Isizukulwana Sowe-1914—Kutheni Sibalulekile Nje?

“Abafundi boncwadi lwethu bayazi ukuba kangangeminyaka ethile besilindele ukuba esi Sizukulwana siphele ngexesha elinzima lenkathazo, kwaye silindele ukuba oku kwenzeke ngequbuliso nangamandla kungekudala emva ko-Oktobha, 1914.”—Ngokusuka kwiThe Watch Tower and Herald of Christ’s Presence, kaMeyi 15, 1911.

UKUSUSELA ngowe-1879 iphephancwadi ngelo xesha elalisaziwa ngokuba yiThe Watch Tower and Herald of Christ’s Presence (ngoku elaziwa ngokuba yiMboniselo Evakalisa UBukumkani BukaYehova) lalisoloko lisalatha kowe-1914 njengonyaka ophawuliweyo kwisiprofeto seBhayibhile. Njengoko loo nyaka wawusiya usondela, abafundi babekhunjuzwa ukuba balindele ‘ixesha elinzima lenkathazo.’

Le nkcazelo yapapashwa kuzo zonk’ iindawo ngamaKristu, awayeyisekele kwindlela awayewaqonda ngayo ‘amaxesha asixhenxe’ ‘namaxesha eeNtlanga’ akhankanywe eBhayibhileni.a Eli xesha aliqonda njengeminyaka engama-2 520—eyaqala ukususela ekubhukuqweni kobukumkani bamandulo bomnombo kaDavide eYerusalem ukuya kutsho ngo-Oktobha 1914.b—Daniyeli 4:16, 17; Luka 21:24, King James Version.

Ngo-Oktobha 2, 1914, uCharles Taze Russell, owayengumongameli weWatch Tower Bible and Tract Society ngelo xesha, ngenkalipho wavakalisa oku: “AmaXesha eeNtlanga aphelile; ookumkani bazo baphelelwe.” Hayi indlela amazwi akhe awangqineka eyinyaniso ngayo! Ngokungabonakaliyo emehlweni abantu, ngo-Oktobha 1914 isiganeko esibaluleke ngendlela egungqisa ihlabathi senzeka ezulwini. UYesu Kristu, iNdlalifa esisigxina ‘kwitrone kaDavide,’ waqalisa ulawulo lwakhe njengoKumkani phezu kwalo lonke uluntu.—Luka 1:32, 33; ISityhilelo 11:15.

Usenokubuza uthi: ‘Kodwa, ukuba uKristu waqalisa ukulawula ngowe-1914, kutheni iimeko emhlabeni zaya zisiba mbi nje?’ Kungenxa yokuba utshaba olungabonakaliyo loluntu uSathana lwalusekho. Kude kube ngowe-1914, uSathana wayesakwazi ukungena ezulwini. Oko kwaguquka ngokumiselwa koBukumkani bukaThixo ngowe-1914. “Kwabakho imfazwe emazulwini.” (ISityhilelo 12:7) USathana needemon zakhe boyiswa baza baphoselwa phantsi emhlabeni, nto leyo eyaba nemiphumo eyintlekele eluntwini. IBhayibhile yaxela kwangaphambili: “Yeha, abo bawumiyo umhlaba nolwandle! ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.”—ISityhilelo 12:12.

Kwinkulungwane yokuqala yeXesha Eliqhelekileyo, uYesu wathi ubukho bakhe obungabonakaliyo njengoKumkani omtsha womhlaba babuya kuphawulwa ngumqondiso obonakalayo. Wabuzwa oku: “Uya kuba yini na umqondiso wobukho bakho, nowokuqosheliswa kwenkqubo yezinto?” Wathini ukuphendula? “Uhlanga luya kuvukelana nohlanga nobukumkani buvukelane nobukumkani, yaye kuya kubakho ukunqongophala kokutya, nezinyikimo zomhlaba kwiindawo ngeendawo. Zonke ezi zinto zikukuqaleka kwenimba.”—Mateyu 24:3, 7, 8, NW.

Ngokuvisisana noko, imfazwe eyaqhambuka ngowe-1914 yaphelekwa kukunqongophala kokutya okulusizi, ekubeni imveliso eqhelekileyo yokutya yaphazanyiswa ithuba elingaphezu kweminyaka emine. Kuthekani ‘ngezinyikimo zomhlaba kwiindawo ngeendawo’? Kwiminyaka elishumi emva kowe-1914, iinyikima zomhlaba ezitshabalalisayo ezingekho ngaphantsi kweshumi zabulala abantu abangaphezu kwama-350 000. (Bona ibhokisi.) Enyanisweni, isizukulwana sowe-1914 sakubona “ukuqaleka kwenimba.” Yaye ukususela ngoko, inimba ibithwaxa ngokuqhubekayo njengeentlekele zokwemvelo, iindlala neemfazwe ezininzi gqitha.

Sekunjalo, iindaba ezingokumiselwa koBukumkani bukaThixo ngowe-1914 ziindaba ezilungileyo ngenxa yokuba obo Bukumkani buya kuwuhlangula lo mhlaba ekonakalisweni. Njani? Buya kushenxisa zonke iinkonzo zobuxoki ezihanahanisayo, oorhulumente abanganyanisekanga nempembelelo kaSathana engendawo. (Daniyeli 2:44; Roma 16:20; ISityhilelo 11:18; 18:4-8, 24) Ngaphezu koko, buya kuzisa ihlabathi elitsha “apho kumi ubulungisa.”—2 Petros 3:13.

Ngokukhawuleza emva kweMfazwe Yehlabathi I, aBafundi BeBhayibhile abanyanisekileyo, njengoko amaNgqina kaYehova ayesaziwa njalo ngelo xesha, baqalisa ukuliqonda ilungelo labo ngokuphathelele enye inkalo yomqondiso wobukho bukaYesu njengoKumkani. UYesu Kristu waxela kwangaphambili: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.”—Mateyu 24:14.

Ukususela eselibathwana ngowe-1919, amaNgqina kaYehova aye aqhubeka engatyhafi evakalisa “ezi ndaba zilungileyo.” Ngokomphumo, izigidi zabantu eziphuma kumazwe angaphezu kwama-200 ngoku ziyahlanganiswa njengabalawulwa boBukumkani bukaThixo. Yaye ezinjani zona iintsikelelo ezilindele aba balawulwa! UBukumkani buya kuyiphelisa kuthi tu into ekuthiwa yimfazwe, inxele likaKhetsekile, ulwaphulo-mthetho nengcinezelo. Buya kude buphelise ukugula nokufa!—INdumiso 46:9; 72:7, 12-14, 16; IMizekeliso 2:21, 22; ISityhilelo 21:3, 4.

Ngaphambi kokuba isizukulwana sowe-1914 sidlule, umsebenzi wokushumayela uBukumkani uya kube uyifezile injongo yawo. UYesu waxela kwangaphambili esithi: “Ngelo xesha kuya kubakho imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo. Kanjalo ukuba ibingayi kuthi loo mihla inqanyulelwe, bekungayi kubakho nyama isindayo; ngenxa ke yabanyuliweyo, loo mihla iya kunqanyulelwa.”—Mateyu 24:21, 22.

Ungayenzi impazamo eyenziwa sisizukulwana sangaphambi kowe-1914. Izinto aziyi kuhlala zinjengokuba zinjalo ngoku. Ngaphambili kukho iinguqulelo ezikhwankqisayo. Kodwa abo benza ngobulumko, baya kufumana amathemba amangalisayo.

Ngoko, khawubek’ indlebe kula mazwi esiprofeto sakudala: “Funani uYehova, nonke balulamileyo belizwe . . . Funani ubulungisa, funani ululamo, mhlawumbi nositheliswa ngemini yomsindo kaYehova.” (Zefaniya 2:3) Sinokusisebenzisa njani esi siluleko? Amanqaku alandelayo aya kusinceda ekuphenduleni loo mbuzo.

[Imibhalo esemazantsi]

[Isicangca esikwiphepha 7]

IINYIKIMA ZOMHLABA—Kwiminyaka Elishumi Emva Kowe-1914

Umhla: Indawo: Abafayo:

Januwari 13, 1915 EAvezzano, eItali 32 600

Januwari 21, 1917 EBali, eIndonesia 15 000

Februwari 13, 1918 KwiPhondo LeKwangtung, eTshayina 10 000

Oktobha 11, 1918 EPuerto Rico (ngasentshona) 116

Januwari 3, 1920 EVeracruz, eMexico 648

Septemba 7, 1920 EReggio di Calabria, eItali 1 400

Disemba 16, 1920 Kwi Phondo LeNingsia, eTshayina 200 000

Matshi 24, 1923 KwiPhondo LeSzechwan, eTshayina 5 000

Meyi 26, 1923 EIran (kumntla-mpuma) 2 200

Septemba 1, 1923 ETokyo naseYokohama, eJapan 99 300

Ngokusuka kwisicangca esithi “Iinyikima Eziphawulekayo Ehlabathini” kwincwadi ethi Terra Non Firma, nguJames M. Gere noHaresh C. Shah.