‘Iindyikitya Zezifo Kwiindawo Ngeendawo’
IINDYIKITYA zezifo ezingenakuthelekiswa nanto zaziyinkalo eyaxelwa kwangaphambili ‘yomqondiso wokufika [kukaYesu Kristu] nowokupheliswa kweli phakade.’ (Mateyu 24:3) Umbhali wencwadi yeVangeli uLuka wongezelela le nkcazelo engakhankanywanga kwiingxelo zikaMateyu noMarko. (UMateyu, isahluko 24 nesama-25; uMarko, isahluko 13) Ukuqhambuka koobhubhani nezifo ezibulalayo kwakuya kubakho “kwiindawo ngeendawo” ngemihla yokugqibela. (Luka 1:3; 21:11) Zinokuvela phi izifo ezinjalo?
Iphephandaba iScience News lithi: “Izazinzulu zazi iintsholongwane eziliqela ezincathame kwimimandla ekweleenjiko ezinokuthi—ngoncedo nje olungephi lwamandla endalo—zisube ubomi babantu abaninzi kunokuba esenza ubhubhani onguGawulayo. Abaphengululi bathi, kwanokuba uphando lwehlabathi ngeentsholongwane lunokuqhubeka lungaguquki, imimandla ekweleenjiko sele ‘inamandla’ awaneleyo okuvelisa iintsholongwane ezinokutshabalalisa abemi abaninzi boMhlaba.”
Into eyenza ukuba ixesha lethu libe sesichengeni ngakumbi kukwanda kwabemi bomhlaba ngokukhawuleza neemfuno ezinkulu zomhlaba ozeleyo. IScience News ithi: “Imbali ibonisa ukuba ukuqhambuka kweentsholongwane ezingcungcuthekisa ubomi ngokufuthi kuye kwalandela emva kokuba abantu beye bafudukela kwimimandla engakhange ihlolwe okanye xa iimeko zokuphila ezidolophini zisiba mbi ngohlobo lokuba iintsholongwane zifumane iindawo ezintsha ezinokuphila kuzo.” Njengoko abantu bengena kwimimandla eneentsholongwane ababengakwazi ukuyifikelela ngaphambili, ngokufuthi umphumo uba ngoobhubhani abatsha beentsholongwane. Kwenzeka okufanayo njengoko izinambuzane zisasazeka xa imozulu yomhlaba iguquka. Eli phephancwadi lithi: “Ukongezelela, ubugcisa bale mihla bezonyango obufana notofelo-gazi nokufakelwa kwamalungu omzimba kuye kwavelisa iindlela ezintsha zokudlulisela iintsholongwane phakathi kwabantu. Kunjalo nangeenguqulelo ezahlukahlukeneyo ezingokwasentlalweni nezingokokuziphatha, ukususela koonyawo lwambeth’ indlela abazizityebi nabantu abadumileyo ukusa ekubolekisaneni ngeenaliti phakathi kwamakhoboka eziyobisi.”
Eli nqaku longezelela lisithi: “Imbali yakutshanje inikela imizekelo ecacileyo engokuliwa kweentsholongwane kumazwe akwanti ebezinokuvelisa oobhubhani abangakumbi kwikamva.” Imizekelo yazo yile: intsholongwane eyiMarburg, eyayingaziwa ngaphambili, intsholongwane ebulalayo ekwimimandla ekweleenjiko yazinxunguphalisa izazinzulu ezininzi zaseNtshona Jamani ekupheleni kweyee-1960; intsholongwane ebangela umkhuhlane ofumaneka kwiNtlambo enguMwonyo eye yasulela izigidi yaza yabulala amawaka eYiputa ngowe-1977; intsholongwane eyiEbola ekwimimandla ekweleenjiko eye yasulela abantu abangaphezu kwewaka eZaire naseSudan ngowe-1976 yaza yabulala abamalunga nama-500, abaninzi kubo ingoogqirha nabongikazi ababenyamekela amaxhoba ayo.
Iintlaselo ezibulalayo zeentsholongwane kunqabile ukuzixela kusengaphambili. IScience News ithi: “Ngokomzekelo, ngowe-1918 uhlobo oluthile lomkhuhlane obulalayo lwasasazeka kulo lonke ihlabathi, lubulala abantu abaqikelelwa kuma-20 ezigidi. Kutshanje, ukuvela kwentsholongwane ebantwini esenokuba ngaphambili yayifumaneka kuphela kwiinkawu zaseAfrika kuliqubule lingalindelanga ihlabathi. Intsholongwane kaGawulayo ngoku iye yasulela abantu abazizigidi ezi-5 ukusa kwezili-10 kumazwe ali-149, ngokoqikelelo lweNtlangano Yehlabathi Yezempilo. Kodwa phezu kwako nje ukuxhomis’ amehlo kwalo bhubhani wakutshanje, izazi ngeentsholongwane zinoloyiko lokuba siseza kubona izinto ezoyikisa ngakumbi.”
Zinxunguphalisa zinjalo iindyikitya zezifo ndawonye nezinto ezifana neemfazwe, iindlala neenyikima ezinkulu zomhlaba, ziyinxalenye yomqondiso oyintlanganisela wobukho bukaYesu ekuzuko loBukumkani. (Marko 13:8; Luka 21:10, 11) Kwakhona ezi zinto zisisizathu sovuyo, kuba uLuka wongezelela amazwi kaYesu athi: “Ke kaloku, zakubon’ ukuba ezi zinto ziyaqala ukuhla, sukani nime, niziphakamise iintloko zenu, ngenxa yokuba iyasondela inkululeko yenu.”—Luka 21:28.