Funda Ukuthobela Ngokwamkela Uqeqesho

YIBA nombono umi phezu kweliwa eliphakamileyo elisentabeni unemvakalelo yokuba usencotsheni yehlabathi ngokoqobo. Enjani yona ukuvuyisa imvakalelo yokuba nenkululeko!

Kanti inkululeko yakho isikelwe umda ngokwenene. Umthetho womxhuzulane uyisikele umda ngokuqatha nayiphi na intshukumo yakho; impazamo nje enye isenokuphumela kwintlekele. Kwelinye icala, hayi indlela ekuvuyisa ngayo ukwazi ukuba kwaloo mthetho ukwamnye womxhuzulane uyakukhusela ukuba ungalengalengi emoyeni ngokungenakuzinceda. Ngoko ngokucacileyo lo mthetho ngowokulungelwa kwakho. Ukwamkela imiqathango oyibekela intshukumo yakho phezulu phayaa entabeni kuyingenelo, kukwasindisa ubomi.

Ewe, maxa wambi imithetho nokuyithobela kusenokuyisikela umda inkululeko yethu, kodwa ngaba oku kukwenza ukuthobela kungabi yomfuneko?

Indlela UThixo Akujonga Ngayo Ukuthobela

“NjengoMdali Ozukileyo,” uYehova “ungumthombo wobomi.” Ngenxa yesi sizathu zonke izidalwa zakhe zifanele zimthobele. Ebonakalisa isimo sengqondo esifanelekileyo, umdumisi wabhala: “Masiqubude, siguqe, sithobe phambi koYehova umenzi wethu. Ngokuba nguThixo wethu yena, thina ke singabantu bokwaluswa nguye, nezimvu zesandla sakhe.”—INtshumayeli 12:1, NW; INdumiso 36:9, NW; Nd 95:6, 7.

Ukususela ekuqalekeni uYehova ebefuna ukuthotyelwa zizidalwa zakhe. Ukuhlala kuka-Adam noEva eParadisi kwakuxhomekeke ekuthobeleni. (Genesis 2:16, 17) Ngokufanayo ukuthobela kwakulindelwe nakwizithunywa zezulu, nakubeni zikwimo ephakamileyo yobomi kuneyabantu. Ngenxa yokuba zimbi zezi zidalwa zomoya ‘zazingeva [‘zazingathobeli,’ NW] xenikweni ukuzeka kade umsindo kukaThixo kwakulindile ngemihla kaNowa,’ zohlwaywa ngokunikelwa “emixokelelwaneni yesithokothoko zigcinelwe umgwebo.”—1 Petros 3:19, 20; 2 Petros 2:4.

Kucace mhlophe ukuba, uThixo ukujonga ukuthobela njengento eyimfuneko ukuze kuzuzwe inkoliseko yakhe. Siyafunda: “UYehova unonelele amadini anyukayo nemibingelelo, kangangokuba enonelele ukuphulaphulwa [“ukuthotyelwa,” NW] kwelizwi likaYehova, yini na? Yabona, ukuphulaphula [“ukuthobela,” NW] kulungile ngaphezu kombingelelo nokubaza iindlebe kulunge ngaphezu kwamanqatha eenkunzi zeegusha.”—1 Samuweli 15:22.

Isizathu Nendlela Okumelwe Kufundwe Ngayo

Ukuthobela kukhokelela kukuma okulungileyo noThixo, ngoko hayi indlela ekubaluleke ngayo ukuba sikufunde! Njengokufunda ulwimi lwasemzini, umkhwa wokuthobela unokufundwa xa sisebancinane. Kungenxa yoko iBhayibhile igxininisa ukuqeqeshwa kwabantwana besebancinane.—Yoshuwa 8:35.

Bambi abantu banamhlanje bayayiphikisa imbono yeBhayibhile, besithi ukufuna ukuba abantwana bathobele kuyafana nokubadlwengula ngokwasengqondweni. Bame ngelokuba abantwana bafanele bavunyelwe ukuba bazivelisele iimbono zabo zobuqu nemilinganiselo abamele baphile ngayo ngaphandle kokungenelela komntu omkhulu.

Kodwa kwiminyaka yee-1960 xa abazali abaninzi babenale mbono, uWilhelm Hansen, ongumhlohli, umhleli nongunjingalwazi kwizifundo zengqondo, wakuphikisa oku. Wabhala: “Kumntwana osemncinane, ngexesha laxa exhomekeke ngokupheleleyo kulwalamano nabazali bakhe, ‘okubi’ yeyona nto abazali bakhe bangayifuniyo yaye ‘okulungileyo’ kokona bakuncomelayo okanye bakudumisayo. Ngoko ke, ukuthobela kukodwa kumkhokelela umntwana kwindlela yokuziphatha kakuhle nakwiimpawu eziyintloko zokulunga ekuthi ngobukho bazo ukwalamana kwakhe nemilinganiselo yokuziphatha kuxhomekeke kuko.”—Thelekisa IMizekeliso 22:15.

ILizwi likaThixo ligxininisa imfuneko yokufunda ukuthobela. Sifunda oku: “Ndiyazi, NKOSI, ukuba umntu akazikhetheli iindlela zakhe; nokuba umntu asikokwakhe ukugqiba ngekhondo lakhe lobomi.” (Yeremiya 10:23, The New English Bible) Imbali izaliswe yimizekelo yabantu abaye bazicebela ikhondo lobomi ngokuvisisana nemilinganiselo yabo yobuqu nabaye bangena kwiingxaki ezinzulu ngenxa yokwenjenjalo. Kutheni oku kusenzeka ngokufuthi? Kungenxa yokuba abantu abanalo ulwazi, ubulumko nokuqonda bokuceba ikhondo labo lobomi ngaphandle koncedo. Okubi ngaphezu koku, baye bazuza ilifa utyekelo lokwenza izigqibo eziphosakeleyo. Kanye emva koMkhukula, uYehova wathetha oku ngomntu: “Ukuyila kwentliziyo yomntu kubi kwasebutsheni bakhe.”—Genesis 8:21.

Ngenxa yoko, akukho nokuba abemnye owazuz’ ilifa utyekelo lokuthobela uYehova. Sifanele sikuhlakulele oku kubantwana bethu size siqhubeke sifunda ngako ukutyhubela ubomi bethu. Ngamnye wethu ufanele ahlakulele imeko yentliziyo kaKumkani uDavide, owabhala oku: “Ndazise iindlela zakho, Yehova, ndifundise umendo wakho. Ndinyathelise enyanisweni yakho, undifundise; ngokuba unguThixo ongumsindisi wam; ndithembe wena yonke imihla.”—INdumiso 25:4, 5.

Fundisa Ukuthobela Ngokuba Ngothobelayo

Unina kaYesu noyise ongumondli babezazi kakuhle iimeko ezazingqonge ukuzalwa kukaYesu. Ngoko ke babeqonda ukuba wayeza kuba nendima ebalulekileyo ekuzalisekiseni iinjongo zikaYehova. (Thelekisa uLuka 1:35, 46, 47.) Kwimeko yabo amazwi athi “Uyabona, ilifa likaYehova ngoonyana” ayenentsingiselo emangalisayo. (INdumiso 127:3) Babeyiqonda ngokuzeleyo imbopheleleko yabo ekhethekileyo yaye ngaloo ndlela bashukunyiselwa ukuba bathobele ulwalathiso lukaThixo, njengaxa baxelelwa ukuba basabele eYiputa okanye kamva baye eGalili.—Mateyu 2:1-23.

Abazali bakaYesu bakwaqonda nembopheleleko yabo ephathalele uqeqesho. Kuyinyaniso ukuba, ebudeni bexesha langaphambi kobukho bakhe njengomntu, uYesu wayesoloko ethobela. Kodwa ngoxa wayesemhlabeni, wafunda ukuthobela phantsi kweemeko ezintsha ngokupheleleyo. Phakathi kwezinye izinto, wayemele athobele abazali abangafezekanga ngenxa yokuba kwanomntwana ofezekileyo uyalufuna uqeqesho oluluhlobo lomyalelo nemfundiso. Abazali bakhe balunikela olu qeqesho. Kwelinye icala, uqeqesho oluluhlobo lwesohlwayo, lwalungeyomfuneko kuye. UYesu wayesoloko ethobela; akuzange kube yimfuneko ukuba axelelwe into enye kabini. Siyafunda: “Ngoko wabuyela ekhaya eNazarete kunye nabo [abazali bakhe] yaye wayebathobela.”—Luka 2:51, Phillips.

UYosefu noMariya babeyazi kwanendlela yokufundisa uYesu ngomzekelo wabo. Ngokomzekelo, sifunda ukuba “baye ke abazali bakhe behambela eYerusalem, iminyaka ngeminyaka, emthendelekweni wepasika.” (Luka 2:41) Ngokulungiselela ukuhamba nentsapho yakhe, uYosefu wayebonakalisa ukuba wayenomdla kwimpilo-ntle yayo yokomoya yaye wayeluthabatha nzulu unqulo lukaYehova. Ngeendlela ezifanayo, namhlanje abazali ngokuthobela kwabo imibandela yonqulo banokufundisa ukuthobela kubantwana babo.

Kwimeko kaYosefu noMariya ngenxa yoqeqesho lwabo lobulungisa, “waye uYesu ehambela phambili ebulumkweni nasebukhulwini, nasekuthandweni nguThixo nangabantu.” Onjani wona ukuba mhle umzekelo omele ulandelwe ngabazali abangamaKristu namhlanje!—Luka 2:52.

“Ukuthobela . . . Kwinto Yonke”

“Nina bantwana, balulameleni [“bathobeleni,” NW] abazali benu ezintweni zonke; kuba oko kukhokekile kuyo iNkosi.” (Kolose 3:20) UYesu wayenokubathobela abazali bakhe kwinto yonke ngenxa yokuba ukuthobela kwabo uYehova kwakubathintela ekufuneni kuYesu—okanye kubantakwabo noodade wabo ngonina—nayiphi na into echasene nokuthanda kukaYehova.

Abazali abaninzi namhlanje bakwafundisa ngokunempumelelo abantwana babo ukuthobela kwinto yonke. Khawuphulaphule koobawo abathathu ngoku, ekubeni begqibile ukukhulisa abantwana babo, abakhonza kwisebe leWatch Tower Society.

UTheo ubalisa ngendlela yena nomfazi wakhe ababakhulisa ngayo oonyana babo abahlanu. Uthi: “Kubalulekile ukwazisa abantwana kwasekuqaleni ukuba nathi bantu bakhulu siyazenza iimpazamo. Okubuhlungu kukuba, side siziphinde yaye ngokuzingiseleyo kufuneke sicele uBawo wethu osemazulwini ukuba asixolele yaye asincede. Sasibavumela ngabom abantwana bethu babone ukuba njengokuba babezamazamana namaxhala obutsha, sasizamazamana namaxhala obuntu obukhulu.”

Ukuba umntwana uza kufundiswa ukuthobela, ulwalamano olunothando phakathi kwakhe nabazali bakhe lubalulekile. UHermann uthi ngomfazi wakhe: “Wayengengonina woonyana bakhe nje kuphela kodwa wayekwangumhlobo wabo. Oku babekuxabisa kakhulu, ngoko kwakungekho nzima ngabo ukuba bathobele.” Ngoko esalek’ umsundulo ngokunikela icebiso eliluncedo ngendlela yokuphucula ulwalamano lomzali nomntwana, uthi: “Kangangeminyaka emininzi sahlala ngabom singenawo umatshini wokuhlamba izitya, ukuze izitya zihlanjwe zize zosulwe ngesandla. Oonyana bethu babenesabelo sokosula, bebolekisana ngoko. Elo yayilelona xesha lilunge gqitha ongalifumana lonxibelelwano olungacwangciswanga.”

Ulwalamano olunothando lomzali nomntwana lume njengomzekelo wolwalamano umKristu amele abe nalo noYehova. URudolf uchaza amahlandinyuka abawenzayo yena nomfazi wakhe ukunceda oonyana babo ababini ukuba bavelise olo lwalamano: “Isiseko sethu yayisisifundo esithe rhoqo sentsapho. Sasibabela abantwana bethu iqela lemixholo efanelekileyo yokwenza uphando. Sasisenza kwanofundo lweBhayibhile kunye size ke sixubushe ngaloo mbandela. Oonyana bethu babenokubona ukuba uYehova ulindele intobelo kubazali, kungekuphela nje kubantwana.”

Abazali abangamaKristu bayayiqonda ukuba indinyana ephefumlelweyo ethi “Ziyindlela yobomi izohlwayo eziqeqeshayo” isebenza kubo nakubantwana babo. Ngoko ngoxa abantwana benembopheleleko yokuthobela abazali babo kwinto yonke, abazali bakwamele bathobele uYehova kwinto yonke ayifunayo kubo. Ngaphezu nje kokomeleza ulwalamano lomzali nabantwana, abazali nabantwana kufuneka bomeleze ulwalamano lwabo noThixo.—IMizekeliso 6:23.

Kujonge Kakuhle Ukuthobela

Hayi indlela esimele sibe nombulelo ngayo kuba iLizwi likaThixo linikela isiluleko esisengqiqweni ngolu hlobo esingokukhulisa abantwana! (Bona ibhokisi.) Abantwana abafunda ukuthobela kubazali babo ababaqeqeshela ebulungiseni bangumthombo wokwenene wovuyo kubo bonke ubuzalwana bobuKristu.

Ekubeni ukuthobela uThixo kuthetha ubomi, sifanele sikuphephe kwaukucinga ngembono yokunqumamisa imiqathango imithetho kaThixo eyibekela inkululeko yethu yobuqu—kwanangokwexeshana. Ngokomzekelo, khawucinge nje ukuba ngokufutshane besinokunqumamisa umthetho womxhuzulane. Hayi indlela ebeluya kusichulumancisa ngayo uvuyo lokuntinga sisuka encotsheni yentaba sinyukela esibhakabhakeni kungekho nto ithintela inkululeko yethu! Kodwa yintoni ebiya kwenzeka xa izinto zibuyela kwimeko yesiqhelo? Khawucinge ngokuwa obekuya kusilindela!

Ukufunda ukuthobela ngokwamkela uqeqesho kunegalelo ekukhuliseni ubuntu obulungeleleneyo yaye kusinceda sikwazi ukusikelwa kwethu umda. Kuyasinceda sikuphephe ukuba ngabawafunayo nabangenavelwano ngamalungelo neemfuno zabanye. Kusinceda siphephe usukuzwano lokungaqiniseki. Ngamafutshane, kuphumela kulonwabo.

Ngoko enoba ungumntu omkhulu okanye ungumntwana, funda ukuthobela ngokwamkela uqeqesho ukuze “kulunge kuwe” nokuze “ube nexesha elide emhlabeni.” (Efese 6:1-3) Ngubani ofuna ukubeka engozini ithemba lakhe lokuphila ngonaphakade ngokusilela ukufunda ukuthobela ngokungalwamkeli uqeqesho?—Yohane 11:26.

[Ibhokisi ekwiphepha 29]

BAZALI, FUNDISANI UKUTHOBELA NGOKUQEQESHA NGOKUSEBULUNGISENI

1. Qeqeshani ngokusekelwe kwimithetho nakwimigaqo yeZibhalo.

2. Qeqeshani kungekuphela nje ngokufuna ukuthobela kodwa ngokuchaza isizathu sokuba ukuthobela kulikhondo lobulumko.—Mateyu 11:19b.

3. Musani ukuqeqesha ngomsindo nangokukhwaza.—Efese 4:31, 32.

4. Qeqeshani ninolwalamano olufudumeleyo lothando nolunenkathalo.—Kolose 3:21; 1 Tesalonika 2:7, 8; Hebhere 12:5-8.

5. Baqeqesheni abantwana besebancinane.—2 Timoti 3:14, 15.

6. Qeqeshani ngokuphindaphindiweyo nangendlela enye.—Duteronomi 6:6-9; 1 Tesalonika 2:11, 12.

7. Ziqeqesheni nina kuqala nize ngaloo ndlela nibafundise ngomzekelo.—Yohane 13:15; thelekisa uMateyu 23:2, 3.

8. Qeqeshani nikholose ngokupheleleyo ngoYehova, nicele uncedo lwakhe ngomthandazo.—ABagwebi 13:8-10.

[Umfanekiso okwiphepha 28]

“Ziyindlela yobomi izohlwayo eziqeqeshayo”