IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w91 12/15 iphe. 14-18
  • Hlala Usondele KuYehova

No video available for this selection.

Sorry, there was an error loading the video.

  • Hlala Usondele KuYehova
  • IMboniselo Evakalisa UBukumkani BukaYehova—1991
  • Imixholwana
  • Amanqaku Afanayo
  • Ukuphendulwa Ngokuvisisana Nenjongo KaThixo
  • Imizekelo Yabo Bahlala Besondele KuYehova
  • UYesu, Umzekelo Wethu
  • Ukulahlela Imithwalo Yethu KuYehova
  • Umthandazo Nethemba Ziya Kuqhubeka
  • Kutheni Sifanele Sithandaze Ngokungapheziyo?
    IMboniselo Evakalisa UBukumkani BukaYehova—2003
  • Indlela Onokusondela Ngayo KuThixo
    Ulwazi Olukhokelela Kubomi Obungunaphakade
  • Phakamisa Izandla Ezinyanisekileyo Uthandaze
    IMboniselo Evakalisa UBukumkani BukaYehova—1999
  • Sondela KuThixo Ngomthandazo
    Yintoni Ngokwenene Efundiswa YiBhayibhile?
Khangela Okunye
IMboniselo Evakalisa UBukumkani BukaYehova—1991
w91 12/15 iphe. 14-18

Hlala Usondele KuYehova

“Mayela nomthandazo, zingisani.”—ROMA 12:12.

1. Kuyintoni ukuthanda kukaYehova ngokubhekisele kumthandazo, yaye luluphi ukhuthazo umpostile uPawulos alunikelayo mayela nomthandazo?

UYEHOVA ‘unguThixo obanika ithemba’ bonke abantu bakhe abathembekileyo. ‘Njengomphulaphuli wemithandazo,’ uyaziphulaphula izicelo zabo zoncedo lokufikelela elo themba livuyisayo alibeke phambi kwabo. (Roma 15:13; INdumiso 65:2) Yaye ngeLizwi lakhe, iBhayibhile, ukhuthaza bonke abakhonzi bakhe ukuba beze kuye nanini na benqwenela ukwenjenjalo. Uhlala ebalindile, enqwenela ukuva ezona zinto zibaxhalabisayo. Eneneni, ubakhuthaza ukuba ‘mayela nomthandazo, bazingise’ nokuba ‘bathandaze bangayeki.’a (Roma 12:12; 1 Tesalonika 5:17) Kukuthanda kukaYehova ukuba onke amaKristu athethe naye ngomthandazo rhoqo, azityande igila kuye yaye enjenjalo egameni loNyana wakhe oyintanda, uYesu Kristu.—Yohane 14:6, 13, 14.

2, 3. (a) Kutheni uThixo wasibongoza ukuba ‘mayela nomthandazo, sizingise’? (b) Sisiphi isiqinisekiso esinaso sokuba uThixo ufuna sithandaze?

2 Kutheni uThixo esibongoza ngolu hlobo? Kungenxa yokuba iingcinezelo neembopheleleko zobomi zinokusisinda kangangokuba silibale nokuthandaza. Okanye iingxaki zisenokusongamela zize zisibangele siyeke ukulivuyela ithemba size siyeke ukuthandaza. Ngenxa yezi zinto, sifuna amazwi akhumbuzayo okusikhuthaza ukuba sithandaze nokuba sisondele gqitha kumthombo woncedo nentuthuzelo, uYehova uThixo wethu.

3 Umfundi uYakobi wabhala wathi: “Sondelani kuye uThixo, wosondela kuni.” (Yakobi 4:8) Ewe, uThixo akaphakamanga okanye akakudanga kangangokuba akanakuweva amazwi ethu esiwabhekisa kuye, nangona singabantu abangafezekanga. (IZenzo 17:27) Ngaphezu koko, akanguye ongenankathalo nongenankxalabo. Umdumisi uthi: “Amehlo kaYehova akumalungisa, iindlebe zakhe zisekuzibikeni kwawo.”—INdumiso 34:15; 1 Petros 3:12.

4. Ukunikela ingqalelo kukaYehova emthandazweni kunokuzekeliswa njani?

4 UYehova ufuna sithandaze. Oku sinokukufanisa nentlanganiso apho kukho iqela labantu elithetha kunye. Ulapho, uphulaphule njengokuba abanye bethetha. Wena ungumbukeli. Kuthi kusenjalo umntu othile aphethukele kuwe, akubize ngegama, aze athethe nawe ngqo. Oku kutsala ingqalelo yakho ngendlela ekhethekileyo. Ngokufanayo, uThixo usoloko enikele ingqalelo kubantu bakhe, nokuba baphi na. (2 Kronike 16:9; IMizekeliso 15:3) Ngoko uyaweva amazwi ethu njengoko ebukele, elungele ukusikhusela yaye enomdla kubantu bakhe. Noko ke, xa sibiza igama likaThixo emthandazweni, sitsala ingqalelo yakhe, yaye uthi ke ngoku alathisele ingqalelo yakhe kuthi ngokukhethekileyo. Ngamandla akhe, uYehova unokubona aze aqonde kwanezicelo zomntu ezingavakaliswanga ezenziwe kwiingontsi zentliziyo nengqondo yakhe. UThixo usiqinisekisa ukuba uya kusondela kubo bonke abo ngokunyaniseka babiza igama lakhe baze bafune ukuhlala besondele kuye.—INdumiso 145:18.

Ukuphendulwa Ngokuvisisana Nenjongo KaThixo

5. (a) Isiluleko ‘sokuzingisa emthandazweni’ sibonisa ntoni mayela nemithandazo yethu? (b) UThixo uyiphendula njani imithandazo?

5 Isiluleko sokuba sizingise emthandazweni sibonisa ukuba maxa wambi uYehova angasiyeka siqhubeke sithandazela umcimbi othile okwethutyana ngaphambi kokuba impendulo yakhe ibonakale. Sinokude sityekele ekubeni sidinwe kukucela ukuba uThixo asenzele inceba okanye ububele obunothando obusenokubonakala buyimfuneko kodwa engade asenzele. Ngenxa yoko, uYehova uThixo usibongoza ukuba singayekeleli kutyekelo olunjalo kodwa siqhubeke sithandaza. Sifanele siqhubeke simcela ngezinto ezisixhalabisayo, siqinisekile ukuba uyayihlonela imithandazo yethu nokuba uya kusinceda kwiintswelo zethu zokwenene, kungekhona nje izinto esisenokuba sicinga ukuba siyazifuna. Ngokungathandabuzekiyo uYehova uThixo izicelo zethu uzivisisanisa nenjongo yakhe. Ngokomzekelo, isicelo sethu sisenokuchaphazela abanye. Le meko sinokuyifanisa neyobawo unyana wakhe ocela ibhayisekile. Ubawo uyazi ukuba ukuba uyamthengela ibhayisekile loo nyana, omnye unyana wakhe naye uya kufuna eyakhe. Ekubeni omnye unyana esenokuba usemncinane kakhulu ukuba anganebhayisekile, ubawo usenokugqiba kwelokuba angathengi nokuba ibe nye ngelo xesha. Ngendlela efanayo, ngenxa yenjongo yakhe nokubala kwakhe amaxesha ezinto, uBawo wethu osemazulwini ugqiba ngoko kusilungele ngokwenene thina nabanye.—INdumiso 84:8, 11; thelekisa uHabhakuki 2:3.

6. Nguwuphi umzekeliso uYesu awawenzayo mayela nomthandazo, yaye ukuzingisa emthandazweni kubonisa ntoni?

6 Umzekeliso uYesu awawenzayo ngemfuneko yokuba abafundi bakhe “bamelwe kukuhlala bethandaza, bangethi amandla” ungophawulekayo. Umhlolokazi othile, engade enzelwe okusesikweni, wazingisa kwisicelo sakhe kumgwebi ongumntu de ekugqibeleni wakwenzelwa okusesikweni. UYesu wongezelela: “Ke yena uThixo akayi kukha abalungise na abanyulwa bakhe?” (Luka 18:1-7) Ukuzingisa emthandazweni kubonisa ukholo lwethu, ukukholosa kwethu ngoYehova, ukuvuma kwethu ukuhlala sisondele kuye size senze isicelo sethu, imiphumo siyishiyela kuye.—Hebhere 11:6.

Imizekelo Yabo Bahlala Besondele KuYehova

7. Sinokuluxelisa njani ukholo lukaAbheli lokuhlala esondele kuYehova?

7 IBhayibhile izele ziingxelo zemithandazo eyenziwa ngabakhonzi bakaThixo. Ezi “zaye zibhalelwa okwethu ukufundiswa, ukuze sithi ngalo unyamezelo novuselelo lwezibhalo sibe nalo ithemba.” (Roma 15:4) Ithemba lethu liyaqiniswa kukuqwalasela eminye yemizekelo yabo bahlala besondele kuYehova. UAbheli wanikela idini elamkelekileyo kuThixo, yaye nangona kungathethwa nto ngomthandazo, alithandabuzeki elokuba wambongoza uYehova ngomthandazo ukuba awamkele umnikelo wakhe. AmaHebhere 11:4 athi: “Ngokholo uAbheli wasondeza kuye uThixo umbingelelo ogqithileyo kunoKayin, awangqinelwa ngawo ukuba ulilungisa.” UAbheli wayelazi idinga likaThixo elikwiGenesis 3:15, kodwa xa kuthelekiswa noko thina sikwaziyo ngoku, wayengazi nto. Sekunjalo, uAbheli wenza ngokuvisisana nolo lwazi wayenalo. Ngoko namhlanje, abanye babo basandul’ ukuba nomdla kwinyaniso kaThixo abakabi nalwazi lungako, kodwa bayathandaza baze balusebenzise kangangoko ulwazi abanalo, njengoko wenzayo uAbheli. Ewe, benza ngokholo.

8. Kutheni sinokuqiniseka ukuba uAbraham wahlala esondele kuYehova, yaye nguwuphi umbuzo esifanele sizibuze wona?

8 Omnye umkhonzi othembekileyo kaThixo yayinguAbraham, “uyise wabo bonke abakholwayo.” (Roma 4:11) Namhlanje, kunanini na ngaphambili, kufuneka sibe nokholo olomeleleyo, yaye kufuneka sithandaze sikholwa, njengokuba wenzayo uAbraham. IGenesis 12:8 ithi wamakhela isibingelelo “uYehova waza waqalisa ukubiza igama likaYehova.” UAbraham wayelazi igama likaThixo yaye walisebenzisa emthandazweni. Ngokuphindaphindiweyo wazingisa emthandazweni ngokunyanisekileyo, elibiza “igama likaYehova uThixo ongunaphakade.” (Genesis 13:4, NW; Ge 21:33) UAbraham wabiza egameni likaThixo ngokholo awayesaziwa ngalo. (Hebhere 11:17-19) Umthandazo wamnceda uAbraham waqhubeka elivuyela kakhulu ithemba loBukumkani. Ngaba silandela umzekelo ka-Abraham wokuzingisa emthandazweni?

9. (a) Kutheni imithandazo kaDavide iyingenelo kubantu bakaThixo namhlanje? (b) Unokuba yintoni umphumo wokuthandaza kwethu njengokuba uDavide wenzayo ukuze ahlale esondele kuYehova?

9 UDavide wayebalasele ngokuzingisa emthandazweni, yaye iindumiso zakhe zisibonisa oko kufanele kuqukwe emithandazweni. Ngokomzekelo, abakhonzi bakaThixo ngokufanelekileyo banokuthandazela izinto ezinjengokusindiswa okanye ukuhlangulwa (Nd 3:7, 8; 60:5), ukhokelo (Nd 25:4, 5), ukukhuselwa (Nd 17:8), ukuxolelwa izono (Nd 25:7, 11, 18) nentliziyo ehlambulukileyo (Nd 51:10). Xa uDavide wayeziva ecinezelekile, wathandaza: “Wuvuyise umphefumlo womkhonzi wakho.” (Nd 86:4) Ngokufanayo sinokuthandazela uvuyo lwentliziyo, sisazi ukuba uYehova unqwenela ukuba sivuye kwithemba lethu. UDavide wahlala esondele kuYehova waza wathandaza wathi: “Umphefumlo wam uthene mbende nawe; isandla sakho sokunene sindibambile.” (Nd 63:8) Ngaba siya kuhlala sisondele kuYehova, njengokuba wenzayo uDavide? Ukuba senjenjalo, uya kusiphakamisa nathi.

10. Ziziphi ingcinga eziphosakeleyo umdumisi uAsafu awakha wanazo ngaxa lithile, kodwa kamva yintoni awayiqondayo?

10 Ukuba siza kuhlala sisondele kuYehova, kufuneka sikuphephe ukubamonela abangendawo kuba bephila ubomi bokungakhathali nobokuthanda izinto eziphathekayo. Umdumisi uAsafu ngasihlandlo sithile wavakalelwa kukuba kwakungancedi nto ukukhonza uYehova, kuba abangendawo “banokuchulumanca ngonaphakade.” Sekunjalo waqonda ukuba indlela awayecinga ngayo yayiphosakele yaye abangendawo ‘basendaweni ebuthelezi.’ Waqonda ukuba kwakungekho nto ilunge ngaphezu kokuhlala usondele kuYehova, yaye wathetha noThixo wathi: “Mna ke ndihlala ndinawe; undibambile ngesandla sam sokunene. Ngokuba, yabona, abanyawukileyo kuwe baya kudaka. . . . Mna ke, ukusondela kuThixo kulungile kum, ndiyenza ihlathi lam iNkosi uYehova, ukuze ndiyibalise yonke imisebenzi yakhe.” (INdumiso 73:12, 13, 18, 23, 27, 28) Kunokumonela ubomi bokungakhathali babangendawo, abantu abangenathemba, masixelise uAsafu ngokuhlala sisondele kuYehova.

11. Kutheni uDaniyeli engumzekelo omhle womntu owahlala esondele kuYehova, yaye sinokumxelisa njani?

11 UDaniyeli wazingisa ngokuqinileyo emthandazweni, kwanaxa wayejamelene nengozi yokufakwa emhadini weengonyama ngenxa yokutyeshela imiqathango emiswe ngokusemthethweni ngokuphathelele ukuthandaza. Kodwa uYehova ‘wathuma isithunywa sakhe, sayivingca imilomo yeengonyama,’ emhlangula uDaniyeli. (Daniyeli 6:7-10, 22, 27) UDaniyeli wasikelelwa kakhulu ngokuzingisa kwakhe emthandazweni. Ngaba nathi siyazingisa emthandazweni, ingakumbi xa sijamelene nokuchaswa kokushumayela kwethu ngoBukumkani?

UYesu, Umzekelo Wethu

12. (a) Ekuqaleni kobulungiseleli bakhe, nguwuphi umzekelo uYesu awawumiselayo ngokubhekisele kumthandazo, yaye amaKristu anokungenelwa njani koku? (b) Umthandazo kaYesu ongumzekelo utyhila ntoni ngomthandazo?

12 Kwasekuqaleni kobulungiseleli bakhe basemhlabeni, ingxelo ibonisa ukuba uYesu wayethandaza. Isimo sakhe sengqondo sokuthandaza ngoxa wayebhaptizwa sibamisela umzekelo omhle abo babhaptizwa emanzini kumaxesha anamhlanje. (Luka 3:21, 22) Umntu usenokuthandazela ukuba uThixo amncede aphumeze oko kufuziselwa lubhaptizo lwasemanzini. Kwakhona uYesu wanceda abanye ukuba basondele kuYehova ngomthandazo. Ngesihlandlo uYesu awayekwindawo ethile ethandaza, omnye wabafundi bakhe wathi kuye kamva: “Nkosi, sifundise ukuthandaza.” Wandula ke uYesu wachaza oko kwaziwa kakhulu ngokuba ngumthandazo ongumzekelo, apho indlela azilandelelanise ngayo izinto ibonisa ukuba igama likaThixo nenjongo yakhe zimele zibe kwindawo yokuqala. (Luka 11:1-4) Ngaloo ndlela, kwimithandazo yethu kufuneka izinto sizibone ngendlela eyiyo size sigcine ulungelelwano, singazityesheli “izinto eziziincamisa.” (Filipi 1:9, 10) Kambe ke, kukho amaxesha axa kukho iintswelo ezikhethekileyo okanye kufuneka kujongenwe nengxaki ethile ekhethekileyo. NjengoYesu, amaKristu asenokuya kuThixo ngomthandazo ukuze afune amandla okuphumeza izabelo ezithile okanye okujamelana neemvavanyo okanye iingozi ezithile. (Mateyu 26:36-44) Enyanisweni, imithandazo yobuqu isenokugubungela phantse zonke iinkalo zobomi.

13. UYesu wakubonakalisa njani ukubaluleka kokuthandazela abanye?

13 Ngomzekelo wakhe omhle, uYesu wabonisa ukubaluleka kokuthandazela abanye. Wayesazi ukuba abafundi bakhe babeya kuthiywa baze batshutshiswe, njengokuba kwakunjalo nakuye. (Yohane 15:18-20; 1 Petros 5:9) Ngoko ke, wacela ukuba uThixo “abagcine ngenxa yongendawo.” (Yohane 17:9, 11, 15, 20, NW) Yaye elwazi uvavanyo olukhethekileyo olwaluza kufikela uPetros, wamxelela oku: “Mna ndikhungile ngawe, ukuba ukholo lwakho lungapheli.” (Luka 22:32) Hayi indlela ekuyingenelo ngayo ukuba nathi siyazingisa ukubathandazela abazalwana bethu, sicinga ngabanye yaye kungekuphela nje ngezethu iingxaki nezilangazelelo!—Filipi 2:4; Kolose 1:9, 10.

14. Sazi njani ukuba uYesu wahlala esondele kuYehova kubo bonke ubulungiseleli bakhe basemhlabeni, yaye sinokumxelisa njani?

14 Kubo bonke ubulungiseleli bakhe, uYesu wazingisa emthandazweni, ehlala esondele kuYehova. (Hebhere 5:7-10) KwiZenzo 2:25-28, umpostile uPetros ucaphula INdumiso 16:8 aze ayisebenzise kwiNkosi uYesu Kristu: “UDavide uthi, esingisele kuye, Ndahlala ndiyibona iNkosi [“uYehova,” NW] phambi kwamehlo am, ngokuba ingasekunene kwam, ukuze ndingashukunyiswa.” Sinokwenza okufanayo. Sinokuthandazela ukuba uThixo asondele kuthi, yaye sinokubonisa intembelo yethu kuYehova ngokuhlala simbona ngeliso lethu lengqondo. (Thelekisa INdumiso 110:5; Isaya 41:10, 13.) Siya kwandula ke siphephe zonke iinkathazo, kuba uYehova uya kusixhasa, yaye asisayi kuze sishukunyiswe.

15. (a) Kungokubhekisele kwintoni esingamele size sisilele ukuzingisa emthandazweni? (b) Kunikelwa siphi isilumkiso ngokubhekisele ekubeni sibe nombulelo?

15 Kwanga singangaze singawubonakalisi umbulelo kuYehova ngako konke ukulunga kwakhe kuthi, ewe, ‘ubabalo lukaThixo oluncamisileyo,’ oluquka isipho soNyana wakhe njengedini lentlawulelo yezono zethu. (2 Korinte 9:14, 15; Marko 10:45; Yohane 3:16; Roma 8:32; 1 Yohane 4:9, 10) Enyanisweni, egameni likaYesu, ‘nimana nibulela ngenxa yeento zonke, kuye uThixo uYise.’ (Efese 5:19, 20; Kolose 4:2; 1 Tesalonika 5:18) Simele silumke hleze singabi nambulelo ngenxa yokuba sizixakekise gqitha ngoko singenako okanye ngeengxaki zethu zobuqu.

Ukulahlela Imithwalo Yethu KuYehova

16. Xa umthwalo othile usikhathaza, sifanele senze ntoni?

16 Ukuzingisa emthandazweni kubonisa ubunzulu bozinikelo lwethu. Xa sibiza uThixo, umphumo kuthi uba ngolungileyo kwanangaphambi kokuba asiphendule. Ukuba kukho umthwalo osikhathazayo ezingqondweni zethu, sinokuhlala sisondele kuYehova ngokulandela esi siluleko silandelayo: “Umthwalo wakho wulahlele kuYehova; yena wokuzimasa.” (INdumiso 55:22) Ngokulahlela yonke imithwalo yethu—amaxhala, izinto ezisikhathazayo, udano, uloyiko, njalo njalo—kuThixo, sinokholo ngokupheleleyo kuye, siya kufumana ukuzola kwentliziyo, “uxolo lukaThixo, olugqithisele kuko konke ukuqonda.”—Filipi 4:4, 7; INdumiso 68:19; Marko 11:24; 1 Petros 5:7.

17. Sinokulufumana njani uxolo lukaThixo?

17 Ngaba olu xolo lukaThixo lubakho ngoko nangoko? Nangona sisenokufumana isiqabu ngoko nangoko, oko uYesu wakuthethayo ngokuthandazela umoya oyingcwele kukwayinyaniso nakule meko: “Qhubekani nicela, nophiwa; qhubekani nifuna, yaye niya kufumana; qhubekani ninkqonkqoza, niya kuvulelwa.” (Luka 11:9-13, NW) Ekubeni amaxhala siwalahlela kude ngomoya oyingcwele, kufuneka sizingise ekuceleni uxolo lukaThixo noncedo lwakhe mayela nemithwalo yethu. Sinokuqiniseka ukuba ngokuzingisa emthandazweni, siya kukufumana ukuphumla nokuzola kwentliziyo esikunqwenelayo.

18. Yintoni uYehova asenzela yona ukuba asazi ukuba masithandazele ntoni ngokuthe ngqo kwimeko ethile?

18 Kodwa kuthekani ukuba asazi ukuba masithandazele ntoni ngokuthe ngqo? Ngokufuthi asikuvakalisi ukuncwina kwethu kwangaphakathi ngenxa yokuba asiyiqondi kakuhle imeko yethu, okanye asazi ukuba sithini na ukuthetha kuYehova. Kulapha ke onokuthi umoya oyingcwele usithethelele. UPawulos wabhala: “Kuba esingakuthandazelayo ngokoko simelwe kukuthandaza ngako, asikwazi; uthi ke uMoya ngokwakhe asithethelele ngezincwino ezingathethekiyo.” (Roma 8:26) Kwenzeka njani oku? ELizwini likaThixo kukho iziprofeto nemithandazo ephefumlelweyo ephathelele imeko yethu. Wenza isithethelele, ngokungathi kunjalo. Uyamkela le ngokungathi koko besiya kukuthandazela ukuba besiyazi intsingiselo yayo kwimeko yethu, aze ke ayizalisekise ngokuvisisana noko.

Umthandazo Nethemba Ziya Kuqhubeka

19. Kutheni umthandazo nethemba ziya kuqhubeka zikho ngonaphakade?

19 Ukuthandaza kuBawo wethu osezulwini kuya kuqhubeka ngonaphakade, ingakumbi ngokubhekisele kumbulelo ngehlabathi elitsha neentsikelelo zalo. (Isaya 65:24; ISityhilelo 21:5) Kwakhona siya kuqhubeka sivuya mayela nethemba, kuba ithemba esinalo liya kuhlala likho ngonaphakade. (Thelekisa eyoku-1 kwabaseKorinte 13:13.) Ukuba ziziphi na izinto ezintsha uYehova aya kuzizisa xa engasekho kwimini yakhe yeSabatha azibekele yona yokuphumla ngokubhekisele kumhlaba, asinako nokuthelekelela oku. (Genesis 2:2, 3) Kuse emaphakadeni, ngothando usaya kubenzela izinto abebengazilindelanga abantu bakhe, yaye ubagcinele izinto ezizukileyo kwikamva ngokuphathelele ukwenza ukuthanda kwakhe.

20. Lufanele lube yintoni uzimiselo lwethu, yaye ngoba?

20 Silindelwe lithemba elichulumancisa ngolo hlobo, ngamana sonke singahlala sisondele kuYehova ngokuzingisa emthandazweni. Kwanga asingeyeki ukumbulela uBawo wethu wasezulwini ngazo zonke iintsikelelo zethu. Ngexesha elifanelekileyo oko sikulindeleyo kuya kuzaliseka ngendlela evuyisayo, ngendlela eyodlula lee esakha sayithelekelela okanye sayilindela, kuba uYehova unako “ukwenza okungaphezu kweento zonke ngokugqithiseleyo kakhulu, ngaphezu kwesikucelayo nesinokukuqiqa.” (Efese 3:20) Ngenxa yoku ke ngoko, masinikele yonke indumiso nozuko nombulelo kuse kuwo amaphakade kuYehova uThixo wethu, ‘umphulaphuli wemithandazo’!

[Umbhalo osemazantsi]

a Ngokutsho kweWebster’s New Dictionary of Synonyms, “ukuZingisa phantse ngamaxesha onke kuthetha uphawu oluthandekayo; kuthetha ukungavumi ukutyhafiswa kukungaphumeleli, amathandabuzo okanye iinzima, nokusukela ngokungenakushukunyiswa okanye ungayeki usukelo okanye iphulo elithile.”

Ubuya Kuphendula Uthini?

◻ Kutheni kufuneka sizingise emthandazweni?

◻ Sifunda ntoni kwimizekelo yangaphambi kwexesha lobuKristu yomthandazo?

◻ Umzekelo kaYesu usifundisa ntoni ngomthandazo?

◻ Sinokuyilahlela njani imithwalo yethu kuYehova yaye oko kunawuphi umphumo?

[Umfanekiso okwiphepha 17]

UDaniyeli wazingisa emthandazweni nangona wayesongelwa ngokuphoswa emhadini weengonyama

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share