Ngaba Unokuvuya Unokuninzi Omele Ukwenze?
INKOLISO yethu iphila ubomi obuxakeke gqitha, obumaxhaphetshu. Iingcinezelo ezisoloko zikho zobomi banamhlanje zifuna ukuba senze umgudu othe rhoqo wokusigcina siphila. Amadoda nootata bamele bahlangabezane neembopheleleko ezicinezelayo kwiintsapho zabo, abaqeshi babo nabanye. Abafazi noomama bamele bajamelane neemfuneko zasekhaya zeentsapho zabo ibe ngokufuthi kufuneka babe kumsebenzi wempangelo. Kwanabantu abaselula banamaxhala okuhlangabezana neembopheleleko ezithile zentsapho ngoxa befuna imfundo eya kubenza babe nendima eya kuba yinzuzo kwibutho labantu.
Kodwa kuthekani ngabo kuthi abaye ubomi babo babahlulela kuYehova uThixo baza baba ngamaNgqina akhe abhaptiziweyo? Ukongezelela kuzo zonke izinto ekufuneka sizenzile, sinesi siluleko sivela kumpostile uPawulos: “Bazalwana bam abaziintanda, qinani, ningabi nakushukuma; nihlale niphuphuma umsebenzi weNkosi, nisazi nje ukuba ukubulaleka kwenu akulambathi eNkosini.” (1 Korinte 15:58) Ewe, iimbopheleleko ezininzi ezongezelelekileyo ziyinxalenye yezinto ezifunekayo kunqulo lokwenyaniso. Singazizalisekisa njani zonke ezi mbopheleleko size sibe noxolo lwengqondo nesimo sengqondo sokuba novuyo?
Ukuphumeza Okuthile Kuzisa Uvuyo
Uvuyo—imvakalelo yokuphumeza okuthile okanye yolwaneliseko—lufaniswa ngokusondeleyo nokuba nempumelelo kwiimbopheleleko zobomi. Ukuba siyakwazi ukuhlangabezana neembopheleleko zethu zemihla ngemihla ngendlela efaneleke ngokusengqiqweni, ukwenza izinto ngexesha nangocwangco, siba nemvakalelo yokuba ngabaphumeze okuthile neyolwaneliseko. Leyo yindlela ekufanele kube yiyo, ibe umphumo ufak’ isandla kuvuyo lwethu.
UYehova uThixo akazange acebe ukuba ukusingatha kwethu iimbopheleleko kufanele kube ngumthwalo ocinezelayo. Kunoko, bekusoloko kungumnqweno wakhe ukuba ‘sivuye size sibone okulungileyo emigudwini yethu yonke.’ (INtshumayeli 3:12, 13) Siwuvuyela umsebenzi esiwenzayo, ngokuqhelekileyo siba ngabanemveliso. Siwamkela ngokukhululekileyo umyalelo size sisebenzisane ngoxolo nabanye. Kwelinye icala, ukuba awusivuyisi, umsebenzi wethu utyekela ekubeni ngoqobayo—intw’ ethile enomdintsi, edikayo nekwabangela uxinzeleleko olungokweemvakalelo. Oku kukhokelela kwiindlela zokusebenza ezingenamveliso nesimo sengqondo esingesihle. Ubomi buba nzima mihla le njengoko sizama ukuhlangabezana nazo zonke izinto ekufuneka sizenzile. Noko ke, ukuba sinokufumana indlela yokuhlala sivuyiswa, koko sikwenzayo, ngokunokwenzeka ngakumbi sinokuba nendlela yokuphila enomvuzo neyanelisayo.
Yiba Ngolungeleleneyo
Ukuba siza kuvuya kwanokuba sinokuninzi esimele sikwenze, kufuneka sibe ngabalungeleleneyo. Ibe kukuthini ukulungelelana? ‘Kukuba ngozinzileyo ngokwasengqondweni nangokweemvakalelo.’ Umntu olungeleleneyo uzama ngamandla ukuba ngonocwangco kuko konke akwenzayo. Uceba kusengaphambili, uyakuphepha ukuzibekela amangomso izinto ibe ungolungeleleneyo kwimikhwa yakhe. Ubonakalisa ukuzeyisa, ekutyeni, ekuseleni, ekuzihlaziyeni, kwizinto azithandayo nasekuzonwabiseni. Enyanisweni, ubonakalisa ‘ubungcathu ezintweni zonke’!—1 Korinte 9:24-27; thelekisa uTito 2:2.
Umthandazo unendima ebalulekileyo ekulondolozeni ulungelelwano lomKristu. Umkhonzi kaYehova unokuthandazela umoya oyingcwele kaThixo noncedo loBawo wakhe wasezulwini ekuhlakuleleni isiqhamo sawo, kuquka ukuzeyisa. (Luka 11:13; Galati 5:22, 23) Ngokukhethekileyo umKristu ufanele akhangele kuThixo ngomthandazo xa ejamelene neemvavanyo ezisongela ukuphazamisa ukulungelelana kwakhe. Umdumisi uDavide wathi, “Yiyekele kuYehova indlela yakho, ukholose ngaye; wokwenzela.” (INdumiso 37:5) Maxa wambi kusenokufuneka sithandaze njengoko uDavide wenzayo xa wabongoza esithi: “Thixo, khawuleza uze kum. Umncedi wam nomsindisi wam nguwe; Yehova, musa ukulibala.” (INdumiso 70:5) Ungaze ulibale ukuba ngomthandazo unako ukulondoloza ulungelelwano uze unandiphe ‘uxolo lukaThixo, olugqithisele kuko konke ukuqonda, oluya kuzigcina iintliziyo neengqiqo zethu.’—Filipi 4:6, 7.
Ngenxa yokuba exhomekeke kuYehova yaye enandipha uxolo lukaThixo, umKristu olungeleleneyo uba ngonesidima. (Tito 2:11, 12) Oku kubangelwa kukuba nolwazi oluhle ngemigaqo yeBhayibhile nangokuyisebenzisa ebomini bakhe. Umntu onjalo akangomhanahanisi, engangxami agwebe. Ukuba nengqiqo kuyamthintela ekubeni ngoneenkani okanye olukhuni. Ulondoloza imbono entle ngaye nangoko anokukuphumeza, ibe oku kumenza akwazi ukusebenzisana nabanye. (Mika 6:8) Okubangela umdla kukuba, imizila enceda umntu abe ngolungeleleneyo ikwaphakathi kweempawu ezifuneka kwabo banyulwe ukuba bakhonze njengabaveleli kwibandla lamaKristu.—1 Timoti 3:2, 3.
Sinokongezelela okungakumbi gqitha kulonwabo lwethu ngokuzama ngamandla ukuba ngabalungelelene ngakumbi koko sikwenzayo imihla ngemihla. Ngokubonakalisa iimpawu ezinxulumene nolungelelwano oluhle, sinokwenza izinto eziyimfuneko ngaphandle kokucinezeleka okunzulu okungokwasemzimbeni okanye okungokweemvakalelo. Indlela esibuphila ngayo ubomi bethu iya kubonisa ukuzinza okungakumbi, ibe siya kuphumeza okungakumbi. Abanye baya kukuvuyela ngokungakumbi ukunxulumana nathi, ibe siya kufumana ulwaneliseko novuyo olungakumbi. Kodwa ziziphi ezinye iindlela ezisebenzisekayo zokulondoloza ulungelelwano?
Iindlela Ezisebenzisekayo Zokulondoloza Ulungelelwano
Ukuze silondoloze ulungelelwano, sifanele sizame ukuba singabi ngabazila-zilayo yaye sibe ngalungeleleneyo ekusingatheni imicimbi yobuqu. Sifanele sicebe kusengaphambili, sinyamekele imicimbi ngendlela elungeleleneyo, nangocwangco. Abo basilelayo ekuzilungelelaniseni kakuhle izinto nabatyekela ekuzibekeleni amangomso izinto babenza nzima ubomi babo ngokuziqhekez’ intloko nangokuzixhalabisa ngokongezelelekileyo. Impumelelo kule nkalo yobomi iya kusinceda sizive sikwazi ukuzilawula kunokuba nemvakalelo yokuba ngamaxhoba angenakuzinceda eemeko.
Asifanele sizame ukwenza yonke into ngokwethu. Abo bangenamdla wokwamkela uncedo oluvela kwabanye ngokufuthi bahlawula ixabiso eliphakamileyo ngokudinwa ngamandla nangokunxunguphala. Kukho imisebenzi eyahlukahlukeneyo ebinokunyanyekelwa ngabanye. Ngoko ke, kububulumko ukungenelwa koko kunokwenziwa ngabo bakulungeleyo ukunceda. Ngaphandle kokwenza lula umthwalo wethu, oku kusenokuba kokukhuthazayo kwabo banqwenela ukusondela ngakumbi kuthi.
Asibobulumko ukuzithelekisa nabo basenokwenza okungakumbi. Ukuzama ukuba njengabo ngokucacileyo baphumeza okungakumbi kunokuba sisenza kuyatyhafisa, kusenza sizive singamatatasholo noongantweni. Ingcinga enjalo iyabulala, isenza singaqiniseki ngeziqu zethu kwaye sizijongele phantsi. UPawulos wabhala, “Elowo ke makawucikide owakhe umsebenzi, wayeya kwandula ukuba neqhayiya ngokwakhe yedwa, angabi nalo ngomnye.” (Galati 6:4) Khumbula ukuba umsebenzi oxatyiswa ngokonakona ngulowo ulandela imiyalelo, ozinzileyo kwaye onokuthenjwa, nowenza umsebenzi ngokuchubekileyo. Ukuba sinjalo, inkonzo yethu iya kuxatyiswa ize ibe yefunwayo.—IMizekeliso 22:29.
Sifanele siyinyamekele kakuhle impilo yethu. Iyenye yezona zinto zixabisekileyo esinazo, kuba ngaphandle kwayo sisenokwenza okuncinane gqitha. Ngenxa yoko, sifanele sizame ukulondoloza imikhwa emihle yokudla ngokutya ukudla okunesondlo. Simele siphumle ngokwaneleyo, silala ngexesha elisengqiqweni. Xa sidinwe ngokugqithiseleyo okanye siziva sichwechwelwa kukugula, asifanele sizinyanzele; sisenokuzifaka engozini enkulu.
Kuyinto ebalulekileyo ukuzilinda nxamnye nokubonakalisa umoya wokukhalaza. Ukuba asiyilawuli ingcinga engentle, sisenokungaboni nantoni na elungileyo phantse kuyo yonke into okanye nakubani na. Le yindlela eqinisekileyo enokusihlutha uvuyo lwethu ihluthe nolwabanye. Kunokuhleba okanye ukukhalaza ngoko sivakalelwa kukuba kuphosakele, sifanele sazise abo banembopheleleko yokuwulungisa lo mbandela size oku sikushiyele kubo ukuba bazilungise izinto. (Thelekisa eyoku-1 kwabaseKorinte 1:10-12.) Singabalumkileyo ukuba silondoloza isimo sengqondo esihle, sisoloko sifuna yaye silindele ukufumana okuhle kwabanye nakwizinto ezibalulekileyo eziza kuqala kubomi bethu.—Thelekisa uYuda 3, 4, 16.
Xa siceba okuthile esifanele sikwenze, sifanele sikhumbule ukuba ukuzenza izinto ngokukhawuleza kusenokusenza sibe ngabagqwesayo, kodwa kunqabile ukuba kube njalo ithuba elide. Ukusoloko uzixhinxa ngomsebenzi akukhokeleli kuphela ekudinweni ngamandla kodwa kukwanokusibangela sityhafe nto leyo enokusenza singaqiniseki enoba sisafanele siqhubeke kusini na. Ngenxa yoko, masibethe ngesantya esinokusilondoloza ngokungenasiphelo. Ngokomzekelo, kuyinto elungileyo ukuzenzela ucwangciso olusebenzisekayo lokuba nesabelo ngokuthe rhoqo kumsebenzi wokushumayela kwindlu ngendlu nakwezinye iinkalo zobulungiseleli bobuKristu. Sifanele sizinike ithuba lokuphumla nelokuzihlaziya okwakhayo. Ibe siya kukufumanisa kuyingenelo ukuncokola nabantu abakhulileyo abaneminyaka emininzi yamava, kuba basenokuba bafunde indlela yokwenza izinto eziyimfuneko ngaphandle kokuzidinisa ngokwasemzimbeni okanye ngokweemvakalelo.
Sebenzisa Ugwebo Olulungileyo
Kuyinto efanelekileyo ukuziva sinembopheleleko nomnqweno wokuzalisekisa zonke iimbopheleleko esabelwe zona, kuquka nezo zisebandleni labantu bakaYehova. UThixo uyakholiswa ngabasebenzi abakhutheleyo, abanokuthenjwa. (Thelekisa uMateyu 25:21; Tito 2:11-14.) Kodwa iZibhalo ziyabongoza zisithi: “Londoloza ubulumko obusebenzisekayo namandla okucinga.” (IMizekeliso 3:21, NW) Ukusebenzisa ubulumko beBhayibhile kuya kusinceda, ibe kufuneka sisebenzise ingqondo nogwebo olulungileyo, siceba ngenyameko yaye sisoloko sisenza oko sinokukufikelela ngamandla ethu.
Umyalelo wokwenza okuninzi kumsebenzi weNkosi umele ulungelelaniswe nesiluleko esikwiNtshumayeli 9:4. Apho siyafunda: “Inja esaphilileyo ilunge ngaphezu kwengonyama efileyo.” Ewe, inja ephilayo nangona ijongelwa phantsi, ilunge ngakumbi kunengonyama efileyo, isilwanyana abanye abasigqala njengokumkani. Ukuba siba ngabalungeleleneyo size siyinyamekele ngokufanelekileyo impilo yethu, siya kuphila size siqhubeke sizenza izinto. Abafileyo abasenasabelo nakuwuphi na umsebenzi. Ugwebo olulungileyo lunokusinceda ukuba sifumane ulungelelwano olunengqiqo olusinceda ukuba siphumeze izinto eziyimfuneko ngaphandle kokuphulukana novuyo lwethu.
Ngoko ke, ukwenza okungakumbi akuthethi ukuba asinakuba ngabavuyayo. Abona bantu baxakekileyo banokuba phakathi kwabona bantu bavuyayo ukuba bangabanengqiqo, abalondoloza isimo sengqondo esihle nabasebenzisa ugwebo olulungileyo ukuze bahlale belungelelene. Sinokufumana olona vuyo lunokubakho ukuba sibonakalisa ubulumko, senza imisebenzi emihle size sibeke ithemba lethu kuYehova uThixo.—1 Timoti 6:17-19.