Abavakalisi BoBukumkani Bayabalisa

Boyiseka EKathmandu

UMZOBI othile olibhinqa waqalisa iphulo lakhe lokufuna inyaniso eBrittany, eFransi, ngowe-1980. Waba neengxubusho namalungu eecawa zomoya wafunda ngeenkonzo zaseMpuma—enganeliseki. Emva koko waba neengxoxo nomnye wamaNgqina kaYehova kodwa wakhawuleza waziyeka. Wadibana nomnye umzobi oyindoda waza wasebenza yaye wahlala kunye naye.

Kungekudala emva koku esi sibini singatshatanga sagqiba kwelokuba sityelele eNepal. Sasichukumiseke gqitha bubuhle noxolo lwelo lizwe kodwa sadana kukungabikho kokusesikweni esakufumanisayo kwinkqubo yokucalulwa kwabantu ngokweendidi ezahlukeneyo eyabonakala ingekho sesikweni xa bethelekisa neyaseNtshona.

Ekubuyeni kwaso eFransi, eli bhinqa lacebisa iqabane lalo ukuba bafundisise iBhayibhile kunye yaye, lingalindelanga lavuma. Baqhagamshelana nelaa Ngqina elalikhe laneengxubusho nalo kwiminyaka emibini eyadlulayo. Ekuqaleni babesebenzisa iBhayibhile kuphela, kodwa ekugqibeleni bavuma ukusebenzisa incwadi ethi Inyaniso Ekhokelela Kubomi Obungunaphakade yaye kamva incwadi ethi Unokuphila Ngonaphakade KwiParadisi Esemhlabeni. Kwithuba nje elingangonyaka bakuyeka ukusebenzisa iziyobisi.

Emva kokuba sityelele eNepal kwakhona kangangeenyanga ezimbini, esi sibini sabuyela eFransi apho saqhubeka sifundisisa. Sakuyeka ukutshaya nokuya kwiindawo ezithengisa iziselo ezinxilisayo nakwiindawo zokuzonwabisa zasebusuku yaye saqalisa ukuya kwiintlanganiso zamaNgqina kaYehova. Noko ke, xa sagqiba ukufunda incwadi ethi Unokuphila, sagqiba kwelokuba siyeke ukufundisisa.

Kwakhona sahamba saya eNepal saza sahlala endlwini encinane phantsi kweeNtaba zeHimalaya. Ngenye imini indoda ekhulileyo, inxibe isuti neqhina, yankqonkqoza endlwini yaso. Eli bhinqa lalilodwa endlwini, yaye lacinga ukuba kumele ukuba ngumthengisi wemizobo uze kubona imizobo yabo. Lothuka gqitha kukufumanisa ukuba yayiliNgqina elalithunyelwe ngulaa mntu wayefundisisa kunye nalo eFransi. Kungabanga thuba lide iqabane lalo labuyela ekhaya, yaye emva koko kwaqalisa ingxubusho eyathabatha iiyure ezimbini.

Iintsuku ezimbalwa kamva, esi sibini saya kwiintlanganiso zamaNgqina kaYehova, eKathmandu yaye sasichukumisekile kukucoceka kwabo babelapho. Saphawula uthando lobuzalwana nolonwabo olufana nolo sasilubone ezintlanganisweni eFransi. Sakwaphawula ubunye babantu baseNepal ababekho apho, nangona aba babephantsi kwenkqubo yokucalulwa kwabantu ngokweendidi ezahlukeneyo. Ngoku saseyisekile kukuba le yayimele ukuba yintlangano kaYehova.

Kwiinyanga kamva sabuyela eFransi saza ngoko nangoko saphinda saqalisa isifundo saso seBhayibhile yaye saya nasezintlanganisweni. Satshata, saqalisa ukuba nesabelo kumsebenzi wokunikela ubungqina, yaye ekugqibeleni sabhaptizwa. Indoda ngoku isisicaka solungiselelo, yaye umfazi wayo uba nesabelo rhoqo kwinkonzo yobuvulindlela babancedani. Enyanisweni, abo baneentliziyo ezilungileyo baya kuncedwa ngumoya kaYehova ukuba benze inkqubela baze babe ngabanquli bakhe.—ISityhilelo 7:15-17.

[Ibhokisi/Imaphu ekwiphepha 9]

ENEPAL

Inani Labemi - 17 712 221

Incopho Yabavakalisi Ngowe-1990 - 63

Umlinganiselo, Umvakalisi Omnye Kwabangama - 281 146

Umlinganiselo Woovulindlela - 10

Inani Lamabandla - 1

Umlinganiselo Wezifundo ZeBhayibhile - 107

Abezileyo Esikhumbuzweni - 220

[Imaphu]

(Ukuba ufuna inkcazelo ehlahlelwe kakuhle, yiya kwimpapasho)

NEPAL

INDIA

[Umfanekiso okwiphepha 9]

Indawo Yentengiso yaseKathmandu, eNepal