“Hlalani Niphaphile”
1 Emva kokuchaza iziganeko ezithile ezaziya kuphawula imihla yokugqibela yale nkqubo yezinto, uYesu wabongoza abafundi bakhe ukuba ‘bahlale bephaphile.’ (Marko 13:33) Kutheni amaKristu emele ahlale ephaphile? Kungenxa yokuba siphila kwelona xesha liyingozi kwimbali yoluntu. Asinakozela ngokomoya. Oko kuya kuphumela ekubeni singawuxabisi umsebenzi afuna siwenze uYehova kweli xesha lesiphelo. Nguwuphi loo msebenzi?
2 UYehova ufuna abantu bakhe bavakalise iindaba ezilungileyo zoBukumkani emhlabeni wonke—ezikuphela kwethemba loluntu. Ukusebenza kwethu ngokusondeleyo nentlangano kaThixo kusifanisa namaKristu okwenyaniso, agqala amaxesha nemfuneko yokunceda abanye beve ‘amazwi obomi obungunaphakade.’ (Yoh. 6:68) Ngokuba nesabelo ngenzondelelo kulo msebenzi ungowona ubalulekileyo, sibonisa ukuba siphaphile ngokomoya.
3 Shukunyiselwa Ukuba Ushumayele: NjengamaNgqina kaYehova, sifanele sibe nesimo sengqondo esifanelekileyo ngobulungiseleli bethu. Uthando ngoThixo nommelwane lusishukumisela ukuba sibe nesabelo ngokobuqu kumsebenzi wokushumayela. (1 Kor. 9:16, 17) Ngokwenjenjalo, siya kuzisindisa thina nabo basiphulaphulayo. (1 Tim. 4:16) Masizimisele ukuba nesabelo rhoqo ngokuzimisela kangangoko kunokwenzeka ekushumayeleni ngoyena rhulumente usemagqabini elinokuze libe naye uluntu—uBukumkani bukaThixo!
4 Ukungxamiseka kobulungiseleli bethu kugxininiswa kuthi sisibakala esibalulekileyo— imbandezelo enkulu iya kuza ngoxa sisaxakeke ngulo msebenzi. Ukungalazi kwethu usuku neyure kufuna sihlale siphaphile yaye silungile ngamaxesha onke, size sithembele kuYehova ngomthandazo. (Efe. 6:18) Umsebenzi wokushumayela uyaqhubeka usanda. Kodwa kungentsuku zatywala, owona msebenzi mkhulu wokunikela ubungqina kwimbali yabantu uza kufikelela incopho yawo.
5 Wulandele ngokuthembeka umyalelo kaYesu ‘wokuhlala uphaphile.’ Oku kungxamiseke gqitha ngoku kunanini na ngaphambili. Ngamana singasabela ngemvo yongxamiseko. Namhlanje namihla le, masihlale sithe qwa ngokomoya, siphaphile yaye sikhuthele emsebenzini kaYehova. Ewe, ngamana ‘singahlala siphaphile, sithe qwa.’—1 Tes. 5:6.