Ihlathi Labo—Lelobuxoki!
“Amanga siwenze ihlathi lethu, sasithela ngobuxoki.”—ISAYA 28:15.
1, 2. (a) Yiyiphi intlangano namhlanje efanele ikuphaphele oko kwenzeka kubukumkani bamandulo bakwaYuda? (b) Liliphi ithemba lobuxoki awayenalo uYuda?
NGABA loo mazwi ayasebenza kwiNgqobhoko namhlanje njengoko ayesebenza kubukumkani bamandulo bezizwe ezibini zakwaYuda? Ngokuqinisekileyo, ayasebenza! Yaye oko kufana kungumqondiso wokuba izinto azisayi kuyihambela kakuhle iNgqobhoko yanamhlanje. Kuthetha ukuba loo ntlangano iwexukileyo iza kufikelwa yintlekele kungekudala.
2 Ngakumntla wakwaYuda yayibubukumkani bukaSirayeli bezizwe ezilishumi. Xa uSirayeli wangqineka engenalukholo, uYehova wavumela ukuba oyiswe yiAsiriya ngowama-740 B.C.E. Ubukumkani obungudade wabo, uYuda, wasibona ngamehlo esi siganeko sihambis’ umzimba kodwa ngokucacileyo wavakalelwa kukuba into enjalo yayingasokuze yenzeke kuye. Iinkokeli zakhe zaqhayisa zisithi, ‘ayikuthi na apha eYerusalem itempile kaYehova? Asingobantu na thina akholiswe ngabo uYehova? Ababingeleli nabaprofeti abathethi egameni likaYehova na?’ (Thelekisa uYeremiya 7:4, 8-11.) Ezo nkokeli zonqulo zaziqinisekile ukuba zazinqabisekile. Kodwa zaziphosisa! Zaziswele ukholo ngokufanayo nezizalwana zazo zangasentla. Ngoko, oko kwenzeka kwiSamari kwakuza kwenzeka nakwiYerusalem.
3. Kutheni iNgqobhoko inentembelo ngekamva, kodwa ngaba kukho isizathu esifanelekileyo sokuba nentembelo kwayo?
3 Ngendlela efanayo, iNgqobhoko izibanga inolwalamano olukhethekileyo noThixo. Iqhayisa isithi, ‘sinamashumi amawaka eecawa nabefundisi abanezidanga, ndawonye namakhulu ezigidi zamarhamente. Sikwanayo neBhayibhile, yaye sisebenzisa igama likaYesu kunqulo lwethu. Ngokuqinisekileyo, uThixo uyakholiswa sithi!’ Kodwa oko kwenzeka kwiYerusalem yamandulo kusisilumkiso esinamandla. Phezu kwazo nje iinguqulelo zakutshanje ebezingalindelekanga kwezobupolitika, siyazi ukuba kungekudala uYehova uza kuthabatha amanyathelo aqatha ngeNgqobhoko nalo lonke unqulo lobuxoki.
‘Umnqophiso Nokufa’
4. Nguwuphi umnqophiso uYuda awayecinga ukuba uwenzile?
4 Kumaxesha amandulo, iYerusalem engathembekanga yafumana izilumkiso ezininzi ngabaprofeti bokwenyaniso bakaThixo, kodwa ayizange izikholelwe. Kunoko, yaqhayisa isithi ukufa akusayi kuze kuyihlisele eSheol, ingcwaba, njengoko kuye kwenjenjalo kubukumkani basemantla bukaSirayeli. UIsaya umprofeti waphefumlelwa ukuba athi kuYuda: “Ngako oko liveni ilizwi likaYehova, madoda [aqhayisayo, NW], balawuli baba bantu baseYerusalem. Ngokuba nisithi, Sinqophisene nokufa, sivumelene nelabafileyo; isibetho esingumkhukula, xa singenelayo, asiyi kufika kuthi, kuba amanga siwenze ihlathi lethu, sasithela ngobuxoki.”—Isaya 28:14, 15.
5. (a) Wawuyintoni umnqophiso ekwakusithiwa uYuda uwenzile nokufa? (b) Sisiphi isilumkiso esasinikelwe kuKumkani uAsa uYuda awayesilibele?
5 Ewe, iinkokeli zeYerusalem zazicinga ukuba zazenze isivumelwano, ngokungathi kunjalo, nokufa neSheol ukuze isixeko sazo silondolozwe. Kodwa ngaba umnqophiso ekuthiwa wawenziwe yiYerusalem nokufa uthetha ukuba yayiguqukile ezonweni zayo yaza yakholosa ngoYehova ukuze isindiswe? (Yeremiya 8:6, 7) Akunjalo konke konke! Kunoko, yayifuna uncedo kubalawuli bezobupolitika abangabantu. Kodwa ukuthembela kwayo ngabahlobo behlabathi kwakuyinkohliso, ubuxoki. Abantu behlabathi eyayithembele ngabo babengenakuyisindisa. Yaye ekubeni yayimlahlile uYehova, uYehova wayilahla iYerusalem. Kwenzeka kanye njengokuba umprofeti uAzariya wayemlumkisile uKumkani uAsa wathi: “UYehova unani ekubeni ninaye; ukuba nithe namquqela, nomfumana; ukuba nithe namshiya, wonishiya nani.”—2 Kronike 15:2.
6, 7. Wenza ntoni uYuda ukuqinisekisa unqabiseko lwakhe, kodwa ngayiphi imiphumo ekugqibeleni?
6 Zithembele ngezivumelwano zazo zobupolitika, iinkokeli zaseYerusalem zaziqinisekile ukuba kwakungasayi kubakho “sibetho singumkhukula” semikhosi ehlaselayo esasiya kusondela kuzo size siphazamise uxolo nonqabiseko lwazo. Xa yayisongelwa yimikhosi emanyeneyo yakwaSirayeli neyama-Aram, iYerusalem yafuna uncedo kwiAsiriya. (2 Kumkani 16:5-9) Kamva, xa imikhosi yaseBhabhiloni yayihlaselayo, yabhenela kwiYiputa ukuze ifumane inkxaso waza uFaro wasabela, ethumela umkhosi ukuza kunceda.—Yeremiya 37:5-8; Hezekile 17:11-15.
7 Kodwa imikhosi yaseBhabhiloni yayinamandla gqitha, yaye imikhosi yaseYiputa yanyanzeleka ukuba irhoxe. Ukuthembela kweYerusalem ngeYiputa kwangqineka kuyimpazamo, kwaza ngowama-607 B.C.E., uYehova wayiyekela kwintshabalaliso awayeyixele kwangaphambili. Ngoko abalawuli nababingeleli baseYerusalem babephosisile! Ukukholosa kwabo ngezivumelwano zehlabathi ukuze bazuze uxolo nonqabiseko ‘kwakububuxoki’ obathi bashenxiswa sisibetho esingumkhukula semikhosi yaseBhabhiloni.
Ukuligatya “Ilitye Locikido”
8. INgqobhoko inokuma okufanayo njani noko kukaYuda wamandulo?
8 Ngaba kukho imeko efanayo namhlanje? Ewe, ikho. Abefundisi beNgqobhoko nabo bavakalelwa kukuba akukho ntlekele iya kubafikela. Enyanisweni, bathetha njengoko uIsaya waxela kwangaphambili: “Sinqophisene nokufa, sivumelene nelabafileyo; isibetho esingumkhukula, xa singenelayo, asiyi kufika kuthi, kuba amanga siwenze ihlathi lethu, sasithela ngobuxoki.” (Isaya 28:15) NjengeYerusalem yamandulo, iNgqobhoko ikhangela kwizivumelwano zehlabathi ukuze izuze unqabiseko, yaye abefundisi bayo abavumi ukumenza uYehova ihlathi labo. Kaloku, abasebenzisi kwanegama lakhe, yaye babenza intlekisa baze babatshutshise abo balihlonelayo elo gama. Abefundisi beNgqobhoko benze kanye oko kwenziwa ngababingeleli abakhulu bamaYuda ngenkulungwane yokuqala xa bagatya uKristu. Enyanisweni, baye bathi, “Asinakumkani ungenguye uKesare.”—Yohane 19:15.
9. (a) Ngoobani namhlanje abalumkisa iNgqobhoko ngendlela efana naleyo uIsaya walumkisa ngayo uYuda? (b) INgqobhoko ifanele iguqukele kubani?
9 Namhlanje, amaNgqina kaYehova alumkisa ngelokuba kungekudala imikhosi esisikhukula yomgwebo iza kuyitshayela iNgqobhoko. Ngaphezu koko, alatha kwihlathi lokwenene lokuzimela loo mkhukula. Acaphula uIsaya 28:16, othi: “Ngako oko itsho iNkosi uYehova ukuthi, Yabona, ndiseke eZiyon ilitye, ilitye locikido, ilitye elinqabileyo lembombo, loseko olusekiweyo. Okholiweyo akayi kungxama [“kunkwantya,” NW].” Lingubani eli “litye linqabileyo lembombo”? Umpostile uPetros wacaphula la mazwi waza wawabhekisa kuYesu Kristu. (1 Petros 2:6) Ukuba iNgqobhoko ibizenzele uxolo noKumkani kaYehova, uYesu Kristu, ibiya kwandula ke isiphephe isibetho esingumkhukula esizayo.—Thelekisa uLuka 19:42-44.
10. Iye yazibandakanya nantoni iNgqobhoko?
10 Noko ke, ayikhange yenjenjalo. Kunoko, kwiphulo layo lokufuna uxolo nonqabiseko, ngobuchule izama amalinge okuzenza yamkeleke kwiinkokeli zezizwe zezobupolitika—oku ikwenza phezu kwaso nje isilumkiso seBhayibhile sokuba ubuhlobo behlabathi bubutshaba kuThixo. (Yakobi 4:4) Ngaphezu koko, ngowe-1919 yaluthethelela ngamandla uManyano Lwezizwe njengelona themba loxolo. Ukususela ngowe-1945 iye yathembela ngeZizwe Ezimanyeneyo. (Thelekisa ISityhilelo 17:3, 11.) Izibandakanye kangakanani nale ntlangano?
11. Unqulo lumelwe kangakanani kwiZizwe Ezimanyeneyo?
11 Incwadi yakutshanje iyakubonisa oku xa isithi: “Zingaphezu kwamashumi amabini anesine iintlangano zamaKatolika ezinabameli kwiZizwe Ezimanyeneyo. Ziliqela iinkokeli zonqulo eziye zayityelela le ntlangano yezizwe ngezizwe. Ezona zihlandlo zikhumbulekayo zezokutyelela kukaPopu Ongcwele uPaul VI ebudeni beNgqungquthela yowe-1965 noPopu John Paul II ngowe-1979. Iinkonzo ezininzi zinezikhungo, imithandazo, amaculo neenkonzo ezikhethekileyo ezenzelwa iZizwe Ezimanyeneyo. Eyona mizekelo ibalulekileyo yileyo yamaKatolika, amaUnitarian-Universalist, amaBhaptizi namaBahai.”
Amathemba Oxolo Alilize
12, 13. Phezu kwawo nje amathemba asasazekileyo okuba uxolo lusenokufunyanwa, kutheni amaNgqina kaYehova eqinisekile ukuba izilumkiso zawo ziyinyaniso?
12 Enye yezona nkokeli zinempembelelo ehlabathini yavakalisa amathemba abantu abaninzi abanawo xa yathi: “Esi sizukulwana sabantu sisemhlabeni siya kubona ukuqalisa kwexesha loxolo elingayi kubuya liguqulwe kwimbali yoluntu.” Ngaba yayinyanisile? Ngaba iinguqulelo zakutshanje zithetha ukuba izilumkiso eziye zanikelwa ngamaNgqina kaYehova ezingokuphunyezwa komgwebo kaYehova kwiintlanga azisayi kuzaliseka? Ngaba amaNgqina kaYehova aphosisile?
13 Hayi, awaphosisanga. Ayazi ukuba athetha inyaniso ngenxa yokuba akholose ngoYehova nangeBhayibhile, eliLizwi likaThixo lenyaniso. UTito 1:2 uthi: ‘uThixo akanakuxoka.’ Ngoko anentembelo epheleleyo yokuba xa isiprofeto seBhayibhile sisithi into ethile iza kwenzeka, ayinakungenzeki. UYehova uthi: “Liya kuba njalo ilizwi lam eliphuma emlonyeni wam; aliyi kubuyela kum lilambatha, lingakwenzanga endikuthandayo.”—Isaya 55:11.
14, 15. (a) Iinkokeli zakwaYuda zazivakalisa ntoni ngaphambi nje kokutshatyalaliswa kweYerusalem ngowama-607 B.C.E.? (b) Yintoni uPawulos awayixela kusengaphambili njengeyayiya kuvakaliswa ngaphambi kokuba intshabalaliso yebhaqo ifikele eli hlabathi? (c) Yintoni esinokuyilindela xa ukuvakaliswa kwesibhengezo esikweyoku-1 kwabaseTesalonika 5:3 kufikelela incopho?
14 Kwiminyaka engaphambi kokutshatyalaliswa kweYerusalem ngowama-607 B.C.E., uYeremiya wanikela ingxelo yokuba iinkokeli zazidanduluka zisithi, “Luxolo, luxolo.” (Yeremiya 8:11) Noko ke, oko kwakububuxoki. IYerusalem yatshatyalaliswa nto leyo eyayizalisekisa izilumkiso eziphefumlelweyo zabaprofeti bakaYehova bokwenyaniso. Umpostile uPawulos walumkisa ngelokuba kwakuza kwenzeka okufanayo kumhla wethu. Wathi abantu babeya kudanduluka bathi “Luxolo nokunqaba.” Kodwa wathi, emva koko, “baya kufikelwa yintshabalaliso ngebhaqo.”—1 Tesalonika 5:3.
15 Njengoko siqalisa iminyaka yee-1990, amaphephandaba namaphephancwadi kuyo yonke indawo ebesithi iMfazwe Yomlomo iphelile yaye ekugqibeleni kuza kubakho uxolo lwehlabathi. Kodwa kanye ngelo xesha kwaqhambuka imfazwe kuMbindi-Mpuma. Noko ke, kungekudala iimeko zehlabathi ziza kuguquka zilungele ukuba ukuhlokonyiswa kwesibhengezo ‘soxolo nokunqaba’ ekuprofetwe ngaso kweyoku-1 kwabaseTesalonika 5:2, 3 kufikelele encotsheni. Ekubeni sinethemba elisekelwe ngokuqinileyo kwiLizwi likaThixo, siyazi ukuba, xa kufikelelwa kuloo ncopho, imigwebo kaThixo iya kuphunyezwa ngokukhawuleza nangaphandle kwempazamo. Ukubotshwa kwamaxonya kusithiwa luxolo nokunqaba akufanele kusenze sicinge ukuba intshabalalo eyaxelwa nguThixo kwangaphambili ayisayi kufika. Imigwebo kaYehova ibhalwe ngokungenakuguqulwa kwiLizwi lakhe iBhayibhile. INgqobhoko, nalo lonke unqulo lobuxoki, iya kutshatyalaliswa. Iya kwandula ke imigwebo kaYehova yentshabalalo iphunyezwe kulo lonke ihlabathi likaSathana. (2 Tesalonika 1:6-8; 2:8; ISityhilelo 18:21; 19:19-21) Ekubeni amaNgqina kaYehova eqinisekile ukuba uYehova uya kulizalisekisa ilizwi lakhe, aqhubeka ephaphile ngaphantsi kokhokelo lomkhonzi othembekileyo noqondayo yaye ngenyameko ondele indlela ezenzeka ngayo iziganeko zehlabathi. (Mateyu 24:45-47) Ngokuqinisekileyo, imigudu yabantu yokuzisa uxolo ayifanele isenze sicinge ukuba uYehova uyiyekile injongo yakhe yokuzisa isibetho esingumkhukula sentshabalaliso kwiNgqobhoko enyhukunyhuku zizono.
‘UThixo Ulihlathi Lethu’
16, 17. AmaNgqina kaYehova asabela njani ukuba abanye bayakhubeka kukungafihlisi kwesigidimi sawo?
16 Bambi basenokukhubeka yindlela amaNgqina kaYehova akuvakalisa ngokungafihlisi ngayo oku. Noko ke, xa esithi abalawuli bonqulo beNgqobhoko baye basithela ngobuxoki, kuphela nje athetha oko kuthethwa yiBhayibhile. Xa esithi iNgqobhoko ifanelwe sisohlwayo ngenxa yokuba iye yaba yinxalenye yehlabathi, kuphela nje anikela ingxelo yoko uThixo akuthethayo eBhayibhileni. (Filipi 3:18, 19) Ngaphezu koko, ngenxa yokuba iNgqobhoko iye yakholosa ngamacebo enziwe leli hlabathi, enyanisweni ixhasa uthixo weli hlabathi, uSathana uMtyholi, uYesu awathi unguyise wamaxoki.—Yohane 8:44; 2 Korinte 4:4.
17 Ngoko ke, amaNgqina kaYehova avakalisa esithi: Thina, asikhuthazi amathemba obuxoki oxolo lwehlabathi ngenxa yokuguquka kweemeko zobupolitika. Kunoko, siphinda amazwi omdumisi athi: “UThixo ulihlathi kuthi. Bangumphunga kwaphela oonyana boluntu, ngamanga oonyana bamadoda; esikalini bangenyuka, bangumphunga bephelele.” (INdumiso 62:8, 9) Amacebo abantu okuhambisela phambili nokulondoloza iNgqobhoko nale nkqubo yezinto angamampunge, abubuxoki! Onke edibene awanamandla okuthintela iinjongo zikaYehova njengoko kunjalo ngomphunga!
18. Sisiphi isilumkiso somdumisi esisexesheni namhlanje?
18 Kwakhona amaNgqina kaYehova acaphula iNdumiso 33, indinyana 17 ukusa kweye-19, ethi: “Liyaxoka ihashe [laseYiputa, elifuzisela imfazwe] ukuba lingasindisa, nangamandla alo amakhulu alinakusiza. Yabona, iliso likaYehova likubo abamoyikayo, abalindele inceba yakhe, ukuba awuhlangule ekufeni umphefumlo wabo, abagcine ngexesha lendlala.” Namhlanje, amaKristu okwenyaniso akholose ngoYehova nangoBukumkani bakhe basezulwini, ekuphela kwelungiselelo elinokuzisa uxolo olusisigxina.
INgqobhoko “Into Egqushiweyo”
19. Kutheni ukuthembela ngemibutho yezobupolitika ukuba izise uxolo lwehlabathi kuyinkohliso?
19 Ukuthemba nayiphi na into eyenziwe ngumntu ethabathel’ indawo uBukumkani bukaThixo kuyenza loo nto ibe sisithixo, umfanekiso wonqulo. (ISityhilelo 13:14, 15) Ngaloo ndlela, ukukhuthaza ukuthembela ngamaziko ezobupolitika, njengeZizwe Ezimanyeneyo, ekuziseni uxolo nonqabiseko kuyinkohliso, kububuxoki. Ngokuphathelele amathemba obuxoki anjalo, uYeremiya uthi: “Umfanekiso wakhe otyhidiweyo bubuxoki, awunamoya. Zingamampunge ezo zinto, zizenzo zokugxekwa; ngexesha lokuvelelwa kwazo ziyadaka.” (Yeremiya 10:14, 15) Ngoko ke, amahashe emfazwe eYiputa yanamhla, oko kukuthi, amandla ezomkhosi nezobupolitika eentlanga namhlanje, awasayi kuwukhusela ummandla wonqulo weNgqobhoko xa ufikelwa yintlekele. Ukumanyana kweecawa zeNgqobhoko neli hlabathi ngokuqinisekileyo akuyi kuzikhusela.
20, 21. (a) Kwenzeka ntoni kuManyano Lwezizwe, yaye kutheni iZizwe Ezimanyeneyo zingayi kuba nasiphelo sahlukileyo? (b) UIsaya wabonisa njani ukuba izivumelwano iNgqobhoko enazo nehlabathi aziyi kuyisindisa?
20 INgqobhoko yayithembele kuManyano Lwezizwe, kodwa elo thuba labhangiswa kwanangaphambi kokuba kufike iArmagedon. Ngoku intembelo yayo iyiphethulele kwiZizwe Ezimanyeneyo. Kodwa kungekudala ziza kujamelana ‘nemfazwe yaloo mini inkulu kaThixo, uSomandla,’ yaye azisayi kusinda. (ISityhilelo 16:14) KwaneZizwe Ezimanyeneyo ezihlaziyiweyo azisokuze ziluzise uxolo nonqabiseko. ILizwi likaThixo elibuprofeti libonisa ukuba intlangano yeZizwe Ezimanyeneyo nezizwe ezingamalungu ayo ‘ziya kwenza imfazwe neMvana [uKristu ekumandla oBukumkani]. IMvana iya kuzeyisa, ngokuba inguNkosi kankosi, inguKumkani kakumkani.’—ISityhilelo 17:14.
21 Ngentembelo amaNgqina kaYehova athi akukho lusindiso kwiNgqobhoko ngokumanyana kwayo nehlabathi likaSathana. Yaye xa ethetha oku, kuphela nje alatha koko iBhayibhile ikuthethayo. UIsaya 28:17, 18 umcaphula uYehova esithi: “[Okusesikweni ndokwenza, NW] intambo yokulinganisa, ubulungisa ndibenze ilothe yokulungelelanisa; isichotho siya kumka nalo ihlathi lamanga, amanzi ayikhukulise indawo yokusithela. Kuya kucinywa ukunqophisana kwenu nokufa, kungemi ukuvumelana kwenu nelabafileyo; isibetho esingumkhukula, xa singenelayo, sonenza nibe yinto egqushiweyo.”
22. Xa okusesikweni okugqibeleleyo kuphunyezwa kwiNgqobhoko, uya kuba yintoni umphumo?
22 Xa umgwebo kaYehova uphunyezwa, uya kuphunyezwa ngokusesikweni ngokugqibeleleyo. Yaye isizinzi sentembelo yeNgqobhoko, ‘ukunqophisana kwayo nokufa,’ siya kutshayelwa ngokupheleleyo ngokunga kungesibetho esingumkhukula. UIsaya uhlabela mgama athi: “Imiso ngemiso siya kuningenela, imini nobusuku; kuthi ukuqonda udaba kube kukuhlasimla kodwa.” (Isaya 28:19) Hayi indlela ekuya koyikeka ngayo kwabo babukeleyo ukubona amandla apheleleyo omgwebo kaYehova! Hayi indlela ekuya koyikeka ngayo kubefundisi beNgqobhoko nabalandeli babo ukufumanisa sebeshiywe lixesha, ukuba baye bakholosa ngobuxoki!
Igama LikaYehova ‘Liyinqaba Eliqele’
23, 24. Kunokufuna unqabiseko kweli hlabathi, yintoni eyenziwa ngamaNgqina kaYehova?
23 Kodwa kuthekani ngamaNgqina kaYehova? Naxa ejamelene nentiyo nentshutshiso yezizwe ngezizwe, ayazingisa ekuzigcineni ahlukile kwihlabathi. Awaze alibale ukuba uYesu wathi ngabalandeli bakhe: “Abangabo abehlabathi, njengokuba nam ndingenguye owehlabathi.” (Yohane 17:16) Ukutyhubela le mihla yokugqibela, aye akholosa ngoBukumkani bukaYehova, kungekhona ngamacebo abantu. Ngoko ke, intlekele eya kufikela iNgqobhoko ayisayi kuwankwantyisa amaNgqina kaYehova. Kunjengokuba uIsaya waxela kwangaphambili wathi: “Okholiweyo akayi kungxama [“kunkwantya,” NW].’—Isaya 28:16.
24 IMizekeliso 18:10 ithi: “Yinqaba ende eliqele igama likaYehova; ilungisa ligidimela kulo, libe sengxondeni.” Ngoko simema bonke abantu ababumvu ukuba bazimele ngoYehova nangoBukumkani bakhe obulawulwa nguKristu. Njengendawo yokusithela, uYehova akaloxoki! UBukumkani bakhe obulawulwa nguKristu asinto yabuxoki! Ihlathi leNgqobhoko lelobuxoki, kodwa ihlathi lamaKristu okwenyaniso lelenyaniso.
Ngaba Unokucacisa?
◻ UYuda wamandulo wazimela njani ngehlathi lobuxoki?
◻ Kungayiphi indlela ethe iNgqobhoko yazama ukuzifihla ngobuxoki?
◻ UIsaya wamlumkisa njani uYuda, yaye amaNgqina kaYehova asivakalisa njani isilumkiso esifanayo namhlanje?
◻ INgqobhoko iya kufumanisa njani ukuba ithemba layo lelobuxoki?
◻ Ngokwahlukileyo kwiNgqobhoko, kukuphi ukuma okulondolozwa ngamaNgqina kaYehova namhlanje?
[Ibhokisi ekwiphepha 17]
ABANTU BATHEMBE LUKHULU KWIZIZWE EZIMANYENEYO
“Izizwe ngezizwe zimanyene okwesihlandlo sokuqala ukususela ngeMfazwe Yehlabathi II. Iinkokeli zeZizwe Ezimanyeneyo zizalisekisa imibono yabaseki bazo, ebisoloko ilithemba nje. . . . Ngoko ke ihlabathi linokuxhakamfula eli thuba ukuze lizalisekise isithembiso ekudala senziwa senkqubo entsha yehlabathi.”—UMongameli Bush waseUnited States kwintetho kaMongameli kwiNgqungquthela yeSizwe, ngoJanuwari 29, 1991