Qhubeka Ulumkisa Ngomsebenzi Ongaqhelekanga KaYehova
“Uya kusuk’ eme uYehova, njengasentabeni yePeratsim; uya kuguguma, njengasentilini yeGibheyon.”—ISAYA 28:21.
1, 2. Nguwuphi umsebenzi ongaqhelekanga uYehova awawenza ngenxa yabantu bakhe ngomhla kaDavide?
ISENZO esisodwa! Umsebenzi ongaqhelekanga ngokwenene! Oko koko kwenziwa nguYehova ngenxa yabantu bakhe kumaxesha amandulo emva phayaa ngenkulungwane ye-11 B.C.E. Yaye esi senzo sisodwa sasingumzekelo womsebenzi ongaqhelekanga ngakumbi aza kuwenza kungekudala. Yayisisiphi eso senzo samaxesha amandulo? Kwakamsinya nje emva kokubekwa kukaDavide njengokumkani eYerusalem, amaFilisti angabamelwane ahlasela, yaye oku kwashukumisela uYehova ukuba enze isenzo sakhe esisodwa. Okokuqala, amaFilisti ahlasela kwithafa elingezantsi lakwaRafa. UDavide wabuza kuYehova oko wayefanele akwenze yaye wayalelwa ukuba ahlasele. Ethobela ilizwi likaYehova, uDavide wawoyisa ngokupheleleyo umkhosi onamandla wamaFilisti eBhahali-peratsim. Kodwa amaFilisti akazange anikezele. Kungekudala abuya ukuze atshabalalise aze aphange okungakumbi kwithafa elingezantsi lakwaRafa, kwakhona uDavide wafuna ulwalathiso kuYehova.
2 Ngeli thuba waxelelwa ukuba yena nemikhosi yakhe bawavelele amaFilisti. UYehova wathi: “Ekuveni kwakho isandi sokuhamba emantloko emithi yemibhaka, wandule ungxamise; ngokuba woba uphumile phambi kwakho uYehova ngela xesha, ukuba ayixabele impi yamaFilisti.” Yaye oko koko kwenzekayo. UDavide walinda de uYehova wavakalisa isandi sokuhamba emantloko emithi yemibhaka—mhlawumbi ngokusebenzisa umoya onamandla. Ngokukhawuleza, uDavide nemikhosi yakhe baphuma kwindawo ababezimele kuyo baza bawahlasela amaFilisti awayedidekile, bawoyisa ngokuwaxabela kakhulu. Imifanekiso yonqulo amaFilisti awayishiya kwelo thafa ledabi yahlanganiswa yaza yatshatyalaliswa.—2 Samuweli 5:17-25; 1 Kronike 14:8-17.
3. Kutheni isenzo sikaYehova esisodwa sasisesomdla kumaYuda omhla kaIsaya, yaye kutheni sifanele sibe sesomdla kwiNgqobhoko namhlanje?
3 Lo yayingumsebenzi ongaqhelekanga, isenzo esisodwa, esaphunyezwa nguYehova nxamnye namaFilisti nangenxa yokumkani wakhe othanjisiweyo. Esi senzo siphawulekayo sesomdla okhethekileyo kuba umprofeti uIsaya wayelumkise wathi uYehova wayeza kwenza into engaqhelekanga nenamandla ngokufanayo nxamnye namanxila okomoya akwaYuda. Ngenxa yoko, kwakufuneka ziphaphe iinkokeli zonqulo ezingathembekanga zomhla kaIsaya. INgqobhoko namhlanje ikwafanele iphaphe kuba oko kwenzeka kwaYuda kwakungumzekelo woko kuya kuba sisiphelo seNgqobhoko.
“Umandlalo Mfutshane”
4, 5. (a) UIsaya uyichaza ngokucacileyo njani imeko yokungonwabi yeenkokeli zonqulo zomhla wakhe? (b) Yintoni ebangela ukungonwabi kweNgqobhoko namhlanje?
4 Okokuqala, uIsaya wabhenca ukuba izivumelwano loo manxila okomoya amandulo awayethembele kuzo zaziyinkohliso, ubuxoki. Wandula ke ngokucacileyo wabonisa indlela abangonwabanga ngayo abo bathembele kobo buxoki. Wathi: “Umandlalo mfutshane, akukho kunaba; nesigubungelo sincinane, ukuba azisongele kuso.” (Isaya 28:20) Nabani na onaba kwisingqengqelo esifutshane kakhulu ufumanisa ukuba iinyawo zakhe zijinga ngaphandle zize zigodole. Kwelinye icala, ukuba uyaziqotha ukuze anele kwisingqengqelo esifutshane, isigubungelo sincinane ibe inxalenye enkulu yomzimba wakhe iba ngaphandle. Kungakhathaliseki ukuba wenza ntoni na, inxalenye yakhe ethile iba ngaphandle.
5 Ngokufuziselayo, le yayiyimeko yabo babethembele ngehlathi lobuxoki ngomhla kaIsaya. Nanamhlanje bakwimeko yokungonwabi efanayo abo bathembele ngehlathi lobuxoki leNgqobhoko. Eli asiloxesha lokufuna ulonwabo kumalungiselelo ehlabathi okuzisa uxolo nonqabiseko. Ngaphantsi kwethunzi lemigwebo ezayo kaThixo, izivumelwano neenkokeli zezobupolitika aziyi kunikela ntuthuzelo ifudumezayo kwiNgqobhoko.
Isenzo SikaYehova Esisodwa
6. UYehova wayeza kwenza ntoni nxamnye noYuda, yaye uza kwenza ntoni nxamnye neNgqobhoko?
6 Akuba eyichaze kakuhle imeko yokungonwabi kweYerusalem engathembekanga yomhla wakhe—neyeNgqobhoko yanamhlanje engathembekanga—uIsaya wahlabela mgama wenjenje: “Uya kusuk’ eme uYehova, njengasentabeni yePeratsim, uya kuguguma, njengasentilini yeGibheyon; ukuba enze isenzo sakhe, isenzo sakhe esisodwa, ukuba asebenze umsebenzi wakhe, umsebenzi wakhe ongaqhelekileyo.” (Isaya 28:21) Ewe, uIsaya walumkisa esithi, kungekudala uYehova uya kuphakama njengoko wenzayo eBhahali-peratsim. Kodwa ngoku wayeza kwenza okuthile nxamnye nabantu bakhe abangenalukholo. Yaye wayeza kwenjenjalo njengomkhukula ongenakuthintelwa wamanzi aphuma kwidama eliqhekekayo. Umnqophiso weYerusalem nokufa wawuza kuboniswa ungophuthileyo. Ngendlela efanayo, kungekudala uYehova uza kuthabatha inyathelo nxamnye neNgqobhoko, yaye iza kufumanisa ukuba zonke izivumelwano zayo ezinxilisayo ezenze neli hlabathi azinantsingiselo. Intlangano yayo enkulu iya kuqhekeka yaye abaxhasi bayo baya kusasazeka. Oothixo bayo bobuxoki baya kutshiswa baphele.
7. Kutheni iinjongo zikaYehova nxamnye noYuda kwathiwa ‘zizodwa’ yaye ‘aziqhelekanga’?
7 Kutheni uIsaya esibiza isenzo sikaYehova nxamnye neYerusalem ngokuba ngumsebenzi owodwa nongaqhelekanga? Kaloku, iYerusalem yayisisazulu sonqulo lukaYehova nesixeko sokumkani othanjisiweyo kaYehova. (INdumiso 132:11-18) Ngenxa yoko, ayizange ngaphambili ikhe ibhukuqwe. Itempile yayo ayizange ikhe itshiswe. Indlu yobukhosi kaDavide, eyayizinziswe eYerusalem, ayizange ikhe yoyiswe. Izinto ezinjalo zazingathi qatha nokuthi qatha engqondweni. Kwakuyinto engaqhelekanga gqitha ukuba uYehova wayenokucinga ngokuvumela izinto ezinjalo zenzeke.
8. Sisiphi isilumkiso uYehova awasinikelayo ngesenzo sakhe esingaqhelekanga nesasisondela?
8 Kodwa uYehova ngabaprofeti bakhe wanikela isilumkiso esifanelekileyo sokuba kwakuza kwenzeka iziganeko ezothusayo. (Mika 3:9-12) Ngokomzekelo, umprofeti uHabhakuki, owayephila ngenkulungwane yesixhenxe Ngaphambi kweXesha Eliqhelekileyo, wathi: “Khangelani phakathi kweentlanga, nondele, ningakhulumi nokukhuluma; ngokuba ndiya kusebenza umsebenzi ngemihla yenu, eningayi kukholwa nguwo, nokuba niyawubaliselwa. Kuba, yabonani, ndixhoxha amaKaledi, uhlanga olulugcalagcala, oluyintshakavula; oluhamba nobubanzi behlabathi, ukuze luhluthe amakhaya angewalo. Luyadengisa, luyoyikeka.”—Habhakuki 1:5-7.
9. UYehova wasizalisekisa njani isilumkiso sakhe nxamnye neYerusalem?
9 Ngowama-607 B.C.E., uYehova wasizalisekisa isilumkiso sakhe. Ekubeni wavumela imikhosi yaseBhabhiloni ukuba ilwe nxamnye neYerusalem, wayivumela ukuba isitshabalalise isixeko netempile. (IZililo 2:7-9) Ngaphezu koko, wavumela ukuba iYerusalem itshatyalaliswe okwesihlandlo sesibini. Kwakutheni? Kaloku, emva kweminyaka engama-70 yokuthinjwa, amaYuda awayeguqukile avunyelwa ukubuyela kwilizwe lawo, yaye ekugqibeleni kwakhiwa enye itempile eYerusalem. Noko ke, kwakhona amaYuda amshiya uYehova. Ngenkulungwane yokuqala yeXesha Eliqhelekileyo, uPawulos wacaphulela amaYuda omhla wakhe amazwi kaHabhakuki, ngaloo ndlela ewalumkisa ukuba esi siprofeto sasiza kuzaliseka kwakhona. (IZenzo 13:40, 41) UYesu wayenikele isilumkiso esingqalileyo sokuba iYerusalem netempile yayo zaziza kutshatyalaliswa ngenxa yokuswela ukholo kwamaYuda. (Mateyu 23:37–24:2) Ngaba loo maYuda enkulungwane yokuqala athobela? Akunjalo. Njengooyisemkhulu, asityeshela ngokupheleleyo isilumkiso sikaYehova. Ngenxa yoko, uYehova wawuphinda umsebenzi wakhe owodwa. Ngowama-70 C.E. iYerusalem netempile yayo yatshatyalaliswa yimikhosi yamaRoma.
10. Yintoni uYehova aza kuyenza nxamnye neNgqobhoko kungekudala?
10 Ngoko, yintoni enokubangela nawuphi na umntu acinge ukuba uYehova akayi kwenza okufanayo kwixesha lethu? Isibakala sikukuba, uya kuyizalisekisa injongo yakhe nakubeni ibonakala iyeyodwa nengaqhelekanga kwabo bathandabuzayo. Ngeli thuba abo baza kubandakanyeka kwisenzo sakhe iya kuba yiNgqobhoko, njengoYuda wamandulo, eye yazibanga inqula uThixo kodwa eyonakele ngokunganiki themba. NgoDavide wakhe Omkhulu, uKristu Yesu, uYehova uya kuhlasela ‘amaFilisti’ eNgqobhoko ngeyure angayilindelanga. Uya kwenza umsebenzi wakhe ongaqhelekanga ukusa kwinqanaba lokutshayela kuthi tu nemizila yokugqibela yeenkqubo zonqulo lweNgqobhoko.—Mateyu 13:36-43; 2 Tesalonika 1:6-10.
Isilumkiso Ngesenzo SikaYehova
11, 12. AmaNgqina kaYehova aye alumkisa njani ngemigwebo kaYehova esondelayo?
11 Kangangeminyaka emininzi amaNgqina kaYehova aye alumkisa ngesi senzo sizayo sokugweba sikaYehova. Aye athi ukutshatyalaliswa kweYerusalem netempile yayo ngowama-607 B.C.E. nokutshatyalaliswa kwayo kwakhona ngowama-70 C.E. kwakuzizilumkiso ezibuprofeti zoko kuza kwenzeka kwiNgqobhoko. Ngaphezu koko, aye abonisa ukuba iNgqobhoko, ngenxa yokuwexuka kwayo, iye yaba yinxalenye yobukhosi behlabathi bonqulo lobuxoki, iBhabhiloni Enkulu. Ngenxa yoku, imigwebo kaThixo kwiBhabhiloni Enkulu ngokukhethekileyo iya kuziswa phezu kweNgqobhoko, ngenxa yokuba iyeyona nxalenye inetyala yaloo ntlanganisela ibusathanarha.—ISityhilelo 19:1-3.
12 AmaNgqina kaYehova aye alatha kwisilumkiso esibuprofeti seBhayibhile sokuba ngexesha likaYehova elifanelekileyo, izithandane zobupolitika zeBhabhiloni Enkulu ziya kuyijikela. Sifanekisela ezi njengeempondo ezilishumi zerhamncwa elimfusa, ISityhilelo silumkisa sisithi: “Iimpondo ezilishumi owazibonayo ziserhamncweni, ngabo baya kulithiya ihenyukazi [iBhabhiloni Enkulu], baliphanzise, balihlube, bayidle inyama yalo, balitshise ngomlilo.” (ISityhilelo 17:16) INgqobhoko etyekele elunqulweni iya kutshiswa ize itshatyalaliswe ndawonye nazo zonke ezinye iinkonzo zobuxoki. Esi iya kuba sisenzo sikaYehova esisodwa, umsebenzi wakhe ongaqhelekanga womhla wethu.
13. Iindlela abantu abasabela ngazo namhlanje kwizilumkiso zikaYehova zifana njani noko uIsaya wahlangabezana nako?
13 Xa amaNgqina kaYehova enikela isilumkiso ngale ntlekele izayo, ngokufuthi ahlangabezana nokugculelwa. Abantu bayazibuza enoba acinga ukuba angoobani na ukuba angathetha izinto ezinjalo. INgqobhoko ibonakala izinze gqitha, ingenakugungqiswa. Kaloku, bambi bacinga ukuba imeko yayo iya iphucuka. Oorhulumente ababefudula beyicinezela bathe kutshanje bayinika inkululeko engakumbi yokusebenza. Noko ke, enyanisweni iNgqobhoko ifanele ithobele isiluleko sikaIsaya esithi: “Musani ukugxeka, hleze kuqiniselwe ukubotshelelwa kwenu; ngokokuba isiphelo esiya kulifikela ilizwe lonke sisesimisiweyo ke sagqitywa; ndisivile eNkosini, uYehova wemikhosi.”—Isaya 28:22; 2 Petros 3:3, 4.
14. Ziya kuba zezomelele neziqine kangakanani izibopho zeNgqobhoko?
14 Ubukhulu becala, iNgqobhoko iya kuqhubeka imgxeka yaye imchasa uKumkani noBukumkani bakhe. (2 Tesalonika 2:3, 4, 8) Noko ke, kwangaxeshanye, izibopho zayo ziya komelela ngakumbi. Ngamany’ amazwi, intshabalalo yayo iya kuqiniseka ngakumbi nangakumbi. UYehova akayi kuguquka kwisigqibo sakhe sokuba iNgqobhoko itshatyalaliswe kanye njengoko engazange aguquke kwisigqibo sakhe sokuvumela ukuba iYerusalem netempile yayo itshatyalaliswe ngowama-607 B.C.E.
“Phumani Kuyo”
15. Yiyiphi indlela yokusaba evulekileyo kubantu abantliziyo zilungileyo?
15 Ubani unokusaba njani kwisiphelo seNgqobhoko? Emva phayaa kwimihla kaSirayeli, uYehova wathumela abaprofeti abathembekileyo ukuba babuyisele abo bantliziyo zifanelekileyo kunqulo olunyulu. Namhlanje, uye wamisela amaNgqina akhe, ngoku afikelela kwizigidi, ngenjongo efanayo. Ayibhenca ngokungenaloyiko imeko yokufa ngokomoya yeNgqobhoko. Ngokwenjenjalo, aphinda ngokuthembekileyo izibhengezo ezifana nezibetho zokuvuthela kwezithunywa zezulu amaxilongo eSityhilelo isahluko 8 nesesi-9. Ngaphezu koko, ngenkuthalo aye avakalisa isibongozo esikwiSityhilelo 18:4 esithi: “Phumani kuyo, bantu bam, ukuze . . . ningamkeliswa kwizibetho zayo.” Ngokuthi “kuyo” apha kubhekiselwa kwiBhabhiloni Enkulu, ubukhosi behlabathi bonqulo lobuxoki. Elona lungu layo eliphambili iyiNgqobhoko.
16. Ziye zasaba ngayiphi indlela izigidi zabantu kunqulo lobuxoki?
16 Ukususela ngowe-1919, yaye ingakumbi ukususela ngowe-1922, isihlwele esandayo sabalulamileyo, sisabela kweso sibongozo, siye sayishiya iBhabhiloni Enkulu. Okokuqala amawaka, kwaza kwalandela amakhulu amawaka, yaye ngoku izigidi ziye zazahlukanisa nonqulo lobuxoki, ingakumbi iNgqobhoko, zaza zasabela kunqulo olunyulu. (Isaya 2:2-4) Bayazi ukuba kuphela kungokuyishiya ngaloo ndlela iBhabhiloni Enkulu abanokuthi baphephe ukwamkeliswa kwizibetho zayo, eziya kufikelela incopho ekutshatyalalisweni kwayo xa kufika ixesha lokuba kuphunyezwe umsebenzi kaYehova ongaqhelekanga.
17, 18. UYehova uye wasisithsaba esimakhazikhazi, nesangqawe sokuhomba ngayiphi indlela kubantu bakhe?
17 Umprofeti uIsaya uchaza imeko eyonwabisayo abakuyo abo bamela unqulo olunyulu. Uthi: “Ngaloo mini uYehova wemikhosi uya kuba sisithsaba esimakhazikhazi, nesangqawe sokuhomba kumasalela abantu bakhe; abe ngumoya wesiko kwabahleli esihlalweni sokugweba, nobugorha kwababuyisela imfazwe esangweni.”—Isaya 28:5, 6.
18 Ngenxa yokunyaniseka kwabo kwinyaniso, uYehova usisithsaba sobuqaqawuli esingabuniyo kumalungu athanjisiweyo odidi lomkhonzi othembekileyo noqondayo. Oku kuye kwayinyaniso ngokukhethekileyo ukususela ngowe-1926. Ngaloo nyaka inkupho kaJanuwari 1 yeMboniselo (yesiNgesi) yabethelela imbaluleka yokuphakamisa igama likaYehova kwinqaku elichukumisayo elinomxholo othi “Ngubani Oya Kuzukisa UYehova?” Ukususela ngoko, amaKristu athanjisiweyo aye alivakalisa elo gama ehlabathini lonke ngaphezu kunanini na ngaphambili. Ngowe-1931 aziwa njengasondelelene ngakumbi noYehova ngokwamkela igama elithi amaNgqina kaYehova. Ngaphezu koko, isihlwele esikhulu sezinye izimvu naso siye saphuma kwiNgqobhoko nakuyo yonke iBhabhiloni Enkulu. Nabo aba baye balamkela igama likaThixo. Ube yintoni umphumo? UYehova—kungekhona inkululeko yelizwe yokwexeshana—uye waba sisithsaba sobuqaqawuli sabantu abangaphezu kwezigidi ezine abakumazwe nakwiziqithi zolwandle ezingaphezu kwama-212. Olunjani lona uzuko abanalo aba lokuthwala igama lokuphela koThixo ophilileyo noyinyaniso!—ISityhilelo 7:3, 4, 9, 10; 15:4.
“Ahlale Phezu Kwalo UMoya KaYehova”
19. Ngubani lowo uhleli esihlalweni sokugweba, yaye uYehova uye waba ngumoya wokusesikweni njani kuye?
19 KuYesu, ‘lowo uhleli esihlalweni sokugweba,’ uYehova uye waba “ngumoya wesiko [wokusesikweni, NW].” Xa uYesu wayesemhlabeni, akazange azivumele oyiswe ngumoya onxilisayo wezivumelwano zehlabathi. Namhlanje, njengoKumkani kaYehova obekwe etroneni, uzaliswe ngumoya oyingcwele, omkhokelayo ekwenzeni izigqibo ezilungeleleneyo nezihlala zilungile. Siye sazalisekiswa kuYesu isiprofeto esithi: “Ahle ahlale phezu kwalo uMoya kaYehova, umoya wobulumko nowengqondo, umoya wecebo nowobugorha, umoya wokwazi nowokoyika uYehova.” (Isaya 11:2) Kuyinyaniso ukuba, ngoYesu, uYehova ‘uya kukwenza okusesikweni kube yintambo yokulinganisa, ubulungisa abenze ilothe yokulungelelanisa.’ (Isaya 28:17) Ngoxa iintshaba ezinxilileyo ngokomoya ziya koyiswa entshabalalweni, kuya kwenziwa ngokusesikweni kwigama elingcwele nakulongamo lwendalo iphela lukaYehova.
20, 21. Akuchaphazela ngayiphi indlela amazwi akuIsaya 28:1-22?
20 Ngoko, enjani ukubaluleka intsingiselo esi siprofeto sikaIsaya isahluko 28 esinayo kuthi namhlanje! Ukuba siyawaphepha amanxila okomoya eNgqobhoko size sibambelele kunqulo olunyulu, siya kukhuselwa xa uYehova esenza isenzo sakhe esisodwa nomsebenzi wakhe ongaqhelekanga. Hayi indlela esinemihlali ngayo kukukwazi oku! Hayi indlela esivuya ngayo kukuqonda ukuba xa ezi zinto zenzekile, wonk’ ubani uya kunyanzeleka azi ukuba uYehova wemikhosi uye wenza isenzo ngenxa yabantu bakhe abathembekileyo nangenxa yokuthethelelwa kwakhe ngoYesu Kristu!—INdumiso 83:17, 18.
21 Ngoko ngamana onke amaKristu okwenyaniso angaqhubeka ngokungenaloyiko elumkisa ngesenzo sikaYehova esisodwa. Mawazingise ekuthetheni ngomsebenzi wakhe ongaqhelekanga. Njengoko esenjenjalo, mawavakalise kubo bonke ukuba ithemba lethu elingenakushukunyiswa likuBukumkani bukaThixo obulawulwa nguKumkani wakhe obekwe etroneni. Ngamana inzondelelo, uzimiselo nokunyaniseka kwawo kungafak’ isandla ekudunyisweni ngonaphakade kukaThixo wethu ongusomandla, uYehova.—INdumiso 146:1, 2, 10.
Unokukhumbula Na?
◻ Kutheni iNgqobhoko ikwimeko yokungonwabi?
◻ UYehova wayenayiphi injongo ngeYerusalem, yaye kutheni esi yayisisenzo ‘esisodwa’ yaye ‘esingaqhelekanga’?
◻ Sisiphi isilumkiso amaNgqina kaYehova ebesivakalisa ngokubhekisele kwiNgqobhoko, yaye aye ahlangabezana nayiphi intsabelo?
◻ Abantu banokusaba njani kwisiphelo seNgqobhoko?
[Umfanekiso okwiphepha 24]
UYehova uya kuphinda enze isenzo sakhe esisodwa, ngesi sihlandlo nxamnye neNgqobhoko