Abavakalisi BoBukumkani Bayabalisa

Bakholosa NgoYehova

AMANGQINA KAYEHOVA ayalelwe nguYehova ukuba ashumayele iindaba ezilungileyo zoBukumkani ehlabathini lonke ukuze abantu beentlanga zonke bafumane ithuba lokwazi ngehlabathi elitsha likaThixo. Kumazwe athile, ngokufuthi ngokuphenjelelwa ngabefundisi beNgqobhoko, umsebenzi wethu ubekelwa imiqathango. Oku kunjalo kwilizwe elithile laseAfrika. Kodwa amaNgqina kaYehova apho enza njengoKumkani uDavide. Wathi: “Ndikholose ngoThixo, ndingoyiki.” (INdumiso 56:11) Amava abazalwana bethu kwelo lizwe abonisa ukuba bakholose ngoYehova ibe bayaqhubeka besenza umsebenzi wakhe obalulekileyo.

INgqina eliyinqununu yesikolo esithile lema kwelokuba liya kuthobela ‘uThixo njengomlawuli kunokuba live abantu,’ livakalisa ubundilele balo kwimicimbi kaRhulumente. (IZenzo 5:29) Labethwa kakubi yaye kwakulindeleke ukuba ligwetywe njengomngcatshi. Wonk’ ubani wayecinga ukuba liza kubulawa. Noko ke, eli Ngqina lalikholose ngoYehova. Lahlala lithembekile laza lacacisa izizathu ezingokwesazela zokuma kwalo. Waba yintoni umphumo? Lavakaliswa lingenatyala laza labuyiselwa kwidolophu yakowalo, apho athi amagosa asebuRhulumenteni awayelibethile angxengxeza. Eli Ngqina lithembekileyo labuyiselwa kumsebenzi wokufundisa laza lanyuselwa laba ngumhloli wezikolo!

Umlungelelanisi wekomiti yesinye isikolo wagxothisa umfundisi-ntsapho oliNgqina. Emva kwenyanga lo mlungelelanisi wamkela incwadi ethi Unokuphila Ngonaphakade KwiParadisi Esemhlabeni kuvulindlela okhethekileyo waza wavuma ukuqhutyelwa isifundo seBhayibhile. Emva kokugqiba isahluko 6, wazibeka phantsi iintambo njengomlungelelanisi wekomiti yesikolo, waza yena nomfazi wakhe baqalisa ukubakho kuzo zonke iintlanganiso zamaNgqina kaYehova. Ngenye intsasa yangeCawa umfundisi-ntsapho owagxothwayo ngovuyo wothuswa kukudibana nomntu owayemgxothisile nokufumanisa ukuba wayesendleleni yokuba ngumzalwana wokomoya.

Amanye amava avela kwakweli lizwe abonisa indlela amaNgqina kaYehova abangela ahlonelwe ngayo amalungiselelo kaYehova nendlela asebenzela ngayo ukugcina intlangano icocekile. Uvulindlela okhethekileyo owayesebenza intsimi ekwanti wachaswa kakhulu. Ekubeni wayengowesinye isizwe yaye evela komnye ummandla, iintshaba zenyaniso zazifuna ukumgxotha kuloo lali. Noko ke, inkosi yelali yalatha ihambo yakhe entle nemiphumo emihle yobulungiseleli bakhe yaza ayavuma ukuba agxothwe. Le nkosi yayiphawule ukuba ukususela ekufikeni kwalo vulindlela ukhethekileyo, abantu babewahlonela amagunya alawulayo ngokuhlawula iirhafu zabo nokwenza umsebenzi wokulungisa indlela kube kanye ngeveki.—Roma 13:1, 7.

Kwathi ke, ngobunye ubusuku elinye iNgqina labanjwa likrexeza nomfazi ongeloNgqina. Eli hlazo laba ngundaba-mlonyeni, waza uvulindlela okhethekileyo wabizelwa enkosini, eyamngxolisayo, isithi: “Nanku umzalwana wakho obanjwe ekrexeza. Nina maNgqina kaYehova anahlukanga nganto kwezinye iinkonzo.” Noko ke, uvulindlela okhethekileyo wacacisa wathi: “Nangona singafezekanga, sahlukile kwezinye iinkonzo kuba asizibethi ngoyaba izenzo zabo benza izono ezinzulu.”

INgqina elakrexezayo lahlala ithuba elithile entolongweni laza lahlawula nemali. Ngaphezu koko, lasuswa kubudlelane ebandleni njengomenzi wobubi ongaguqukiyo. Esi senzo sayichukumisa inkosi saza sabaval’ umlomo abo babegculela amaNgqina kaYehova. Inkosi yathi: “Musani ukuthetha kakubi ngamaNgqina kaYehova. Anenyaniso. Isenzo esinje asithatyathwa zezinye iinkonzo.”

AmaNgqina athembekileyo kwelo lizwe alandela isibongozo esikwiNdumiso 37:3 esithi: “Kholosa ngoYehova, wenze okulungileyo; lime ilizwe, ulandelane nokuthembeka.” Ngaba siya kukholosa ngoYehova njengokuba esenza la maKristu?