Indlela Ukholo Olunokubanceda Ngayo Abagulayo

IINGXELO eziseBhayibhile zokuphilisa ngokungummangaliso ziyasiqinisekisa ukuba uThixo uyikhathalele impilo-ntle yethu, yaye zibonisa amandla akhe okuphilisa. Ekubeni oku kuphilisa ngokungummangaliso kwazisa uzuko kuThixo kwaza kwazisa uvuyo olungako, kusengqiqweni ukubuza, Ngaba isipho sokuphilisa ngomoya oyingcwele sisasebenza?

Impendulo kulo mbuzo nguhayi—yaye bambi basenokumangaliswa sisizathu soko. Oko kuphilisa ngokungummangaliso kwinkulungwane yokuqala kwayifeza injongo yako. IThe Illustrated Bible Dictionary ngokuchanileyo ithi: “Injongo yemimangaliso yokuphilisa yayiyeyokonqulo, kungekhona eyezonyango.” Ziziphi ezinye zeenjongo zonqulo ezaphunyezwa yiloo mimangaliso?

Phakathi kwezinye izinto, imimangaliso yokuphilisa kaYesu yaphumeza injongo yokumfanisa njengoMesiya. Yaye emva kokufa kwakhe, yanceda ukuqinisekisa ukuba intsikelelo kaYehova yayiphezu kwebandla elitsha lamaKristu. (Mateyu 11:2-6; Hebhere 2:3, 4) Ngaphezu koko, yabonisa ukuba isithembiso sikaThixo sokuphilisa uluntu kwihlabathi elitsha siya kuphunyezwa. Yomeleza ukholo lwethu ekubeni ngokwenene liya kufika ixesha laxa ‘angayi kuthi ummi wakhona, Ndiyafa; abantu abahleliyo khona babuxolewe ubugwenxa babo.’ (Isaya 33:24) Zathi zisakuzalisekiswa ezi njongo ngenkulungwane yokuqala, imimangaliso ayizange ibe yimfuneko kwakhona.

Kuyaphawuleka ukuba abafundi bakaYesu benkulungwane yokuqala nabo babenezigulo ezingazange ziphiliswe ngokungummangaliso. Obu bubungqina obungakumbi bokuba umsebenzi kaYesu wokuphilisa kwanalowo wenziwa ngabapostisle bakhe wawenzelwe ukufundisa iinyaniso ezibalulekileyo, wawungenziwa ngenjongo yezonyango. Xa wayencomela unyango kubulwelwe obufuthi bukaTimoti, uPawulos wancomela ukusetyenziswa kwewayini njengeyeza, ingekuko ukuphilisa ngokholo. UPawulos, owayesenza imimangaliso yokuphilisa, akazange akhululeke ‘kuviko enyameni’ olwaluqhubeka ‘lumntlitha.’—2 Korinte 12:7; 1 Timoti 5:23.

Xa abapostile bafayo, isipho sokuphilisa saphela. UPawulos wabonisa ukuba oku kwakuya kwenzeka. Efanisa ibandla lamaKristu nomntwana, uPawulos wathi: “Oko bendingumntwana, bendithetha ngokomntwana, bendiqonda ngokomntwana, bendicamanga ngokomntwana; ndithe ke ndakuba yindoda, ndazibhangisa izinto zobuntwana.” Ingongoma yalo mzekeliso wakhe yayikukuba izipho zomoya zokwenza imimangaliso zaziyinxalenye yobuntwana bebandla lamaKristu. ‘Yayizizinto zobuntwana.’ Ngenxa yoko, wathi: “[Izipho zemimangaliso] ziya kubhangiswa.”—1 Korinte 13:8-11.

Ngaba Ukholo Lunokusinceda Xa Sigula?

Noko ke, enoba asithembelanga kubantu abaphilisa ngokholo, ngokuqinisekileyo kufanelekile ukuthandaza kuThixo sicele uncedo xa sigula. Yaye ngokuqinisekileyo akukho nto iphosakeleyo ekubeni abanye basithandazele. Kodwa le mithandazo imele ibe sengqiqweni kwaye ivisisane nokuthanda kukaThixo. (1 Yohane 5:14, 15) Akukho ndawo apho iBhayibhile isiyalela ukuba sithandazele ukuphilisa.a Kunoko, sithandazela inkxaso kaYehova enothando ngethuba leemvavanyo ezibangelwa kukugula.

IBhayibhile ibonisa oko kunokuthandazelwa ngabo bathembekileyo xa isithi: “UYehova uya kumxhasa elukhukweni lobulwelwe; ùya kuluguqula ukhuko lwakhe lonke esifeni sakhe.” (INdumiso 41:3) Ukucamngca ngeLizwi likaThixo kuya kubanceda abo bagula ngokweemvakalelo. Umdumisi wabhala: “Isuka inceba yakho, Yehova, indixhase. Ebuninzini beengcinga-ngcinga zam ngaphakathi kwam, iintuthuzelo zakho ziyawuyolisa umphefumlo wam.”—INdumiso 94:18, 19; bona kwanesama-63:6-8.

Ukongezelela, kufuneka silumke kwimicimbi yezempilo, yaye iBhayibhile iyasiluleka ngako oku. Kulunge ngakumbi ukuphila ngokuvisisana nemigaqo yeBhayibhile kunokuzibandakanya ekusebenziseni kakubi iziyobisi, ekutshayeni, ekuseleni ngokugqithiseleyo, okanye ekutyeni ngokugqithisileyo uze xa ugula, ubhenele kwabo baphilisa ngokholo. Ukuthandazela ummangaliso xa ubani efikelwa kukugula akunakulithabathela indawo ikhondo lobulumko lokuphepha ukugula okunokuphepheka, elinjengokutya ukutya okunesondlo ukuba kuyafumaneka okanye ukufuna uncedo olufanelekileyo lwezamayeza xa kunokwenzeka.

ILizwi likaThixo likwasikhuthaza ukuba sihlakulele isimo sengqondo esilungileyo esinokuba yingenelo kwimpilo yethu yokwenyama. Incwadi yeMizekeliso iyaluleka: “Bubomi benyama intliziyo epholileyo; ke lona ikhwele yimpehla emathanjeni.” “Intliziyo evuyileyo iyalungisa, ichachise; umoya odakumbileyo uyawomisa amathambo.” (IMizekeliso 14:30; 17:22) Ukuthandazela ukuba umoya oyingcwele uvelise ukuzola kunye novuyo kuthi kunokuba yingenelo kwimpilo yethu yokwenyama.—Filipi 4:6, 7.

Kuthekani Ngokuphilisa Ngokholo?

Kakade ke, nokuba umntu uphila ubomi obusempilweni ngokwendlela imeko yakhe emvumela ngayo, ukugula kunokumfikela. Umele enze ntoni ngoko? Ngaba kukho into ephosakeleyo ngokuya kubaphilisi ngethemba lokuphiliswa? Ewe, ikho. Abaphilisi banamhlanje kunqabile ukuba baphilise ngesisa. Yaye ukusebenzisa imali sihlawula umphilisi ngoxa loo mali ibinokusetyenziswa kuncedo lwezamayeza kunokukhokelela kwiintlungu nelahleko. Ngaphezu koko, kutheni unikisa ngemali kubantu abavuyelela ukuqhatheka kwabanye?

Bambi basenokuthi: ‘Ngokuqinisekileyo, ukuphilisa kumele ukuba kuxabisekile ngandlel’ ithile kwanokuba linani elincinane labo baya “kubaphilisi” elinyangekayo.’ Kodwa imbambano yeyokuba abaphilisi banako kusini na ukuphilisa ngokusisigxina. IEncyclopædia Britannica ithi: “Ngokwentelekiso luncinane kakhulu uphando olululo oluye lwenziwa ngeenkalo ezininzi ezingaziwayo zokuphilisa.”

Kwanokuba iqaqobana libonakala liphiliswa, obo asibobungqina bokusebenza komoya oyingcwele. KwiNtshumayelo yaseNtabeni, uYesu wathi: “Baninzi abaya kuthi kum ngaloo mini, Nkosi, Nkosi, sasingathe na egameni lakho saprofeta, sathi egameni lakho sakhupha iidemon, sathi egameni lakho senza imisebenzi yamandla emininzi? Ndandule ndibaxelele ndithi, Andizanga ndinazi; mkani kum, nina nenza okuchasene nomthetho.” (Mateyu 7:22, 23) UYesu wakwathi bambi, nangona uThixo engakholiswa ngabo, babeya kutsalela ingqalelo kubo ngemiqondiso: “Kuba kuya kuvela ooKristu ababuxoki, nabaprofeti ababuxoki, benze imiqondiso emikhulu nezimanga, ngokokude bathi, ukuba bekunokwenzeka balahlekise nabanyuliweyo.” (Mateyu 24:24) Ngokuqinisekileyo, abaphilisi banamhlanje banokuqukwa kuloo mazwi, ngezinto abazenzayo, nokufuna kwabo rhoqo imali, noko kubizwa ngokuba kukuphilisa ngokungummangaliso.

Abo banjalo abalandeli emanyathelweni kaYesu. Ngoko balandela bani? Umpostile uPawulos uyasibonisa xa esithi: “NoSathana ngokwakhe uzimilisa okwesithunywa sokukhanya. Akunto inkulu ke ngoko, ukuba abalungiseleli bakhe bazimilise okwabalungiseleli bobulungisa; abasiphelo siya kuba ngokwemisebenzi yabo.” (2 Korinte 11:14, 15) Ukuba abaphilisi abakwenzi oko kuphilisa bathi bayakwenza, bangabakhohlisi, balandela uSathana, “lowo ulilahlekisayo elimiweyo liphela.” (ISityhilelo 12:9) Kodwa kuthekani ukuba, kwiimeko ezimbalwa, bayaphilisa? Ngaba asinakugqiba kwelokuba “imisebenzi yamandla” abayenzayo inento yokwenza namandla kaSathana naweedemon zakhe? Ewe, kumele ukuba kunjalo!

Ixesha Lokuphilisa Ngokwenene

Ukuphilisa ngokungummangaliso kukaYesu kwakusenziwa ngoncedo lomoya oyingcwele kaThixo. Kwabonisa injongo yakhe yokucombulula zonke iingxaki zempilo zoluntu ngelakhe ixesha. UYehova uthembisa ‘ukuphilisa iintlanga.’ (ISityhilelo 22:2) Yaye akayi kwanela nje ngokuphelisa ukugula kodwa uya kuphelisa nokufa. UYohane uchaza ukuba uYesu wezela “ukuze bonke abakholwayo kuye bangatshabalali, koko babe nobomi obungunaphakade.” (Yohane 3:16) Hayi indlela okuya kulunga ngayo oko kuphiliswa! UYesu kwakhona uya kuphilisa njengoko iBhayibhile isixelela ukuba wenjenjalo kodwa ngomlinganiselo omkhulu ngakumbi. Uya kude avuse nabafileyo! (Yohane 5:28, 29) Kuya kwenzeka nini oku?

Kwihlabathi elitsha likaThixo, bonke ubungqina obubonisa ukuba alikude. Elo hlabathi litsha, eliya kuziswa emva kokushenxiswa ngonaphakade kobungendawo bale nkqubo ingendawo yezinto, liya kuba yintsikelelo yokwenene kuluntu oluntliziyo zilungileyo. Iya kuba lihlabathi ekungekho kubandezeleka kulo. “Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili nakukhala, nantlungu; ngokuba izinto zokuqala zigqithile.” (ISityhilelo 21:4) Hayi indlela oku okwahluke ngayo kuko konke okusingqongileyo esikubonayo namhlanje!

Ngoko ke, kwiimeko zokugula, thandaza ucele inkxaso kuThixo. Yaye enoba uyagula okanye uphilile, funda ukuba ubomi obungunaphakade obungenakugula ngokwenene buya kubakho. Yakhela ukholo lwakho kweli themba liqinisekileyo likaThixo ngokufunda iindawo ezininzi ezibhekisela kulo eBhayibhileni. Funda indlela injongo kaThixo ngalo mbandela ekufuphi ngayo ekuzalisekeni ngokobalo-maxesha lwakhe. Musa ukuthandabuza, kuba iLizwi likaThixo liyasiqinisekisa: “Iya kuginya ukufa kuphele, izisule iNkosi uYehova iinyembezi ebusweni bonke.”—Isaya 25:8.

[Umbhalo osemazantsi]

[Umfanekiso okwiphepha 7]

Ukuphilisa kukaYesu ngokungummangaliso kwayifeza injongo yako

[Umfanekiso okwiphepha 8]

UYesu uya kuyiphinda yaye ayithi chatha imimangaliso yokuphilisa