Ukuhlakulela Isiqhamo Sokuzeyisa
“EsoMoya isiqhamo luthando, uvuyo, uxolo, ukuzeka kade umsindo, ububele, ukulunga, intembeko, ubulali, ukuzeyisa; akukho mthetho uchasene nezinto ezinjalo.”—GALATI 5:22, 23.
1. Ngoobani abaye basibekela eyona mizekelo mihle yokuzeyisa, njengoko kuboniswa ziziphi izibhalo?
UYEHOVA UTHIXO noYesu Kristu basibekele eyona mizekelo mihle yokuzeyisa. Ukususela ekubeni umntu wathi akathobela kumyezo wase-Eden, uYehova uye waqhubeka ebonakalisa olu phawu. (Thelekisa uIsaya 42:14.) Izihlandlo ezisithoba kwiZibhalo zesiHebhere sifunda ukuba “uzeka kade umsindo.” (Eksodus 34:6) Kufuneka ukuzeyisa ukuze enze oko. Yaye ngokuqinisekileyo uNyana kaThixo wabonakalisa ukuzeyisa okukhulu, kuba wayesithi “etshabhiswa, angaphindezeli atshabhise.” (1 Petros 2:23) Ukanti, uYesu wayenokumcela uYise osezulwini ukuba amxhase ‘ngemikhosi yezithunywa zezulu engaphezu kweshumi elinamibini.’—Mateyu 26:53.
2. Yiyiphi imizekelo emihle esiyinikiweyo eZibhalweni yabantu abangafezekanga ababonakalisa ukuzeyisa?
2 Sikwanayo nemizekelo emihle eseZibhalweni yabantu abangafezekanga ababonakalisa ukuzeyisa. Ngokomzekelo, olu phawu lwabonakaliswa kwisiganeko esaziwayo kubomi bukaYosefu, unyana wosolusapho onguYakobi. Okunjani kona ukuzeyisa okwabonakaliswa nguYosefu xa umkaPotifare wayezama ukumlukuhla! (Genesis 39:7-9) Kwakukwakho nomzekelo omhle wabafana abane abangamaHebhere ababonakalisa ukuzeyisa ngokwala ukutya ukudla kokumkani waseBhabhiloni ngenxa yoko kwakusalelwa nguMthetho kaMoses.—Daniyeli 1:8-17.
3. Ngoobani abaphawulekayo ngokuziphatha kwabo okuhle, njengoko kuboniswa bubuphi ubungqina?
3 Ukuze sifumane imizekelo yezi mini yokuzeyisa, sinokwalatha kumaNgqina kaYehova xa ewonke. Akufanele ukunconywa njengoko yenzayo iNew Catholic Encyclopedia—isithi “alelinye lawona maqela aziphethe kakuhle ehlabathini.” Umqeqeshi kwiyunivesithi yakwiiPhilippines wathi “amaNgqina akuqhelisela ngenyameko oko akufunde eZibhalweni.” Ethetha ngendibano yamaNgqina eyayiseWarsaw ngowe-1989, unondaba wasePoland wabhala oku: “Abantu abangama-55 000 abazange batshaye nomdiza lo omnye kangangeentsuku ezintathu! . . . Le mbonakaliso yengqeqesho engenakwenziwa ngumntu ngokwakhe yandichukumisa kakuhle ibe yayindikhwankqisile.”
Ukoyika UThixo Nokuthiya Okubi
4. Yiyiphi enye yezona zinto ziluncedo ekubonakaliseni ukuzeyisa?
4 Enye yezona zinto zinokusinceda ukuhlakulela ukuzeyisa kukoyika uThixo, ukuba nemvakalelo efanelekileyo yokoyika ukungamkholisi uBawo wethu wasezulwini oluthando. Indlela okufanele kubaluleke ngayo kuthi ukumoyika kwethu kwentlonelo uThixo inokubonwa kwisibakala sokuba iZibhalo zikukhankanya izihlandlo ezininzi. Xa kanye uAbraham wayeseza kunikela ngonyana wakhe uIsake, uThixo wathi: “Musa ukusisa isandla sakho kumfana, musa ukumenza nto, kuba ndiyazi ngoku ukuba uyamoyika uThixo; akunqabanga nonyana wakho kum, emnye kuwe.” (Genesis 22:12) Ngokungathandabuzekiyo uAbraham wayecinezelekile ngokweemvakalelo, ngoko kumele ukuba kwafuneka abonakalise ukuzeyisa okuncamisileyo ukuze awuphumeze umyalelo kaThixo ukusa kwinqanaba lokuphakamisa isitshetshe ukuba amsike unyana wakhe oyintanda uIsake. Ewe, ukoyika uThixo kuya kusinceda sibonakalise ukuzeyisa.
5. Ukuthiya okubi kunayiphi indima ekubonakaliseni kwethu ukuzeyisa?
5 Into ehlobene gqitha nokoyika uYehova kukuthiya okubi. Sifunda oku kwiMizekeliso 8:13: “Ukoyika uYehova kukuthiya into embi.” Kwakhona, ukuthiya okubi kuthi kusincede sibonakalise ukuzeyisa. Ngokuphindaphindiweyo, iZibhalo zisixelela ukuba sikuthiye—ewe, sikucekise—okubi. (INdumiso 97:10; Amosi 5:14, 15; Roma 12:9) Ngokufuthi okubi kuyayolisa, kuyahenda, kunomtsalane gqitha kangangokuba simele nje sikuthiye ngokupheleleyo ukuze sikuxhobele ukukuxhathisa. Ukukuthiya ngolo hlobo okubi komeleza uzimiselo lwethu lokubonakalisa ukuzeyisa kuze ngaloo ndlela kusikhusele.
Ukuzeyisa, Ikhondo Lobulumko
6. Kutheni kulikhondo lobulumko ukuthintela utyekelo lwethu lokuzingca ngokubonakalisa ukuzeyisa?
6 Enye into eluncedo kakhulu ekubonakaliseni kwethu ukuzeyisa kukuxabisa ubulumko bokubonakalisa olu phawu. UYehova uyasicela ukuba sibonakalise ukuzeyisa ukuze izinto zisihambele kakuhle. (Thelekisa uIsaya 48:17, 18.) ILizwi lakhe liqulethe imizekelo emininzi yesiluleko esibonisa indlela ekububulumko ngayo ukuthintela utyekelo lwethu lokuzingca ngokubonakalisa ukuzeyisa. Ngokucacileyo asinakuyiphepha imithetho kaThixo engaguquguqukiyo. ILizwi lakhe lisixelela oku: “Into athe wahlwayela yona umntu, wovuna kwayona; ngokuba lowo uhlwayelela eyakhe inyama, wovuna ukonakala ngokwasenyameni; lowo uhlwayelela uMoya ke, wovuna ubomi obungunaphakade ngokwaseMoyeni.” (Galati 6:7, 8) Umzekelo ocacileyo ngulowo wokudla nokusela. Izigulo ezininzi zibangelwa kukuba abantu badla okanye basela ngokugqithiseleyo. Konke ukuyekelela okunjalo ekuzingceni kubangela umntu angazihloneli. Ngaphezu koko, ukuba umntu uyazivumela alawulwe kukuzingca kwakhona wonakalisa ulwalamano lwakhe nabanye. Okona kubi kunako konke kukuba ukungakwazi ukuzeyisa konakalisa ulwalamano lwethu noBawo wethu wasezulwini.
7. Uthini umxholo oyintloko wencwadi yeMizekeliso, njengoko kuboniswa ziziphi iindinyana zeBhayibhile?
7 Ngoko ke, simele sihlale sizixelela ukuba ukuzingca kukuzibetha ngenyheke etyeni. Ingongoma ebalaseleyo yencwadi yeMizekeliso, ebethelela ukuziqeqesha, ikukuba ukuzingca akunamvuzo yaye kububulumko ukubonakalisa ukuzeyisa. (IMizekeliso 14:29; 16:32) Yaye makuphawulwe ukuba ukuziqeqesha kubandakanya okungakumbi kunokuphepha nje okubi. Kwakhona ukuziqeqesha, okanye ukuzeyisa, kuyafuneka ukuze senze oko kufanelekileyo, nto leyo esenokuba nzima ngenxa yokuba oku kuchasene notyekelo lwethu lwesono.
8. Ngawaphi amava abalaselisa ubulumko bokubonakalisa ukuzeyisa?
8 Okuzekelisa ubulumko bokuzeyisa ngumzekelo womnye wamaNgqina kaYehova owayelindile emgceni ebhankini xa enye indoda yafika yema phambi kwakhe. Nangona iNgqina lathi laphazamiseka kancinane, labonakalisa ukuzeyisa. Kanye kwangaloo mini iNgqina lalimele liye kubonana nononjineli othile owayefanele atyobele iiplani ezithile zeHolo yoBukumkani. Ibe kwathi kanti ngubani lo nonjineli? Kaloku, yayikwayilaa ndoda eyayifike yema phambi kwalo ebhankini! Lo nonjineli akazange aphelele nje ekubeni ngonobuhlobo gqitha kodwa walihlawulisa elo Ngqina imali engaphantsi kwaleyo iqhele ukuhlawulwa. Hayi indlela elavuya ngayo eli Ngqina kuba lalibonakalise ukuzeyisa ngaphambilana ngaloo mini, lingazivumeli ukuba licatshukiswe!
9. Liliphi ikhondo lobulumko esinokulilandela xa sihlangabezana nokunyeliswa kubulungiseleli?
9 Izihlandlo ezininzi xa sisiya kwindlu ngendlu sishumayela iindaba ezilungileyo zoBukumkani bukaThixo okanye simi esitratweni sizama ukutsalel’ ingqalelo yabantu abadlulayo kwisigidimi sethu, siyanyeliswa. Liliphi ikhondo lobulumko? IMizekeliso 15:1 inikela le ngxelo yobulumko: “Impendulo ethambileyo ibuyisa ubushushu.” Ngamany’ amazwi, sifanele sibonakalise ukuzeyisa. Kwaye asingomaNgqina kaYehova kuphela akufumanise oku kuyinyaniso koko nabanye bakubonile. Iingcali zezonyango ziya zikuqonda ngakumbi nangakumbi ukubaluleka kokuzeyisa njengeyeza.
Uthando Lokungazingci Luluncedo
10, 11. Kutheni uthando luluncedo lokwenene ekubonakaliseni ukuzeyisa?
10 Inkcazelo kaPawulos ngothando ekweyoku-1 kwabaseKorinte 13:4-8 ibonisa ukuba amandla alo anokusinceda sibonakalise ukuzeyisa. “Uthando luzeka kade umsindo.” Kufuneka ukuzeyisa ukuze ukwazi ukuzeka kade umsindo. “Uthando alunamona; uthando alugwagwisi; alukhukhumali.” Uphawu lothando luyasinceda silawule iingcinga neemvakalelo zethu, sithintele naluphi na utyekelo lokuba nomona, ukuzigwagwisa okanye ukuzikhukhumalisa. Uthando lusishukumisela ukuba senze kanye okwahlukileyo koko, lusenza silulame, sibe ngabathobekileyo njengoko uYesu wayenjalo.—Mateyu 11:28-30.
11 UPawulos uhlabela mgama esithi uthando “alwenzi okuziintloni.” Kwakhona kufuneka ukuzeyisa ukuze siziphathe ngokufanelekileyo ngamaxesha onke. Uphawu lothando lusibangela singabawi, ‘singafuni okukokwethu kodwa.’ Uthando “alucaphuki.” Hayi indlela ekulula ngayo ukucatshukiswa koko abanye bakuthethayo okanye abakwenzayo! Kodwa uthando luya kusinceda sibonakalise ukuzeyisa size singathethi okanye senze izinto esiya kuzisola ngazo kamva. Uthando “alunanzondo.” Ngokwemvelo abantu batyekele ekufukameni inqala okanye ingqumbo. Kodwa uthando luya kusinceda sizishenxise iingcinga ezinjalo kwiingqondo zethu. Uthando “aluvuyeli kungalungisi.” Kufuneka ukuzeyisa ukuze singayoliswa kokubi, njengezinto ezibonisa amanyala okanye amabali achukumisa iimvakalelo aqhutywa ngokweziqendu nathob’ isidima kamabonwakude. Kwakhona uthando “luthwala iinto zonke” yaye “lunyamezela iinto zonke.” Kufuneka ukuzeyisa ukuze ukwazi ukunyamezela, ukunyamezela izilingo okanye izinto ezingumthwalo nokungazivumeli ukuba zisidimaze, zisibangele ukuba siziphindezelele, okanye sifune ukuyeka ukukhonza uYehova.
12. Yiyiphi enye indlela yokubonakalisa uxabiso lwethu ngako konke oko sikwenzelwe nguYehova uThixo noYesu Kristu?
12 Ukuba simthanda ngokwenene uBawo wethu wasezulwini yaye sizixabisa iimpawu zakhe ezintle nako konke asenzele kona, siya kufuna ukumkholisa ngokubonakalisa ukuzeyisa ngawo onke amaxesha. Kwakhona, ukuba siyithanda ngokwenene iNkosi yethu, uYesu Kristu, ibe sikuxabisa konke oko isenzele kona, siya kuwuthobela umyalelo wayo ‘wokuba sithabathe umthi wethu wentuthumbo size siqhubeke siyilandela.’ (Marko 8:34, NW) Ngokuqinisekileyo oko kufuna ukuba sibonakalise ukuzeyisa. Nokuthanda abazalwana noodade bethu abangamaKristu kuya kusibangela singabenzakalisi ngokuhamba ngekhondo lokuzingca.
Ukholo Nokuthobeka Kuluncedo
13. Kutheni le nto ukholo lunokusinceda ukuba sibonakalise ukuzeyisa?
13 Enye into eluncedo kakhulu ekubonakaliseni ukuzeyisa kukuba nokholo kuThixo nakumadinga akhe. Ukholo luya kusenza sikwazi ukukholosa ngoYehova size silindele ixesha lakhe elililo lokuzinzisa imicimbi. Umpostile uPawulos uphuhlisa ingongoma efanayo xa esithi kumaRoma 12:19: “Musani ukuziphindezelela, zintanda; . . . kuba kubhaliwe kwathiwa, Impindezelo yeyam, kuya kubuyekeza mna, itsho iNkosi.” Kule nkalo, nokuthobeka kunokusinceda. Ukuba sithobekile, asiyi kukhawuleza sicatshukiswe kukoniwa okuthile okucingelwayo okanye okukhoyo ngokwenene. Asiyi kudyuduzela siziphindezelele, koko siya kubonakalisa ukuzeyisa size sivume ukulindela kuYehova.—Thelekisa INdumiso 37:1, 8.
14. Ngawaphi amava abonisa ukuba kwanabo bangakwaziyo nje konke konke ukuzeyisa bangakuzuza?
14 Into yokuba sinokukufunda ukubonakalisa ukuzeyisa yabonakaliswa kakuhle kumava endoda eyayithand’ ukuba lugcwabevu ngumsindo. Yavukwa nguloo msindo wayo kangangokuba xa kwakubizwe amapolisa ngenxa yengxwabangxwaba eyayiyenza yona noyise, yabetha amapolisa amathathu yawashiya elutywantsi ngaphambi kokuba amanye ayibambe! Noko ke, ekuhambeni kwexesha yadibana namaNgqina kaYehova yaza yafunda ukuzeyisa, esinye seziqhamo zomoya kaThixo. (Galati 5:22, 23) Namhlanje, kwiminyaka engama-30 kamva, le ndoda isakhonza uYehova ngokuthembeka.
Ukuzeyisa Kwisangqa Sentsapho
15, 16. (a) Yintoni eya kuyinceda indoda ibonakalise ukuzeyisa? (b) Ukuzeyisa kufuneka ngokukodwa kwiyiphi imeko, njengoko kubonwa kwawaphi amava? (c) Kutheni le nto umfazi kufuneka abonakalise ukuzeyisa?
15 Ngokuqinisekileyo ukuzeyisa kuyafuneka kwisangqa sentsapho. Ukuze indoda imthande umfazi wayo njengoko izithanda ifanele izilawule kakuhle iingcinga, amazwi nezenzo zayo. (Efese 5:28, 29) Ewe, kufuneka amadoda abe nokuzeyisa ukuze akwazi ukuthobela amazwi ompostile uPetros kweyoku-1 kaPetros 3:7: “Nina madoda, hlalani nabo ngokokwazi.” Indoda ekholwayo ifanele ibonakalise ukuzeyisa ngokukodwa xa umfazi wayo engakholwa.
16 Ngokomzekelo: Kwakukho umdala owayenomfazi ongunogqwashu nongakholwayo. Noko ke, lo mdala wabonakalisa ukuzeyisa, ibe oku kwamnceda kakhulu kangangokuba ugqirha wakhe wamxelela oku: “John, mhlawumbi uyindoda enomonde gqitha ngemvelo okanye ukuba akunjalo unokuba ulilungu lonqulo olunamandla.” Ngokwenene unqulo lwethu lunamandla, kuba “uThixo akasinikanga moya wabugwala; wasinika owamandla, nowothando, nowesidima,” osincedayo ukuba sibonakalise ukuzeyisa. (2 Timoti 1:7) Ukongezelela koko, kufuneka umfazi abe nokuzeyisa ukuze ayithobele indoda yakhe, ngokukodwa ukuba ayikholwa.—1 Petros 3:1-4.
17. Kutheni ukuzeyisa kubalulekile nje kulwalamano lwabazali nabantwana?
17 Kwakhona ukuzeyisa kuyafuneka kulwalamano lwabazali nabantwana. Ukuze babe nabantwana ababonakalisa ukuzeyisa, abazali bamele baqale ngokumisela umzekelo omhle. Kwaye xa kufuneka abantwana bohlwaywe ngandlel’ ithile, isohlwayo sifanele sidluliselwe ngokuzola nangothando, nto leyo efuna ukuzeyisa kokwenene. (Efese 6:4; Kolose 3:21) Kwakhona, ukuze abantwana babonakalise ukuba babathanda ngokwenene abazali babo bamele babathobele, ibe ngokuqinisekileyo ukuze uthobele kufuneka ukuzeyisa.—Efese 6:1-3; thelekisa eyoku-1 kaYohane 5:3.
Ukusebenzisa Uncedo UThixo Alulungiseleleyo
18-20. Ziziphi iinkalo ezintathu zamalungiselelo okomoya esimele sizisebenzise ngokupheleleyo ukuze sihlakulele iimpawu eziya kusinceda sibonakalise ukuzeyisa?
18 Ukuze sihlakulele ukoyika uThixo, uthando lokungazingci, ukholo, ukuthiya okubi nokuzeyisa, sifanele siwasebenzise ngokupheleleyo onke amalungiselelo kaYehova uThixo okusinceda. Makhe siqwalasele iinxalenye ezintathu zamalungiselelo okomoya anokusinceda sibonakalise ukuzeyisa. Okokuqala, kukho ilungelo elixabisekileyo lomthandazo. Singaze sixakeke gqitha ngokokude singathandazi. Ewe, sifanele sinqwenele ‘ukuthandaza singayeki,’ ‘ukuzingisa emthandazweni.’ (1 Tesalonika 5:17; Roma 12:12) Masikuthandazele ukuhlakulela ukuzeyisa. Kodwa xa siye sasilela ukubonakalisa ukuzeyisa, ngesimo sengqondo sokuguquka masimbongoze uBawo wethu wasezulwini ukuba asixolele.
19 Inkalo yesibini yokusinceda ukubonakalisa ukuzeyisa kukuzuza uncedo olufumaneka ngokuzondla ngeLizwi likaThixo nangoncwadi olusenza siziqonde size sikwazi ukuzisebenzisa iZibhalo. Kulula gqitha ukuyityeshela le nkalo yenkonzo yethu engcwele! Simele sibonakalise ukuzeyisa size sihlale sizixelela ukuba akukho mbandela sinokuwufunda ubaluleke ngaphezu kweBhayibhile nombandela esiwulungiselelwa ‘ngumkhonzi othembekileyo noqondayo,’ kwaye ngenxa yoko umele ube kwindawo yokuqala. (Mateyu 24:45-47) Kuye kwatshiwo ngokufanelekileyo ukuba asinakukwazi ukwenza yonke into kubomi bemihla ngemihla, kodwa simele sikukhethe oko siya kulichithela kuko ixesha lethu. Ngaba ngokwenene singamadoda namabhinqa atyekele kwizinto zokomoya? Ukuba siyiphaphele intswelo yethu yokomoya, siya kubonakalisa ukuzeyisa okufunekayo ukuze sicime umabonwakude size silungiselele iintlanganiso zethu okanye sifunde IMboniselo esenokuba isandul’ ukufika ngeposi.
20 Okwesithathu, kukuzinyamekela kakuhle iintlanganiso zebandla neendibano zethu. Ngaba sivakalelwa kukuba simele sibekho kuzo zonke ezi ntlanganiso? Ngaba siza sikulungele ukuba nenxaxheba size ke senjenjalo xa kuvela ithuba? Umlinganiselo esiya komelezwa ngawo kuzimiselo lwethu lokubonakalisa ukuzeyisa kuzo zonke iimeko uxhomekeke kumlinganiselo esizinyamekela kakuhle ngawo iintlanganiso zethu.
21. Yiyiphi eminye yemivuzo esinokuyinandipha ngokuhlakulela isiqhamo somoya sokuzeyisa?
21 Yiyiphi imivuzo esinokuyilindela ngokuzabalazela kwethu ukubonakalisa ukuzeyisa ngamaxesha onke? Phakathi kwezinye izinto, asisokuze sivune iziqhamo ezikrakra zokuzingca. Siya kuba ngabantu abazihlonelayo nabanesazela esicocekileyo. Siya kuzisindisa kwiinkathazo ezihleli zininzi size sihlale sikwindlela esa ebomini. Ngapha koko, siya kukwazi ukubenzela ezona zinto zintle abanye. Ngaphezu kwako konke, siya kuba sithobela IMizekeliso 27:11: “Yiba nobulumko, nyana wam, uyivuyise intliziyo yam; ukuze ndimphendule ngezwi ondingcikivayo.” Ibe lowo ngowona mvuzo mkhulu esinokuwufumana—ilungelo lokuvuyisa intliziyo kaBawo wethu wasezulwini, uYehova!
Uyakhumbula Na?
◻ Ukoyika uThixo kusinceda njani ekubonakaliseni ukuzeyisa?
◻ Kutheni le nto uthando lusinceda sibonakalise ukuzeyisa?
◻ Ukuzeyisa kufak’ isandla njani kulwalamano lwentsapho?
◻ Ngawaphi amalungiselelo esimele siwasebenzise kakuhle ukuba siza kuhlakulela ukuzeyisa?
[Umfanekiso okwiphepha 15]
UYosefu wasebenzisa ukuzeyisa xa wayelingwa
[Umfanekiso okwiphepha 17]
Kufuneka ukuzeyisa kokwenene ukuze isohlwayo sidluliselwe ngokuzola nangothando emntwaneni