Phakamisa Izandla Ezinyanisekileyo Uthandaze
“Ndinqwenela ukuba kuyo yonke indawo amadoda aqhubeke ethandaza, ephakamisa izandla ezinyanisekileyo, ngaphandle kwengqumbo nokuxambulisana.”—1 TIMOTI 2:8.
1, 2. (a) Eyoku-1 kuTimoti 2:8 isebenza njani kumthandazo obandakanya abantu bakaYehova? (b) Yintoni esiza kuyiqwalasela ngoku?
UYEHOVA ulindele ukuba abantu bakhe banyaniseke kuye nakwabanye. Umpostile uPawulos wanxulumanisa ukunyaniseka nomthandazo xa wabhala esithi: “Ndinqwenela ukuba kuyo yonke indawo amadoda aqhubeke ethandaza, ephakamisa izandla ezinyanisekileyo, ngaphandle kwengqumbo nokuxambulisana.” (1 Timoti 2:8) Kuyabonakala ukuba, uPawulos wayebhekisela kumthandazo owenziwa esidlangalaleni “kuyo yonke indawo” apho amaKristu ayehlanganisana khona. Ngoobani ababefanele bamele abantu bakaThixo ngomthandazo kwiintlanganiso zebandla? Kuphela yayingamadoda angcwele, angamalungisa nandilisekileyo nawayeziphumeza ngenyameko zonke iimbopheleleko zeZibhalo kuThixo. (INtshumayeli 12:13, 14) Kwakufuneka acoceke ngokomoya nangokokuziphatha yaye ukuzinikela kwawo kuYehova uThixo kungathandabuzeki.
2 Ngokukodwa abadala bebandla bafanele ‘baphakamise izandla ezinyanisekileyo bathandaze.’ Imithandazo yabo esuka entliziyweni eyenziwa egameni likaYesu Kristu ibonakalisa ukunyaniseka kuThixo yaye iyabanceda baphephe ukuxambulisana nokugqabhuka kwengqumbo. Enyanisweni, nayiphi na indoda enikwa ilungelo lokumela ibandla lamaKristu ngomthandazo owenziwa esidlangalaleni ayifanele ibe nengqumbo, ulunya okanye inganyaniseki kuYehova nakwintlangano yakhe. (Yakobi 1:19, 20) Luluphi olunye ulwalathiso oluvela eBhayibhileni olunokufunyanwa ngabo bafumana ilungelo lokumela abanye ngomthandazo owenziwa ekuhleni? Ibe yiyiphi eminye yemigaqo yeZibhalo esifanele siyisebenzise kwimithandazo yobuqu neyentsapho?
Cinga Kusengaphambili Ngoko Uza Kukuthandazela
3, 4. (a) Kutheni kuyingenelo ukucinga kusengaphambili ngoko uza kukuthetha xa uthandaza esidlangalaleni? (b) Yintoni eboniswa ziZibhalo ngokuphathelele ubude bemithandazo?
3 Xa siye sacelwa ukuba sithandaze esidlangalaleni, sisenokukwazi ukucinga kusengaphambili ngoko siza kukuthandazela. Ukwenza oku kunokusinceda sigubungele imibandela ebalulekileyo ngaphandle kokwenza umlembelele ogwegwelezayo womthandazo. Kakade ke, nemithandazo yobuqu sinokuyenza ngelizwi elivakalayo. Inokuba mide kangangoko sithanda. UYesu wachitha ubusuku bonke ethandaza ngaphambi kokukhetha abapostile bakhe abali-12. Noko ke, xa wayemisela iSikhumbuzo sokufa kwakhe, kuyabonakala ukuba wayenza yamifutshane imithandazo yewayini nesonka. (Marko 14:22-24; Luka 6:12-16) Kwaye siyazi ukuba kwanemithandazo emifutshane kaYesu yamkeleka ngokupheleleyo kuThixo.
4 Masithi ke sijizekwa ngelungelo lokumela intsapho ngomthandazo ngaphambi kwesidlo. Loo mthandazo unokuba mfutshane nje—kodwa ke nantoni ethethwayo imele iquke ukubulela ukutya. Ukuba sithandaza esidlangalaleni ngaphambi okanye emva kwentlanganiso yamaKristu, akuyomfuneko ukwenza umlembelele womthandazo ogubungela iingongoma ezininzi. UYesu wabagxeka ababhali ‘ababesenza imithandazo emide ngokunyhwalaza.’ (Luka 20:46, 47) Soze ayenze loo nto umntu owoyika uThixo. Noko ke, maxa wambi usenokufaneleka umthandazo wasesidlangalaleni omdana noko. Ngokomzekelo, umdala owabelwe ukwenza umthandazo wokuqukumbela endibanweni ufanele acinge kusengaphambili ngoko aza kukuthandazela yaye usenokunqwenela ukukhankanya iingongoma eziliqela. Kodwa ke, kwanaloo mthandazo awufanele ube mde ngokubaxiweyo.
Sondela KuThixo Ngokundilisekileyo
5. (a) Yintoni esifanele siyikhumbule xa sithandaza esidlangalaleni? (b) Kutheni sifanele sithandaze ngendlela enesidima nebonisa intlonelo?
5 Xa sithandaza esidlangalaleni sifanele sikhumbule ukuba asithethi nabantu. Kunoko, sizizidalwa ezinesono ezibongoza iNkosi enguMongami uYehova. (INdumiso 8:3-5, 9; 73:28) Ngoko sifanele sibonakalise ukukoyika ngokunzulu ukumcaphukisa ngoko sikuthethayo nendlela esikuthetha ngayo. (IMizekeliso 1:7) Umdumisi uDavide wavuma ingoma esithi: “Ke mna, ndinokungena endlwini yakho ngenceba yakho eninzi, ndiqubude, ndibhekise etempileni yakho engcwele ngokukoyika.” (INdumiso 5:7) Xa sinesimo sengqondo esinjalo, siya kuthetha njani ukuba sicelwa ukuba sithandaze kwintlanganiso yasesidlangalaleni yamaNgqina kaYehova? Kaloku, ukuba besithetha nokumkani ongumntu, besiya kuthetha ngentlonelo nangesidima. Ngaba imithandazo yethu ayifanele ibe nesidima nentlonelo engakumbi, ekubeni sithandaza kuYehova, ‘uKumkani wamaphakade’? (ISityhilelo 15:3) Ngoko xa sithandaza siya kukuphepha ukusebenzisa amabinzana anjengathi, “Molo Yehova,” “Sikuthumelela uthando lwethu,” okanye “Usale kakuhle.” IZibhalo zibonisa ukuba ekuphela koNyana ozelwe nguThixo, uYesu Kristu, akazange athethe ngolo hlobo noYise osemazulwini.
6. Yintoni esifanele siyikhumbule xa ‘sisondela kwitrone yobubele obungasifanelanga’?
6 UPawulos wathi: “Masisondele ngenkululeko yokuthetha kwitrone yobubele obungasifanelanga.” (Hebhere 4:16) Nangona sinesono, sinako ukusondela kuYehova “ngenkululeko yokuthetha” ngenxa yokukholwa kwidini lentlawulelo likaYesu Kristu. (IZenzo 10:42, 43; 20:20, 21) Kodwa ke, loo “nkululeko yokuthetha” ayithethi kuthi masincokole noThixo; kananjalo ingathethi kuthi masithethe izinto ezibonisa ukumdelela. Ukuba sifuna imithandazo esiyenza esidlangalaleni imkholise uYehova, simele siyenze ngentlonelo nangesidima esifanelekileyo, yaye akufanelekanga ukuyisebenzisa ukudlulisa izaziso, ukululeka abathile okanye singxolise abaphulaphuli.
Thandaza Ngokuzithoba
7. USolomon wakubonakalisa njani ukuthobeka xa wayethandaza kunikezelwa itempile kaYehova?
7 Enoba sithandaza esidlangalaleni okanye senza umthandazo wobuqu, umgaqo obalulekileyo weZibhalo kukukhumbula ukuba sifanele sibonakalise isimo sengqondo sokuzithoba kwimithandazo yethu. (2 Kronike 7:13, 14) UKumkani uSolomon wabonakalisa ukuzithoba kumthandazo awayewenza esidlangalaleni xa kwakunikezelwa itempile kaYehova yaseYerusalem. USolomon wayesandul’ ukugqiba esinye sezona zakhiwo zihle eziye zakhiwa kulo mhlaba. Ukanti, ngokuthobeka wathandaza esithi: “Gxebe uThixo angade ahlale emhlabeni na? Yabona, amazulu, amazulu awo amazulu, akakulingene; hina ke yona le ndlu ndiyakhileyo!”—1 Kumkani 8:27.
8. Ziziphi ezinye iindlela okuboniswa ngazo ukuthobeka kumthandazo wasesidlangalaleni?
8 NjengoSolomon, kufuneka sithobeke xa simela abanye ngomthandazo wasesidlangalaleni. Nangona sifanele sikuphephe ukuzenza ngcwele, ukuthobeka sinokukubonakalisa ngemvakalo yelizwi lethu. Imithandazo ethobekileyo ayibi nezangotshe okanye ihlombe eligqith’ emgceni. Ayitsaleli ingqalelo kulowo uthandazayo, kodwa iyinikela kuLowo kuthandazwa kuye. (Mateyu 6:5) Ukuthobeka sikwakubonisa ngoko sikuthethayo xa sithandaza. Ukuba sithandaza ngokuthobeka, asiyi kuvakala ngathi siyamnyanzela uThixo ukuba enze izinto ngendlela esifuna ngayo. Kunoko, siya kumbongoza uYehova ukuba enze izinto ngendlela evisisana nokuthanda kwakhe okungcwele. Umdumisi wamisela umzekelo wesimo sengqondo esifanelekileyo xa wabongoza esithi: “Yehova, camagu, khawusindise, Yehova, camagu, khawuhlangule.”—INdumiso 118:25; Luka 18:9-14.
Thandaza Ngokusuka Entliziyweni
9. Sisiphi isiluleko esihle esanikelwa nguYesu esifumaneka kuMateyu 6:7, yaye sinokusetyenziswa njani?
9 Ukuba sifuna imithandazo esiyenza esidlangalaleni okanye eyobuqu imkholise uYehova, imele isuke entliziyweni. Ngaloo ndlela, asiyi kusoloko siphindaphinda amazwi afanayo yonk’ imihla le singakhange sicinge nokucinga ngoko sikuthethayo. KwiNtshumayelo yakhe yaseNtabeni, uYesu waluleka: “Xa uthandaza, ungathethi uphindaphindana nento enye, kanye njengokuba abantu beentlanga [ngempazamo] besenza, kuba besiba baya kufumana ukuviwa ngenxa yokusebenzisa kwabo amazwi amaninzi.” Ngamany’ amazwi, uYesu wathi: “Musani ukushwaqa; ningaphindaphindi into enye engavakaliyo.”—Mateyu 6:7; umbhalo osemazantsi weNW.
10. Kutheni kunokuba yinto efanelekileyo ukuthandazela into enye izihlandlo eziliqela?
10 Kakade ke, zikho izinto ekusenokufuneka sizithandazele ngokuphindaphindiweyo. Asiyi kuba senza into ephosakeleyo xa sisenjenjalo kuba uYesu wabongoza esithi: “Qhubekani nicela, yaye niya kunikwa; qhubekani nifuna, ibe niya kufumana; qhubekani ninkqonkqoza, kwaye niya kuvulelwa.” (Mateyu 7:7) Mhlawumbi kukho imfuneko yeHolo yoBukumkani entsha ekubeni uYehova ebangela inkqubela kumsebenzi wokushumayela owenziwa ekuhlaleni. (Isaya 60:22) Bekuya kuba yinto efanelekileyo ukuqhubeka siyikhankanya loo mfuneko xa sisenza umthandazo wobuqu naxa sithandaza esidlangalaleni kwiintlanganiso zabantu bakaYehova. Ukwenjenjalo bekungayi kuthetha ukuba ‘siphindaphinda into enye engavakaliyo.’
Ungalibali Ukubulela Nokunikela Indumiso
11. EyabaseFilipi 4:6, 7 isebenza njani kwimithandazo yobuqu nakweyasesidlangalaleni?
11 Abantu abaninzi bathandaza kuphela xa becela into ethile, kodwa uthando esinalo ngoYehova uThixo lufanele lusenze simbulele yaye simdumise kwimithandazo yobuqu nakwesiyenza esidlangalaleni. UPawulos wabhala: “Musani ukuxhalela nantoni na, kodwa kuyo yonk’ into zaziseni izibongozo zenu kuThixo ngomthandazo nesikhungo kunye nombulelo; yaye uxolo lukaThixo olugqwesa yonke ingcamango luya kuzilinda iintliziyo zenu namandla enu engqondo ngoKristu Yesu.” (Filipi 4:6, 7) Ewe, ukongezelela kwizicelo nakwizibongozo, sifanele simbulele uYehova ngeentsikelelo zokomoya nezezinto eziphathekayo. (IMizekeliso 10:22) Umdumisi wavuma ingoma esithi: “Bingelela kuYehova umbulelo, uzizalise kOsenyangweni izibhambathiso zakho.” (INdumiso 50:14) Kwaye ingoma yokunqula kaDavide yayiquka la mazwi achukumisayo: “Ndiya kulidumisa igama likaThixo ngokuvuma, ndilenze likhulu ngokubulela.” (INdumiso 69:30) Ngaba asifanele senjenjalo kwimithandazo yethu yasesidlangalaleni nakweyobuqu?
12. Izaliseka njani namhlanje INdumiso 100:4, 5, yaye yintoni esinokumbulela size simdumise ngayo uThixo?
12 Ethetha ngoThixo, umdumisi wavuma ingoma esithi: “Ngenani emasangweni akhe nibulela, ezintendelezweni zakhe nidumisa; bulelani kuye, bongani igama lakhe. Ngokuba uYehova ulungile, inceba yakhe ingunaphakade, ukunyaniseka kwakhe kukwizizukulwana ngezizukulwana.” (INdumiso 100:4, 5) Namhlanje, abantu bazo zonke iintlanga bangena ezintendelezweni zengcwele kaYehova, kwaye sinokumdumisa size simbulele nangaloo nto. Ngaba uyambulela uThixo ngeHolo yoBukumkani yasekuhlaleni uze ubonakalise uxabiso ngokuhlanganisana kuyo rhoqo nabo bamthandayo? Xa ulapho, ngaba ulikhupha ngentliziyo yakho yonke ilizwi lakho uze uvume iingoma zendumiso nezokubulela kuBawo wethu onothando wasezulwini?
Ungaze Uzive Uneentloni Zokuthandaza
13. Nguwuphi umzekelo okwiZibhalo obonisa ukuba sifanele sithandaze kuYehova kwanokuba siziva singento ngenxa yemvakalelo yokuba netyala?
13 Kwanaxa siziva singento ngenxa yemvakalelo yokuba netyala, sifanele sibhenele kuThixo ngomthandazo onyanisekileyo. Xa amaYuda onayo ngokuzithabathela abafazi beentlanga, uEzra waguqa ngamadolo, wolula izandla zakhe ezinyanisekileyo kuThixo waza wathandaza ngokuthobeka esithi: “Thixo wam, ndidanile, ndineentloni, andinakubuphakamisela kuwe ubuso bam, Thixo wam; ngokuba ubugwenxa bethu bukhulile, baba phezu kweentloko zethu; netyala lethu likhulu, lesa emazulwini. Kususela kwimihla yoobawo, sisetyaleni elikhulu unanamhla; . . . Emveni kwako konke okusihleleyo, ngenxa yezenzo zethu ezibi, nangenxa yetyala lethu elikhulu (kanti wena, Thixo wethu, usiyekile, akwasohlwaya ngangobugwenxa bethu, wasinika abasindileyo abangakanana), singabuya siyaphule na imithetho yakho, sendiselane nezizwe ezinaloo masikizi? Akuyi kusifuthela ngomsindo side siphele na, ukuze kungabikho baseleyo, basindileyo? Yehova, Thixo kaSirayeli, ulilungisa, ngokuba sisele singabasindileyo, njengoko kunjalo namhla. Uyabona, siphambi kwakho, sinalo ityala lethu, ngokuba akukho unokuma phambi kwakho ngenxa yoko.”—Ezra 9:1-15; Duteronomi 7:3, 4.
14. Njengoko kwaboniswa kumhla kaEzra, yintoni efunekayo ukuze sixolelwe nguThixo?
14 Ukuze uThixo asixolele, ukuvuma izono zethu kuye kumele kukhatshwe kukuzisola ‘naziziqhamo ezifanele inguquko.’ (Luka 3:8; Yobhi 42:1-6; Isaya 66:2) Ngomhla kaEzra, ukuba nesimo sengqondo sokuguquka kwakukhatshwa ngumgudu wokulungisa undonakele ngokugodusa abafazi beentlanga. (Ezra 10:44; thelekisa eyesi-2 kwabaseKorinte 7:8-13.) Ukuba sifuna uThixo asixolele ngenxa yokwenza into ephosakele ngokunzulu, masisivume isono sethu ngomthandazo wokuzithoba size sivelise iziqhamo ezifanele inguquko. Umoya wenguquko nomnqweno wokulungisa apho sone khona uya kusishukumisela ekubeni sifune uncedo lokomoya kubadala abangamaKristu.—Yakobi 5:13-15.
Fumana Intuthuzelo Ngokuthandaza
15. Okwenzeka kuHana kubonisa njani ukuba sinokuthuthuzelwa ngumthandazo?
15 Xa intliziyo yethu ilihlwili ngenxa yesizathu esithile, umthandazo unokusithuthuzela. (INdumiso 51:17; IMizekeliso 15:13) Wenjenjalo uHana owayenyanisekile. Wayephila ngexesha apho ukuba nentsapho enkulu kwakuyinto eqhelekileyo kwaSirayeli, kodwa yena wayengenabantwana. Umyeni wakhe, uElikana, wayenoonyana neentombi ngomnye umfazi wakhe, uPenina, owayegculela uHana ngokuba ludlolo. UHana wathandaza ngokunyaniseka waza wathembisa ukuba, ukuba wayenokusikelelwa ngonyana, ‘wayeya kumnika uYehova yonke imihla yobomi bakhe.’ Ethuthuzelwe ngumthandazo wakhe nangamazwi oMbingeleli Omkhulu uEli, ‘abuzange bube saxhalaba ubuso’ bukaHana. Wazala unyana awambiza ngokuba nguSamuweli. Kamva, wamsa kwingcwele kaYehova ukuba aye kukhonza. (1 Samuweli 1:9-28, NW) Enombulelo ngobubele awayebenzelwe nguThixo, wathandaza esenza umbulelo—emncoma esithi akakho olingana noYehova. (1 Samuweli 2:1-10) NjengoHana, nathi sinokuthuthuzelwa ngumthandazo, siqinisekile ukuba uThixo uziphendula zonke izicelo ezivisisana nokuthanda kwakhe. Xa sizityand’ igila kuye, ‘masingabi saxhalaba,’ kuba uya kulususa olo xanduva siluthweleyo okanye ke asenze sikwazi ukuluthwala.—INdumiso 55:22.
16. Njengoko kuboniswe kwimeko kaYakobi, kutheni sifanele sithandaze xa sisoyika okanye sinexhala?
16 Xa kukho into esoyikisayo, esikhathazayo okanye esixhalabisayo, masingaze sisilele ukubhenela kuThixo ngomthandazo ukuze asithuthuzele. (INdumiso 55:1-4) UYakobi wayesoyika xa wayeza kudibana nomntakwabo awayengasaginyani kakuhle naye, uEsawu. Ukanti, uYakobi wathandaza esithi: “Thixo kabawo uAbraham, Thixo kabawo uIsake, Yehova, uthe kum, Buyela ezweni lakowenu, kwelokuzalwa kwakho; ndokuphatha kakuhle. Andiyilingene inceba yonke, nenyaniso yonke oyenzileyo kumkhonzi wakho; kuba ndayiwela le Yordan, ndinentonga yam yodwa, kodwa ngoku ndimfuduka mbini. Khawundihlangule esandleni somkhuluwa wam, esandleni sikaEsawu; ngokuba ndiyamoyika, hleze afike andibulale, unina ndawonye nabantwana. Wawuthe wena, Inene, ndiya kukuphatha kakuhle, imbewu yakho ndiyenze ibe njengentlabathi yolwandle, engenakubalwa ngenxa yobuninzi.” (Genesis 32:9-12) UEsawu akazange amhlasele uYakobi nabantu bakhe. Ngaloo ndlela uYehova ‘wamphatha kakuhle’ uYakobi ngeso sihlandlo.
17. Ngokuvisisana neNdumiso 119:52, umthandazo unokusithuthuzela njani xa sivavanywa ngokuqatha?
17 Xa sithandaza, kusenokusithuthuzela ukukhumbula izinto ezithethwa liLizwi likaThixo. Kweyona ndumiso inde—umthandazo owenziwe kakuhle owawuphelekwa ngumculo—kusenokwenzeka ukuba yayiyiNkosana uHezekiya eyayivuma ingoma isithi: “Ndawakhumbula amasiko akho kususela kwanaphakade, Yehova, ndathuthuzeleka.” (INdumiso 119:52) Ngenxa yomthandazo esiwenza ngokuthobeka xa sivavanywa ngokuqatha, sisenokukhumbula umgaqo weBhayibhile okanye umthetho osinceda senze izinto ngendlela eza kusithuthuzela yaye isiqinisekise ukuba siyamkholisa uBawo wethu wasezulwini.
Abanyanisekileyo Bayazingisa Emthandazweni
18. Kutheni kunokutshiwo nje ukuba ‘bonke abanyanisekileyo baya kuthandaza kuThixo’?
18 Bonke abanyanisekileyo kuYehova uThixo baya ‘kuzingisa emthandazweni.’ (Roma 12:12) KwiNdumiso yama-32, esenokuba yabhalwa emva kokuba uDavide onile noBhatshebha, wachaza intlungu eyayimkrekretha ngenxa yokungaceli uxolo waza wachaza nesiqabu awasifumanayo akuguquka aze avume isono sakhe kuThixo. Emva koko uDavide wavuma ingoma esithi: “Ngenxa yoko [ngenxa yokuba uYehova ebaxolela abo baguquka ngokunyanisekileyo] mabathandaze kuwe bonke [abanyanisekileyo, NW] ngexesha lokukufumana.”—INdumiso 32:6.
19. Kutheni sifanele siphakamise izandla ezinyanisekileyo sithandaze?
19 Ukuba siyaluxabisa ulwalamano lwethu noYehova uThixo, siya kuthandazela inceba yakhe ngesizinzi sedini lentlawulelo likaYesu. Ngokholo, sinako ukusondela kwisihlalo sobukhosi sobubele obungasifanelanga sinenkululeko yokuthetha ukuze sifumane inceba noncedo olufika ngexesha elililo. (Hebhere 4:16) Kodwa ke zininzi izizathu zokuthandaza! Ngoko ‘masithandaze ngokungapheziyo’ kuThixo—ngokufuthi sisebenzise amazwi endumiso nawombulelo asuka entliziyweni. (1 Tesalonika 5:17) Emini nasebusuku, masiphakamise izandla ezinyanisekileyo sithandaze.
Ubunokuphendula Uthini?
◻ Iyintoni ingenelo yokukucinga kusengaphambili oko uza kukuthetha xa uthandaza?
◻ Kutheni sifanele sithandaze ngentlonelo nangendlela endilisekileyo?
◻ Simele sibonakalise umoya onjani xa sithandaza?
◻ Xa sithandaza, kutheni sifanele singalibali ukubulela nokudumisa?
◻ IBhayibhile ibonisa njani ukuba umthandazo unokusithuthuzela?
[Caption on page 17]
UKumkani uSolomon wabonakalisa ukuthobeka kumthandazo wakhe wasesidlangalaleni xa kwakunikezelwa itempile kaYehova
[Caption on page 18]
NjengoHana, unako ukuthuthuzelwa ngumthandazo