Wamkelekile KwiiNdibano Zesithili “Zabathandi Benkululeko”!
INKULULEKO! Hayi indlela elivakala kamnandi ngayo elo gama! Akakho umntu okuthandayo ukuba sebukhobokeni okanye ekuthinjweni. Kwiminyaka yakutshanje kuye kwakho amanyathelo akekelele kwinkululeko yezobupolitika abanethemba layo abantu kunayo nayiphi na eminye iminyaka ekhumbulekayo.
Noko ke, nangona inqweneleka inkululeko yezobupolitika, kukho inkululeko ebaluleke nenqweneleka ngakumbi. Yinkululeko uYesu Kristu, uNyana kaThixo, awathetha ngayo xa wathi kubafundi bakhe: “Ukuba nina nithe nahlala elizwini lam, noba ningabafundi bam, inyaniso. Naniya kuyazi inyaniso, yaye inyaniso iya kunikhulula.” (Yohane 8:31, 32) Oku kukukhululwa kubukhoboka beenkolelo zonqulo lobuxoki, ukukhululwa ekoyikeni umntu, ukukhululwa ekukhotyokisweni sisono nazezinye izinto ezininzi.
Yile nkululeko ke engumxholo weeNdibano Zesithili “Zabathandi Benkululeko” eziza kuqhutywa ngamaNgqina kaYehova kulo lonke ihlabathi ukususela kwihlobo lowe-1991. Ukususela ngonyaka we-1919, owaphawulwa kukushenxiswa kwemiqathango karhulumente eyayibekelwe abo babekhokela phakathi kwabo, abantu bakaThixo bebenandipha inkululeko engakumbi kunqulo lwabo olunyulu.
Kufaneleke gqitha ukuba umbandela wenkululeko ube ububalaseliswa kule minyaka idluleyo kwiindibano zolawulo lobuthixo, ngemixholo enjengothi “INdibano Yolawulo Lobuthixo ‘Yohlanga Olukhululekileyo’” nothi “IiNdibano Zesithili ‘Zoonyana BakaThixo Benkululeko.’” Kwakhona kuye kwaxutyushwa kanobom ngenkululeko kwiimpapasho ezinjengethi “The Truth Shall Make You Free” nethi Ubomi Obungunaphakade—Enkululekweni Yoonyana bakaThixo.
Inkululeko abakhonzi bakaYehova abayinikwe nguThixo abayinikelwanga impilo-ntle nolonwabo lwabo kuphela. Kunjengokuba sifunda kumaGalati 5:13: “Kuba nina nabizelwa enkululekweni, bazalwana; kodwa ke musani ukuthi, ukuyiphatha inkululeko leyo, nivulele inyama ithuba; manisuke ngalo uthando nikhonzane.” INdibano Yesithili “Yabathandi Benkululeko” iza kusinceda siyiqonde injongo yokunikwa kwethu inkululeko, isenze sibambelele kwinkululeko yethu exabisekileyo, ize isibonise indlela yokuyisebenzisa ngeyona ndlela ifanelekileyo.
Indibano iya kuqalisa ngentsasa yangoLwesihlanu nge-10:20 ngocwangciso lweengoma oluya kuzenza iingqondo zethu zilungele ukutya kokomoya okuza kulandela. Umxholo wosuku lokuqala, osekelwe kuYohane 8:32, uthi “Ukwazi Inyaniso Esikhululayo.” Kusasa kuya kubalaseliswa amagqabaza kasihlalo olwamkelo nentetho engumxholo ethi, “Injongo Yenkululeko Esiyinikwe NguThixo Nendlela Yokuyisebenzisa.” Le ntetho iya kubalaselisa umahluko phakathi kwenkululeko epheleleyo kaYehova nenkululeko elinganiselweyo uThixo asinike yona. Kwakhona iya kusikhuthaza ukuba siyisebenzise kangangoko kunokwenzeka inkululeko esinayo. Ucwangciso lwasemva kwemini luya kuthetha ngeenkalo ezahlukahlukeneyo zenkululeko yethu nobulungiseleli bethu kwaye luya kuqukunjelwa ngomdlalo othi, Sinikwe Inkululeko Yokuhambisela Phambili Unqulo Lokwenyaniso.
Umxholo wosuku lwesibini, osekelwe kumaGalati 5:1, uthi, “Ukuma Siqinile Kwinkululeko Yethu Esiyinikwe NguThixo.” Ucwangciso lwakusasa luya kubalaselisa ungcelele lweentetho olubonisa indlela ilungu ngalinye lentsapho elinokuyinandipha ngayo inkululeko esiyinikwe nguThixo kwisangqa sentsapho. Abo balungele ukubhaptizwa baya kuyixabisa ngokukhethekileyo intetho engendlela inkululeko efunyanwa ngayo ngokuzahlulela nokubhaptizwa. Kucwangciso lwasemva kwemini kuya kubakho ingxubusho ehlab’ umxhelo engokuba umtshato usisikhokelo solonwabo okanye akunjalo kusini na. Kuya kubakho nongcelele lweentetho oluya kuthetha ngeenkalo ezahlukahlukeneyo zenkululeko kwandule ke kuqukumbele intetho eya kunikel’ ingqalelo kuMmeli Oyintloko uThixo amsebenzisayo ukulungiselela inkululeko nobomi obungunaphakade.
Umxholo wangeCawa, osekelwe kweyesi-2 kwabaseKorinte 3:17, uthi “Ukusebenzisa Inkululeko Yethu Ngokuvisisana Nomoya KaThixo.” Olu cwangciso luya kubalaselisa olona ngcelele lubangel’ umdla nolungomzekeliso kaYesu obhalwe kuMateyu 13:47-50, lubonisa indlela amaNgqina kaYehova angababambisi babantu ngayo. Emva kwemini intetho yesidlangalala ithi “Ukulothulel’ Umnqwazi Ihlabathi Elitsha LikaThixo Lenkululeko!” Iya kulandelwa yimbalasane entsha kwindibano yesithili: ushwankathelo lwesifundo seMboniselo saloo veki. Yaye ucwangciso luya kuqukunjelwa ngokhuthazo olusekelwe eZibhalweni lokuba sonke senze inkqubela ekuyisebenziseni kangangoko inkululeko esiyinikwe nguThixo kwihambo yethu nasekunikeleni ubungqina.
Kubo bonke abathandi benkululeko, kunye nomdumisi uDavide sithi: “Yivani, nibone ukuba ulungile uYehova.” (INdumiso 34:8) Yenza konke okusemandleni akho ukuze ubekho kule ndibano. Qinisekisa ukuba uza kubakho ukususela ekuqaliseni kocwangciso kusasa ngoLwesihlanu de kuse kwintetho yokuqukumbela emva kwemini ngeCawa. Ukuba uza unolangazelelo oluphilileyo ngezinto zokomoya, uyiphaphele ngokupheleleyo intswelo yakho yokomoya, uya kuba noyolo ngokwenene! (Mateyu 5:3) Kwaye masingawulibali umgaqo othi: “Ohlwayela intabalala uya kuvuna intabalala.” Oku kukwabhekisela nakwindlela esenza ngayo kusengaphambili amalungiselelo anyanisekileyo okubakho, inyameko esiyinikelayo ekuphulaphuleni xa ucwangciso luqhubeka, nendlela esiwaphumeza ngehlombe ngayo nawaphi na amalungelo enkonzo yokuzithandela asivulekeleyo ngokuphathelele iNdibano Yesithili “Yabathandi Benkululeko.”—2 Korinte 9:6.