Lutsha—Ngaba Niya Kuluphumelela Uvavanyo Lokunyaniseka KobuKristu?
“AKUCINGI ukuba ukuziphatha okubi kukunganyaniseki. Kuwe ngumdlalo nje lo. Liyinyaniso elokuba uyazi ukuba ukuba abazali bakho okanye abadala banokukufumanisa oku, kungabangela ukwaphuka kwentliziyo neengxaki ezininzi. Kodwa xa usawonwabele umdlalo, ezo ngcinga uzibetha ngoyaba.”
Umfana ekusandul’ ukucatshulwa amazwi akhe waye waqhubeka noqheliselo olufihlakeleyo lokuhenyuza. Waphila ubomi obumbaxa, ebadyobh’ intshongo emehlweni abazali bakhe nebandla lamaKristu. Phantse ngelo xesha wayengacingi ngokuba wayesilela kuvavanyo lokunyaniseka kobuKristu.
Amawaka olutsha olungamaKristu aye asilela kuvavanyo olufanayo lokunyaniseka. Yaye akumangalisi oko! USathana uMtyholi ‘ulwa’ nabantu bakaThixo, esenza konke okusemandleni akhe ukwaphula ingqibelelo yabo. (ISityhilelo 12:17) Ngokukodwa uye wenza ulutsha lwaba ngamaxhoba ‘amacebo akhe achuliweyo.’ (Efese 6:11, Kingdom Interlinear) Ngenxa yoko ukuhlala unyanisekile kufuna umgudu wokwenene nokuzimisela.
Kanye kanye kuyintoni ukunyaniseka? KwiZibhalo zesiHebhere, igama lolwimi lwantlandlolo eliguqulelwe ngokuthi “ukunyaniseka” libonisa ukunamathela okunothando emntwini ucinga ngenjongo ethile. (INdumiso 18:25) Alichazi isivumelwano esibuthathaka esinokwaphulwa nanini na kodwa lichaza ukunamathela okuhlala kungonakaliswa ide injongo yako ngokunxibelelene naloo mntu izaliseke. KwiZibhalo zesiGrike, igama lolwimi lwantlandlolo eliguqulelwe ngokuthi “ukunyaniseka” linengcamango yobungcwele, ubulungisa, okanye intlonelo.
Ngaloo ndlela, ukunyaniseka kubandakanya ulwalamano olufanelekileyo noThixo. AmaEfese 4:24, (NW) asixelela ukuba ‘sambathe ubuntu obutsha obadalelwa ebulungiseni bokwenyaniso nokunyaniseka.’ Ngaba ufuna ukunyaniseka kuYehova? Ngoko umele uhlakulele ukunamathela okunyanisekileyo kuye, iqhina elingenakuqhawulwa, uzimiselo lokumkholisa kwiindlela zakho zonke. Umele unamathele kwimilinganiselo kaYehova yobulungisa—kungakhathaliseki ukuba uhendelwa kangakanani na ekwenzeni okuchasene noko!
Iingcinezelo Ezibangela Ukunganyaniseki
Iyancomeka into yokuba ulutsha oluninzi phakathi kwamaNgqina kaYehova luzabalazela ukuhlala lunyanisekile, yaye ngenxa yoko lunandipha ukuba nesazela esicocekileyo. Sekunjalo, umpostile uPawulos waprofeta ukuba “ngemihla yokugqibela,” ukunganyaniseki kwakuya kuba luphawu lwabantu ngokubanzi. (2 Timoti 3:1, 2) Okubangela usizi kukuba, ulutsha oluthile olungamaKristu luye lwavumela eli hlabathi linganyanisekanga ukuba ‘lilucudisele kwisimilo salo.’ (Roma 12:2, Phillips) USathana uye wakuphumeza njani oku?
Ingcinezelo yoontanga sesinye isixhobo esinempumelelo uSathana asisebenzisayo. Abantu abaninzi bafuna ukucingelwa kakuhle ngabanye, ibe uSathana uyayazi indlela yokusebenzisa lo mnqweno ungokwemvelo. Ulutsha oluthile olungamaKristu, ngokufuna ukujongwa njengolunengqondo, luye lwabandakanyeka kwiincoko ezingentle, ekuziphatheni okubi ngokwesini, ekutshayeni, ekunxileni—kwanasekusebenziseni kakubi iziyobisi—lukwenza konke oku ngenxa yokuba lunomdla wokwamkelwa ngoontanga balo.
USathana ufuna ukuba siziphathe ‘ngokweenkanuko zenyama yethu, sisenza ukuthanda kwenyama.’ (Efese 2:3) Uwazi kakuhle amandla inkanuko yesini enokuba nawo ngethuba ‘lentlahla.’ (1 Korinte 7:36) Yaye ufuna ukuba unikezele kwezo nkanuko. Ngobuyatha lumbi ulutsha olungamaKristu luzenza amaxhoba akhe ngokufunda iincwadi ezingamanyala, ngokubukela imiboniso bhanya bhanya neevideo okanye ngokuqhelisela ukuphulula amaphambili. Ngokufuthi, ezi zinto zikhokelela kwizenzo ezibi zokunganyaniseki. Ngaba ihlabathi likaSathana liye ‘lakucudisela kwisimilo salo’ kwezinye zezi zinto?
Ukuphila Ubomi Obumbaxa
Ngoxa ukwenza isono esinzulu njengokuhenyuza kusisono esikhulu kukodwa nje, ulutsha oluninzi luzenza zibe nzima ngakumbi iingxaki zalo. Lufana “namadoda akhohlakeleyo” ekuthethwe ngawo kwiNdumiso 26:4, ‘angabanyhwalazi.’ Ulutsha olunjalo luphila ubomi obumbaxa, lusenza ngohlobo oluthile xa luphakathi kwabazali balo okanye amanye amaKristu akhulileyo luze lwenze ngolunye uhlobo xa luphakathi koontanga balo.
Noko ke, ukuphila ubomi obumbaxa kukuzibetha ngenyhek’ etyeni ibe kuyingozi. Izenzo ezibi ezingathintelwayo phantse zikhokelela kwezinye izenzo ezibi. Yaye ngoxa isazela sikabani ekuqaleni sinokukukhathaza, ukuba ubani uyazingisa ekwenzeni okuphosakeleyo ithuba elide, isazela sakhe siya sikuqhela okubi. Ubani ‘unokuyeka ukuva intlungu’ ngokwenza okubi—Efese 4:19, Kingdom Interlinear.
Kweli nqanaba kuba nzima kakhulu ukuxela isenzo sikabani esibi ukuze afumane uncedo. Oku kunjalo ngokukodwa xa nolunye ulutsha olungamaKristu lubandakanyekile ebubini. Kudla ngokubakho imvakalelo ephosakeleyo yokunyaniseka. Oselula ocatshulwe ekuqaleni wachaza: “Uyakwazi oko ukwenzayo, ibe uyazi ukuba kuphosakele. Ukuze abanye ababandakanyekileyo bangangeni engxakini, uyavuma ukungaxeleli mntu.”
Ngoxa ubani ‘enokunyhwalaza’ ebusweni babazali bakhe okanye ebandleni, akanakho ukumzimela uYehova. “Akukho sidalwa singabonakaliyo emehlweni akhe; izinto zonke ke zize; zityhilekile, emehlweni alowo esinokuthana ni naye.” (Hebhere 4:13) IBhayibhile iyasiqinisekisa: “Osigubungelayo isono sakhe akayi kuba nampumelelo.” (IMizekeliso 28:13) Ekuhambeni kwexesha kuya kubhencwa okubi. Ubani akanakumdyobh’ intshongo emehlweni uYehova. IMizekeliso 3:7 ithi: “Musa ukuba sisilumko kwawakho amehlo; yoyika uYehova usuke entweni embi.” Kwakhona, khumbula ukuba “asezindaweni zonke amehlo kaYehova, abonisela abanobubi nabalungileyo.”—IMizekeliso 15:3.
Ngoko oselula okhankanywe ekuqaleni, kwanabathile abaliqela ababebandakanyeke kwizenzo eziphosakeleyo ezifihlakeleyo, wabhaqwa, waza yena namaqabane akhe bakhutshelwa ngaphandle kwebandla lamaKristu. Kamva bachacha ngokomoya baza babuyiselwa. Sekunjalo, hayi indlela awakufunda kabuhlungu ngayo oko kuthethwa kukunyaniseka!
‘Ukulungisa Imicimbi’ NoThixo
Kuthekani ukuba ubani ngandlel’ ithile sele ezingqine enganyanisekanga, mhlawumbi ngokwenza isenzo esiphosakeleyo? Kulula ukuziqhatha uze uzixelele ukuba akukho mfuneko yakuyilungisa imicimbi. Omnye oselula wabandakanyeka ngokufihlakeleyo ekuhenyuzeni wathi: “Ndabandisa ubulungiseleli bam basentsimini, ndicinga kuba oku ngandlel’ ithile kunokubuphelisa ububi.” Uhlanga oluneenkani lwakwaSirayeli ngokufanayo lwazama ukumanelisa uYehova ngokwenza amadini. Kodwa uYehova walwala uzinikelo olunjalo lokuhanahanisa. Wababongoza: “Zihlambeni; ziqaqambiseni; susani ububi beentlondi zenu phambi kwamehlo am; yekani ukwenza ububi.” UYehova wayeya kuwamkela amadini alo kuphela emva kokuba ‘lulungise imicimbi kunye naye.’ (NW) Oku kukwayinyaniso namhlanje ngabo basenokuba babandakanyeke ekwenzeni okubi.—Isaya 1:11, 15-18.
Ubani akanakulungisa imicimbi noYehova ngokusuka nje azityande igila kothile alingana naye. Oku kungenxa yokuba oontanga bakho abasoloko benikela olona ncedo lululo, ekubeni amaxesha amaninzi befana nawe ngokungabi namava ebomini. Okubaluleke ngakumbi kukuba, abanakusixolela isono sakho. NguThixo kuphela onokwenza oko. Ngoko ‘phalaza intliziyo yakho’ kuye ngokuvuma isono sakho. (INdumiso 62:8) Nangona usenokuba buhlungu ngokunzulu ngehambo yakho, qiniseka ukuba uYehova ‘uxolela ngokukhulu.’—Isaya 55:7.
Uza kufuna uncedo olongezelelekileyo. Omnye umKristu oselula owangenelwayo kuncedo olunjalo uyala ngolu hlobo: “Yazisa abazali bakho, yazisa abadala ngoko nangoko—kwasekuqaleni.” Ewe, abazali bakho basenokuba kwimeko elungileyo yokukunceda. ‘Banike intliziyo yakho,’ bazise ngako konke ngeengxaki zakho. (IMizekeliso 23:26) Banokulungiselela ukuba ufumane uncedo olubhekele phaya kubadala bebandla xa oko kuyimfuneko.—Yakobi 5:14, 15.
Ukubonakalisa Ukunyaniseka Kokwenene—Njani?
Kambe ke, bekuya kuba kuhle ngakumbi ukungaweli kwihambo yokunganyaniseki kwasekuqaleni. INdumiso 18:25 (NW) isixelela oku: “Konyanisekileyo [uYehova] uya kwenza ngokunyaniseka; kwigorha eligqibeleleyo uya kwenza ngokugqibeleleyo.” UYehova ubasikelela ngokutyebileyo abo bathi ngokunyaniseka balondoloze imilinganiselo ephakamileyo yokuziphatha.
Noko ke, zikhona nezinye iindlela ekunokuthi ukunyaniseka kwakho kubekwe eluvavanyweni ngazo. Ngokomzekelo, masithi umhlobo wakho uye waqalisa ikhondo eligwenxa. Ngaba ubuya kuvumela ukunyaniseka okungafanelekanga kuloo mhlobo kubalasele ngaphezu kokunyaniseka kwakho kuYehova? Isenzo sothando ibiya kuba kukuthetha naloo mhlobo uze umbongoze ukuxela lo mbandela kubazali bakhe okanye kubadala. Mxelele umhlobo wakho ukuba ukuba akakwenzi oko ngethuba elifanelekileyo, uya kunyanzeleka ukwenze ngokwakho. IMizekeliso 27:5 ithi: “Kulungile ukohlwayelwa ekuhleni ngaphezu kothando olusitheleyo.” Ngokunceda umhlobo wakho ngale ndlela, akubonakalisi nje ukunyaniseka kobuhlobo bakho kuphela kodwa ukwabonakalisa nobunzulu bokunyaniseka kwakho kuYehova.
Nokuba lunganjani na uvavanyo, amandla okubonakalisa ukunyaniseka asuka kulwalamano lobuqu olomeleleyo noYehova. Umthandazo onentsingiselo nokukhuthalela ufundisiso lobuqu kuyimfuneko ukuba siza kunandipha ulwalamano olunjalo. Okubangel’ umdla kukuba, lonke ulutsha olwaphambukayo olukhankanywe ngaphambilana lwavuma ukuba uqheliselo lwalo lokuthandaza nolofundisiso lobuqu lwaba ngumsina-ndozele—yaye ekuhambeni kwexesha lwaphela. UYehova wayeka ukuba ngowokwenene kulo, yaye ngokukhawuleza kwalandela ihambo engacocekanga. Ngaba, ngomthandazo nofundisiso lobuqu, uyalomeleza ulwalamano lwakho noYehova ukuze uhlale unyanisekile?
Liyinyaniso elokuba, ngamaxesha athile usenokuzibuza enoba uyaphoswa kusini na lixesha lokuzonwabisa. Elinye ibhinqa eliselula lathi, “Ngamanye amaxesha kubonakala ngokungathi abantu behlabathi bonwabile. Kodwa xa uphakathi kwabo, unokubona ukuba akukho lonwabo konke-konke.” Lalithetha ngokusuka kumava alo, ekubeni nalo lakhe labandakanyeka ekuziphatheni okubi ngokwesini, okwakhokelela ekumitheni nasekuqhomfeni. Ngoku lithi, “Ukuba senyanisweni kuyinkuselo”—eso sifundo lasifunda kabuhlungu. INdumiso 119:165 isikhumbuza ukuba “banoxolo olukhulu abawuthandayo umyalelo [kaThixo].”
Ngoko ke, yenza konke okusemandleni akho ukuhlala unyanisekile. Sebenzela ukwakha ulwalamano oluhlala luhleli noYehova. Kuthiye okubi uze unamathele kokulungileyo. (Roma 12:9) INdumiso 97:10 isixelela oku: “Bathandi bakaYehova kuthiyeni okubi. Umngcini wemiphefumlo yabenceba bakhe uya kubahlangula esandleni sabangendawo.” Ewe, njengomKristu oselula, uya kungenelwa kwinkuselo kaYehova uze unandiphe ubomi obungunaphakade ukuba uyaluphumelela uvavanyo lokunyaniseka kobuKristu.