Ukuhlanganisana Nabathandi Benkululeko Abayinikwe NguThixo
AMANGQINA KAYEHOVA ahlukile ngeendlela ezininzi. Ngawo kuphela athetha “intetho enyulu.” (Zefaniya 3:9) Kuphela ngawo amanyeneyo, enophawu oluwahlulayo lothando olwachazwa nguYesu Kristu. (Yohane 13:35) Yaye ngawo kuphela anandipha inkululeko awathi uYesu Kristu yayiza kuziswa yinyaniso, njengokuba kubhalwe kuYohane 8:32: “Naniya kuyazi inyaniso, yaye inyaniso iya kunikhulula.”
Loo mazwi uYesu Kristu, uNyana kaThixo, awawabhekisa kubafundi bakhe, angqineke eyinyaniso. Yaye ngoku aqondwa ngakumbi kunanini na ngaphambili ngawo onke loo maNgqina kaYehova ebekho kwiNdibano Yesithili “Yabathandi Benkululeko.” Ucwangciso lwendibano lubethelele iingongoma ezahlukahlukeneyo zenkululeko yawo, indlela amele ayisebenzise ngayo, ukuziphendulela okuhambisana nenkululeko yawo nendlela asikelelwe ngayo ngokuba ngabantu abakhululekileyo.
Ezi ndibano ziqhutywe ngexesha elililo neziluncedo zaqalisa kuMantla eIkhweyitha ngoJuni 7, 1991, eLos Angeles, eKhalifoniya, eUnited States. Ucwangciso lwaqala nge-10:20 kusasa ngomculo, owalandelwa yingoma nomthandazo. Kwavulwa ngodlwabevu lwentetho eyayisekelwe kuYakobi 1:25. NgokweThe Jerusalem Bible, le ndinyana ifundeka ngolu hlobo: “Indoda ejonga ngocoselelo kumthetho ogqibeleleyo wenkululeko ize ikwenze umkhwa wayo oko—ingaphulaphuli nje ize ilibale, kodwa ngenkuthalo iwusebenzisa—iya kuba noyolo ngako konke ekwenzayo.” Kanye njengokuba sizibuka esipilini ukuze sibone apho sifanele siphucule khona kwinkangeleko yethu, ngoko kufuneka sihlale siqondele emthethweni kaThixo ogqibeleleyo wenkululeko ukuze sibone apho kufuneka siguqule ubuntu bethu khona. Yaye sifanele sihlale sijongile kweso sipili.
Kwalandela intetho kasihlalo ethi, “Namkelekile, Nonke Nina Bathandi Benkululeko.” AmaNgqina kaYehova ayayithanda inkululeko, yaye afuna ukuhlala ekhululekile. Isithethi sacaphula iincwadi ezisetyenziswa kwezomthetho ezibonisa ukuba akunakubakho nkululeko ngaphandle komthetho. Ewe, amaKristu awakhululekanga ukuba enze unothanda kodwa akhululekile ukuba enze ukuthanda kukaYehova. Afuna ukuyisebenzisa ngokupheleleyo inkululeko yawo kodwa engayisebenzisi kakubi. Ngokukodwa ukususela ngowe-1919, amaNgqina kaYehova ebenandipha inkululeko eyongezelelekileyo. Isithethi salanda ukugxininiswa kwenkululeko kwimixholo yeendibano nakwiimpapasho zamaKristu. Bonke ababekho kwindibano babeza kufunda okungakumbi ngenkululeko abayinikwe nguThixo nendlela yokuyisebenzisa.
Loo magqabaza enziwe ngexesha elililo alandelwa ludliwano-ndlebe nabathandi benkululeko ababekuvuyela ukuba lapho kuloo ndibano. Iindibano ezinjalo zingamaxesha okuvuya, kwananjengokuba imisitho yamaSirayeli amandulo eyayibakho kathathu ngonyaka yayiphawulwa luvuyo olukhulu. Udliwano-ndlebe nabantu abaliqela lwangqina ukuba iindibano ziba zizihlandlo zokuvuya ezakhayo ngokomoya.
Kwandula ke kwalandela intetho engumxholo ethi, “Injongo Yenkululeko Esiyinikwe NguThixo Nendlela Yokuyisebenzisa.” Kule ntetho ababekho endibanweni bafunda ukuba uYehova nguye yedwa onenkululeko epheleleyo kuba uliGunya Elongamileyo yaye unamandla onke. Noko ke, ngenxa yegama lakhe nokuze kulungelwe izidalwa zakhe maxa wambi uyisikel’ umda inkululeko yakhe ngokuzeka kade umsindo nangokuzeyisa. Zonke izidalwa zakhe ezikrelekrele zinenkululeko elinganiselweyo, kuba zithobela uYehova yaye zisikelwe umda yimithetho yakhe yemvelo neyokuziphatha. UYehova ubanike inkululeko yokuba bayinandiphe kodwa ngokukodwa ukwenzela ukuba bazise uzuko novuyo kuye ngokumnqula. Ngenxa yokuba eyisebenzisa kakuhle inkululeko yawo, amaNgqina kaYehova aye afumana udumo emhlabeni wonke ngenxa yehambo entle nangenzondelelo kubulungiseleli.
NgoLwesihlanu Emva Kwemini
Intetho exhokonx’ ingcinga eyavula ucwangciso lwenjikalanga yangoLwesihlanu yayinomxholo othi “Ngaba Sifanele Sixakeke Yimisebenzi Efileyo Okanye Kwinkonzo KaYehova?” Imisebenzi efileyo ayiquki kuphela leyo yenyama kodwa kwakhona neminye efileyo ngokomoya, elilize nengenaziqhamo—njengamalungiselelo okwenza imali. Kulo mbandela, ukuzigocagoca ngokunyanisekileyo komntu ngamnye kuyimfuneko ukuze siqonde enoba sibeka uBukumkani kuqala ebomini kusini na.
Ekwanenjongo efanayo yaba yintetho eyalandelayo enomxholo othi, “Ukufeza Uthumo Lwethu Njengabalungiseleli BakaThixo.” Isithethi sabonisa ukuba amaKristu awafanele aneliseke kukufeza inkonzo nje yokudlulisela usana kunina okanye nje ngokusebenzela iiyure. Afanele afune ukuba ngaphumelelayo kwiinkalo zonke zobulungiseleli bobuKristu. Ezi ngongoma zabethelelwa ngemiboniso nangodliwano-ndlebe. Onke amaKristu abongozwa ukuba afeze ubulungiseleli bawo ngomkhamo ophakame kangangoko kunokwenzeka.
Kwalandela intetho ethi “Abantu Abakhululekileyo Kodwa Abaya Kuphendula,” isithethi sagxininisa ukuba nangona abantu bakaYehova beyinandipha inkululeko inyaniso ebazisele yona, bafanele bakhumbule ukuba iphelekwa kukuziphendulela. Bafanele bayisebenzise inkululeko yabo, kungekhona njengesingxengxezo sehambo embi, kodwa ekudumiseni uYehova. NjengamaKristu, baya kuphendula “kumagunya awongamileyo” yaye bafanele basebenzisane nabadala bebandla. (Roma 13:1) Ngaphezu koko, bamele baphendule ngendlela abanxiba ngayo, abazilungisa ngayo nangehambo yabo. Abafanele baze balibale ukuba “elowo kuthi uya kuziphendulela kuThixo.”—Roma 14:12; 1 Petros 2:16.
Kwaza ke kwalandela ingxubusho yemfuneko yokuba onke amaKristu abenako “Ukungoyiki Njengoko Isiphelo Seli Hlabathi Sisondela.” Ngoxa uluntu lunoloyiko loko kunokwenzeka kwikamva, amaKristu kufuneka angoyiki ukufeza ubulungiseleli bawo. Ukungoyiki kungumphumo wokukholosa ngoYehova, kuba okukhona umKristu esoyika ukungamkholisi uThixo, kokukhona eya kungazoyiki izidalwa. Ukuzazi ngentloko izibhalo ezithuthuzelayo kunokumomeleza umntu ukuba abe ngongenaloyiko. Ukuze bomelele ngokomoya baze bangoyiki, abakhonzi bakaThixo kukwafuneka ukuba bawasebenzise kakuhle onke amathuba okunxulumana namakholwa abakhonza kunye nawo. Ngamnye kukwafuneka ukuba akhumbule indima umthandazo onayo ekubeni ngongenaloyiko. Ngokuhlala engenaloyiko, amaKristu aya kulondoloza ulwalamano oluhle noYehova uThixo.
Ucwangciso losuku lokuqala lwaqukunjelwa ngomdlalo onemfundiso gqitha nothi Sinikwe Inkululeko Yokuhambisela Phambili Unqulo Lokwenyaniso. Wabonisa indlela intsapho yezi mini eyafunda isifundo ngayo kuEzra neqela lakhe labantu abangama-7 000, abancama izinto ezithile ukuze babuyele eYerusalem. Wenza ukuba ngamnye okhoyo endibanweni ahlole izinto eziza kuqala ebomini bakhe aze abone indlela anokuwandisa ngayo amalungelo akhe enkonzo. Abakhulileyo nabaselula ngokufanayo bangenelwa kulo mdlalo.
NgoMgqibelo Kusasa
Emva kokudlalwa komculo, ukuvunywa kwengoma, umthandazo nengxubusho yetekisi yeBhayibhile yemihla ngemihla, ucwangciso lwakusasa ngoMgqibelo lwabalaselisa ungcelele lweentetho olunomxholo othi, “Inkululeko Ephelekwa Yimbopheleleko Kwisangqa Sentsapho.” Kwicandelo lokuqala elithi, “Indlela Oobawo Abanokumxelisa Ngayo UYehova,” oobawo balulekwa ngeendlela ezahlukahlukeneyo abanokuthi baxelise uBawo wethu osemazulwini ngazo. Eyokuqala kuTimoti 5:8 ifuna ukuba balungiselele iintsapho kungekuphela ngokwezinto eziphathekayo kodwa kwanangokomoya. Baxelisa uYehova ngokuba ngabafundisi abalungileyo kwiintsapho zabo nangokunikela ingqeqesho enothando xa kuyimfuneko. Ezi ngongoma zaveliswa kakuhle ngodliwano-ndlebe nabantu abaliqela.
Icandelo elilandelayo lolu ngcelele lweentetho lalinomxholo othi, “Indima Yomfazi Yokuxhasa Indoda Yakhe.” Laqalisa ngokugxininisa ukuba umfazi unesikhundla esinesidima kwintsapho yamaKristu, eso sokuba ngoxhasayo. Oku kufuna ntoni kuye? Kufuna ukuba abonakalise ukuzithoba okufanelekileyo, angaze anyanzelele indoda yakhe ukuba yenze oko kunqwenelwa nguye kuphela. Kufuneka azinyamekele kakuhle iimbopheleleko zakhe ezinokuthanani nendoda nabantwana bakhe yaye unokwaneliseka ngokwenene kukugcina ikhaya lakhe licocekile yaye lithandeka. Yaye njengomlungiseleli ongumKristu, unokuba namathuba amaninzi okuba nesabelo kwinkonzo yasentsimini. Udliwano-ndlebe nentsapho ethile lwagxininisa ubulumko besiluleko esinjalo esingokweZibhalo.
Abantu abaselula bafumana ingqalelo kwicandelo elinomxholo othi “Abantwana Abaphulaphulayo Baze Bafunde.” Ngokuqeqesha abantwana babo ukuba baphulaphule baze bafunde, abazali bazisa uzuko kuYehova yaye babonisa uthando ngabazalwana babo bokomoya nakubantwana babo. Kuya kubakho umanyano olomeleleyo phakathi kwabazali nabantwana ukuba bachitha ixesha elixabisekileyo kunye. Abazali bamele bakuxhobele ukuphendula imibuzo yabantwana babo baze bakukhuthaze ukunxanelwa ulwazi kwabo. Kwakhona, udliwano-ndlebe nabathile lwabonisa indlela oku okunokwenziwa ngayo.
Kwalandela isiluleko esihle esinomxholo othi, “Zigcine Ukhululekile Ukuze Ukhonze UYehova.” Kwenziwa njani oku? Ngokuzigcina sikhululekile ekusukeleni imisebenzi yehlabathi, imisetyenzana yokuzonwabisa edla ixesha nosukelo lwezinto eziphathekayo. UYesu nompostile uPawulos basimisela umzekelo omhle wokuba ngabazincamayo. Abantu bakaYehova kufuneka bagcine iliso elingenakumbi, elijoliswe kwizilangazelelo zoBukumkani. Xa kufuneka kufunyanwe izinto eziphathekayo, kububulumko ukonga imali ngoku kuze kuthengwe kamva kunokuthenga ngoku kuze kuhlawulwe kamva. Ulutsha lumele lukulumkele ukucamngca ngoyolo lwesini nosukelo lwehlabathi. Udliwano-ndlebe novulindlela ongatshatanga lwabonisa iintsikelelo ubani azifumanayo xa ezigcina ekhululekile ukuze akhonze uYehova.
Ucwangciso lwakusasa ngoMgqibelo lwaqukunjelwa ngentetho enomxholo othi, “Ngena Enkululekweni Ngozahlulelo Nobhaptizo.” Abo babeza kubhaptizwa bakhunjuzwa ukuba ngoxa indalo yeyeliselwa ebukhobokeni yimvukelo ka-Adam, uMkhululi onamandla, uYesu Kristu, wavula indlela eya kwinkululeko ngedini lakhe. Isithethi sabonisa oko kwakubandakanyekile ekwahlukaneni nokuthile ukuze wenze ukuthanda kukaThixo saza sabalaselisa iimbopheleleko ezithile neentsikelelo ezityebileyo ababeza kuzifumana abo babeza kubhaptizwa.
NgoMgqibelo Emva Kwemini
Ucwangciso lwangoMgqibelo emva kwemini lwaqalisa ngentetho enombuzo ochukumisayo othi, “Ufuna Ukulungelwa Kukabani?” Ihlabathi libonakalisa umoya kaMtyholi wokufuna ukulungelwa kobuqu. Noko ke, amaKristu afanele axelise umoya wokuzincama owabonakaliswa nguYesu Kristu. Onjani wona umzekelo awawumiselayo! Washiya uzuko lwakhe lwasemazulwini waza wancama ubomi bakhe ukwenzela ukulungelwa kwethu. Ucelomngeni lokufuna ukulungelwa komnye luphakama xa kuvela ukungaqondani phakathi kwamaKristu kwimicimbi yoshishino okanye yemali, xa kuvela ukungqubana kweempawu zobuntu njalo njalo. Izinto ezinjalo zivavanya uthando lobuKristu. Kodwa ngokufuna ukulungelwa kwabanye, umntu uqinisekile ngokufumana intsikelelo engakumbi yokupha, yaye uya kwamkeleka kuYehova.
Kwandula ke kwalandela umxholo ohlobene gqitha noku othi, “Ukuqonda Nokoyisa Ubuthathaka Bokomoya.” Le ntetho yagxininisa imfuneko yokuqonda iimpawu zobuthathaka bokomoya size senze ngokungxamisekileyo ekulweleni ukoyisa uSathana nemigibe yakhe. Abakhonzi bakaYehova bamele bahlakulele uthando olunzulu ngaye baze bakuthiye okubi. Oku kufuna ukuba bamazi uYehova ngesifundo seBhayibhile sobuqu nesentsapho esithe rhoqo nesinenjongo. Bamele baziphephe zonke iindlela zokuzonwabisa ezizukisa ugonyamelo nokuziphatha kakubi ngokwesini. (Efese 5:3-5) Ukuthandaza nokuya rhoqo kwiintlanganiso kukwabalulekile ukuze baphumelele ekoyiseni ubuthathaka bokomoya.
Mhlawumbi eyona ntetho eyaba ngundaba-mlonyeni kunayo nayiphi na enye eyanikelwa kuloo ndibano yayiyileyo inomxholo othi, “Ngaba Umtshato Usisikhokelo Solonwabo?” Abantu abaselula abaninzi bacinga njalo! Kodwa isithethi sakwenza kwacaca ukuba kukho izidalwa zomoya ezingabalekiyo ezithembekileyo ezonwabileyo noxa zingatshatanga, kanye njengokuba amaKristu amaninzi azahluleleyo onwabe gqitha noxa engazibophelelanga ngedyokhwe yomtshato. Ngaphezu koko, izibini ezininzi ezitshatileyo azonwabanga, njengokuba oko kubonakala ngezininzi gqitha eziqhawula umtshato. Ubani ufuna nje ukwalathisel’ ingqalelo yakhe kwiintsikelelo ezininzi athi onke amaKristu azahlulelelyo azinandiphe ukuze aqonde ukuba umtshato, nangona usenokuba yintsikelelo, awusosikhokelo solonwabo.
Le ntetho yalandelwa lungcelele lweentetho olunomxholo othi, “Inkululeko YamaKristu Kumhla Wethu.” Isithethi sokuqala saxubusha umxholo othi, “Iinkalo Ezithile Zenkululeko Yethu NjengamaKristu.” Ezi ziquka ukukhululeka kwiimfundiso zonqulo lobuxoki ezinjengekaBathathu Emnye, eyokungafi komphefumlo womntu neyentuthumbo engunaphakade. Kwandule ke kubekho inkululeko ekubeni ngamakhoboka esono. Nangona amaKristu engafezekanga, akhululekile kwimikhwa emibi enjengokutshaya, ukungcakaza, ukunxila nokuziphatha kakubi ngokwesini. Kukwakho nokukhululeka kwimeko yokungabi nathemba, kuba anethemba leParadisi elibaqhubela ekubeni baxelele abanye ngalo.
Isithethi esalandelayo sabuza umbuzo othi, “Ngaba Wena Ngokobuqu Uyayixabisa Le Nkululeko?” Ukuxabisa into kuthetha ukuyithanda nokuyiphatha ngenyameko. Ukuze enze oko, umkhonzi kaThixo umele azinxweme ekubeni ahendelwe ekudluleleni ngaphaya kwemida yenkululeko yamaKristu. Inkululeko yehlabathi yeyenkohliso, kuba iphumela ebukhobokeni besono nokonakala.
Isithethi sokugqibela kolu ngcelele lweentetho sathetha ngomxholo othi, “Abathandi Benkululeko Bema Beqinile.” Ukuze enze oko, amaKristu amele anamathele kubazali bawo basezulwini, uYehova nentlangano yakhe enjengomfazi. Abantu bakaYehova abanakuzivumela ukuba batyekiswe ngabawexuki; bamele babaphephe abo banengcamango yokuziphatha okubi. Ukuze eme eqinile kwinkululeko yobuthixo, amaKristu amele ‘adle ubomi ngokomoya.’—Galati 5:25.
Intetho yokugqibela yaloo mini yayiluncuthu. Yayinomxholo othi, “Oyena Mntu Ubalaseleyo Wakha Waphila.” UYesu Kristu wayengoyena mntu ubalaseleyo, kuba wabuchaphazela ngamandla ubomi boluntu kunayo yonke imikhosi, iinqanawa zemfazwe, iipalamente nookumkani bebonke. WayenguNyana kaThixo, owayephila ezulwini ngaphambi kokuba eze emhlabeni. UYesu waxelisa uYise wasezulwini kuyo yonke into awayeyithetha newayeyifundisa nendlela awayephila ngayo kangangokuba waba nako ukuthi: “Lowo undibonileyo mna umbonile uBawo.” (Yohane 14:9) Hayi indlela uYesu awakubonakalisa kakuhle ngayo ukuba “uThixo uluthando!” (1 Yohane 4:8) Emva kokuxubusha ngokunzulu ngeempawu zikaYesu, isithethi saphawula ukuba ungcelele lwamanqaku athi, “Ubomi Nobulungiseleli BukaYesu” luye lwapapashwa kwiMboniselo ukususela ngoAprili 1985. Ekuphenduleni izicelo ezininzi, uMbutho ngoku wawukhupha incwadi entsha ethi Oyena Mntu Ubalaseleyo Wakha Waphila. Inezahluko ezili-133 yaye ishicilelwe ngemibalabala. Umbandela okungcelele uye wahlengahlengiswa, yaye wonke ukhutshelwe kumaphepha angama-448 ale ncwadi. Enyanisweni, olu suku lwendibano lwaphela ngovuyo olukhethekileyo!
Kusasa NgeCawa
Ekuqaleni kocwangciso lwakusasa ngeCawa kwabakho ungcelele lweentetho olunomxholo othi, “Ukukhonza Njengababambisi Babantu.” Intetho ethi, “Ukubambisa Iintlanzi—Ezokoqobo Nezokomfuziselo” yabeka isiseko seentetho ezalandelayo. Isithethi sabonisa ukuba emva kokuba uYesu ebambise iintlanzi ezininzi ngokumangalisayo, wamema abalobi ababebandakanyekile ukuba babe ngabalobi babantu. Kangangexesha elithile, uYesu waqeqesha abafundi bakhe ukuba babe ngabalobi babantu, yaye beqala ngePentekoste yowama-33 C.E., baphumelela ekuncedeni inkitha yamadoda nabafazi ukuba babe ngabafundi.
Isithethi esilandelayo saxubusha ngomzekeliso womnatha obhalwe kuMateyu 13:47-50. Sabonisa ukuba umnatha wokomfuziselo wawuquka amaKristu athanjisiweyo neNgqobhoko, yona ngenxa yomsebenzi eyawenzayo wokuguqulela, ukupapasha nokusasaza iiBhayibhile, nangona le migudu yabangela ukuqokelelwa kweentlanzi ezininzi ezimbi. Ngokukodwa ukususela ngowe-1919 kuye kwakho umsebenzi wokwahlula, iintlanzi ezimbi zilahlwa, ngoxa ezintle ziqokelelelwa kumabandla anjengezitya aye anceda ekukhuseleni nasekulondolozeni amaKristu okwenyaniso ukwenzela inkonzo yobuthixo.
Intetho yesithathu ethi, “Ukubambisa Abantu Kumanzi Omhlaba Wonke,” yagxininisa imbopheleleko yawo onke amaKristu azahluleleyo ukuba abe nenxaxheba kumsebenzi wokubambisa emhlabeni wonke. Ngoku abangaphezu kwezi-4 000 000 kumazwe angaphezu kwama-200 banenxaxheba kulo msebenzi, yaye kwiminyaka yakutshanje abangaphezu kwama-230 000 baye babhaptizwa nyaka ngamnye. Bonke abantu bakaYehova babongozwa ukuba baphucule ubuchule babo bokubambisa, yaye kwadliwan’ indlebe ngokukodwa “nabalobi” abanempumelelo.
Kwintetho elandelayo, enomxholo othi, “Hlalani Niphaphile ‘Kwixesha Lokuphela’” isithethi sabala izinto ezisixhenxe ezinokunceda abantu bakaThixo bahlale bephaphile: ukulwa ukuphazamiseka, ukuthandaza, ukulumkisa ngesiphelo esizayo sale nkqubo yezinto, ukunamathela kwintlangano kaYehova, ukwenza uhlolisiso lobuqu, ukucamngca ngeziprofeto eziye zazaliseka nokukhumbula ukuba usindiso lwabo lukufuphi kunaxa baqalayo ukukholwa.
Ucwangciso lwakusasa lwaqukunjelwa ngengxubusho enomxholo othi, “Ngoobani Abaya Kusinda ‘Ngexesha Lembandezelo’?” Isithethi sabonisa indlela isiprofeto sikaYoweli esazaliseka ngayo ngomlinganiselo othile ngamaxesha abapostile, nendlela esizaliseka ngokubhekele phaya ngayo ngoku, yaye esiya kuzaliseka ngokupheleleyo kwikamva elingekude.
NgeCawa Emva Kwemini
Ucwangciso lwasemva kwemini lwaqalisa ngentetho yesidlangalala ethi, “Ukulothulel’ Umnqwazi Ihlabathi Elitsha LikaThixo Lenkululeko!” Le ntetho yaqhubeka nomxholo wendibano othetha ngenkululeko. Kwacaciswa ukuba iLizwi likaThixo lixela kwangaphambili ihlabathi elitsha apho kuya kubakho inkululeko kwingcinezelo ebangelwa lunqulo lobuxoki, zezobupolitika, zezorhwebo nabubuzwe. Kuya kubakho kwakhona inkululeko kwisono nasekufeni. Impilo egqibeleleyo iya kubuyiselwa ukuze abantu bakwazi ukuphila ngonaphakade ngolonwabo kumhlaba oyiparadisi. Ngaloo ndlela, abathandi bobulungisa banezizathu ezininzi zokuthi ngxatsho ke! kuMenzi wehlabathi elitsha ngokudanduluka bathi: “Enkosi, Yehova, ngokuthi ekugqibeleni usinike inkululeko yokwenyaniso!”
Intetho yesidlangalala yalandelwa yinto entsha kwindibano yesithili—ingxubusho yesifundo seveki esikwiMboniselo. Yaza indibano yaqukunjelwa ngentetho echukumisayo nesiluleko esithi, “Bathandi Benkululeko, Hlalani Nisenza Inkqubela.” Ngokufutshane isithethi saxubusha ngeengongoma eziphambili zomxholo wendibano ongenkululeko. Sagxininisa indlela abonwabe ngayo abantu bakaYehova ngenxa yenkululeko yabo, sabala iindlela amaKristu aye anenkqubela ngazo saza sawabongoza ukuba ahlale esenza inkqubela ngokumanyeneyo ukuze avune iintsikelelo ezingakumbi. Saqukumbela ngamazwi athi: “Ngoxa sisenza oku, ngamana uYehova angaqhubeka esisikelela thina sonke ngabanye ukuze sibe siya kuhlala sisenza inkqubela njengabathandi benkululeko.”
“Indalo yalulanyiselwa kokungelutho, kungengakuvuma kwayo, kungenxa yowayilulamisayo, inethemba lokuba nendalo ngokwayo iya kukhululwa ebukhobokeni bokonakala, isingiswe enkululekweni yozuko lwabantwana bakaThixo.”—Roma 8:20, 21.
[Imifanekiso ekwiphepha 25]
Oselula owayeze kwindibano yasePrague, eCzechoslovakia
[Imifanekiso ekwiphepha 26]
1. Abaza kubhaptizwa besiya kwindawo yokubhaptizela ePrague, eCzechoslovakia
2. Ukubhaptizwa njengomnye wamaNgqina kaYehova eTallinn, e-Estonia
3. Iimpapasho ezintsha zabavuyisa abo babeze kwindibano eyayiseUsolye-Sibirskoye, eSiberia
4. Ukukhutshwa kwe-“New World Translation of the Holy Scriptures” ngesiCzech nesiSlovak kwindibano eyayisePrague