Ukuthelekisa UPawulos NoPlato Kumbandela Wovuko
UMPOSTILE uPawulos wabhala ngovuko kweyoku-1 kwabaseKorinte 15:35-58 nakweyesi-2 kwabaseKorinte 5:1-10. Xa wayesenjenjalo, ngaba walandela iimbono zikaPlato nezezithandi zobulumko zamaGrike zokungafi komphefumlo, okanye ngaba wahambisana nemfundiso kaYesu neyezinye iZibhalo?
Incwadana eyabhalwa ngowe-1974 neyanconyelwa ngubhishophu omkhulu weCawa yesiThethe samaGrike yaseMntla naseMzantsi Merika, ethi Immortality of the Soul or Resurrection of the Individual: St. Paul’s View with Special Reference to Plato (Ukungafi Komphefumlo Okanye Uvuko Lomntu Ngamnye: Izimvo ZeNgcwele UPawulos Nembekiselo Ekhethekileyo KuPlato), inikela impendulo eyenza kucace. Emva kokuxubusha ngento oluyiyo uvuko ngokweZibhalo ezikhankanywe ngasentla nangempembelelo yamaGrike yelo xesha, umbhali ufikelela kwesi sigqibo silandelayo:
“UPlato ufundisa ukuba umphefumlo uhlala ukho ngonaphakade, ngaphandle komzimba. NgokukaPlato umphefumlo ngokusisiseko nangokwemvelo awufi . . . INgcwele uPawulos ayiyifundisi ingcamango enjalo yaye ayitsho ukuba yakha yenjenjalo . . .
“UMpostile uPawulos akathethi ngokungafi komphefumlo okanye umoya njengeenxalenye ezahlukahlukeneyo kodwa uthetha ngokuvuko kwawo wonke umzimba womntu onomoya nomphefumlo njengoko kwaba njalo ngovuko lukaKristu. Imbono kaPawulos ngokuvuka komzimba ayithethi ukubuyiselwa ebomini kwemizimba efileyo esemangcwabeni.
“Imbono yakhe ngokuvuka komzimba inokucaciswa kakuhle ngokuthi ukuguqulwa, ukudalwa ngokutsha, nokwakhiwa ngokutsha, ngamandla kaThixo, unazo zonke iimpawu zomntu, isengulaa mntu, enobuntu bakhe, ingqondo nomzimba wakhe zisebenzelana kakuhle, ngamnye eneempawu zokwenene zokuba sezingqondweni nokuba sempilweni. Ukuvuswa kwethu kwixesha elizayo akuyi kwenzeka njengento ebesifanele siyifumane ngokwemveko, kodwa kuya kuba njengesipho esibalaseleyo sikaThixo.”
Ewe, ukungafi akuyonto nawuphi na umntu awazalwa nayo. Kunoko, kungumvuzo nesipho esizukileyo esivela kuYehova ngeNkosi yethu uYesu Kristu kwabo babumba ibandla lamaKristu athanjisiweyo.—1 Korinte 15:20, 57; Filipi 3:14.
[Umfanekiso okwiphepha 9]
Isithandi sobulumko esingumGrike uPlato
[Inkcazelo]
Vatican Museum photograph