambathise iinkwenkwezi zalo ngezimnyama zokuzila. Ndiya kulisibekela ilanga ngamafu, nenyanga ingakhanyisi ngokukhanya kwayo. Zonke izikhanyiso ezikhanyisayo ezulwini ndiya kuzambathisa ngezimnyama zokuzila ngenxa yakho, ndenze ubumnyama phezu kwelizwe lakho; itsho iNkosi uYehova.”—Hezekile 32:7, 8.
10 Xa uFaro nemikhosi yakhe boyiswayo, amazulu okoqobo akazange abe mnyama. Kodwa ikamva leYiputa laba mfiliba kakhulu. Kunjengokuba umphengululi weBhayibhile uC. F. Keil ephawula oku, “ubumnyama obalandela [ukoyiswa kukaFaro] yimbonakaliso yokomfuziselo yeemeko ezinganiki themba ngokupheleleyo.” Ekubeni kwakupheliswe ngonaphakade ukuba ibe ligunya lehlabathi elizimeleyo, iYiputa yalawulwa lelinye igunya lehlabathi emva kwelinye! Namhlanje, ummandla omkhulu wegunya lehlabathi lamandulo looFaro lilawulwa luhlanga lwama-Arabhu.
11. (a) Yintoni efuziselwa kwangaphambili koko kwenzeka eYiputa? (b) Ikamva liya kuba lelimfiliba ngokupheleleyo njani kwihlabathi likaSathana ngethuba lembandezelo enkulu?
11 Kodwa okaKeil wabona intsingiselo ebhekele phaya kwisiprofeto sikaHezekile. Uyabhala: “Ukubhukuqwa kweli gunya lehlabathi [iYiputa] kungumqondiso nengabula-zigcawu yokubhukuqwa kwawo onke amagunya angahloneli Thixo ngomhla womgwebo wokugqibela.” Oku ngokusisiseko, kuyinyaniso. Njengoko ISityhilelo sibonisa, ngethuba lembandezelo enkulu amathemba oluntu olungahloneli Thixo aya kuba mfiliba njengoko ayenjalo awabo bantu baseYiputa. Kuya kuba ngathi ilanga alikhanyisi emini ibe ngethuba lasebusuku isibhakabhaka asiyi kufumana kukhanya okubukekayo kwenyanga ibe akuyi kubakho zinkwenkwezi ziqaqambileyo. Abo bangakufuniyo ukuzukisa uKumkani kaYehova baya kutshatyalaliswa bangangcwatywa nangendlela ebekekileyo njengoko uMkhweli wehashe elimhlophe ephelelisa uloyiso lwakhe. (ISityhilelo 19:11, 17-21; Hezekile 39:4, 17-19) Akumangalisi ke ukuba abantu abangahloneli Thixo babe baya kukhala besithi “kwiintaba nakumawa, Siweleni, nisifihle ebusweni balowo uhleli phezu kwetrone, nasengqumbeni yeMvana; ngokuba ufikile umhla omkhulu wengqumbo yayo; ngubani na ke onako ukuma?”—ISityhilelo 6:16, 17; Mateyu 24:30.
Imfazwe Eqhubekayo!
12. USathana uye wakubonakalisa njani ukumthiya kwakhe uYesu Kristu ebudeni bemini yeNkosi?
12 Noko ke, kuthekani ngamaKristu akhoyo kula maxesha? Kaloku, aye achatshazelwa kanobom yimfazwe engenasiphelo eqhubekayo phakathi koSathana noMkhweli wehashe elimhlophe. Ekubeni uSathana engakwazanga ukufumana uYesu, uye wakhuphela ngamandla umsindo wakhe kwabo baseleyo abathanjisiweyo—ibe kutshanje—kwisihlwele esikhulu sezinye izimvu esiye sazihlanganisa nabo. Njengoko uYesu walumkisayo, aba ‘baye bathiywa ziintlanga zonke ngenxa yegama lakhe.’ (Mateyu 24:9) USathana uye wasebenzisa zonke izixhobo anokuzisebenzisa, kuquka amahlokondiba, ukuvalela entolongweni, ukuthuthumbisa nokubulala, ukuze alwe nabo.—2 Timoti 3:12.
13. USathana uye wawasebenzisa njani amaqhinga kwimfazwe yakhe nxamnye nabantu bakaThixo?
13 Kwakhona uSathana ngobuqhophololo uye wasebenzisa amaqhinga. (Efese 6:11) Esebenzisa ‘ukulukuhla kobutyebi,’ uye wahendela abathile ekubeni bathobe isantya okanye ekubeni bayiyeke nje kwaphela inkonzo yabo engcwele. (Mateyu 13:22; 1 Timoti 6:9, 10) Uye watsalela abanye ekungcoleni nasekuziphatheni okubi. (1 Korinte 5:1, 2) Abaninzi baphantsi koxinezeleko olukhulu ngenxa ‘yamaxhala obu bomi,’ ibe uSathana uya kusebenzisa oko ukuze azame ‘ukubenza basindeke.’ (Luka 21:34) Kwezinye iimeko, uye wasebenzisa iingxabano zobuqu okanye utyekelo lwemvukelo ukuze asuse ingqalelo ‘kwizinto ezibalulekileyo.’—Filipi 1:10, NW; 1 Korinte 1:11, 12; Yakobi 4:1-3.
14, 15. Sinokoyisa njani kumlo wethu nxamnye noSathana?
14 Ngenxa yoko, kuye kwafuneka ukuba amaKristu ahlakulele unyamezelo ebudeni bemini yeNkosi. Wambi aye asilela, ibe intsilelo nganye iye yaba yindlela encinane yokoyisa kukaSathana. (1 Petros 5:8) Kodwa amaninzi aye asithobela isithembiso sikaYesu esithi: “Ke onyamezeleyo kwada kwaba sekupheleni, lowo uya kusindiswa.” (Mateyu 24:13) Ngenxa yoncedo oluvela kuYehova, aye oyisa aza avuyisa intliziyo yakhe.—IMizekeliso 27:11; 1 Yohane 2:13, 14.
15 Ngokuqinisekileyo, akukho namnye kuthi ofuna ukwanelisa uSathana ngokuthi asibone sisehla nomcinga! Ngenxa yoko, masenze ngokuvisisana nesiluleko sikaPawulos size sizixhobise ngenyaniso, ngobulungisa nangokholo—sishumayela iindaba ezilungileyo ngenzondelelo yaye sifundisisa ukuze sigcine ukholo lwethu lomelele. Masizingise emthandazweni size sihlale siphaphile. Ngaloo ndlela, siya kuba ‘ngabangenakumangaleleka ngemini yeNkosi yethu uYesu Kristu.’ (1 Korinte 1:8; Efese 6:10-18; 1 Tesalonika 5:17; 1 Petros 4:7) Kunoko, imini yeNkosi iya kuba ngumthombo weentsikelelo ezityebileyo kuthi.
Amalungelo Amangalisayo Enkonzo
16. Kutheni uYohane waxelelwa ukuba angakubhali oko wayekuva kuthethwa ziindudumo ezisixhenxe, ibe oku kwathetha ntoni ngamaKristu athanjisiweyo ngowe-1919?
16 KwiSityhilelo 10:3, 4, uYohane uthi weva “iindudumo ezisixhenxe” zithetha ngamazwi azo. Wayefuna ukubhala oko wayekuva, kodwa unikela le ngxelo: “Ndeva izwi liphuma emazulwini, lisithi kum, Zitywine izinto ezizivakalisileyo iindudumo ezisixhenxe, ungazibhali zona.” Kuyabonakala ukuba, elo yayingekabi lixesha lokuba ikhutshwe loo nkcazelo. Kunoko, uYohane waxelelwa ukuba athabathe incwadana esongwayo aze ayidle. Iindudumo ezisixhenxe zibonakala zifanekisela imbonakaliso epheleleyo yeenjongo zikaYehova. (INdumiso 29:3; Yohane 12:28, 29; ISityhilelo 4:5) Emva phayaa ngowe-1919, xa amaKristu athanjisiweyo athi ngokufuziselayo adla incwadana esongwayo, kwakungeloxesha lokuba aziqonde ngokupheleleyo iinjongo zikaYehova. (Thelekisa uDaniyeli 12:8, 9.) Kodwa aqhubela phambili ngokungenaloyiko ngoko kuqonda kuthile ayenako aze azingqina engalufanelekeleyo ukhanyiselo olungakumbi.
17. Kukuphi okunye ukuqiqa okutsha aye uYehova wabanika kona abantu bakhe kwiminyaka esusela kowe-1919?
17 Kwandula ke, ekuhambeni kweminyaka, anikwa ukuqonda okucacileyo kokuthanda kukaYehova ngokwamabakala anenkqubela. Ngokomzekelo, athi aqonda ukuba izimvu zomzekeliso kaYesu, kwanangaphambi kweArmagedon, zazisahlulwa kwiibhokhwe. (Mateyu 25:31-46) Abona ukuba ukumiselwa koBukumkani ngowe-1914 kwakuzalisekisa ISityhilelo isahluko 12. Athi akuqonda ngokunzulu ngakumbi ukubaluleka kwegama likaYehova, ibe asiqonda ngenene ukuba singoobani na isihlwele esikhulu seSityhilelo isahluko 7. Enjani yona intembelo ezathi ezi zityhilelo zatyhilwa ngokwamabakala anenkqubela zayibangela kubantu bakaThixo!—IMizekeliso 4:18; 2 Petros 1:19.
18. Abantu bakaYehova baye banesabelo kwawaphi amalungelo enkonzo abalaseleyo ebudeni bemini yeNkosi, ibe oku kusinceda siqonde ntoni ezintliziyweni zethu?
18 Kwangaxeshanye, uYehova wajizeka abakhonzi bakhe basemhlabeni ngamalungelo enkonzo abalaseleyo. Embonweni ozukileyo, uYohane wabona izithunywa zezulu zivakalisa iindaba ezilungileyo ezingunaphakade kuluntu, zivakalisa ngokuwa kweBhabhiloni Enkulu yaye, zilumkisa ngokufumana uphawu lwerhamncwa. (ISityhilelo 14:6-10) Ngoxa ngokungathandabuzekiyo izithunywa zezulu zazisongamela kula malungelo enkonzo obuthixo, yaba ngabantu, amaNgqina kaYehova asemhlabeni, abathi ngenene bathetha ezi zigidimi kuluntu. UYohane wakwabona uYesu evuna “isivuno somhlaba.” (ISityhilelo 14:14-16) Kodwa kube ngenxa yomsebenzi wokushumayela uBukumkani nowokwenza abafundi owenziwa ngabalawulwa bakaYesu abasemhlabeni athe yena wavuna esi sivuno. (Mateyu 24:14; 28:19, 20) Elinjani lona ilungelo ukuba nesabelo nezithunywa zezulu noYesu Kristu ngokwakhe kumalungelo enkonzo abaluleke ngolo hlobo! Ngokwenjenjalo, ngokwenyaniso siziva sikwimvisiswano nentlangano kaYehova enkulu nengabonakaliyo yasezulwini yezidalwa zokomoya ezithembekileyo.
Inkuselo KaThixo
19. (a) Luya kuba yintoni uvutho-ndaba lobutshaba bukaSathana kubantu bakaThixo? (b) Ngubani oya koyisa kumlo oyincopho wamagqibela kankqoyi?
19 Njengoko isiphelo sehlabathi lakhe sisondela, uSathana uya kuwacinezela ngakumbi nangakumbi amaKristu. Uvutho-ndaba lobu butshaba bakhe luchazwe kuHezekile isahluko 38 nesama-39, apho ngokuprofetayo abizwa ngokuba nguGogi wakwaMagogi. Ngokutsho kwesi siprofeto siphefumlelweyo, uSathana uya kuhlasela kangangoko anako ezama ukutshabalalisa abantu bakaThixo ngonaphakade. Ngaba uya kuphumelela? ISityhilelo siyaphendula: “Iimpondo ezilishumi [“ookumkani” okanye abalawuli banamhla] . . . baya kwenza imfazwe neMvana. IMvana iya kubeyisa, ngokuba inguNkosi kankosi, inguKumkani kakumkani; baya kweyisa nabo banayo, babiziweyo, banyuliweyo, bathembekileyo.” (ISityhilelo 17:12, 14) AmaKristu athembekileyo aya kuqiniseka ukuba aya koyisa ukuba ahlala ethembekile kuKumkani wawo omkhulu owoyisayo. Imikhosi kaGogi iya kucinyw’ igama ngokupheleleyo.—Hezekile 39:3, 4, 17-19; ISityhilelo 19:17-21.
20. Ziziphi iintsikelelo eziya kuziswa yimini yeNkosi kumaKristu athembekileyo ngethuba lembandezelo enkulu?
20 Ngaloo ndlela, le mini yeNkosi ithetha usindiso kubantu bakaThixo. Abo bathanjisiweyo abaya kuba besaphila njengabantu ngethuba lembandezelo enkulu baya kuqinisekiswa ngesikhundla sabo sasezulwini, ibe baya kuzimisela ngokungaxengaxengiyo ukugqiba ikhondo labo lobomi bethembekile. (ISityhilelo 7:1-3; 2 Timoti 4:6-8) Nesihlwele esikhulu siya kusinda, ibe uYesu ‘uya kusikhokelela emithonjeni ephilileyo yamanzi; waye uThixo eya kuzisula iinyembezi zonke emehlweni aso.’ (ISityhilelo 7:14, 17) Onjani wona ukuba mhle umvuzo wokunyamezela ngokuthembeka!
21. Kuya kwenzeka ntoni emhlabeni ebudeni bemini yeNkosi emva kwembandezelo enkulu?
21 Ngoku imini yeNkosi ifikelela kwinqanaba elimangalisayo: ULawulo Lweminyaka Eliwaka lukaKristu Yesu. (ISityhilelo 20:6, 11-15) Umlambo ophilileyo wamanzi, ekwaprofetwa ngawo kwiSityhilelo nakuHezekile, uya kuqukuqelela ezantsi usuka etroneni kaYehova usiya eluntwini, ibe abo baselayo kuwo baya kuphakanyiselwa emfezekweni yoluntu ngokuthe ngcembe. (Hezekile 47:1-12; ISityhilelo 22:1, 2) Elabafileyo liya kuqongqothwa, ibe amawaka ezigidi zabo baye bafa nawo aya kuba nethuba lokusela kulo mlambo.—Yohane 5:28, 29.
22. Ziziphi iziganeko ezibalulekileyo ezilindele uluntu ekupheleni koLawulo lweMinyaka Eliwaka lukaKristu?
22 Ekupheleni kweminyaka eliwaka, uluntu luya kube luphakanyiselwe emfezekweni. Elinjani lona ukufaneleka ixesha lokuba uSathana enze amagqibela kankqoyi okuthi cakatha kulo mhlaba! Kwakhona uya kuzama ukukhohlisa uluntu, ibe kwanangelo xesha, abathile baya kumlandela. Aba babizwa ngendlela ebalulekileyo ngokuba ‘nguGogi noMagogi’ ekubeni beya kubonakalisa kwaloo moya mbi unjengalowo ubonakaliswa ‘yingxokolo kaGogi’ kwisiprofeto sikaHezekile. Kodwa loo moya wabo wemvukelo uya kutshayelwa ungabikho ngonaphakade xa bona, kunye noSathana needemon zakhe, bephoselwa edikeni lomlilo lokomfuziselo. (ISityhilelo 20:7-10; Hezekile 39:11) Ikamva lokwenene elisikelelweyo lilindele abo bahlala bethembekile ukutyhubela olo vavanyo lokugqibela, ibe ke isizwe sabantu esenziwe safezeka siya kumanyana nentlangano kaYehova yobulungisa yendalo iphela. UYehova uThixo uya kuba ‘kuko konke kubo bonke’!—1 Korinte 15:24, 28; ISityhilelo 20:5.
23. Ngenxa yexesha esiphila kulo, sisiphi isiluleko sikaPawulos esisesona sifanelekileyo kuye ngamnye kuthi ukuba asithobele?
23 Ngoko, ezinjani zona iintsikelelo ukungabi nakuthelekelelwa, ezisilindeleyo ukuba siyanyamezela! Khumbula, imini yeNkosi sele iqalisile. Izinto zamehlo sele ziqalisile ukwenzeka. Ngoko, la mazwi kaPawulos angafanelekileyo: “Ke ekwenzeni okulungileyo masingethi amandla; kuba sovuna ngexesha elililo, ukuba asityhafi.” (Galati 6:9) Ngenene ‘masingethi amandla ekwenzeni okulungileyo’ ngale mini yeNkosi. Ukuba siyanyamezela, le mini iya kuzisa iingenelo ezihlala zihleli kuye ngamnye wethu.
Ngaba Unokucacisa?
◻ Liliphi inqanaba lokuqala lokutshatyalaliswa kwehlabathi likaSathana?
◻ UYesu uya ‘kuluphelelisa njani uloyiso lwakhe’ kwiintshaba zakhe?
◻ USathana uye walwa njani namaNgqina kaYehova ebudeni bemini yeNkosi?
◻ Ziziphi iintsikelelo eziphawulekayo eziye zananditshwa ngabantu bakaThixo ukususela ngowe-1919?
◻ Ngenxa yendawo esikuyo kumsinga wexesha, wena ngokobuqu uzimisele ukwenza ntoni?
[Umfanekiso okwiphepha 16]
Oko kwenzeka kwiYerusalem yamandulo kubonisa oko kuya kwenzeka kwiBhabhiloni Enkulu kungekudala