Isaziso
Ukuncedisa IiKomiti ZeQumrhu Elilawulayo
Amalungu eQumrhu Elilawulayo lamaNgqina kaYehova, ngoku ali-12, ayaqhubeka ekhonza ngokuthembeka kwizabelo zawo. Asoloko enombulelo kumalungu anyanisekileyo ‘esihlwele esikhulu’ esandayo ngokuwaxhasa kwawo ngenzondelelo. (ISityhilelo 7:9, 15) Ngenxa yolwando olukhulu ehlabathini lonke, kubonakala kufanelekile ngoku ukuba kunikelwe uncedo olongezelelekileyo kwiQumrhu Elilawulayo. Ngoko ke kuye kwagqitywa kwelokuba kucelwe abancedisi abaliqela, ngokuyintloko ngokusuka kwisihlwele esikhulu, ukuba babe nenxaxheba kwiintlanganiso zazo zonke iiKomiti zeQumrhu Elilawulayo, ezizezi, iKomiti Yabasebenzi, Yokupapasha, Yenkonzo, Yokufundisa neYokubhala. Ngaloo ndlela, inani labo baya kubakho kwezi ntlanganiso liya kunyuka liye kubantu abasixhenxe okanye abasibhozo. Ngaphantsi kolwalathiso lwamalungu eekomiti zeQumrhu Elilawulayo, aba bancedisi baya kuba nenxaxheba kwiingxubusho yaye baya kuphumeza izabelo ezahlukahlukeneyo abazinikwa yikomiti. Eli lungiselelo litsha liqalisa ukusebenza ngoMeyi 1, 1992.
Kangangeminyaka emininzi ngoku, inani lentsalela yamaNgqina athanjisiweyo belincipha, ngoxa inani lesihlwele esikhulu liye landa ngaphezu kokuba besilindele. (Isaya 60:22) Sibamba ngazibini kuYehova ngolu lwando lumangalisayo! Xa, ngowe-1931, ngombulelo kwamkelwa igama elitsha, amaNgqina kaYehova, inani eliyincopho labavakalisi boBukumkani lalingama-39 372, inkoliso yalo isithi ingabazalwana bakaKristu abathanjisiweyo. (Isaya 43:10-12; Hebhere 2:11) Kwiminyaka engamashumi amathandathu kamva, ngowe-1991, incopho yazwenibanzi yabavakalisi ibizizi-4 278 820, kuphela ngama-8 850 kubo abathe bangabentsalela ethanjisiweyo. Njengokuba besilindele ngenxa yoko kutshiwo ziZibhalo, ngoku “isihlwele esikhulu” siyiphinda izihlandlo ezingama-480 le ntsalela ‘yomhlambi omncinane.’ (Luka 12:32; ISityhilelo 7:4-9) Ukuze inyamekele izilangazelelo zoBukumkani ezandayo, ngokuqinisekileyo intsalela iyayifuna yaye iyayixabisa intsebenziswano nenkxaso yesihlwele esikhulu.
Njengokuba kucaciswa kwakule nkupho yeMboniselo, namhlanje kukho iqela elikhonza noSirayeli wokomoya elinokufaniswa namaNethini noonyana babakhonzi bakaSolomon ababuya ekuthinjweni eBhabhiloni nentsalela yamaYuda; nabo bantu bangengomaSirayeli babebaninzi kakhulu kunabaLevi ababuyayo. (Ezra 2:40-58; 8:15-20) “Abanikelweyo” bethatyathwa phakathi kwesihlwele esikhulu sanamhlanje ngamadoda angamaKristu akhulileyo nanamava angathethekiyo awazuze ngokunyamekela umsebenzi wokuvelela kumasebe, kumsebenzi wokuhambahamba naphakathi kwamabandla angama-66 000 ngoku amiselweyo emhlabeni wonke.
Kutshanje, kuye kwaqhutywa iZikolo Zobulungiseleli ZoBukumkani emhlabeni wonke ukuze kufundiswe abaveleli nezicaka zolungiselelo ezibancedisayo. KwiUnited States kuphela, kuye kwabakho abaveleli abangama-59 420. Ngale ndlela la ‘madoda makhulu’ aye axhotyiselwa ukuphumeza iimbopheleleko zawo ngokunempumelelo ngakumbi.—1 Petros 5:1-3; thelekisa eyabase-Efese 4:8, 11.
Kwikomkhulu lamaNgqina kaYehova eliseBrooklyn, abanye “abanikelweyo” baye bakhonza iminyaka emininzi gqitha. Aba baquka abaveleli abakhulileyo abathatyathwe kwisihlwele esikhulu abaye bazuza ubuchule namava angenakuthelekiswa nanto. Ngaloo ndlela, iQumrhu Elilawulayo liye lakhetha abambalwa kwaba baveleli ukuze bancedise kwiintlanganiso zeekomiti zeQumrhu Elilawulayo. Oku akuthethi ukuba la ngawona madoda anexesha elide esenkonzweni. Kunoko, ngamadoda akhulileyo, anamava naneemfaneleko eziwenza akufanelekele ukuncedisa kwiinkalo ezithile. Ukwabelwa kwawo ukuba asebenze nekomiti ethile akuwaniki ubume obukhethekileyo. Kunjengokuba uYesu wathi ngokubhekisele kubafundi bakhe, “nina ke nonke ningabazalwana.” (Mateyu 23:8) Noko ke, kukhulu okuza kuphathiswa la madoda, ibe ngenxa yoko “kuya kufunwa okukhulu” kuwo.—Luka 12:48.
Kuyasivuyisa ukuhambela phambili kwentlangano kaYehova namhlanje. Kule minyaka ilishumi idlulileyo, kuye kwabakho ulwando phantse lwe-100 ekhulwini kwinani labo balungiselelayo entsimini, ngokuvisisana nesiprofeto esimayela noDavide Omkhulu, uYesu Kristu: “Ukwanda koburhulumente bakhe noxolo akusayi kuphela.” (Isaya 9:7, King James Version) Ngendlela efanayo naleyo amaNethini awayesebenzisana ngayo nababingeleli ekulungiseni iindonga zeYerusalem, nanamhlanje isiprofeto esimayela nentlangano kaYehova siyazaliseka: “Oonyana bolunye uhlanga baya kuzakha iindonga zakho.” (Isaya 60:10; Nehemiya 3:22, 26) AmaNethini anamhlanje amele anconywe ngenzondelelo ayibonisayo ekwakheni unqulo lokwenyaniso, encedisa “ababingeleli bakaYehova” kuwo nawuphi na umsebenzi okanye inkonzo asenokuyinikwa kwintlangano kaYehova esehlabathini lonke.—Isaya 61:5, 6.