Ngaba UThixo Uyakholiswa Kukuphilisa Ngokholo?
“SIBONE umhlola namhlanje!” Ewe, ababukeli babechukumisekile. Indoda eyayome amalungu omzimba yayiphiliswe phambi kwabo. Umphilisi wathi kule ndoda: “Vuka, uthathe ukhuko lwakho, uhambe ugoduke!” Yaye le ndoda yenza kanye oko! Amalungu ayo omzimba ayengasomanga. Akumangalisi ngoko ukuba abo babekho baye “bamdumisa uThixo”! (Luka 5:18-26) Oku kuphilisa kwenziwa nguYesu Kristu malunga nama-2 000 eminyaka eyadlulayo, ngokucacileyo kwakunenkoloseko kaThixo.
Kuthekani namhlanje? Ngaba basenako ukuphiliswa ngokungummangaliso abo bangenakunyangeka ngamayeza? UYesu waphilisa ngokungummangaliso. Abaphilisa ngokholo namhlanje bathi baxelisa yena. Simele siwajonge njani amabango abo?
Ukuphilisa ngokholo kuchazwa “njengendlela yokunyanga izifo ngomthandazo nokuba nokholo kuThixo.” IEncyclopædia Britannica iyavuma: “Imbali yokuphilisa ngokholo kubuKristu yaqalisa kubulungiseleli bobuqu obumangalisayo bukaYesu nabapostile.” Ewe, uYesu waphilisa ngendlela ebalaseleyo. Ngaba abo baphilisa ngokholo namhlanje benza imimangaliso njengokuba wenzayo?
Ukholo—Luyimfuneko?
Ngokutsho kweBlack’s Bible Dictionary, uYesu “wachaza [ukholo] njengoluyimfuneko ngaphambi kokuba aphilise ngokungummangaliso.” Kodwa ngaba kwakunjalo? Ngaba uYesu wanyanzelisa ukuba umntu ogulayo abe nokholo ngaphambi kokuba amphilise? Impendulo nguhayi. Ukholo lwalufuneka kulowo uphilisayo kungekhona kumguli. Ngesinye isihlandlo abafundi bakaYesu abazange baphumelele ukuphilisa inkwenkwe eyayinesathuthwane. UYesu wayiphilisa le nkwenkwe waza emva koko wabaxelela abafundi bakhe isizathu sokuba bengazange babe nako ukuyiphilisa. Wathi kubo: “Bekungenxa yokungakholwa kwenu.”—Mateyu 17:14-20.
NgokukaMateyu 8:16, 17, “nabo bonke abafayo wabaphilisa” uYesu. Enyanisweni, aba bantu babenawo umlinganiselo othile wokholo kuYesu owabenza bakwazi ukuya kuye. (Mateyu 8:13; 9:22, 29) Ubukhulu becala kwakufuneka bamcele ngaphambi kokuba abaphilise. Phofu ke, akukho sivumo sokholo ekwakufuneka senziwe ukuze kwenziwe ummangaliso. Ngesinye isihlandlo uYesu waphilisa indoda eyayingumlwelwe eyayingamazi nokuba uYesu wayengubani na. (Yohane 5:5-9, 13) Ngobusuku bokubanjwa kwakhe, uYesu wabuyisela indlebe yomkhonzi wombingeleli omkhulu eyayinqanyulwe, nangona le ndoda yayingomnye weentshaba zikaYesu ezazize kumbamba. (Luka 22:50, 51) Eneneni, ngezinye izihlandlo, uYesu wayede avuse nabafi!—Luka 8:54, 55; Yohane 11:43, 44.
UYesu wayeyenza njani le mimangaliso? Kungenxa yokuba wayethembele ngomoya oyingcwele, okanye amandla asebenzayo kaThixo. Ngawo awayephilisa, kungekhona ukholo lwalowo wayegula. Ukuba ufunda iingxelo zeencwadi zeVangeli uya kuphawula nokuba uYesu wayengafuni ndumasi xa wayephilisa abantu. Akukho zinto zazisenziwa ngenjongo yokutsala ingqalelo yabantu okanye ukudlala ngeemvakalelo zabo. Ngaphezu koko, enokuba yayisisifo esiluhlobo luni, uYesu akazange oyisakale ukusinyanga. Wayesoloko ephumelela, yaye akazange ahlawulise mntu.—Mateyu 15:30, 31.
Ngaba Ukuphilisa Kwanamhlanje Kuyafana Noko KukaYesu?
Ukugula kuyingxaki eyoyikekayo, yaye kusakuhlasela, kungokwemvelo ukufuna ukukhululeka kuko. Noko ke, kuthekani ukuba sihlala kwindawo apho “‘abasebenzi abaqeqeshiweyo bezonyango babaphatha abantu, ingakumbi abo bangamahlwempu, njengezinto kungekhona njengabantu”? Leyo yimeko omnye ugqirha awayiphawulayo kwelinye ilizwe laseMzantsi Merika. Yaye kuthekani ukuba sihlala kwindawo apho, njengakwelo lizwe, ‘ingama-40 ekhulwini kuphela oogqirha bezonyango abawufundeleyo umsebenzi wabo’?
Akumangalisi ke ngoko ukuba abaninzi bengaboni ndlela yimbi yokukhululeka, bebona ukuya kubantu abaphilisa ngokholo kuyinto abanokuyizama. Kanti, oko kubizwa ngokuba lunyango olwenziwa ngabo baphilisa ngokholo kuzisa imbambano. Ngokomzekelo, abantu abathelekelelwa kuma-70 000 beza kwiingqungquthela eSão Paulo, eBrazil, apho abaphilisi ababini ‘banyathela phezu kwamakhulukhulu eendondo zamehlo ezazilahlwe ngabantu ababelapho, bethembisa abo abantu babeqhatheka lula ukuba babeza kubaphilisa amehlo.’ Omnye wabaphilisi ngokunyanisekileyo wavuma oku kudliwano-ndlebe: “Andingetsho ukuba bonke abo bagulayo esibathandazelayo baya kuphiliswa. Kuxhomekeke kukholo lwabo. Ukuba umntu uyakholwa, uya kuphiliswa.” Wathi ukungaphiliswa kunokubangelwa kukungabi nalukholo kwalowo ugulayo. Noko ke, khumbula, njengoko besele sibonile ngaphambili, ukuba uYesu wathi kukungabi nalukholo kwabo baphilisayo okunokwenza ukuphilisa kungaphumeleli!
Omnye umphilisi wathembisa ukunyanga umhlaza nokoma kwamalungu omzimba. Kwenzeka ntoni? Ngokutsho kwephephancwadi iVeja “kuyabonakala ukuba, esi sithembiso asizange siphunyezwe.” Yaye phulaphula indlela le ndoda eyayisenza ngayo: “Phantse iiyure ezimbini, [umphilisi] wayesonwabisa abaphulaphuli bakhe ngeentshumayelo, imithandazo, izikhalo, umculo—nangokubetha, ngenjongo yokugxotha iidemon ezazihlala emizimbeni yabathembekileyo. Ekugqibeleni, wajula iqhina lakhe netshefu yakhe kwabo baphulaphuli babenehlombe waza wadlulisela isitya senkongozelo ukuze baqokolele ‘iminikelo yokuzithandela.’” UYesu nabapostile bakhe abazange bafune mali yokuphilisa ngokungummangaliso, yaye abazange benze zinto ngenjongo ngokutsala ingqalelo yabantu.
Ngoko, ngokucacileyo aba baphilisa ngokholo namhlanje abenzi oko kwakusenziwa nguYesu. Yaye akubonakali ngathi uThixo uyakholiswa koko bakwenzayo. Noko ke, ngaba kukho ukuphilisa ngokungummangaliso akholiswayo kuko namhlanje? Okanye ngaba kukho ndlela ithile ukholo lwethu olunokusinceda ngayo xa thina okanye abathandekayo bethu befikelwa kukugula?