Hlala Uphaphile ‘Kwixesha Lokuphela’
“Hlalani nikhangele, hlalani niphaphile, kuba anazi ukuba linini na ixesha elimisiweyo.”—MARKO 13:33, NW.
1. Sifanele sisabele njani njengoko kusenzeka iziganeko ezichukumisayo ‘ngeli xesha lokuphela’?
NJENGOKO kusenzeka iziganeko ezichukumisayo ngeli “xesha lokuphela,” amaKristu afanele asabele njani? (Daniyeli 12:4) Awashiywanga enyanyeni. UYesu Kristu wanikela isiprofeto somqondiso oyintlanganisela ebesizaliseka kule nkulungwane yama-20. Waxela kwangaphambili iinkalo ezininzi eziye zaliphawula eli xesha lisusela kowe-1914 njengelahlukileyo. Ekubeni wayeqhelene nesiprofeto sikaDaniyeli esithetha ‘ngexesha lokuphela,’ uYesu waqukumbela isiprofeto sakhe esikhulu ngokubongoza abafundi bakhe ukuba ‘baphaphe.’—Luka 21:36.
2. Kutheni kukho imfuneko enkulu yokuba sihlale siphaphile ngokomoya?
2 Kutheni befanele baphaphe? Kungenxa yokuba eli lelona xesha linomngcipheko embalini yabantu. Ukunikezela kwamaKristu ekozeleni kokomoya ngeli xesha kungathetha intlekele. Ukuba siqalisa ukungakhathali okanye sivumela iintliziyo zethu ukuba zisindwe ngamaxhala obomi, siya kuba sengozini. KuLuka 21:34, 35, uYesu Kristu wasilumkisa: “Zilumkeleni ke, hleze zisindwe iintliziyo zenu kukuzingxala, nakukunxila, nangamaxhala obu bomi, ize loo mini inifikele ngebhaqo. Kuba iya kubazela njengomgibe bonke abahleliyo phezu kwehlabathi lonke.”
3, 4. (a) UYesu wayethetha ukuthini xa wathi imini kaThixo iza kubafikela ngebhaqo “njengomgibe” abantu? (b) Ekubeni uThixo engabekeli bani mgibe, kutheni loo mini iya kubafikela bengalindelanga abantu ngokubanzi?
3 UYesu wayenesizathu esifanelekileyo sokuthi imini kaYehova iya ‘kusifikela ngebhaqo njengomgibe.’ Ngokufuthi umgibe uba nerhintyela, yaye usetyenziselwa ukubambisa iintaka nezilwanyana ezanyisayo. Umgibe uba nendawo yokutsala irhintyela, yaye nabani na onyathela umgibe ubangela ukuba irhintyela litsaleke. Uthi ke umgibe uvaleke, lize ixhoba libhabhiseke. Konke oku kwenzeka ngequbuliso. UYesu wathi ngendlela efanayo ke, abo bapholileyo ngokomoya baya kuqutyulwa yaye baya kufunyanwa bengalindelanga “yimini yokuphuphuma umsindo” kaThixo.—IMizekeliso 11:4.
4 Ngaba nguYehova uThixo obekela abantu umgibe? Hayi, akalalelanga ukubambisa abantu bengalindelanga aze abatshabalalise. Kodwa loo mini iya kubafikela abantu ngokubanzi bengalindelanga kuba abanikeli ngqalelo iphambili kuBukumkani bukaThixo. Bahamba ngabayibonayo besukela izilangazelelo zobomi, beyityeshela intsingiselo yeziganeko ezibangqongileyo. Noko ke, oku akuluguquli ucwangciso lukaThixo lwexesha. Unexesha elimisiweyo lokuzinzisa imicimbi. Yaye, ngenceba, akalushiyi uluntu lungazi nto ngomgwebo wakhe ozayo.—Marko 13:10.
5, 6. (a) Ngenxa yomgwebo ozayo, liliphi ilungiselelo lothando uMdali alenzele izidalwa ezingabantu, kodwa ube yintoni umphumo ngokubanzi? (b) Yintoni eza kuqwalaselwa ukusinceda sihlale siphaphile?
5 Esi silumkiso sidluliselwa kwangaphambili lilungiselelo lothando elenziwa nguMdali omkhulu, onomdla kwintlalo-ntle yezidalwa ezingabantu ezilapha kwisihlalo sokomfuziselo seenyawo zakhe. (Isaya 66:1) Uyabathanda abemi abahlala kwindawo ekuthiwa ziphumla kuyo iinyawo zakhe. Ngoko esebenzisa oonozakuzaku nabameli bakhe basemhlabeni, ulumkisa abo bemi ngeziganeko eziza kubafikela. (2 Korinte 5:20, NW) Sekunjalo, phezu kwako nje ukunikelwa kwesilumkiso, ezo ziganeko ziya kuyiqubula ingalindelanga intsapho yabantu ngokungathi inyathele umgibe. Ngoba? Kuba inkoliso yabantu ilele ngokomoya. (1 Tesalonika 5:6) Ngokwentelekiso liqaqobana nje labantu elisithobelayo isilumkiso neliya kusindela kwihlabathi elitsha likaThixo.—Mateyu 7:13, 14.
6 Ngoko ke, sinokuhlala njani siphaphile ngeli xesha lokuphela ukuze sibe phakathi kwabo baya kusinda? UYehova unikela uncedo olufunekayo. Masiqwalasele izinto ezisixhenxe esinokuzenza.
Yilwa Nokuphazamiseka
7. Sisiphi isilumkiso esanikelwa nguYesu ngokuphathelele ukuphazamiseka?
7 Okokuqala, simele silwe nokuphazamiseka. KuMateyu 24:42, 44, uYesu wathi: “Phaphani ngoko; ngokuba ningazi ukuba lilixa liphi na eza ngalo iNkosi yenu. Ngenxa yoko yibani nilungile nani, ngokuba uNyana woMntu uza ngelixa eningalikhumbuleliyo.” Intetho uYesu awayisebenzisa apha ibonisa ukuba ngeli xesha lamanqam, kuya kubakho izinto ezininzi eziphazamisayo, yaye ukuphazamiseka kunokukhokelela ekutshatyalalisweni. Ngomhla kaNowa abantu babexakekiswe zizinto ezininzi. Ngenxa yoko, abo bantu baphazamisekileyo ‘zange bakuqonde’ oko kwenzekayo, yaye uMkhukula wabakhukulisa bonke. Ngokufanelekileyo ke, uYesu walumkisa: “Koba njalo nokufika koNyana woMntu.”—Mateyu 24:37-39.
8, 9. (a) Izilangazelelo eziqhelekileyo zobomi zinokusiphazamisa njani ngokuyingozi? (b) Ziziphi izilumkiso esazinikwa nguPawulos noYesu?
8 Kwakhona, khumbula ukuba kwisilumkiso sakhe esikuLuka 21:34, 35, uYesu wayexubusha ngeenkalo eziqhelekileyo zobomi, ezinjengokudla, ukusela namaxhala okuphila. Ezi zizinto eziqhelekileyo kubantu bonke, kuquka nabafundi beNkosi uYesu. (Thelekisa uMarko 6:31.) Ezi zinto zisenokuba azinabungozi zona ngokunokwazo, kodwa ukuba ziye zavunyelwa, zinokusiphazamisa, zisixakekise, zize ngaloo ndlela zisibangele sozele ngokomoya, nto leyo eyingozi.
9 Ngoko ke, masingaze sityeshele eyona nto ibaluleke gqitha—ukuzuza inkoliseko kaThixo. Kunokuzibhokoxa kwizinto eziqhelekileyo zobomi, masizisebenzise kuphela ngomlinganiselo oyimfuneko wokusizimasa. (Filipi 3:8) Azifanele ziminxe izilangazelelo zoBukumkani. Njengoko eyabaseRoma 14:17 isitsho, “ubukumkani bukaThixo abukukudla nakusela; bubulungisa noxolo novuyo kuMoya oyiNgcwele.” Khumbula oko kwathethwa nguYesu esithi: “Funani ke tanci ubukumkani bukaThixo nobulungisa bakhe, zaye zonke ezo zinto ziya kongezelelwa kuni.” (Mateyu 6:33) Ngaphezu koko, kuLuka 9:62, uYesu wathi: “Akukho namnye usibekileyo isandla sakhe epuluweni, abe emana ekhangela kokusemva, ubulungeleyo ubukumkani bukaThixo.”
10. Yiyiphi ingozi ekhoyo ukuba asiwagcini amehlo ethu etsoliswe emvuzweni?
10 Ngokwentetho efuziselayo, sakuba siqalisile ukulima, simele singabhanki. Umntu obambe ipuluwa aze akhangele ngasemva akasayi kulima ifolo efanelekileyo. Uyaphazamiseka yaye ngokulula nje unokuphambuka okanye anqunyanyiswe kukugileka kwinto ethile. Masingabi njengomkaLote, owakhangela ngasemva waza waphelela esengozini. Sifanele siwagcine amehlo ethu etsoliswe emvuzweni. Ukuze senjenjalo simele silwe nokuphazamiseka.—Genesis 19:17, 26; Luka 17:32.
Thandaza Ngokunyanisekileyo
11. Yintoni awayibethelelayo uYesu emva kokusilumkisa ngengozi yokuphazamiseka?
11 Noko ke, kukho okungakumbi esinokukwenza ukuze sihlale siphaphile. Into yesibini ebalulekileyo yile: Thandaza ngokunyanisekileyo. Emva kokusilumkisa ngengozi yokuphazanyiswa zizilangazelelo eziqhelekileyo zobomi, uYesu wanikela esi siluleko: “Phaphani ngoko, amaxesha onke nikhunga, ukuze kuthiwe nikufanele ukuzisaba zonke ezo zinto ziza kuhla, nokumiswa phambi koNyana woMntu.”—Luka 21:36.
12. Luhlobo luni lomthandazo olufunekayo, yaye uba yintoni umphumo?
12 Ngenxa yoko, ngamaxesha onke simele sikhunge ngenxa yobungozi bemeko yethu nemfuneko yokuba siphaphe. Ngoko masisondele kuThixo ngomthandazo yaye simbongoza ngokunyanisekileyo. UPawulos uthi kweyabaseRoma 12:12: “Mayela nomthandazo, zingisani.” Yaye kwabase-Efese 6:18, sifunda oku: “Ngako konke ukuthandaza nokukhunga, [thandazani] amaxesha onke nikuye uMoya; niyiphaphamele loo nto ngako konke ukuzingisa.” Lo asingombandela nje wokuzibona sele uthandaza ungazi nokuba bekuqalele phi na ngokungathi wenza nje into engabalulekanga. Ukuphila kwethu kusengozini. Ngoko ke kufuneka ngokunyanisekileyo sicele uncedo lukaThixo. (Thelekisa amaHebhere 5:7.) Ngaloo ndlela siya kusoloko sime ngakwicala likaYehova. Akukho ndlela yimbi eya kusinceda ukuphumeza oku ngaphandle kokuba sithi ‘ngamaxesha onke sikhunge.’ Uya kwandula ke uYehova asenze sihlale sithe qwa. Ngoko, hayi indlela ekubaluleke ngayo ukuzingisa emthandazweni!
Namathela Kwintlangano KaThixo Nomsebenzi Wayo
13. Luluphi uhlobo lonxulumano olufunekayo ukuze sihlale siphaphile?
13 Sifuna ukusinda kuzo zonke ezi zinto ziza kuhlela ihlabathi. Sifuna ukuma njengabamkelekileyo phambi koNyana womntu. Ngenxa yoko ke kukho into yesithathu esinokuyenza: Namathela ngokuqinileyo kwintlangano kaYehova yobuthixo. Sifanele sinxulumane ngokupheleleyo naloo ntlangano size sibe nenxaxheba kwimisebenzi yayo. Ngale ndlela siya kuthi ngaphandle kwempazamo sizibonakalise njengamaKristu aphaphileyo.
14, 15. (a) Kukuxakeka nguwuphi umsebenzi okuya kusigcina siphaphile? (b) Ngubani omisela ixesha lokugqitywa komsebenzi wokushumayela, yaye sifanele sivakalelwe njani ngawo? (c) Emva kwembandezelo enkulu, yintoni esiya kuyiqonda xa sikhangela emva kumsebenzi owenziweyo wokushumayela ngoBukumkani?
14 Oku kuhlobene gqitha nento yesine enokusinceda sihlale siphaphile. Simele sibe phakathi kwabo balumkisa abantu ngesiphelo esizayo sale nkqubo yezinto. Esona siphelo sale nkqubo yezinto indala asiyi kufika de zibe “ezi ndaba zilungileyo zobukumkani” zishunyayelwe ngomkhamo uThixo uSomandla acebe ngawo. (Mateyu 24:14) AsingomaNgqina kaYehova aya kumisela ixesha lokugqitywa komsebenzi wokushumayela. UYehova uligcinele yena elo lungelo. (Marko 13:32, 33) Noko ke, thina sizimisele ukuzibhokoxa kangangoko sinako emsebenzini logama nje kuseyimfuneko ukuba sishumayele ngoyena rhulumente uya kululawula ngokufanelekileyo uluntu, uBukumkani bukaThixo. “Imbandezelo enkulu” iya kuqalisa ngoxa sisaxakeke ngulo msebenzi. (Mateyu 24:21) Kulo lonke ixesha elizayo, abasindileyo baya kukhangela ngasemva baze bechukumisekile bavume ukuba uYesu Kristu wayengengomprofeti wobuxoki. (ISityhilelo 19:11) Umsebenzi wokushumayela uya kube wenziwe ngomlinganiselo omkhulu ngakumbi kunalowo wawulindelwe ngabo babenenxaxheba kulo msebenzi.
15 Ngokufanelekileyo, kwelo xesha libalulekileyo xa lo msebenzi uya kube ufezwe ngendlela uThixo afuna ngayo, mhlawumbi abaninzi ngakumbi baya kuba benenxaxheba kuwo ukudlula naliphi na elinye ithuba ngaphambili. Hayi indlela esiya kuba nombulelo ngayo kuba siye sabandakanyeka kulo msebenzi uzukileyo! Umpostile uPetros uyasiqinisekisa ukuba uYehova ‘akafuni kutshabalale mntu koko ufuna wonke ubani aguquke.’ (2 Petros 3:9) Ngenxa yoko, amandla asebenzayo kaThixo uSomandla asebenza kakhulu namhlanje kunanini na ngaphambili, yaye amaNgqina kaYehova anqwenela ukuqhubeka nalo msebenzi uxhaswa ngomoya. Ngoko namathela ngokuqinileyo kwintlangano kaYehova, yaye xakeka kubulungiseleli bayo basesidlangalaleni. Oku kuya kukunceda ukuba uhlale uphaphile.
Yenza Uhlolisiso Lobuqu
16. Kutheni sifanele senze uhlolisiso lobuqu ngemeko yethu yokomoya yangoku?
16 Kukho into yesihlanu esinokuyenza ukuze sihlale siphaphile. Njengabantu ngabanye, sifanele senze uhlolisiso lobuqu ngemeko yethu yangoku. Oku kufanelekile ngoku kunanini na ngaphambili. Sifanele sinikele ubungqina becala esilimela ngokuqinileyo. KumaGalati 6:4, uPawulos wathi: “Elowo ke makawucikide owakhe umsebenzi.” Yenza uhlolisiso lobuqu ngokuvisisana namazwi kaPawulos akweyoku-1 kwabaseTesalonika 5:6-8: “Masingalali, njengabanye aba; masiphaphe sibe ziingcathu. Kuba abaleleyo balala ebusuku; nabanxilayo banxila ebusuku. Ke thina bangabemini masibe ziingcathu; masinxibe isigcina-sifuba sokholo nothando, nesigcina-ntloko esilithemba losindiso.”
17. Xa sisenza olo hlolisiso lobuqu, yiyiphi imibuzo esifanele sizibuze yona?
17 Kuthekani ngathi? Xa sizihlolisisa ngeZibhalo, ngaba siphawula ukuba siphaphile, sinxibe isigcina-ntloko esilithemba losindiso? Ngaba singabantu abazahlule ngokupheleleyo kule nkqubo indala yezinto yaye asisahambisani neengcamango zayo? Ngaba ngokwenene sinomoya wehlabathi elitsha likaThixo? Ngaba sisiphaphele ngokuzeleyo isiphelo sale nkqubo? Ukuba kunjalo, imini kaYehova ayiyi kusibhada ngokungathi singamasela.—1 Tesalonika 5:4.
18. Yiyiphi eminye imibuzo ekusenokufuneka sizibuze yona, yaye ngawuphi umphumo?
18 Noko ke, kuthekani ukuba uhlolisiso lwethu lobuqu lubonisa ukuba sizabalazela ukuzenzela indlela entle, yobunewunewu, etofotofo neyokuyekelela yobomi? Kuthekani ukuba sifumanise ukuba amehlo ethu okomoya anzima ngenxa yokozela nobuthongo? Ngaba sisemaphupheni, sisukelana nezinto eziyintelekelelo zehlabathi? Ukuba kunjalo, masivuke!—1 Korinte 15:34.
Camngca Ngeziprofeto Ezizalisekileyo
19. Ziziphi ezinye zeziprofeto esiye sazibona zizalisekiswa?
19 Ngoku sifikelela kwinto yesithandathu eya kusinceda sihlale siphaphile: Camngca ngeziprofeto ezininzi eziye zazaliseka kweli xesha lokuphela. Sele siwudlule unyaka wama-77 ukususela ekupheleni kwamaxesha eentlanga ngowe-1914. Xa sikhangela emva kule minyaka ingaphezu kwamashumi asixhenxe anesihlanu edlulileyo, sinokubona indlela eziye iziprofeto zazaliseka ngayo ngokulandelelana kwazo—ukubuyiselwa konqulo lokwenyaniso; ukuhlangulwa kwentsalela ethanjisiweyo, kunye namaqabane ayo, yaza yangeniswa kwiparadisi yokomoya; ukushunyayelwa kweendaba ezilungileyo zoBukumkani ehlabathini lonke; ukubonakala kwesihlwele esikhulu. (Isaya 2:2, 3; isahluko 35; Zekariya 8:23; Mateyu 24:14; ISityhilelo 7:9) Igama elikhulu likaYehova nolongamo lwakhe lwendalo iphela luye lwaphakanyiswa, ndawonye nokwanda komncinanana esiba liwaka noweyeleyo esiba luhlanga olunamandla, yaye uYehova ekukhawulezisa oko ngexesha lako. (Isaya 60:22; Hezekile 38:23) Yaye imibono yompostile uYohane ebhalwe kwincwadi yeSityhilelo ngoku ifikelela incopho yayo.
20. Luluphi ulweyiseko amaNgqina kaYehova analo, yaye enyanisweni aye angqineka eyintoni?
20 Ngoko ke, kunanini na ngaphambili, amaNgqina kaYehova eyiseke ngokupheleleyo kukuchana kwendlela ayiqonda ngayo intsingiselo yemicimbi yehlabathi ukususela ngowe-1914. Ekubeni eyiseke ngolo hlobo, angqineke ezezona zixhobo zisebenzisekayo esandleni sikaThixo Osenyangweni. Ngawo aye ayalelwa ukuba asasaze isigidimi sosindiso kweli xesha libalulekileyo. (Roma 10:15, 18) Ewe, amazwi kaYehova angexesha lokuphela aye azaliseka. (Isaya 55:11) Yaye oku, kufanele kusishukumisele ukuba siqhubeke de onke amadinga kaThixo siwabone ezaliseka ngokupheleleyo ngoYesu Kristu.
Usindiso Lukufuphi Kunaxa Saqalayo Ukukholwa
21. Yiyiphi into yesixhenxe yokusinceda sihlale siphaphile ngokomoya?
21 Okokugqibela, uncedo lwesixhenxe ukuze sihlale siphaphile lolu: Ngamaxesha onke khumbula ukuba usindiso lwethu lukufuphi kunaxa saqalayo ukukholwa. Okubaluleke ngakumbi kukuba ukuthethelelwa kolongamo lukaYehova lwendalo iphela nokuzukiswa kwegama lakhe kusondele ngakumbi. Ngoko imfuneko yokuhlala siphaphile ingxamiseke gqitha kunanini na ngaphambili. Umpostile uPawulos uyabhala: “Silazi nje ixesha eli, ukuba lilixa lokuba ngoku sivuke ebuthongweni; kuba ngoku usindiso lukufuphi kuthi, kunokuya saqalayo ukukholwa. Ubusuku buhambile, ukusa ke kusondele.”—Roma 13:11, 12.
22. Ukusondela kosindiso lwethu kufanele kusichaphazele njani?
22 Ekubeni usindiso lwethu lukufuphi kangaka, simele sihlale siphaphile. Asimele sivumele naziphi na izilangazelelo zobuqu okanye zehlabathi zigqumelele uxabiso lwethu ngoko uYehova abenzela kona abantu bakhe kweli xesha lokuphela. (Daniyeli 12:3) Sifanele sibonakalise inzondelelo engakumbi kunanini na ngaphambili ukuze singaphambukiswa kwindlela iLizwi likaThixo elisalathisela ngokucacileyo kuyo. (Mateyu 13:22) Ubungqina bubonisa ngokucacileyo ukuba eli hlabathi likwimihla yalo yokugqibela. Kungekudala liza kutshayelwa kuthi tu ngonaphakade ukuze lishenxele ihlabathi elitsha lobulungisa.—2 Petros 3:13.
23. UYehova uya kusinceda ngayiphi indlela, yaye siya kusikelelwa ngawuphi umphumo?
23 Ngoko, masihlale siphaphile ngazo zonke iindlela. Kunanini na ngaphambili, sifanele sazi apho sikhoyo kumsinga wexesha. Khumbula ukuba uYehova akasoze alale kulo mbandela. Kunoko, uya kusoloko esinceda ukuze sihlale siphaphile kweli xesha lokuphela. Ubusuku buhambile. Ukusa kusondele. Ngoko hlala uphaphile! Kungekudala siza kubona olona suku lubalaseleyo kunazo zonke, njengoko uBukumkani obungoMesiya buzalisekisa injongo kaYehova ngalo mhlaba!—ISityhilelo 21:4, 5.
Zithini Iimpendulo Zakho?
◻ UYesu wayethetha ukuthini xa wathi imini yengqumbo kaThixo iya kubafikela abantu “njengomgibe”?
◻ Kutheni simele silwe nokuphazamiseka, yaye sinokukwenza njani oko?
◻ Luhlobo luni lomthandazo olufunekayo ukuze sihlale siphaphile?
◻ Luluphi uhlobo lonxulumano olubalulekileyo?
◻ Kutheni simele senze uhlolisiso lobuqu ngemeko yethu yokomoya?
◻ Isiprofeto sinayiphi indima ekuhlaleni kwethu siphaphile?