UYesu—Umlawuli “Oziphumo Zakhe Zisusela Mandulo”

UBA nemincili xa ulindele ukufika kwesalamane sakho owasigqibela kudala. Ekugqibeleni uyasibona uze ubulise ngokufudumeleyo. Uphulaphula ngenyameko njengoko sikuxelela isizathu sokuba uyise athi masikutyelele. Ngokukhawuleza kufika ixesha lokuba sigoduke. Ubuhlungu, uthi ndlela-ntle. Intlungu obuyiva ekuhambeni kwaso ithi shwaka xa usiva ukuba sifike kakuhle ekhaya.

Kamva, xa uphengulula amaphepha athile amadala, ubona iileta ezichaza amatile-tile isalamane sakho esawenzayo kudala ngaphambi kokuba siqalise uhambo lwaso lokuza kukubona. Oko ukufunda kwezo leta kukuthela thsuphe ngemvelaphi yaso kuze Oko kukubangele ube noxabiso ngakumbi ngenxa yotyelelo lwaso nomsebenzi esiwenzayo ngoku.

‘Kususela Mandulo’

Phakathi kwamaphepha amadala awayefumaneka kumaYuda enkulungwane yokuqala kwakukho imibhalo yomprofeti kaThixo uMika, eyayibhalwe malunga namakhulu asixhenxe eminyaka ngaphambili. Le yayibonisa indawo awayeza kuzalelwa kuyo uMesiya. “Ke wena, Bhetelehem-efrata, umncinane kunokuba ubekho emawakeni akwaYuda, kuya kuphuma kuwe, eze ngenxa yam, oya kuba ngumlawuli kwaSirayeli, oziphumo zakhe zisusela kumandulo, zisusela kwimihla yasephakadeni.” (Mika 5:2) Kuzaliseka la mazwi, uYesu wazalelwa kwelakwaYuda kwidolophana yaseBhetelehem kunyaka obizwa ngokuba ngowesi-2 B.C.E. Kodwa kwakunokwenzeka njani ukuba imvelaphi yakhe ‘isusele mandulo’?

UYesu wayephila ngaphambi kokuba abe ngumntu. Kwincwadi yakhe awayeyibhalele amaKristu aseKolose, umpostile uPawulos uchaza uYesu ngokuthi “ungumfanekiso kaThixo ongabonakaliyo, izibulo kwindalo yonke.”—Kolose 1:15.

UYehova, uMthombo wobulumko, wadala uNyana wakhe wokuqala ‘njengemisebenzi yakhe yamandulo,’ xa sisebenzisa ibinzana eliphefumlelweyo elibhalwe nguKumkani uSolomon kwincwadi yeMizekeliso. Emva kokundwendwela kukaYesu emhlabeni nokubuyela kwakhe ezulwini, wangqina ukuba ngokwenene ‘usisiqalo sendalo kaThixo.’ Njengobulumko bumntwisiwe, ngaphambi kokuba abe ngumntu uYesu wathi: “Ekulilungiseni kwakhe izulu, [uYehova] ndandikho apho.”—IMizekeliso 8:22, 23, 27; ISityhilelo 3:14.

Kwasekuqaleni, uNyana kaThixo wafumana isabelo esikhethekileyo, eso sokuba ‘yingcibi yomsebenzi’ ndawonye noYise. Olunjani uvuyo oku okwaluzisa kuYehova! IMizekeliso 8:30 ithi: “Ndiziyolisa ngokwam iimini ngemini,” isongezelela ithi, “ndidlala phambi kwakhe [uYehoval ixesha lonke.”

Kamva uYehova wamema uNyana wakhe wamazibulo ukuba abe nesabelo ekudalweni koluntu. Wathi: “Masenze umntu ngokomfanekiselo wethu ngokufana nathi.” (Genesis 1:26) Ngenxa yoko, kwakhula uthando ngakumbi. Ngaphambi kokuba abe ngumntu uYesu wacacisa wathi: “Nokuziyolisa kwam kukoonyana babantu.” (IMizekeliso 8:31) Ekuqaleni kwincwadi yakhe yeVangeli, umpostile uYohane wayivuma indima awaba nayo uYesu ngaphambi kokuba abe ngumntu endalweni: “Zonke izinto zabakho ngaye, yaye ngaphandle kwakhe akubangakho nanye into.”—Yohane 1:3.

Isithethi SikaYehova

Amazwi kaYohane anikela ingqalelo kwelinye ilungelo elananditshwa nguNyana kaThixo, elo lokuba sisithethi. Ukususela ekuqaleni, wakhonza njengoLizwi. Ngaloo ndlela, xa uYehova wathetha noAdam, waza kamva wathetha noAdam ekunye noEva, kunokwenzeka ukuba oko wakwenza ngoLizwi. Ibe ngubani onokukwazi ukudlulisela imiyalelo kaThixo ukuze kulungelwe uluntu ngaphezu kwalowo waba nothando ngabo?—Yohane 1:1, 2.

Hayi indlela ekumele ukuba kwaba buhlungu ngayo xa uLizwi wabona uEva noAdam bengamthobeli uMdali wabo! Ibe hayi indlela amele ukuba wayekulangazelela ngayo ukuphelisa intlungu eyaziswa kwinzala yabo ngenxa yokungathobeli! (Genesis 2:15-17; 3:6, 8; Roma 5: 12) Ethetha noSathana, owabangela ukuba uEva avukele, uYehova wathi: “Ndiya kumisa ubutshaba phakathi kwakho nomfazi, naphakathi kwembewu yakho nembewu yakhe.” (Genesis 3:15) Ezibonele ngawakhe amehlo oko kwenzeka eEden, uLizwi waqonda ukuba njengoyena uyinxalenye enkulu “yembewu” yomfazi, uya kuba ngoyena uthiywa ngokukrakra. Wayesazi ukuba uSathana wayesisibulala-mntu.—Yohane 8:44.

Xa uSathana kamva wacel’ umngeni ingqibelelo kaYobhi othembekileyo, kumele ukuba uLizwi waziva enomsindo ngenxa yezityholo ezinobuqhophololo ezazijoliswe kuYise. (Yobhi 1:6-10; 2:1-4) Enyanisweni, kwisikhundla sakhe njengesiphatha-zingelosi, uLizwi waziwa ngokuba nguMikayeli, gama elo elithetha ukuba “Ngubani OnjengoThixo?” yaye libonisa indlela amkhusela ngayo uYehova kubo bonke abo bazama ukuphang’ igunya ulongamo lukaThixo.—Daniyeli 12:1; ISityhilelo 12:7-10.

Njengokuba imbali kaSirayeli yatyhileka, uLizwi wabona indlela uSathana azama ngayo ukutyekisa abantu kunqulo olunyulu. Emva kweMfuduko eYiputa, uThixo wathetha Oku kuSirayeli ngoMoses: “Uyabona, ndithuma isithunywa phambi kwakho, ukuba sikugcine endleleni, sikufikise endaweni endiyilungisileyo. Silumkele, uliphulaphule izwi laso. Musa ukusiphikisa; kuba asiyi kuluxolela ukreqo lwenu; kuba igama lam likuso.” (Eksodus 23:20, 21) Yayingubani le ngelosi? Kusenokwenzeka ukuba, yayinguYesu ngaphambi kokuba abe ngumntu.

Ukuzithoba Ngokuthembekileyo

UMoses wafa ngowe-1473 B.C.E., yaye umzimba wakhe wangcwatyelwa “emfuleni, ezweni lakwaMowabhi, malungana neBhete-pehore.” (Duteronomi 34:5, 6) Kubonakala ukuba, uSathana wayefuna ukusebenzisa eso sidumbu ekhuthaza unqulo-zithixo. UMikayeli wakuchasa oku kodwa wazithoba ngokuyekela oku kuYise, uYehova owayenegunya kuko. ‘Engazange abe nobuganga bokuzisa umgwebo kuSathana ngokunxamnye naye ngamazwi okutshabhisa,’ uMikayeli wamlumkisa uSathana wathi: “Ngamana uYehova angakukhalimela.”—Yude 9.

Kamva uSirayeli waqalisa ukuthimba iLizwe Ledinga laseKanan. Kufuphi nesixeko saseYeriko, uYoshuwa wafumana isiqinisekiso sokuqhubeka kukaLizwi esongamela uhlanga. Apho wadibana nendoda ephethe ikrele. UYoshuwa wahamba esiya kulo mntu wasemzini waza wabuza: “Ungakuthi, ungakwiintshaba zethu, kusini na?” Yiba nomfanekiso-ngqondweni wendlela uYoshuwa awamangaliswa ngayo xa lo wasemzini wazazisa, esithi: “Hayi, ndingumthetheli womkhosi kaYehova; ndifikile ngoku.” Akumangalisi ke ngoko ukuba uYoshuwa waguqa phambi kwalo mmeli mkhulu kaYehova, ngokungathandabuzekiyo uYesu ngaphambi kokuba abe ngumntu owayeza kuba ‘ngumthanjiswa oyinganga.’—Yoshuwa 5:13-15; Daniyeli 9:25.

Olunye ungquzulwano noSathana lwenzeka ngemihla yomprofeti kaThixo uDaniyeli. Ngesi sihlandlo uMikayeli waxhasa isithunywa xa umthetheleli weedemon wamaPersi ‘wamelana naye’ kangangeeveki ezintathu. Ingelosi yathi: “Uyabona, uMikayeli, omnye wakubathetheli abaziintloko, weza kundinceda; mna ndamoyisa khona, kookumkani bamaPersi.”—Daniyeli 10:13, 21.

Ngaphambi Kokuba Ngumntu Nozuko Lomntu

Ngowe-778 B.C.E., unyaka awafa ngawo uKumkani wakwaYuda u-Uziya, umprofeti kaThixo uIsaya wabona umbono kaYehova esetroneni yakhe ephakamileyo. “Ndothuma bani na? Ngubani na owosiyela?” wabuza uYehova. UIsaya wazenza wafumaneka, kodwa uYehova wamlumkisa ukuba amaSirayeli awayekunye naye ayengayi kuwaphulaphula amazwi akhe. Umpostile uYohane wathelekisa amaYuda angakholwayo enkulungwane yokuqala nabantu bomhla kaIsaya, waza waphawula oku: “UIsaya wazitsho ezi zinto ngenxa yokuba walubona uzuko lwakhe.” Uzuko lukabani? Olo lukaYehova nolukaYesu ngaphambi kokuba abe ngumntu bekunye kwiintendelezo zasezulwini.—Isaya 6:1, 8-10; Yohane 12:37-41

Kwiinkulungwane ezimbalwa kamva uYesu wafumana esona sabelo sikhulu ngelo xesha, UYehova wadlulisela amandla okuphila oNyana wakhe amthandayo ukususela ezulwini ukusa kwisibeleko sikaMariya. Kwiinyanga ezisithoba kamva wazala umntwana oyinkwenkwe, uYesu. (Luka 2:1-7, 21) Ngokwamazwi ompostile uPawulos: “Xa umda ozeleyo wexesha wafikayo, uThixo wathumela uNyana wakhe, owathi waphuma emfazini waza waba phantsi komthetho.” (Galati 4:4) Ngokufanayo, umpostile uYohane wavuma: “ULizwi waba yinyama waza wahlala phakathi kwethu, yaye salubona uzuko lwakhe, uzuko olunjengolo lonyana okuphela kozelweyo nguyise; kwaye wayezele bububele obungasifanelanga nayinyaniso.”—Yohane 1:14.

Ukuvela KukaMesiya

Ubuncinane xa wayeneminyaka eli-12 ubudala, uYesu oselula waqonda ukuba umele axakeke ngumsebenzi kaYise. (Luka 2:48, 49) Kwiminyaka enokuba li-18 kamva, uYesu waya kuYohane uMbhaptizi kuMlambo iYordan yaye wabhaptizwa. Njengokuba uYesu wayethandaza, amazulu avuleka, yaye umoya oyingcwele wehlela kuye. Khawuthelekelele iinkumbulo ekumele ukuba waba nazo njengoko ekhumbula amawakawaka eminyaka awawachitha ekunye noYise njengengcibi yomsebenzi, isithethi sakhe, umthetheli womkhosi kaThixo, njengomphathi-zingelosi, uMikayeli. Emva koko kwavakala ilizwi likaYise lixelela uYohane uMbhaptizi lisithi: “Lo nguNyana wam, oyintanda, endikholisiweyo nguye.”—Mateyu 3:16, 17; Luka 3:21, 22.

UYohane uMbhaptizi ngokuqinisekileyo akazange abuthandabuze ubukho bukaYesu ngaphambi kokuba abe ngumntu. Njengokuba uYesu wayesondela kuye, uYohane wadanduluka wathi: “Yabonani, iMvana kaThixo esusa isono sehlabathi!” Yaye wongezelela wathi: “Lo ngulowo endathi ngaye, Emva kwam kuza umntu oye wadlulela phambi kwam, ngenxa yokuba wabakho ngaphambi kwam.” (Yohane 1:15, 29, 30) Umpostile uYohane, naye wayebazi ubukho bukaYesu bangaphambili. Wabhala wathi: “Lowo uza evela phezulu ungaphezu kwabo bonke abanye.” yaye: “Lowo uza evela ezulwini ungaphezu kwabo bonke abnnye. Oko akubonileyo nakuvileyo, unikela ubungqina ngako.”—Yohane 3:31, 32.

Malunga nonynka wama-61 C.E., umpostile uPawulos wakhuthaza amaKristu angamaHebhere ukuba akuqonde ukubaluleka kokufika kukaMesiya emhlabeni nomsebenzi wakhe njengoMbingeleli Omkhulu. Enikela ingqalelo kwindima kaYesu njengeSithethi, uPawulos wabhala: “UThixo . . . uye ekupheleni kwale mihla wathetha nathi ngoNyana . . . nathe ngaye wenza iinkqubo zezinto.“ Enoba oku kubhekisela kwindima kaYesu ‘njengengcibi yomsebenzi’ ekudalweni okanye ekubandakanyekeni kwilungiselelo eliqhubekayo likaThixo lokuxolelaniswa kwabantu, apha uPawulos wongezelela ubungqina bakhe bobukho bukaYesu ngaphambi kokuba ngumntu.—Hebhere 1:1-6; 2:9.

Ukunyaniseka ‘Kususela Mandulo’

KumaKristu aseFilipi enkulungwane yokuqala, uPawulos wanikela esi sibongozo: “Hlalani ninesi simo sengqondo wayenaso noKristu Yesu, owathi, nangona wayekubume bukaThixo, akanikela ngqalelo kurhwaphilizo, olulolu, lokuba wayefanele alingane noThixo. Hayi khona, kodwa waziqongqotha waza wathabatha ubume bekhoboka yaye waba ngokwemfano yabantu. Ukongezelela, xa wazifumana ekwimo yomntu, wazithoba waza wathobeka de kwafikelela ekufeni, ewe, ukufa kwisibonda sentuthumbo.” (Filipi 2:5-8) Ngothando uYehova wasabela kwikhondo likaYesu lokuthembeka ngokumvusa nokuphinda amamkele kwikhaya lakhe ezulwini. Onjani wona ukubalasela umzekelo wokugcina ingqibelelo kumaxesha akudala asishiya nawo uYesu!—1 Petros 2:21.

Hayi indlela esinombulelo ngayo ngenxa yenkcazelo esiyinikwa yiBhayibhile yobukho bukaYesu ngaphambi kokuba abe ngumntu! Ngokuqinisekileyo iyasomeleza ukuze senze isigqibo sokuxelisa umzekelo wakhe wenkonzo yokunyaniseka, ngokungakumbi ngoku njengokuba elawula njengoKumkani woBukumkani bukaThixo obungoMesiya. Masikhahlele ‘uMthetheli woxolo,’ uKristu Yesu, oyiRhuluneli nonguMlawuli wethu “oziphumo zakhe zisusela kumandulo”!—Isaya 9:6; Mika 5:2.

[Ibhokisi ekwiphepha 24]

Ubungqina Bobukho Bakhe Bangaphambi Kokuba Abe Ngumntu

Amazwi kaYesu, njengokuba kuphawuliwe ngezantsi, ngokuqinisekileyo abonisa ubukho bakhe bangaphambili njengomntu:

◻ “Akukho mntu unyukele ezulwini ngaphandle kwalowo wehla evela ezulwini.”—Yohane 3:13.

◻ “UMoses akazange aninike isonka esivela ezulwini, kodwa uBawo uninika isonka sokwenyaniso esivela ezulwini. Kuba isonka sikaThixo ngulowo uhla evela ezulwini aze alinike ubomi ihlabathi. . . . ezulwini ndihlele ukuza kwenza, kungekhona ukuthanda kwam, kodwa ukuthanda kwalowo wandithumayo.”—Yohane 6:32, 33, 38.

◻ “Siso esi isonka esihla sivela ezulwini, khon’ ukuze nabani na adle kuso aze angafi. Ndim isonka esiphilayo esehla sivela ezulwini; ukuba nabani na udla kwesi sonka uya kuphila ngonaphakade.”—Yohane 6:50, 51.

◻ “Kuthekani, ke ngoko, ukuba ningabona uNyana womntu enyukela apho wayekho ngaphambili?”—Yohane 6:62.

◻ “Ubungqina bam buyinyaniso, ngenxa yokuba ndiyazi apho ndivela khona nalapho ndiya khona. . . . Nina nivela kummandla ongezantsi; mna ndivela kummandla ongaphezulu. Nina nivela kweli hlabathi; mna andiveli kweli hlabathi.”—Yohane 8:14, 23.

◻ “Ukuba uThixo ebenguYihlo, ngenindithanda, kuba ndilapha nje ndiphuma kuThixo. Andizanga ngokwam konke konke, kodwa Lowo undithumele.”—Yohane 8:42.

◻ “Ngokona kuyinyaniso ndithi kuni, Ngaphambi kokuba uAbraham abekho, bendikho.”—Yohane 8:58.

◻ “Bawo, ndizukise ecaleni kwakho ngozuko endandinalo ecaleni kwakho phambi kokubakho kwehlabathi. Bawo, mayela noko undinike kona, ndinqwenela ukuba, apho ndikhoyo mna, kwanabo babe kunye nam, ukuze balubone uzuko lwam ondinike lona, ngenxa yokuba wandithanda phambi kokusekwa kwehlabathi.”—Yohane 17:5, 24.

[Umfanekiso okwiphepha 23]

UYoshuwa udibana nomthetheleli womkhosi kaYehova